July 2021

ತೆಂಕನಿಡಿಯೂರು ಕಾಲೇಜು ಪ್ರಾಂಶುಪಾಲೆರಾದ್ ಡಾ. ಗಣನಾಥ ಶೆಟ್ಟಿ ಎಕ್ಕಾರು ಆಯ್ಕೆ

ಒಡಿಪು, ಜುಲೈ 6 : ಸರಕಾರಿ ಪ್ರಥಮ ದರ್ಜೆ ಕಾಲೇಜು ಬೊಕ್ಕ ಸ್ನಾತಕೋತ್ತರ ಅಧ್ಯಯನ ಕೇಂದ್ರ ತೆಂಕನಿಡಿಯೂರು ಮುಲ್ತ ಪೊಸ ಪ್ರಾಂಶುಪಾಲರಾದ್ ಡಾ. ಗಣನಾಥ ಶೆಟ್ಟಿ ಎಕ್ಕಾರು ಅಧಿಕಾರ ಸ್ವೀಕಾರ ಮಲ್ದೆರ್ . ಡಾ. ಗಣನಾಥ ಶೆಟ್ಟಿ ಎಕ್ಕಾರು ಮೆರೆಗ್ ಸೇವಾ ನಿವೃತ್ತರಾಯಿನ ಪ್ರಾಂಶುಪಾಲೆರಾಯಿನ ಪ್ರೊ. ಬಾಲಕೃಷ್ಣ ಎಸ್. ಹೆಗ್ಡೆ ಅಧಿಕಾರ ಹಸ್ತಾಂತರ ಮಲ್ತೆರ್ . ಈ ಪೊರ್ತುಡು ಪ್ರಾದೇಶಿಕ ಜಂಟಿ ನಿರ್ದೇಶಕೆರಾಯಿನ ಪ್ರೊ. ವಸಂತರಾಜ ಶೆಟ್ಟಿ ಪಾಲ್ ಪಡೆದಿತ್ತೆರ್ .

ಡಾ. ಎಕ್ಕಾರು ಕರ್ನಾಟಕ ಸರಕಾರದ ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ರಾಜ್ಯ ಎನ್.ಎಸ್.ಎಸ್. ಕೋಶಡ್ ರಾಜ್ಯ ಎನ್.ಎಸ್.ಎಸ್. ಅಧಿಕಾರಿ ಬೊಕ್ಕ ಸರಕಾರದ ಪದನಿಮಿತ್ತ ಜಂಟಿ ಕಾರ್ಯದರ್ಶಿಯಾದ್ 6 ವರ್ಷ ಸೇವೆ ಮಲ್ದೆರ್ . ಕಾಲೇಜು ಶಿಕ್ಷಣ ಇಲಾಖೆದ ಬೇತೆ ಬೇತೆ ಕಾಲೇಜ್ ಡ್ ಉಪನ್ಯಾಸಕೆರಾದ್ , ಸಹ ಪ್ರಾಧ್ಯಾಪಕೆರಾದ್ ಬೇಲೆ ಮಲ್ದೆರ್ . ಕಾವೂರು ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ಡ್ ಸ್ಥಾಪಕ ಪ್ರಾಂಶುಪಾಲರಾದ್ 4 ವರ್ಷ ಬೇಲೆ ಮಲ್ದೆರ್ . ಜಾನಪದ ಬೊಕ್ಕ ಸಾಹಿತ್ಯ ಕ್ಷೇತ್ರಡ್ ಬೇಲೆ ಮಲ್ದಿನ ಕೃತಿಲೆನ್ ಪ್ರಕಟ ಮಲ್ದೆರ್ . ಡಾ. ಎಕ್ಕಾರು ಒಡಿಪು ತಾಲಾಕು ಕನ್ನಡ ಸಾಹಿತ್ಯ ಪರಿಷತ್ತ್ ದ ಗುರ್ಕಾರ್ಲಾದ್ , ಕುಡ್ಲ ವಿ.ವಿ. ಎನ್.ಎಸ್.ಎಸ್. ಸಂಯೋಜನಾಧಿಕಾರಿಯಾದ್ , ಕನ್ನಡ ಅಧ್ಯಾಪಕರ ಸಂಘದ ಗುರ್ಕಾರ್ಲಾದ್ ಬೇಲೆ ಮಲ್ದೆರ್ . ಮೇರ್ ಎನ್.ಎಸ್.ಎಸ್.ಗೆ ಮಲ್ದಿನ ಸೇವೆಗಾದ್ ರಾಜ್ಯ ಸರಕಾರರ್ದ್ ಅತ್ಯುತ್ತಮ ಸಂಯೋಜನಾಧಿಕಾರಿಯಾದ್ ರಾಜ್ಯ ಪ್ರಶಸ್ತಿ ಬೊಕ್ಕ ಕೇಂದ್ರ ಸರಕಾರರ್ದ್ ರಾಷ್ಟ್ರ ಪ್ರಶಸ್ತಿ ಪಡೆತೆರ್..

