ಕುಡ್ಲದ ಸುದ್ದಿ | Mangalore News

ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಗುಜ್ಜರಕೆರೆಕ್ಕ್ ಭೇಟಿ

ಕುಡ್ಲ : ಕುಡ್ಲ ಮಹಾನಗರಪಾಲಿಕೆದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಮೇರ್ ಇಂಚೊಗು ಗುಜ್ಜರಕೆರೆಕ್ಕ್ ಭೇಟಿ ಕೊರಿಯೆರ್.

ಈ ಪೊರ್ತುಡು ಗುಜ್ಜರಕೆರೆ ನೀರ್ ದ ಶುದ್ಧತೆ, ಕೈತಲ್ ದೇವಸ್ಥಾನದ ದೇವೆರ್ನ ಜಲಕಗ್ ಕೆರೆತ ನಡುಟ್ಟು ತೀರ್ಥ ಕೆರೆತ ನಿರ್ಮಾಣ, ಕೆರೆತ ಸುತ್ತ
ಬರ್ಸದ ನೀರ್ ಒಟ್ಟು ಮಲ್ಪುನ
ವ್ಯವಸ್ಥೆ ನಿರ್ಮಾಣ ಮಲ್ಪುನ ಬಗ್ಗೆ ಸಾರ್ವಜನಿಕೆರ್ ಮನವಿ ಮಲ್ತೆರ್.

ಗುಜ್ಜರಕೆರೆ ತೀರ್ಥ ಸಂರಕ್ಷಣಾ ವೇದಿಕೆದ ಉಪಾಧ್ಯಕ್ಷೆರ್ ಸಿ. ಪಿ. ದಿನೇಶ, ಪ್ರಧಾನ ಕಾರ್ಯದರ್ಶಿ ಪಿ. ನೇಮು ಕೊಟ್ಟಾರಿ ಗುಜ್ಜರಕೆರೆ, ಸ್ಥಳೀಯ ಕಾರ್ಪೊರೇಟರ್ ಭಾನುಮತಿ ಪಿ.ಎಸ್, ಸ್ಥಳೀಯೆರ್ ಉಮಾಶಂಕರ, ಉದಯಶಂಕರ್ ಸುಜಾತಾ, ದಿನೇಶ್, ಜ್ಞಾನೇಶ್ , ಪ್ರಸಾದ್ ಹಳೇಕೋಟೆ ಶ್ರೀ ಮಾರಿಯಮ್ಮ ಕ್ಷೇತ್ರದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಬಿ.ಅಶೋಕ್ ಕುಮಾರ್ ಇತ್ತೆರ್.

ಅಯೋಧ್ಯೆಡ್ ಕಾರ್ಯಕ್ರಮ: ಕುಡ್ಲ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಬಂದೋಬಸ್ತ್

ಕುಡ್ಲ : ಅಯೋಧ್ಯೆಡ್ ಶ್ರೀರಾಮನ ಮೂರ್ತಿ ಪ್ರತಿಷ್ಠಾಪನೆದ ನಿಲೆಟ್ಟ್ ಕುಡ್ಲ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಒವ್ವೇ ರೀತಿದ ಬೊರ್ಚಾಂದಿನ ಘಟನೆ ಆವಂದಿಲೆಕ ಜಿಲ್ಲಾಡಳಿತ ಮಸ್ತ್ ಕಡೆಟ್ಟ್ ಬಂದೋಬಸ್ತ್ ಮಲ್ದ್ಂಡ್.

ಸಾರ್ವಜನಿಕೆರ್ನ ಎಡ್ಡೆಪ್ಪುಗಾದ್ ಬೊಕ್ಕ ಕಾನೂನು ವ್ಯವಸ್ಥೆ ಮಲ್ಪುನ ದೃಷ್ಟಿಡ್ ಕ್ರಮಕ್ಲೆನ್ ದೆತೊಂದೆರ್.

