November 2022

ಪೆರಿಯ ಸಾಹಿತಿ, ಶಿಕ್ಷಕಿ, ಗಾಯಕಿ, ಬಹುಮುಖಿ ಸಾಧಕಿ ಗಾಯತ್ರಿ ಉಡುಪ ನನ ನೆಂಪು ಮಾತ್ರ

ಪೆರಿಯ ಸಾಹಿತಿ, ಶಿಕ್ಷಕಿ, ಕನ್ನಡ ಸಾಹಿತ್ಯ ಪರಿಷತ್ ಮುಲ್ಕಿ ತಾಲೂಕ್ ಘಟಕದ ಸುರೂತ್ತ ಅಧ್ಯಕ್ಷೆರ್, ಬಹುಮುಖ ಸಾಧಕಿ ಗಾಯತ್ರಿ ಎಸ್. ಉಡುಪ (62) ನನ ನಮಕ್ಕ್ ನೆಂಪು ಮಾತ್ರ.

ಮೇರ್ ಹುಷಾರ್ ಇಜ್ಜಂದೆ (ನ.22) ಅಂಗಾರೆ ಡೆಲ್ಲಿದ ಸಹೋದರನ ಇಲ್ಲಲ್ ತೀರ್ ಪೋಯೆರ್.
ಮೇರ್ ಒಡಿಪು ಜಿಲ್ಲೆ ಕಾರ್ಲದ ಬಿ.ಶಿವರಾಮ ವಾರಂಬಳ್ಳಿ-ಬಿ. ಕಮಲಾಕ್ಷಿ ವಾರಂಬಳ್ಳಿ ದಂಪತಿಲೆನ ಮಗಲ್. ಎಂ.ಎ ಬಿ.ಎಡ್ (ಕನ್ನಡ) ಪದವೀಧರೆರ್. ಆಕಾಶವಾಣಿಡ್ 10 ವರ್ಷ ಭಾವಗೀತೆ, ಭಕ್ತಿಗೀತೆಲೆನ ಬಿಗ್ರೇಡ್ ಕಲಾವಿದೆ. ಮೆರೆನ ಕಂಡನಿ ಸಚ್ಚಿದಾನಂದ ಉಡುಪ ಅನಂತ ಪ್ರಕಾಶ ಸಂಸ್ಥೆದ ಮುಖ್ಯಸ್ಥೆರ್. ಮೆರೆನ ಗಾಯತ್ರಿ ಪ್ರಕಾಶನೊಡು 76 ಬೂಕುಲು ಪ್ರಕಟ ಆತ್ಂಡ್. ಅಯಿಟ್ಟ್ ಮೇರ್ ಬರೆತಿನ 6 ಕೃತಿಕ್ಕುಲು ಪ್ರಕಟ ಆತ್ಂಡ್. ಸದ್ಯಡ್ ನನೊಂಜಿ ಕಥಾ ಸಂಕಲನ ಬರಿಯೆರೆ ಉಂಡು. ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಮೂಜಿ ಮಹಿಳಾ ಯಕ್ಷಗಾನ ಸಂಘಟನೆಲೆಡ್, ನಾಟಕಲೆಡ್, ಹವ್ಯಾಸಿ ಪಾತ್ರಧಾರಿ ಆದಿತ್ತೆರ್. ಮೆರೆಗ್ ಕಂಡನಿ ಕಿನ್ನಿಗೋಳಿದ ಅನಂತ ಪ್ರಕಾಶನದ ಪ್ರಧಾನ ಸಂಪಾದಕೆರ್ ಸಚ್ಚಿದಾನಂದ ಉಡುಪ ಅಂಚೆನೆ ಪತ್ರಕರ್ತೆರ್ ಮಿಥುನ್ ಉಡುಪ ಸೇರ್ದ್ ಮೂಜಿ ಜನ ಜೋಕುಲು ಉಲ್ಲೆರ್.