ಲಾಕ್ ಡೌನ್ ಪೊರ್ತುಡು ತುಳು ಲಿಪಿನ್ ಪೂರ್ಣವಾದ್ ಕಲ್ತ್ ಅವ್ವೆ ಲಿಪಿಟ್ ಹನುಮಾನ್ ಚಾಲೀಸಾ ಬರೆಯಿನ ಒಡಿಯೂರು ಸ್ವಾಮೀಜಿ

ಬಂಟ್ವಾಳ, ಜುಲೈ 6: ಬಂಟ್ವಾಳ ತಾಲೂಕುದ ಒಡಿಯೂರು ಶ್ರೀಗುರುದೇವಾನಂದ ಸ್ವಾಮೀಜಿಲು ಲಾಕ್ ಡೌನ್ ಪೊರ್ತುಡು ತುಳು ಲಿಪಿನ್ ಪೂರ್ಣವಾದ್ ಕಲ್ತ್ ಅವ್ವೆ ಲಿಪಿಟ್ ತುಳಸೀದಾಸೆರ್ನ ಹನುಮಾನ್ ಚಾಲೀಸನ್ ನೇರವಾದ್ ಅನುವಾದಿಸಾದ್ ಜನಕ್ಲೆನ ಮನ ಗೆಂದಿಯೆರ್ .

ದಕ್ಷಿಣದ ಗಾಣಗಾಪುರ ಪಂದ್ ಗುರ್ತಿಸಾಯಿನ ದ.ಕ ಜಿಲ್ಲೆದ ಬಂಟ್ವಾಳ ತಾಲೂಕುದ ಒಡಿಯೂರುಡು ಉಪ್ಪುನ ಶ್ರೀಗುರುದೇವದತ್ತ ಸಂಸ್ಥಾನನ್ ಶ್ರೀಗುರುದೇವಾನಂದ ಸ್ವಾಮೀಜಿ, ಮಾರ್ಚ್ ತಿಂಗೊಲುರ್ದು ಜುಲೈ ಮುಟ ಲಿಪಿನ್ ಕಲ್ತ್ , ಲಿಪಿ ಮುಖೇನ ಲೀಲಾಜಾಲವಾದ್ ಬರೆಯುನೆನ್ ಕಲ್ತೆರ್ . ತುಳು ಭಾಷೆ, ಕನ್ನಡ ಲಿಪಿತ ಮುಖೇನ ಸಾಹಿತಿ ವಿ.ಬಿ.ಅರ್ತಿಕಜೆ ಬರೆಯಿನ ತುಳಸೀದಾಸೆರ್ ರಚನೆ ಮಲ್ತಿನ ಹನುಮಾನ್ ಚಾಲೀಸಾನ್ ಸುರುತ್ತ ಸಲ ತುಳು ಲಿಪಿಟ್ ಬರೆಯೆರ್ .