ಕುಡ್ಲ ಪೇಂಟೆಡ್ ದೇವಸ್ಥಾನ ಬೊಕ್ಕ ಮಂದಿರಡ್ ಒಟ್ಟು 196 ಕಡೆಟ್ಟ್ ಪೂಜೆ, ಧಾರ್ಮಿಕ ಕಾರ್ಯಕ್ರಮ ನಡಪುನ ಜಾಗೆನ್ ಗುರುತಿಸಾದೆರ್. 131 ಸೂಕ್ಷ್ಮ ಪ್ರದೇಶಡ್ ರಾತ್ರೆ ಪಗೆಲ್ ಪಿಕೆಟಿಂಗ್ ಗ್ ಅಧಿಕಾರಿಲೆನ್ ಪಾಡ್ದೆರ್.
 ಸಿಟಿತ್ತ 57 ಸೆಕ್ಟರ್ ಮೊಬೈಲ್ನ್ 24 ಗಂಟೆ ರಾತ್ರೆ ಪಗೆಲ್ ಗಸ್ತ್ ಡ್ ಇಪ್ಪುನ ವ್ಯವಸ್ಥೆ ಮಲ್ತ್ ದೆರ್.
 14 ಕಡೆಟ್ಟ್ ಚೆಕ್ ಪಾಯಿಂಟ್ ನಿಯೋಜನೆ ಮಲ್ತ್ ದೆರ್.
 9 ಸಿಎಆರ್ ಬೊಕ್ಕ 3 ಕೆ.ಎಸ್.ಆರ್.ಪಿ ತುಕಡಿ ನಿಯೋಜನೆ ಮಲ್ತ್ ದೆರ್.
 ನಡುರಾತ್ರೆ ಬೊಕ್ಕ ಕಾಂಡೆ ವಿಶೇಷ ಗಸ್ತು ವ್ಯವಸ್ಥೆ ಮಲ್ತ್ ದೆರ್.
 ಕುಡ್ಲ ಪೇಂಟೆದ ಮಾತ ಸಾರ್ವಜನಿಕ ಜಾಗೆಡ್ ವಿಧ್ವಂಸಕ ತಪಾಸಣಾ ತಂಡರ್ದ್ ತಪಾಸಣೆ ನಡಪಾವೆರ್.
 ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಒವ್ವೇ ರೀತಿದ ಮೆರವಣಿಗೆ, ರ‌್ಯಾಲಿಗ್ ಅನುಮತಿ ಇಜ್ಜಿ.
 ಮಾತ ಪೊಲೀಸ್ ಠಾಣೆಡ್ ಆಯಾ ಎ.ಸಿ.ಪಿಲೆನ ಮಾರ್ಗದರ್ಶನಡ್ ಶಾಂತಿ ಸಭೆ ದೀತೆರ್.
 ಪ್ರತೀ ಪೊಲೀಸ್ ಠಾಣಾ ಮಟ್ಟಡ್ ಸಾರ್ವಜನಿಕೆರೆಡ ವಿಶ್ವಾಸ ಪುಟ್ಟಾವುನೆಟ್ಟ್ ಏರಿಯಾ ಡಾಮಿನೇಷನ್ ಬೊಕ್ಕ ರೂಟ್ ಮಾರ್ಚ್ ದೆತೊಂದೆರ್.
 ಮಹಾನಗರ ಪಾಲಿಕೆದೊಟ್ಟಿಗೆ ಸಮನ್ವಯ ಸಾದಿಸಾದ್ ಫ್ಲೆಕ್ಸ್, ಬ್ಯಾನರ್ ಬಂಟಿಂಗ್ಸ್ ಅಳವಡಿಕೆದ ಮಿತ್ತ್ ಸೂಕ್ತ ನಿಗಾ ದೀತೆರ್. ಬೊಕ್ಕ ಆಯೋಜಕೆರೆಗ್ ಅವೆತ್ತ ಭದ್ರತೆನ್ ಖಚಿತ ಮಲ್ಪೆರೆ ಸೂಚಿಸಾದೆರ್.
 ಮಂಗಳೂರು ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಜ. 21 ನಡುರಾತ್ರಿರ್ದ್ ಜ.23 ಕಾಂಡೆ ಮುಟ್ಟ ಮಾತ ಬಾರ್ ಬೊಕ್ಕ ಮದ್ಯ ಮಾರಾಟ ಮಳಿಗೆಲೆನ್ ಮುಚ್ಚೆರೆ ಜಿಲ್ಲಾಧಿಕಾರಿಲೆಗ್ ಪ್ರಸ್ತಾವನೆ ಕೊರ್ತೆರ್.
 ಒಟ್ಟಾರೆಯಾದ್ 3-ಡಿಸಿಪಿ, ೦6-ಎಸಿಪಿ, 11-ಪಿ.ಐ ಬೊಕ್ಕ 37-ಪಿ.ಎಸ್.ಐ ದರ್ಜೆದ ಅಧಿಕಾರಿ ಬೊಕ್ಕ 781 ಪೊಲೀಸ್ ಸಿಬ್ಬಂದಿಲೆನ್ ಬಂದೋಬಸ್ತ್ ಗ್ ಪಾಡ್ದೆರ್.