ದುಬೈಡ್ ಗೌಜಿಡ್ ನಡತ್ಂಡ್ ಗಡಿನಾಡ ಉಚ್ಚಯ: ಮೂಜಿ ಜನ ಸಾಧಕೆರೆಗ್ ಗಡಿನಾಡ ರತ್ನ ಪ್ರಶಸ್ತಿ ಪ್ರದಾನ

ಯುಎಇ: ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ)ಯು.ಎ.ಇ ಘಟಕ ದುಬೈ ನೆತ್ತ ವತಿರ್ದ್ ನಡತಿನ ಗಡಿನಾಡ ಉಚ್ಚಯ ಬೊಕ್ಕ ಗಡಿನಾಡ ರತ್ನ ಪ್ರಶಸ್ತಿ ಪ್ರದಾನ ಲೇಸ್ ನಡತ್ಂಡ್.

ಈ ಲೇಸ್ ಡ್ ಮಂಜೇಶ್ವರದ ಜನಪ್ರಿಯ ಶಾಸಕೆರ್ ಎಕೆಎಂ ಆಶ್ರಫ್ ಮೇರ್ ಪಾತೆರಿನ ಅಚ್ಚಗನ್ನಡದ ಪಾತೆರಲು ಅರಬ್ ರಾಷ್ಟ್ರದ ಅನಿವಾಸಿ ಕನ್ನಡಿಗೆರೆನ್ ಮಂತ್ರ ಮುಗ್ಧ ಮಲ್ದ್ಂಡ್. ಪೇಂಟೆದ ಬ್ಯುಸಿನೆಸ್‌ ಮೆಟ್ರೋ ಸ್ಟೇಷನ್ ಕೈತಲ್ ಇಪ್ಪುನ ಜೆ.ಎಸ್.ಎಸ್‌. ಶಾಲೆದ ಜಾವಡಿಡ್ ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ದೊಟ್ಟಿಗೆ ಗಡಿನಾಡ ಉಚ್ಚಯ ನಡತ್ಂಡ್. ಕೇರಳ- ಕರ್ನಾಟಕ ಗಡಿಭಾಗ ಆಯಿನ ಮಂಜೇಶ್ವರಡ್ ಧಾರ್ಮಿಕ, ಸಾಂಸ್ಕೃತಿಕ ಸಾಹಿತ್ಯ ಬೊಕ್ಕ ಸಾಮಾಜಿಕದ ಮುಖೇನ ಮತೀಯ ಸೌಹಾರ್ದತೆ ಬುಲೆಪಾವೊಂದು ಇಡೀ ದೇಶಗ್ ಮಾದರಿಯಾಯಿನ ಗಡಿನಾಡ ಸಂಸ್ಕೃತಿನ್ ಸಮಗ್ರವಾದ್ ವಿಶ್ಲೇಷಣೆ ಮಲ್ತ್ ದ್ ಮನಸ್ ಗ್ ಅರ್ಥ ಆಪಿನ ರೀತಿಡ್ ಅಚ್ಚಗನ್ನಡಡ್ ಮಂಡನೆ ಮಲ್ತಿನ ವಿಚಾರಧಾರೆಲೆನ್ ಅಲ್ಪ ಇತ್ತಿನ ಸಾರ ಸಾರ ಜನ ತೆರಿಯೊನಿಯೆರ್. ಸಾಂಸ್ಕೃತಿಕ ಲೇಸ್ ದ ಉದಿಪನನ್ ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷೆರಾಯಿನ ಸರ್ವೋತ್ತಮ ಶೆಟ್ಟಿ ಮೇರ್ ಗಡಿನಾಡ ಸಂಸ್ಕೃತಿಡ್ ಒಂಜಾಯಿನ ದಫ್ ಬೊಟ್ಟುನ ಮುಖೇನ ಮಲ್ತೆರ್. ಉದಿಪನ ಲೇಸ್ ದ ಅಧ್ಯಕ್ಷತೆನ್ ಗಡಿನಾಡ ಉಚ್ಚಯದ ಯು.ಎ.ಇ.ಯ ಅಧ್ಯಕ್ಷೆರಾಯಿನ ಅಮರದೀಪ್ ಕಲ್ಲೂರಾಯ ಒಯಿಸ್ ದಿತ್ತೆರ್.

