July 2021

ಬಲೆಕ್ ತಿಕ್ಕಿನ ಜಿಂಕೆನ್ ಕಾಡ್ ಗ್ ಬುಡಿನ ಅರಣ್ಯ ಸಿಬ್ಬಂದಿ

ಮುಂಡಗೋಡ, ಜುಲೈ 22: ಬುಳೆ ತ ರಕ್ಷಣೆಗ್ ಪಾಡಿನ ಬಲೆಕ್ ತಿಕ್ಕೊಲಿನ ಜಿಂಕೆನ್ ಅರಣ್ಯ ಇಲಾಖೆ ಸಿಬ್ಬಂದಿ ಬುಡ್ಪಾದ್ ಕಾಡ್ಗ್ ಬುಡಿನ ಘಟನೆ ನಡತುದುಂಡು .

ಅಜ್ಜಳ್ಳಿ ಗ್ರಾಮಡ್ ವಿಷ್ಣು ಆಲದಕಟ್ಟಿ ಮೆರ್ನ ಕಂಡೊಗು ಪಾರ್ದಿನ ಬಲೆಕ್ ಜಿಂಕೆ ತಿಕೊಲ್ದು ಬಲೆರ್ದ್ ಪಿದಾಯಿ ಬರ್ರೆ ನರಕೊಂದು ಇತ್ತಿನ ತೂಯಿನ ಮಾಲಿಕ ಅರಣ್ಯ ಇಲಾಖೆಗ್ ಮಾಹಿತಿ ಕೊರಿಯೆರ್. ಅರಣ್ಯ ಇಲಾಖೆ ಸಿಬ್ಬಂದಿ ಶ್ರೀಧರ ಭಜಂತ್ರಿ ಬೊಕ್ಕ ಶಿವಪ್ಪ ಶಿರ್ಮಾ ಜಿಂಕೆನ್ ಬಲೆರ್ದ್ ಬುಡ್ಪಾದ್ ಕಾಡ್ ಗ್ ಬುಡ್ತೆರ್.

ಹುಷಾರ್ದಾಂತೆ ತೀರ್ ಪೋಯಿನ ಮುದ್ರಾಡಿ ಶ್ರೀ ಆದಿಶಕ್ತಿ ದೇವಸ್ಥಾನದ ಧರ್ಮದರ್ಶಿ ಧರ್ಮಯೋಗಿ ಕರ್ಮಯೋಗಿ ಶ್ರೀ ಮೋಹನ್ ಸ್ವಾಮೀಜಿ

ಮುದ್ರಾಡಿ, ಜುಲೈ 22: ಮುದ್ರಾಡಿ ಶ್ರೀ ಆದಿಶಕ್ತಿ ದೇವಸ್ಥಾನದ ಧರ್ಮದರ್ಶಿ ಧರ್ಮಯೋಗಿ ಕರ್ಮಯೋಗಿ ಶ್ರೀ ಮೋಹನ್ ಸ್ವಾಮೀಜಿ ಬುಧವಾರ ರಾತ್ರಿ ಹೃದಯ ಘಾತರ್ದ್ ತೀರ್ ಪೋಯೆರ್ .

ಮೃತೆರೆಗ್ ಬೊಡೆದಿ, ಕರ್ನಾಟಕ ನಾಟಕ ಅಕಾಡೆಮಿ ಯ ಮಾಜಿ ಸದಸ್ಯ ರಾಷ್ಟಮಟ್ಟದ ರಂಗ ನಟ ನಿರ್ದೇಶಕ ಸುಕುಮಾರ್ ಮೋಹನ್ ಸಹಿತ ಮೂಜಿ ಆನ್ ಒಂಜಿ ಪೊಣ್ಣು ಮಗಲ್ ಉಲ್ಲೆರ್.