ಕುಡ್ಲ ತುಳು ಭವನಡ್ ಇನಿ ಅಮೃತ ನುಡಿನಮನ: ಪಾಲ್ ಪಡೆಯೆರೆ ಉಲ್ಲೆರ್ ಮಾಜಿ ಸಿಎಂ ವೀರಪ್ಪ ಮೊಯ್ಲಿ

ಇಂಚಿಪಗ್ ದೇವೆರೆ ಪಾದೊ ಸೇರಿನ ಮಲ್ಲ ವಿದ್ವಾಂಸೆರ್, ಸಾಹಿತಿ, ಶಿಕ್ಷಕೆರ್ ಪ್ರೊ.ಅಮೃತ ಸೋಮೇಶ್ವರ ಅರೆಗ್ ನುಡಿ ನಮನ ಸಂದಾವುನ ಲೇಸ್ ಜ.13 ಸನಿವಾರ ಮದ್ಯಾಹ್ನ 3.00 ಗಂಟೆಗ್ ಉರ್ವಾಸ್ಟೋರ್ ದ ತುಳು ಭವನಡ್ ನಡಪೆರೆ ಉಂಡು.

ನುಡಿನಮನ ಕಾರ್ಯಕ್ರಮಡ್ ಸ್ಪೀಕರ್ ಯು.ಟಿ ಖಾದರ್, ಮಾಜಿ ಮುಖ್ಯಮಂತ್ರಿ ಎಂ.ವೀರಪ್ಪ ಮೊಯ್ಲಿ, ಸಂಸದೆರ್ ನಳಿನ್ ಕುಮಾರ್ ಕಟೀಲ್ , ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಶಾಸಕೆರಾಯಿನ ವೇದವ್ಯಾಸ ಕಾಮತ್, ವೈ.ಭರತ್ ಶೆಟ್ಟಿ, ಹರೀಶ್ ಕುಮಾರ್ , ಮಂಜುನಾಥ್ ಭಂಡಾರಿ, ಕುಡ್ಲ ವಿ.ವಿ.ಕುಲಪತಿ ಪ್ರೊ.ಜಯರಾಜ್ ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ತುಳು ಪರಿಷತ್ ಪ್ರಕಟಣೆ ತೆರಿಪಾದ್ಂಡ್.

ದೇವೆರೆ ಪಾದೋ ಸೇರಿನ ತುಳುನಾಡ್ ದ ಬೊಳ್ಳಿ ಪ್ರೊ. ಅಮೃತ ಸೋಮೇಶ್ವರ

ಕುಡ್ಲ: ತುಳುನಾಡ ಮಲ್ಲ ಬೊಳ್ಳಿ ಅಮೃತ್ ಸೋಮೇಶ್ವರ್ ಇನಿ ಕಾಂಡೆ ದೇವೆರೊ ಪಾದ ಸೇರಿಯೆರ್.