ಆಕ್ಮೇ ಸಂಸ್ಥೆ ದುಬೈದ ಪ್ರಬಂಧಕಾರೆರಾಯಿನ ರಿತೇಶ್ ಕುಂಬಳೆ, ಗಾಯಕೆರ್ ನವೀದ್ ಮಾಗುಂಡಿ, ರಾಜ್ ಕುಮಾರ್, ಗಡಿನಾಡ ಉಚ್ಚಯ ಸಮಿತಿದ ಅಧ್ಯಕ್ಷೆರಾಯಿನ ನ್ಯಾಯವಾದಿ ಇಬ್ರಾಹಿಂ ಕಲೀಲ್ ಇತ್ತೆರ್. ಸಂಚಾಲಕೆರಾಯಿನ ಸಾದನ್ ದಾಸ್ ಎದ್ಕೊನಿಯೆರ್. ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ಕ್ಲಾಸಿಕಲ್ ರಿದಮ್ ಡ್ಯಾನ್ಸ್ ಕೂಟರ್ದ್ ಎದ್ಕೊನುನ ಡ್ಯಾನ್ಸ್, ರಮಣ ಲಾಸ್ಯ ಕೂಟರ್ದ್, ಮೇಘನ ಬೆಂಗ್ಲೂರ್, ರೇಖ ಶಿವರಾಮ ಕೂಟರ್ದ್ ಬೊಕ್ಕ ಸ್ಮೈಲ್ ಕ್ರಿಯೇಷನ್ ಕೂಟರ್ದ್ ಡ್ಯಾನ್ಸ್, ಕೊಲ್ಕಲಿ, ಮಾಪಿಲಪ್ಪಾಟ್, ದಫ್, ಗಿರೀಶ್ ನಾರಾಯಣ ಕೂಟರ್ದ್ ಪಿಲಿ ಏಸ ಬೊಕ್ಕ ಹರೀಶ್ ಶೇರಿಗಾರ್, ನವೀದ್ ಮಾಗುಂಡಿ, ಭವ್ಯ ಕುಂಬಳೆ, ಡಾ.ಸಂತೋಷ್, ರಾಮಚಂದ್ರ ಬೆದ್ರಡ್ಕ ಕೂಟರ್ದ್ ಸಂಗೀತ ರಸಮಂಜರಿ ನಡತ್ಂಡ್. ಆರತಿ ಅಡಿಗ ಬೊಕ್ಕ ವಿಘ್ನೇಶ್ ಕುಂದಾಪುರ ಲೇಸ್ ದ ನಿರೂಪಣೆ ಮಲ್ತೆರ್. ಅಂಚನೆ ಸಮಾರೋಪ ಸಮಾರಂಭ ಬೊಕ್ಕ ಗಡಿನಾಡ ರತ್ನ ಪ್ರಶಸ್ತಿ ಪ್ರಧಾನ ಲೇಸ್ ದ ಅಧ್ಯಕ್ಷತೆನ್ ಕರ್ನಾಟಕ ಸರಕಾರದ ಗಡಿನಾಡ ಅಭಿವೃದ್ಧಿ ಅಥೋರಿಟಿದ ಅಧ್ಯಕ್ಷೆರ್ ಡಾ.ಸಿ.ಸೋಮಶೇಖರ ಐ.ಎ.ಎಸ್ ಒಯಿಸೊಂದು ಲೇಸ್ ದ ಬಗೆಟ್ ಪಾತೆರಿಯೆರ್. ಮಲ್ಲ ಬಿನ್ನೆರಾಯಿನ ಕರ್ನಾಟಕ ವಿಧಾನ ಪರಿಷತ್ ದ ಅಧ್ಯಕ್ಷೆರ್ ರಘುನಾಥ ರಾವ್ ಮಲ್ಕಾಪುರೆ, ಕರ್ನಾಟಕ ವಿಧಾನ ಪರಿಷತ್ತ್ ದ ವಿರೋಧ ಪಕ್ಷದ ಮುಖ್ಯ ಸಚೇತಕೆರ್ ಪ್ರಕಾಶ್ ರಾಥೋಡ್, ಮಂಜೇಶ್ವರದ ಪುಗರ್ತೆದ ಶಾಸಕೆರ್ ಎ.ಕೆ.ಎಂ.ಅಶ್ರಫ್, ಉದುಮ ಶಾಸಕೆರ್ ಸಿ.ಎಚ್.ಕುಂಞಿಂಬು, ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಶಾರ್ಜಾ ಕರ್ನಾಟಕ ಸಂಘದ ಮಾಜಿ ಅಧ್ಯಕ್ಷೆರ್ ಸುಗಂದರಾಜ್ ಬೇಕಲ್, ವೆಂಕಟೇಶ್ ತುಪ್ಪಿಲ್, ತೆಕ್ಕಾರ ಫರಾಝ್ ತಾಜ್ ದುಬೈ, ದುಬೈ ಫ್ರೈಮ್ ಆಸ್ಪತ್ರೆದ ಡಾ.ಜಲೀಲ್ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್. ಕರ್ನಾಟಕ ಸರ್ಕಾರದ ಮಾಜಿ ಮಂತ್ರಿಲು ಜೆ.ಕೃಷ್ಣ ಪಾಲೆಮಾರ್, ಆಕ್ಮೇ ಗ್ರೂಪ್‌ದ ಸಂಸ್ಥೆದ ಅಧ್ಯಕ್ಷೆರ್ ಸಮಾಜ ಸೇವಕೆರ್ ಹರೀಶ್ ಶೇರಿಗಾರ್ ಬೊಕ್ಕ ಝಯೀದ್ ಫೌಂಡೇಶನ್ ದ ಫೈನಾನ್ಸ್ ಕಂಟ್ರೋಲರಾಯಿನ ಗಡಿನಾಡ ಸಮಾಜ ಸೇವಕೆರ್ ಅಬ್ದುಲ್ಲಾ ಮದುಮೂಲೆ ಮೆರೆಗ್ ಗಡಿನಾಡ ರತ್ನ ಪ್ರಶಸ್ತಿ ಕೊರ್ದು, ಗಣ್ಯೆರೆನ ಸಮ್ಮುಖಡ್ ಗೌರವ ಕೊರಿಯೆರ್.