ಈ ಸಲತ ಲಾಕ್ಡೌನ್ ಪೊರ್ತುಡು ತುಳಸೀದಾಸ್ ಹನುಮಾನ್ ಚಾಲೀಸಾನ್ ನೇರವಾದ್ ತುಳು ಭಾಷೆಗ್ ಅನುವಾದಿಸಾದ್ ತುಳುಲಿಪಿಟೇ ರಚನೆ ಮಲ್ತೆರ್ . ಆತೆ ಅತ್ತoದೆ ಏಕೀಶ್ಲೋಕ ರಾಮಾಯಣ, ಶ್ರೀಕೃಷ್ಣ ಲೀಲಾಮೃತ, ಚರ್ತುಶ್ಲೋಕಿ ಮದ್ಭಾಗವತ ಇಂಚ ಪುರಾಣಲೆನ್ ತುಳು ಲಿಪಿಟೇ ಬರೆದ್ ಮುಗಿತ್ ದೆರ್ .

ಸಮಾಜದ ಬುಳೆಚ್ಚಿಲ್ ಗ್ ಮಾಧ್ಯಮದ ಜವಾಬ್ದಾರಿ ಮಹತ್ತರ : ಎಸ್. ಅಂಗಾರ

ಸುಳ್ಯ,: ಜುಲೈ 5 : ಸಮಾಜಡ್ ಮಾಧ್ಯಮದ ಜವಾಬ್ದಾರಿ ಮಹತ್ತರವಾದುಂಡು . ಪ್ರತಿಯೊಂಜಿ ಮಾಧ್ಯಮದ ಕೂಡ ನಿಸ್ಪಕ್ಷವಾದ್ ಬೊಕ್ಕ ಸ್ಪಷ್ಟವಾದ್ ವರದಿ ಮಲ್ತುಂಡ ಅಂಚಿನ ವರದಿಗ್ ಮಹತ್ವ ಬರ್ಪುಂಡು . ಇಂಚಿನ ವರದಿಲು ಜನಕ್ಲೆನ ವಿಶ್ವಾಸ ಗಳಿಸಾವೊಂದು ಉಲ್ಲೆರ್ . ಜನಪರವಾಯಿನ ವರದಿಗಾರಿಕೆರ್ದ್ ಮಾಧ್ಯಮ ಕ್ಷೇತ್ರ ನನಾತ್ ವಿಸ್ತಾರವಾದ್ ಬೊಕ್ಕ ಪರಿಣಾಮಕಾರಿಯಾದ್ ಬುಳೆಯೆರೆ ಸಾಧ್ಯ ಪಂದ್ ಬಂದರು, ಮೀನುಗಾರಿಕೆ ಬೊಕ್ಕ ಒಳನಾಡು ಜಲಸಾರಿಗೆ ಸಚಿವ ಎಸ್.ಅಂಗಾರ ಪಂಡೆರ್ .

ಮೇರ್ ಸುಳ್ಯ ತಾಲೂಕು ಪಂ. ವತಿರ್ದ್ ಕೊರಿನoಚಿನ ಅಂಬೆಟಡ್ಕದ ನಿವೇಶನಡ್ ಶನಿವಾರ ನೂತನ ಪ್ರೆಸ್ ಕ್ಲಬ್ ಕಟ್ಟಡ ಬೊಕ್ಕ ಪತ್ರಕರ್ತೆನಾ ಸಮುದಾಯ ಭವನಗ್ ಶಿಲಾನ್ಯಾಸ ನೆರವೇರ್ಸಾದ್ ಪಾತೆರಿಯೆರ್ . ಪ್ರೆಸ್ ಕ್ಲಬ್ ಗುರ್ಕಾರ್ಲಾಯಿನ ಹರೀಶ್ ಬಂಟ್ವಾಳ್ ಗುರ್ಕಾರ್ಮೆ ವಹಿಸ್ದಿತ್ತೆರ್ .

