July 2021

ಸರಕಾರ ಮೀನುಗಾರೆರರ್ನ ಕಷ್ಟಗ್ ಸ್ಪಂದನೆ ಕೊರಡ್ : ಒಡಿಪು ಜಿಲ್ಲಾ ಕಾಂಗ್ರೆಸ್

ಒಡಿಪು, ಜುಲೈ 30 : ಬರ್ಪಿನ ಆಗಸ್ಟ್ ತಿಂಗೊಲ್ ಡು ಕರಾವಳಿಡ್ ಮೀನುಗಾರಿಕಾ ಋತು ಸುರು ಆಪಿನ ನೆಲೆಟ್ಟ್ ಸರಕಾರ, ಆಯಿನಾತ್ ಬೇಗ ಮೀನುಗಾರಿಕೆಗ್ ಅನುವು ಮಲ್ತ್ ಕೊರ್ರೆ ಡೀಸೆಲ್ ಪಾಸ್ ಪುಸ್ತಕದ ನವೀಕರಣ ಮಲ್ಪೊಡು ಪಂದ್ ಒಡಿಪು ಜಿಲ್ಲಾ ಕಾಂಗ್ರೆಸ್ ರಾಜ್ಯದ ನೂತನ ಸರಕಾರನ್ ಅಗ್ರಹ ಮಲ್ದುಂಡು .

ಕೊರೋನಾ ಸಂಕಷ್ಟದ ಕಾಲಡ್ ಲಾ ಸರಕಾರ ಅಧಿಕಾರನ್ ಒರಿಪಾವುನಲ್ಪ ಬೇಲೆ ಮಲ್ತೊಂದು ಉಂಡು ಅತ್ತoದೆ ಜನಕ್ಲೆನ ಸಂಕಷ್ಟಗ್ ಪರಿಹಾರ ಕೊರ್ಪಿನ ಒವ್ವೆ ಕ್ರಮ ದೆತೊನಂದಿನ ಖಂಡನೀಯ ಪಂದ್ ಪಂಡೆರ್.

ರೈಲ್ದ ಪಟ್ಟೆದ ಮಿತ್ತ್ ನಿಗೂಢ ರೀತಿಡ್ ಪತ್ತೆಯಾಯಿನ ಜವನ್ಯನ ಪುನ

ಬಂಟ್ವಾಳ: ದೇವಂದಬೆಟ್ಟು ಪನ್ಪಿನ ಜಾಗೆದ ರೈಲ್ದ ಪಟ್ಟೆಡ್ ಜವನ್ಯನ ಪುನ ಪತ್ತೆಯಾಯಿನ , ಸಂಶಯಗ್ ಕಾರಣ ಆತುಂಡು .

ಕಳ್ಳಿಗೆ ಗ್ರಾಮದ ಲಕ್ಷಣ ಪನ್ಪಿನರೆನ ಮಗೆ ಕಾರ್ತಿಕ್ (25) ಮೆರೆನ ಮೃತದೇಹ ಪಂದ್ ಗುರ್ತು ಮಲ್ದೆರ್.

ಕೋಡೆ ಬೈಯ್ಯರ್ದೆ ಸಂಜೆ ಇಲ್ಲರ್ದ್ ಪೋಯಿನ ಕಾರ್ತಿಕ್ ರಾತ್ರಿ 11 ಗಂಟೆಯಾoಡಲ ಇಲ್ಲಗ್ ಬತ್ತಿತ್ತ್ಜೆರ್ . ಈ ನೆಲೆಟ್ಟ್ ಇಲ್ಲದಕುಲು ನಾಡೆರೆ ಸುರು ಮಲ್ತೆರ್ ಕಾಂಡೆ ಸುಮಾರ್ 3 ಗಂಟೆ ಪೊರ್ತುಗು ಕಾರ್ತಿಕ್ ನ ಪುನ ರೈಲ್ವೆ ಹಳಿಟ್ ಪತ್ತೆಯಾತುಂಡು .ಈ ಬಗ್ಗೆ ಬಂಟ್ವಾಳ ನಗರ ಠಾಣಾ ಪೋಲೀಸೆರೆಗ್ ಮಾಹಿತಿ ಕೊರ್ತೆರ್ , ಜಾಗೆಗ್ ಉನ್ನತ ಮಟ್ಟದ ಅಧಿಕಾರಿಲು ಬೇಟಿ ಕೊರ್ದು ಪರಿಶೀಲನೆ ನಡಪಾದೆರ್ .