ಈ ಪೊರ್ತುಡು ಬಿನ್ನೆರಾದ್ ಅಬ್ದುಲ್ ರಝಕ್, ಗಡಿನಾಡ ಅಭಿವೃದ್ಧಿ ಸಮಿತಿ ಕರ್ನಾಟಕ ಸರಕಾರದ ಪ್ರಕಾಶ್ ಮಾತಹಳ್ಳಿ, ಕೆ.ಎಮ್.ಸಿ.ಸಿ.ದ ಕಾರ್ಯದರ್ಶಿ ನಿಸಾರ್ ತಳಂಗರೆ, ಕರ್ನಾಟಕ ಇತಿಹಾಸ ಅಕಾಡೆಮಿ ಕೇರಳ ಅಧ್ಯಕ್ಷೆರ್ ಪ್ರಭಾಕರ ಕಲ್ಲೂರಾಯ, ಕನ್ನಡ ಭವನ ಕಾಸ್ರೋಡುದ ಸಂಧ್ಯಾ ರಾಣಿ ಟೀಚರ್, ಗಡಿನಾಡ ಕನ್ನಡ ಪರ ಹೋರಾಟಗಾರೆ ಎ.ಕೆ .ಸುಬ್ಬಯ್ಯಕಟ್ಟೆ, ಸಾಹಿತಿ ಥೋಮಸ್ ಡಿ.ಸೋಜಾ, ಪ್ರವೀಣ್ ಕುಮಾರ್ ಕೊಡಿಯಾಲ್ ಬೈಲ್, ಉದ್ಯಮಿ ಆಯಿನ ಸಲಾಂ ಅಟ್ಟೆಗೋಳಿ, ಸಿದ್ದಿಕ್ ಅರೋಸ್ ಅಜ್ಮಾನ್, ಅಬ್ದುಲ್ ಸಲಾಂ ಚೇವರ್, ಅಬ್ದುಲ್ ರಸೀದ್, ಗಡಿನಾಡ ಸಾ.ಸ.ಅ.ಯ ಅಧ್ಯಕ್ಷೆರ್ ಎನ್.ಚನಿಯಪ್ಪ ನಾಯ್ಕ, ಕಾರ್ಯದರ್ಶಿ ಅಖಿಲೇಶ್ ನಗುಮುಗಂ, ಕೋಶಾಧಿಕಾರಿ ಝಡ್ ಕಯ್ಯಾರ್ ಇತ್ತೆರ್. ಯು.ಎ.ಇ ಬೊಕ್ಕ ಭಾರತದ ರಾಷ್ಟ್ರಗೀತೆ ಪನ್ಪುನ ಮುಖೇನ ಲೇಸ್ ಸುರು ಆಂಡ್. ‌ಸಾದನ್ ದಾಸ್ ಪ್ರಾಸ್ತಾವಿಕ ಪಾತೆರಿಯೆರ್. ನ್ಯಾಯವಾದಿ ಇಬ್ರಾಹಿಂ ಕಲೀಲ್ ಎದ್ಕೊನಿಯೆರ್. ಪತ್ರಕರ್ತೆರ್ ರವಿ ನಾಯ್ಕಾಪು ಲೇಸ್ ದ ನಿರೂಪಣೆ ಮಲ್ತೆರ್. ಇಬ್ರಾಹಿಂ ಬಜೋರಿ ಸೊಲ್ಮೆ ಸಂದಾಯೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)