ತಾ.ಪಂ.ಮಾಜಿ ಗುರ್ಕಾರ್ಲಾಯಿನ ಚನಿಯ ಕಲ್ತಡ್ಕ, ಸ್ಥಾಯಿ ಸಮಿತಿ ಮಾಜಿ ಗುರ್ಕಾರ್ಲಾಯಿನ ರಾಧಾಕೃಷ್ಣ ಬೊಳ್ಳೂರು, ಜಿಲ್ಲಾ ಪಂಚಾಯತ್ ಮಾಜಿ ಸದಸ್ಯೆರಾಯಿನ ಹರೀಶ್ ಕಂಜಿಪಿಲಿ, ತಾಲೂಕು ಪಂಚಾಯತ್ ವ್ಯವಸ್ಥಾಪಕ ಹರೀಶ್ ರಾವ್ ಮೆರೆಗ್ ಸೊಲ್ಮೆ ಸಂದೈತ ಮಲ್ತೆರ್.

ಜುಲೈ ರಡ್ಡನೆ ವಾರಡ್ ಪದವಿ ವೇಳಾಪಟ್ಟಿ ಪ್ರಕಟ: ಉನ್ನತ ಶಿಕ್ಷಣ ಇಲಾಖೆ

ಬೆಂಗ್ಳೂರು, ಜುಲೈ 5: : ಕೋವಿಡ್ ಕಾರಣರ್ದ್ ದುಂಬು ಪಾರ್ದಿನ ಪದವಿ ಸೆಮಿಸ್ಟರ್ ಪರೀಕ್ಷೆನ್ ಆಯಿನಾತ್ ಬೆಗೋಡೆ ನಡಪಾವ ಪಂದ್ ರಾಜ್ಯ ಉನ್ನತ ಶಿಕ್ಷಣ ಇಲಾಖೆ ಮಾಹಿತಿ ಕೊರ್ತುಂಡು..

ರಾಜ್ಯೋಡು ಮಾತಾ ವಿಶ್ವವಿದ್ಯಾಲಯದ ಪದವಿ ಬೊಕ್ಕ ಸ್ನಾತಕೋತ್ತರ ಪದವಿ ಪರೀಕ್ಷೆಲು ಏಪ್ರಿಲ್ ಬೊಕ್ಕ ಮೇ ತಿಂಗೊಲ್ ಡು ನಡಪೊಡಿತ್ತ್oಡ್ . ಆ ಪೊರ್ತುಡು ರಾಜ್ಯೋಡು ಲಾಕ್ಡೌನ್ ಘೋಷಣೆಯಾಯಿನ ಕಾರಣ ಪರೀಕ್ಷೆಯನ್ ದುಂಬು ಪಾರ್ದ್ದಿತ್ತೆರ್ . ಐರ್ದ್ ಬೊಕ್ಕ ಮಾತಾ ವಿಶ್ವವಿದ್ಯಾನಿಲಯಲು ಆನ್ಲೈನ್ ಮುಖೇನ ದುಂಬುದ ಸೆಮಿಸ್ಟರ್ದ ತರಗತಿಲೆನ್ ಸುರು ಮಲ್ದುಂಡು . ಈ ಕಾರಣರ್ದ್ ಬಾಕಿ ಒರಿನ ಸೆಮಿಸ್ಟರ್ ಪರೀಕ್ಷೆಲು ನಡಾಪುಂಡ ಇಜ್ಜಾ ಪನ್ಪಿನ ಗೊಂದಲ ಜೋಕ್ಲೆಗ್ ಆದ್ ಇತ್ತುಂಡು ತರಗತಿ ನಡತೊಂದು ಇತ್ತುಂಡಲ , ಪರೀಕ್ಷೆ ಮಲ್ಪರೆ ಬಲ್ಲಿ ಪನ್ಪಿನ ಸೊರ ವಿದ್ಯಾರ್ಥಿ ವಲಯರ್ದ್ ಕೇಂದ್ ಬತ್ತ್oಡ್ .