ಹಿರಿಯ ನಾಗರಿಕೆರೆಗ್ ರಾಜ್ಯ ಪ್ರಶಸ್ತಿ : ಪ್ರಸ್ತಾವನೆಗ್ ಲೆಪ್ಪೋಲೆ

ಒಡಿಪು, ಜುಲೈ 30: ವಿಕಲಚೇತನರ ಬೊಕ್ಕ ಹಿರಿಯ ನಾಗರಿಕರ ಸಬಲೀಕರಣ ಇಲಾಖೆದ ವತಿರ್ದ್ ಅಕ್ಟೋಬರ್ 1ಕ್ಕ್ ವಿಶ್ವ ಹಿರಿಯ ನಾಗರಿಕರ ದಿನಾಚರಣೆನ್ ರಾಜ್ಯ ಮಟ್ಟಡ್ ಆಚರಣೆ ಮಲ್ತೊಂದು ಉಲ್ಲೆರ್ , ಈ ಪೊರ್ತುಡು ಶಿಕ್ಷಣ, ಸಾಹಿತ್ಯ, ಕಲಾಕ್ಷೇತ್ರ, ಕಾನೂನು, ಪ್ರತಿಭೆ, ಕ್ರೀಡೆ ಅಂಚನೇ ಹಿರಿಯ ನಾಗರಿಕರ ಕ್ಷೇತ್ರಡ್ ಸಮಾಜ ಸೇವೆ ಮಲ್ತಿನ ಹಿರಿಯ ನಾಗರಿಕೆರೆಗ್ ಒಟ್ಟು ಆಜಿ ವೈಯಕ್ತಿಕ ಪ್ರಶಸ್ತಿ ಬೊಕ್ಕ ಒಂಜಿ ಸಂಸ್ಥೆಗ್ ಪ್ರಶಸ್ತಿ ಸೇರಿನಂಚ ಒಟ್ಟು ಏಳ್ ರಾಜ್ಯ ಪ್ರಶಸ್ತಿ ಕೊರೊಂದು ಉಲ್ಲೆರ್ ನೆಕ್ಕಾದ್ ಜಿಲ್ಲೆದ ಹಿರಿಯ ನಾಗರಿಕೆರೆರ್ದ್ ಪ್ರಸ್ತಾವನೆ ಲೈದೆರ್ .

ಕೋವಿಡ್ ಗ್ ಕುಡ್ಲಡ್ 5 ಜನ ಬಲಿ : 337 ಜನಕ್ ಕೊರೋನ ಸೋಂಕು

ಕುಡ್ಲ, ಜುಲೈ 30: ದ.ಕ. ಜಿಲ್ಲೆಡ್ ಗುರುವಾರ ಕೋವಿಡ್‌ರ್ದ್ ಐನ್ ಜನ ತೀರ್ ಪೋಯೆರ್. ಆತೆ ಅತ್ತoದೆ, ಪೊಸತಾದ್ 337 ಸೋಂಕು ಪ್ರಕರಣ ಪತ್ತೆ ಆತುಂಡು. ಜಿಲ್ಲೆಡ್ 148 ಜನ ಹುಷಾರ್ ಆತೆರ್.

ಕೋವಿಡ್‌ರ್ದ್ ಜಿಲ್ಲೆಡ್ ಒಟ್ಟು 1,402 ಜನ ತೀರ್ ಪೋತೆರ್. ಇತ್ತೆ ಮುಟ 99,264 ಪಾಸಿಟಿವ್ ಪ್ರಕರಣ ವರದಿ ಆತುಂಡು.

ಜುಗಾರಿ ಆರೋಪ : ಮೂಜಿ ಜನತ ಬಂಧನ

ಕುಂದಾಪುರ,ಜುಲೈ 30: ತಲ್ಲೂರು ಗ್ರಾಮದ ಮಾರನಮನೆ ಪನ್ಪಿನ ಜಾಗೆಡ್ ಕೋಡೆ ಅಂದರ್ ಬಾಹರ್ ಇಸ್ಪೀಟು ಜುಗಾರಿ ಗೊಬ್ಬೊoದು ಇತ್ತಿನ ಮೂಜಿ ಜನನ್ ಕುಂದಾಪುರ ಪೊಲೀಸೆರ್ ಪತ್ತ್ ದೆರ್.

ನಾರಾಯಣ ದೇವಾಡಿಗ (40), ರಮೇಶ ದೇವಾಡಿಗ (36), ಭಾಸ್ಕರ ದೇವಾಡಿಗ (53) ಬಂಧಿತ ಆರೋಪಿಲು . ಮೆಕ್ಲೆನೆರ್ದ್ 1250 ರೂ. ನಗದು ವಶಕ್ ದೆತೊನ್ದೆರ್ . ಈ ಬಗ್ಗೆ ಕುಂದಾಪುರ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲಾತುಂಡು .

ಆ.1 ಕ್ಕ್ ಕೊಂಕಣಿ ಸಾಹಿತ್ಯ ಅಕಾಡೆಮಿ ಗೌರವ ಪ್ರಶಸ್ತಿ ಪ್ರದಾನ

ಕುಡ್ಲ,ಜುಲೈ 30 : ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿದ 2020ನೆ ಸಾಲ್ದ ಗೌರವ ಪ್ರಶಸ್ತಿ ಬೊಕ್ಕ ಪುಸ್ತಕ ಬಹುಮಾನ ಪ್ರದಾನ ಲೇಸ್ ಆ.1ಕ್ಕ್ ಮಧ್ಯಾಹ್ನ 2 ಗಂಟೆಗ್ ಕುಡ್ಲದ ಕುದ್ಮುಲ್ ರಂಗರಾವ್ ಪುರಭವನಡ್ ಅಟ್ಟನೆ ಮಲ್ದೆರ್ ಪಂದ್ ಅಕಾಡೆಮಿ ಗುರ್ಕಾರ್ಲಾಯಿನ ಡಾ.ಕೆ.ಜಗದೀಶ್ ಪೈ ಗುರುವಾರ ಸುದ್ದಿಗೋಷ್ಠಿಡ್ ತೆರಿಪಾಯೆರ್ .

ಅರುಣ್ ಸುಬ್ರಾವ್ ಉಭಯಕರ್ (ಸಾಹಿತ್ಯ), ಪುತ್ತೂರು ಪಾಂಡುರಂಗ ನಾಯಕ್ (ಕಲೆ), ಲಕ್ಷ್ಮಿ ಕೃಷ್ಣ ಸಿದ್ದಿ (ಜಾನಪದ) ಮೆರೆಗ್ ಅಕಾಡೆಮಿ ಗೌರವ ಪ್ರಶಸ್ತಿ ಬೊಕ್ಕ ಪ್ರೇಮ್ ಮೊರಾಸ್ ಮೇರ್ ಕವನ-ಏಕ್‌ಮೂಟ್ ಪಾವ್ಳ್ಯೊ’, ಮೋನಿಕಾ ಡೇಸಾ ಅವರ ಸಣ್ಣಕತೆ-ನವಿದಿಶಾ’, ಸ್ಟೀವನ್ ಕ್ವಾಡ್ರಸ್ ಮೆರ್ನ ಲೇಖನ-ಸುಗಂದು ಸ್ವಾಸ್‌ಗ್ ಪುಸ್ತಕ ಬಹುಮಾನ ಮಾನದಿಗೆ ಮಲ್ಪರೆ ಉಲ್ಲೆರ್ ಪಂದ್ ಪಂಡೆರ್.

ಸ್ವಾಬ್ ಕಲೆಕ್ಟರ್ ಹುದ್ದೆಗ್ ಜು.31ಕ್ಕ್ ಸೀದಾ ಸಂದರ್ಶನ

ಕುಡ್ಲ, ಜುಲೈ 30: ಡಿಎಚ್‍ಒ ಅಧೀನಡ್ ಉಪ್ಪುನ ಪ್ರಾಥಮಿಕ ಆರೋಗ್ಯ ಕೇಂದ್ರಡ್ ಗಂಟಲು ದ್ರವ ಮಾದರಿ ಸಂಗ್ರಹಗ್ (ಸ್ವಾಬ್ ಕಲೆಕ್ಟರ್) 25 ಅರ್ಹ ಅಭ್ಯರ್ಥಿಲೆನ್ ಗುತ್ತಿಗೆ ಆಧಾರಡ್ ತಾತ್ಕಾಲಿಕ ನೇಮಕಗ್ 2021ರ ಜುಲೈ 31ರ ಶನಿವಾರ ಬೆಳಿಗ್ಗೆ 10.30ಕ್ಕೆ ಪೇಂಟೆದ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿ ಕಚೇರಿಡ್ ನೇರ ಸಂದರ್ಶನ ಲೈದೆರ್ .

2021ರ ಸೆಪ್ಟೆಂಬರ್ 30 ಮುಟ ಬೇಲೆ ಮಲ್ಪರೆ ಈ ಆಯ್ಕೆ ನಡತೊಂದು ಉಂಡು , ಡಿ.ಎಂ.ಎಲ್.ಟಿ., ಅರೆವೈದ್ಯಕೀಯ ಪದವೀಧರೆರ್ , ಡಿಪ್ಲೋಮ, ವಿಜ್ಞಾನ ಪದವೀಧರೆರ್ ಅರ್ಜಿ ಪಾಡೋಲಿ .