ಡಿ.16: ಕೆದಿಲ ಶ್ರೀ ಉಳ್ಳಾಕ್ಲು ಧೂಮಾವತಿ ಮಲರಾಯ ದೈವೊಲ್ಯಡ್ ಚಂಡಿಕಾ ಯಾಗ

ಪುತ್ತೂರ್: ಕೆದಿಲ ಶ್ರೀ ಉಳ್ಳಾಕ್ಲು ಧೂಮಾವತಿ ಮಲರಾಯ ದೈವೊಲ್ಯಡ್ ಡಿ.16 ಶುಕ್ರಾರದಾನಿ ಶ್ರೀ ಕೆಮ್ಮಿಂಜೆ ನಾಗೇಶ ತಂತ್ರಿಲೆನ ನೇತೃತ್ವಡ್ ಚಂಡಿಯಾಗ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಹೆಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ದೇವೋಲ್ಯದ ಅಧ್ಯಕ್ಷೆರ್, ಪದಾಧಿಕಾರಿಲು, ಸರ್ವಸದಸ್ಯೆರ್, ಆಡಳಿತ ಸಮಿತಿ ಬೊಕ್ಕ ಕೆದಿಲ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.14-16:ಮಾರ್ಪಳ್ಳಿ ಶ್ರೀ ಬ್ರಹ್ಮ ಬೈದರ್ಕಳ ಗರೋಡಿಡ್ ಕಾಲಾಧಿದ ನೇಮ ಉಚ್ಚಯ

ಬೈಲೂರು ಮಾರ್ಪಳ್ಳಿ ಶ್ರೀ ಬ್ರಹ್ಮ ಬೈದರ್ಕಳ ಗರೋಡಿಡ್ ಕಾಲಾಧಿದ ನೇಮ ಉಚ್ಚಯ ಡಿ.14 ರ್ದ್ 16 ಮುಟ್ಟ ನಡಪರೆ ಉಂಡು.

ಡಿ.14 ಬುಧಾರದಾನಿ ನವಕ ಪ್ರಧಾನ ಹೋಮ, ಅನ್ನನೈವೇದ್ಯದ ಹಸಿರುವಾಣಿದೊಟ್ಟಿಗೆ ಗರೋಡಿ ಪ್ರವೇಶ, ತುಳಸಿ ಪೂಜೆ ಬೊಕ್ಕ ಅಗೆಲ್ ನೈವೇದ್ಯ ಸೇವೆ ಬೊಕ್ಕ ಪ್ರಸಾದ ಕೊರ್ಪೆರ್. ಡಿ.15 ಗುರುವಾರದಾನಿ ಮಹಾ ಅನ್ನಸಂತರ್ಪಣೆ, ಶ್ರೀ ಬೈದರ್ಕಳ ನೇಮ, ಶ್ರೀ ಬೈದೆರ್ಲೆನ ದರ್ಶನ, ಚಪ್ಪರ ಪ್ರವೇಶ ನಡಪುಂಡು. ಬೊಕ್ಕ ಡಿ.16 ಶುಕ್ರಾರದಾನಿ ಮಾಯಾಂದಾಲೆ ನೇಮ, 5 ಗ್ರಾಮದ ಕೂಡುಕಟ್ಟ್ ಗ್ ಸೇರ್ನ ಪಿಲಿಚಾಮುಂಡಿ ದೈವದ ಕೋಲ ನಡಪರೆ ಉಂಡು ಪಂದ್ ಗರೋಡಿ ಅಭಿವೃದ್ಧಿ ಸಮಿತಿದ ಗುರಿಕಾರೆರ್, ಅರ್ಚಕೆರ್ ಬೊಕ್ಕ ಸಮಸ್ತ ಗ್ರಾಮಸ್ಥೆರ್, ಗೌರವಾಧ್ಯಕ್ಷೆರ್, ಅಧ್ಯಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.2-4: ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯ ಶಿಕ್ಷಣ ಸಂಸ್ಥೆಲೆನ ಮುತಾಲಿಕೆಡ್ ಭ್ರಮರ-ಇಂಚರ ನುಡಿಪರ್ಬ, ತುಳು ಉಚ್ಚಯೊ

ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಸಮೂಹ ಶಿಕ್ಷಣ ಸಂಸ್ಥೆಲೆನ ಮುತಾಲಿಕೆಡ್ ಭ್ರಮರ-ಇಂಚರ ನುಡಿಪರ್ಬ ಡಿ.2 ಶುಕ್ರಾರರ್ದ್ ಡಿ.4 ಐತಾರ ಮುಟ್ಟ ಕಟೀಲ್ ಪದವಿಪೂರ್ವ ಕಾಲೇಜ್ ದ ಶ್ರೀವಿದ್ಯಾ ಸಭಾಭವನಡ್ ನಡಪರೆ ಉಂಡು.

ಈ ಲೇಸ್ ದ ಸಮ್ಮೇಳನಾಧ್ಯಕ್ಷೆರ್ ಡಾ. ಪಾದೇಕಲ್ಲ್ ವಿಷ್ಣು ಭಟ್ರ್ ಆದ್ ಉಲ್ಲೆರ್. ಡಿ.3 ಕ್ಕ್ ತುಳು ಉಚ್ಚಯೋ ಲೇಸ್ ನಡಪುಂಡು. ರಂಗನಟೆ, ನಿರ್ದೇಶೆಕೆರ್ ಡಾ.ದೇವದಾಸ್ ಕಾಪಿಕಾಡ್ ಬೊಕ್ಕ ವಿದ್ವೆಂಸೆರ್ ಡಾ.ಗಣೇಶ ಅಮೀನ್ ಸಂಕಮಾರ್ ಈ ಲೇಸ್ ದ ಉದಿಪನ ಮಲ್ಪುವೆರ್. ಬೊಕ್ಕ ಶ್ರೀ ಕ್ಷೇತ್ರ ಕಟೀಲ್ ದ ಅನುವಂಶಿಕ ಅರ್ಚಕೆರ್ ವೆಂಕಟರಮಣ ಆಸ್ರಣ್ಣ, ಶ್ರೀ ಕಟೀಲ್ ಕ್ಷೇತ್ರದ ಅನುವಂಶಿಕ ಅರ್ಚಕೆರ್ ಕಮಲಾದೇವೀಪ್ರಸಾದ ಅಸ್ರಣ್ಣ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಬಿನ್ನೆರಾದ್ ಡಾ.ಶಶಿಕುಮಾರ್, ಜ್ಯೋತಿ ಶುಭಾನಂದ ರಾವ್, ರಾಘವ ಚೌಟ, ರತ್ನಾಕರ ಶೆಟ್ಟಿ ಎಕ್ಕಾರ್, ನಿಶಾಂತ್ ಶೆಟ್ಟಿ ಕಿಲೆಂಜೂರ್, ಕೇಶವ ಪೂಜಾರಿ ಗುರುಪುರ ಬರಿಯೆರೆ ಉಲ್ಲೆರ್. ಬೊಕ್ಕ ತುಳು ಐಸಿರಿ, ತುಳುನಾಡ್ ಇತಿಹಾಸ, ನೆಕ್ ವಿದ್ವಾಂಸೆರ್ ಪ್ರೊ. ತುಕಾರಾಮ ಪೂಜಾರಿ ಬರ್ಪೆರ್. ಈ ಲೇಸ್ ಗ್ ಬಿನ್ನೆರಾದ್ ಸುಚೇತಾ, ವೀಣಾ ಗಣೇಶ್, ಡಾ.ಲಕ್ಷ್ಮೀ ಆರ್. ಒಡಿಪು, ದಯೇಶ್ ಜಿ.ಪಿ ಬರಿಯೆರೆ ಉಲ್ಲೆರ್. ಬೊಕ್ಕ ತುಳುನಾಡ್ ದ ದೇವಾಲಯ ಸಂಸ್ಕೃತಿ ಲೇಸ್ ಗ್ ವಿದ್ವಾಂಸೆರ್ ಡಾ. ಪುಂಡಿಕಾಯಿ ಗಣಪಯ್ಯ ಭಟ್ರ್ ಬೊಕ್ಕ ಬಿನ್ನೆರಾದ್ ಸಿಎ ಪಾಂಡುರಂಗ ಶೆಟ್ಟಿಗಾರ್, ಸಿಎ ರವಿರಾಜ ಶೆಟ್ಟಿ, ಸಿಎ ಸುನಿಲ್ ಭಂಡಾರಿ ಬರಿಯೆರೆ ಉಲ್ಲೆರ್.