ಇತ್ತೇ ಮಾತಾ ಗೊಂದಲಗ್ಲಾ ರಾಜ್ಯ ಉನ್ನತ ಶಿಕ್ಷಣ ಸಚಿವಾಲಯ ಕಡೆತ ಚುಕ್ಕಿ ದೀತೆರ್. ಆಯಿನಾತ್ ಬೆಗೋಡೆ ಪರೀಕ್ಷೆ ನಡಪಾವ ಪಂದ್ ಪಂಡೆರ್. ರಡ್ಡನೆ ವಾರಡ್ ಪರೀಕ್ಷಾ ವೇಳಾಪಟ್ಟಿ ಪ್ರಕಟ ಮಲ್ಪುವ . ಒವ್ವೆ ಕಾರಣಗ್ಲಾ ಪರೀಕ್ಷೆ ರದ್ದು ಮಲ್ಪುಜ ಪಂದ್ ಉನ್ನತ ಶಿಕ್ಷಣ ಇಲಾಖೆದ ಮೂಲ ತೆರಿಪಾದುಂಡು .

ತುಳು ಭಾಷೆ ಕೇರಳದ ಅಧಿಕೃತ ಭಾಷೆಯಾವಡ್ : ಜೈ ತುಲುನಾಡ್ (ರಿ ) ಕಾಸ್ರೋಡು ಎಗ್ಗೆರ್ದ್ ಮಂಜೇಶ್ವರ ಶಾಸಕೆರೆಗ್ ಮನವಿ

ಕಾಸ್ರೊಡು, ಜುಲೈ 5: ತುಳು ಭಾಷೆಗ್ ಕೇರಳ ರಾಜ್ಯದ ಅಧಿಕೃತ ಭಾಷಾ ಸ್ಥಾನಮಾನ ಕೊರ್ಪಾವೊಡೊಂದು ಜೈ ತುಲುನಾಡ್ (ರಿ) ಸಂಘಟನೆದ ಕಾಸ್ರೋಡ್ (ಕಾಸರಗೋಡ್) ಎಗ್ಗೆರ್ದ್ ಮಂಜೇಶ್ವರದ ಶಾಸಕೆರಾಯಿನ ಎ.ಕೆ.ಎಮ್ ಅಶ್ರಫ್ ಮೆರೆಗ್ ದಾಖಲೆ ಸಮೇತ ಬಿನ್ನಂತೋಲೆದ ಮುಖೇನ ಬಿನ್ನೈತೊಂಡೆರ್.

ಈ ಪೊರ್ತುಡು ಜೈ ತುಲುನಾಡ್ ಕಾಸ್ರೋಡು ಎಗ್ಗೆದ ಗುರ್ಕಾರೆರ್ ಹರಿಕಾಂತ್ ಕಾಸರಗೋಡ್, ಕಾರ್ಯಂತೆರ್ ಕಾರ್ತಿಕ್ ಪೆರ್ಲ ಕೋಶಾಧಿಕಾರಿ ಪ್ರಶಾಂತ್ ರೈ ಬಂದಡ್ಕ, ಮುಖ್ಯ ಸಂಚಾಲಕೆರ್ ಪ್ರವೀಶ್ ಕುಲಾಲ್ ಬೊಕ್ಕ ಪದುಕೆರಾಯಿನ ದೇವಿಪ್ರಸಾದ್ ರೈ ಪಾಲ್ ಪಡೆಯೆರ್. ಮನವಿ ಸ್ವೀಕರಿತ್‌ದ್ ಈ ವಿಷಯೊನು ಸದನೊಡು ಮಂಡನೆ ಮಲ್ಪವೆಂದ್ ಶಾಸಕೆರ್ ಅಶ್ರಫ್ ಪಂಡೆರ್.