ಸನಾತನ ಯಕ್ಷಾಲಯ (ರಿ.) ಕುಡ್ಲ ಯೂಟ್ಯೂಬ್ ಲೈವ್ ಕಾರ್ಯಕ್ರಮ

ಕುಡ್ಲ, ಜುಲೈ 22: ಸನಾತನ ಯಕ್ಷಾಲಯ (ರಿ.) ಕುಡ್ಲ ನೆತ್ತ 12ನೇ ವಾರ್ಷಿಕೋತ್ಸವದ ಪ್ರಯುಕ್ತ ಯೂಟ್ಯೂಬ್ ಲೈವ್ ಕಾರ್ಯಕ್ರಮತಾರೀಖ್ 29/08/2021 ನೇ ಐತಾರ ಕಾಂಡೆ 10 ಗಂಟೆರ್ದ್ 10:30 ಮುಟ ಪೂರ್ವರಂಗ ಪಣಂಬೂರು ವೆಂಕಟ್ರಯ ಐತಾಳ್ ಸಾಂಸ್ಕೃತಿಕ ಪ್ರತಿಷ್ಠಾನ ಒಡಿಪು ವತಿರ್ದ್ ಪತ್ತ್ ಓಡ್ಡೋಲಗ ಅಪೂರ್ವ ಸಂಗಮ ಮಧ್ಯಾಹ್ನ 1 ಗಂಟೆರ್ದ್ 3 ಗಂಟೆ ಮುಟ ಸಂಸ್ಥೆದ ಕಲಾವಿದೆರೆರ್ದ್ ಯಕ್ಷಗಾನ ತಾಳಮದ್ದಳೆ ” ಅನಭಿಷಿಕ್ತ ದೊರೆ ” ಅಂಚನೇ ಬೈಯ್ಯ 3 ಗಂಟೆರ್ದ್ 4 ಗಂಟೆ ಮುಟ ಸಭಾ ಕಾರ್ಯಕ್ರಮ, ಮಾನದಿಗೆ ಬೊಕ್ಕ ಸಂಸ್ಮರಣೆ ಕಾರ್ಯಕ್ರಮ ಬೊಕ್ಕ ಬೈಯ್ಯ 4 ಗಂಟೆರ್ದ್ ರಂಗ ಪ್ರವೇಶ ಬೊಕ್ಕ ಸಂಸ್ಥೆದ ಸದಸ್ಯೆರೆರ್ದ್ “ಸಮಗ್ರ ವಾಲಿ ” ಯಕ್ಷಗಾನ ನಡಪರೆ ಉಂಡು.

ಹಂತ ಹಂತವಾದ್ ತುಳು, ಬ್ಯಾರಿ, ಕೊಂಕಣಿ ಭವನ ನಿರ್ಮಾಣ : ಸಚಿವ ಕೋಟ ಶ್ರೀನಿವಾಸ ಪೂಜಾರಿ

ಕುಡ್ಲ, ಜುಲೈ 21: ತುಳು, ಬ್ಯಾರಿ, ಕೊಂಕಣಿ ಸಾಂಸ್ಕೃತಿಕ ಭವನನ್ ಹಂತಹಂತವಾದ್ ನಿರ್ಮಾಣ ಮಲ್ಪರೆ ಇತ್ತೆ ಕ್ರಮ ದೆತೊoದ ಪಂದ್ ಜಿಲ್ಲಾ ಉಸ್ತುವಾರಿ ಸಚಿವೆರಾಯಿನ ಕೋಟ ಶ್ರೀನಿವಾಸ ಪೂಜಾರಿ ಪಂಡೆರ್ .

ನಗರದ ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣಡ್ ತುಳು, ಬ್ಯಾರಿ, ಕೊಂಕಣಿ ಅಕಾಡಮಿ ಗುರ್ಕಾರ್ಲೆನ ಒಟ್ಟುಗು ಭವನದ ನಿರ್ಮಾಣ ಬಗ್ಗೆ ಸೋಮವಾರ ಅಟ್ಟನೆ ಮಲ್ತಿನ ಸಭೆಟ್ ಗುರ್ಕಾರ್ಲಾದ್ ಆರ್ ಪಾತೆರಿಯೆರ್ .

ಜಿಲ್ಲಾ ರಂಗಮಂದಿರದ ಒಟ್ಟುಗು ತುಳು, ಬ್ಯಾರಿ ಬೊಕ್ಕ ಕೊಂಕಣಿ ಸಾಂಸ್ಕೃತಿಕ ಭವನದ ನಿರ್ಮಾಣಗ್ ಸರಕಾರರ್ದ್ ಇತ್ತೆ ಅನುದಾನ ಬುಡುಗಡೆ ಆತುಂಡು . ಆಯಾ ಅಕಾಡಮಿ ಭವನದ ನಿರ್ಮಾಣಗ್ ಸಂಬಂಧ ಪಟ್ಟಿನoಚ ಒಪ್ಪಿಗೆ ಕೊರ್ತೆರ್ ಪಂದ್ ಪಂಡೆರ್

ಜಿಲ್ಲಾಧಿಕಾರಿ ಡಾ.ರಾಜೇಂದ್ರ ಕೆ.ವಿ. ಬೊಕ್ಕ ಶಾಸಕ ಡಾ.ಭರತ್ ಶೆಟ್ಟಿ, ಉಪವಿಭಾಗಾಧಿಕಾರಿ ಮದನ್ ಮೋಹನ್, ತುಳು ಅಕಾಡಮಿದ ಗುರ್ಕಾರ್ಲಾಯಿನ ಅಧ್ಯಕ್ಷ ದಯಾನಂದ ಕತ್ತಲ್‌ಸಾರ್, ಬ್ಯಾರಿ ಅಕಾಡಮಿ ಗುರ್ಕಾರ್ಲಾಯಿನ ರಹೀಂ ಉಚ್ಚಿಲ, ಕೊಂಕಣಿ ಅಕಾಡಮಿ ಗುರ್ಕಾರ್ಲಾಯಿನ ಡಾ. ಜಗದೀಶ್ ರೈ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕ ರಾಜೇಶ್, ತಹಶೀಲ್ದಾರೆರ್ ಬೊಕ್ಕ ಬೇತೆ ಅಧಿಕಾರಿಲು ಪಾಲ್ ಪಡೆದಿತ್ತೆರ್.