ಬೊಕ್ಕ ತುಳು ಗೊಬ್ಬುಲು ಲೇಸ್ ಗ್ ವಿದ್ವಾಂಸೆರ್ ಡಾ.ಗಣನಾಥ ಎಕ್ಕಾರ್ ಬೊಕ್ಕ ಬಿನ್ನೆರಾದ್ ರಿತೇಶ್ ಜೆ. ಶೆಟ್ಟಿ ಎಕ್ಕಾರ್, ಸಿಎ ಶರತ್ ಶೆಟ್ಟಿ ಬೊಂಬೈ, ಸುಕೇಶ್ ಸಾಲ್ಯಾನ್ ಬರ್ಪೆರ್. ಬೊಕ್ಕ ಕಿರುತೆರೆ, ಸಾಹಿತ್ಯ ಬೊಕ್ಕ ಬದುಕು ಲೇಸ್ ಗ್ ಖ್ಯಾತ ನಿರ್ದೇಶೆಕೆರ್ ಟಿ.ಎನ್ ಸೀತಾರಾಮ್, ಬೊಕ್ಕ ಚಲನಚಿತ್ರ ಕಥೆಗಾರೆ ಶ್ರೀನಿಧಿ ಡಿ.ಎಸ್ ಬರಿಯೆರೆ ಉಲ್ಲೆರ್. ಬೊಕ್ಕ ದಿನೇಶ್ ರಾವ್ ಕುಕ್ಕುಂಡೇಲು, ಸರಸ್ವತಿ ಎಸ್ ಮುಗೇರಾಯ, ರಾಜ್ ದೀಪಕ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್. ಯಕ್ಷಗಾನ ಸಾಹಿತ್ಯ-ಯಕ್ಷಗಾನರ್ದ್ ಬದುಕು ನೆಕ್ ಯಕ್ಷಗಾನ ಕಲಾವಿದೆರ್ ಸುಣ್ಣಂಬಳ ವಿಶ್ವೇಶ್ವರ ಭಟ್, ಸಾಹಿತಿ ವಿದ್ವಾಂಸೆರ್ ಡಾ.ಪೃಥ್ವಿರಾಜ್‌ ಕವತ್ತಾರ್, ಯಕ್ಷಗಾನ ಕಲಾವಿದೆರ್ ವಾಸುದೇವ ರಂಗಾ ಭಟ್ಟ, ಯಕ್ಷಗಾನ ಕಲಾವಿದೆರ್ ವಾದಿರಾಜ ಕಲ್ಲೂರಾಯ ಬೊಕ್ಕ ಗುರುರಾಜ ರಾವ್ ಬೆಂಗ್ಲೂರ್, ರಕ್ಷಿತ್ ಶೆಟ್ಟಿ ಪಡ್ರೆ, ಗೀತಾ ಗಣೇಶ್ ಪಾಲ್ ಪಡೆಯೆರೆ ಉಲ್ಲೆರ್.

ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯಗ್ ಭೇಟಿ ಕೊರ್ನ ಗೃಹಸಚಿವೆರ್ ಆರಗ ಜ್ಞಾನೇಂದ್ರ

ಒಡಿಪು: ಇಂಚಿಪ್ಪ ನಿರ್ಮಾಣ ಆಯಿನ ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಲ್ಯಗ್ ರಾಜ್ಯ ಗೃಹ ಸಚಿವೆರ್ ಆರಗ ಜ್ಞಾನೇಂದ್ರ ಮೇರ್ ಬುಧಾರ ಬಯ್ಯಗ್ ಭೇಟಿ ಕೊರ್ದು ಶ್ರೀ ಮಹಾಲಕ್ಷ್ಮಿನ ದರ್ಶನ ಪಡೆಯೆರ್.

ಮೆರೆನ್ ದೇವಲ್ಯದ ವತಿರ್ದ್ ಪೂರ್ಣ ಕುಂಭದೊಟ್ಟಿಗೆ ಎದ್ಕೊನಿಯೆರ್. ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯದ ಅರ್ಚಕೆರ್ ಕೆ ವಿ ರಾಘವೇಂದ್ರ ಉಪಾಧ್ಯಾಯ ಬೊಕ್ಕ ವಿಷ್ಣುಮೂರ್ತಿ ಉಪಾಧ್ಯಾಯ ಮೊಕುಲು ಶ್ರೀದೇವಿಗ್ ಪೂಜೆ ಸಂದಾದ್, ಪ್ರಸಾದ ಕೊರಿಯೆರ್. ದೇವಲ್ಯದ ರೂವಾರಿ ನಾಡೋಜ ಡಾ. ಜಿ. ಶಂಕರ್ ಮೇರ್ ದೇವಲ್ಯದ ವತಿರ್ದ್ ಗೃಹ ಸಚಿವರೆಗ್ ತಮ್ಮನ ಮಲ್ತ್ ದ್ ಸ್ಮರಣಿಕೆ ಕೊರಿಯೆರ್. ಈ ಪೊರ್ತುಡು ಕಾಪು ಶಾಸಕೆರ್ ಲಾಲಾಜಿ ಆರ್ ಮೆಂಡನ್, ಮೊಗವೀರ ಮಹಾಜನ ಸಂಘದ ಅಧ್ಯಕ್ಷೆರ್ ಜಯ ಸಿ ಕೋಟ್ಯಾನ್ ಬೆಳ್ಳಂಪಳ್ಳಿ, ಕ್ಷೇತ್ರ ಆಡಳಿತ ಸಮಿತಿದ ಅಧ್ಯಕ್ಷೆರ್ ವಾಸುದೇವ ಸಾಲಿಯನ್, ಮಹಾಜನ ಸಂಘದ ಮಹಿಳಾ ಘಟಕದ ಉಪಾಧ್ಯೆಕ್ಷೆರ್ ಜಾನಕಿ ಲೀಲಾಧರ್, ನಾರಾಯಣ ಕರ್ಕೇರಾ, ದಿನೇಶ್ ಏರ್ಮಾಳ್, ದಿನೇಶ್ ಮೂಳೂರು, ಮೋಹನ್ ಬಂಗೇರ, ದೇವಲ್ಯದ ಪ್ರಧಾನ ಕಾರ್ಯನಿರ್ವಾಹಕೆರ್ ಸತೀಶ್ ಅಮೀನ್ ಮಟ್ಟು, ಕಾಪು ಬಿಜೆಪಿ ಅಧ್ಯಕ್ಷೆರ್ ಶ್ರೀಕಾಂತ್ ನಾಯಕ್, ಕಾರ್ಯದರ್ಶಿ ಗೋಪಾಲಕೃಷ್ಣ ರಾವ್, ಕಾಪು ಪೊಲೀಸ್ ವೃತ್ತ ನಿರೀಕ್ಷಕೆರ್ ಕೆ. ಸಿ ಪೂವಯ್ಯ, ಪಡುಬಿದ್ರೆ ಠಾಣಾಧಿಕಾರಿ ಪುರುಷೋತ್ತಮ್ ಇತ್ತೆರ್.