ತುಳುನಾಡ್ ದ ಒರಿ ಪುಗರ್ತೆದ ಸಾಹಿತಿ ಅತ್ತಂದೆ ಜಾನಪದ ವಿದ್ವಾಂಸೆರ್, ತುಳುಟು ತಂಬಿಲ ರಂಗೀತ ಪನ್ಪಿನ ಕವನ ಸಂಕಲನ ಸುಮಾರ್ ನಾಟಕೊಲು, ಅನುವಾದ ಗ್ರಂಥೊಲು, ಪಾಡ್ದನ ಸಂಗ್ರಹ, ತುಳು ಜಾನಪದ ಲೇಖನೊಲು, ಯಕ್ಷಗಾನ ಗ್ರಂಥೊಲೆನ್ ಬರೆತೆರ್.

ರಘುನಾಥ ಎಂ. ವರ್ಕಾಡಿ ಬರೆಯಿನ “ಸೂರ್ಯೆ ಚಂದ್ರೆ ಸಿರಿ” ತುಳು ಜನಪದ ಕಥೆತ್ತ ಬೂಕು ಬುಡುಗಡೆ

ಕುಡ್ಲ ಆಕೃತಿ ಆಶಯ ಪ್ರಕಾಶನ ಮೊಕ್ಲೆನ ಮುತಾಲಿಕೆಡ್ ರಘುನಾಥ ಎಂ. ವರ್ಕಾಡಿ ಬರೆಯಿನ “ಸೂರ್ಯೆ ಚಂದ್ರೆ ಸಿರಿ” ತುಳು ಜನಪದ ಕಥೆತ್ತ ಬೂಕು ಬುಡುಗಡೆ ಲೇಸ್ ಜ. 4 ಗುರುವಾರ ಕುಡ್ಲದ ಪತ್ರಿಕಾ ಭವನಡ್ ನಡತ್ಂಡ್.

ಶ್ರೀನಿವಾಸ ವಿಶ್ವವಿದ್ಯಾನಿಲಯ ಮುಕ್ಕದ ಪ್ರೊ.ಎಂ.ಎಸ್.ಕೋಟ್ಯಾನ್ ಅಧ್ಯಕ್ಷತೆಡ್ ಬಂಟ್ವಾಳದ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರದ ಸ್ಥಾಪಕ ಅಧ್ಯಕ್ಷೆರ್ ಡಾ. ತುಕಾರಾಮ ಪೂಜಾರಿ ಕೃತಿ ಲೋಕಾರ್ಪಣೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್, ಈ ಬೂಕುಡ್ ಸುಮಾರ್ 30 ದಾತ್ ತುಳು ಕಥೆಕ್ಕುಲು ಉಂಡು. ರಘುನಾಥ ಎಂ. ವರ್ಕಾಡಿ ಮೇರ್ ತುಳು ಬಾಸೆದ ಮಲ್ಲ ಅಭಿಮಾನಿ. ಮೆರೆನ ಕಥೆಕ್ಕುಲು ಜನಕ್ಲೆನ ಮನಸ್ಸ್‌ನ್ ಒಯ್ಪುಂಡು. ನನಾತ್ ತುಳು ಬೂಕುನ್ ಮೇರ್ ಬುಡುಗಡೆ ಮಲ್ಪುಲೆಕ್ಕ ಆವಡ್ ಪಂದ್ ಪಂಡೆರ್.

ಈ ಪೊರ್ತುಡು ನಮ್ಮ ಕುಡ್ಲ ಚಾನೆಲ್‌ದ ನಿರ್ದೇಶಕೆರ್ ಸುರೇಶ್ ಬಿ. ಕರ್ಕೇರ, ಪ್ರಗತಿಪರ ಕೃಷಿಕೆರ್ ಬೊಕ್ಕ ನಾರಾಯಣ ಗುರು ಯುವ ವೇದಿಕೆ ಕುಡ್ಲದ ಸಲಹಾ ನಿರ್ದೇಶಕೆರ್ ನೀಲಯಂ ಯಂ. ಅಗರಿ ಬೊಕ್ಕ ರಘುನಾಥ ಎಂ. ವರ್ಕಾಡಿ ಇತ್ತೆರ್.

ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಇ ಪೇಪರ್ ಬುಡುಗಡೆ ಲೇಸ್

ಕುಡ್ಲ: ಕುಡ್ಲ ಪ್ರೆಸ್ ಕ್ಲಬ್‌ದ ಗೃಹ ಪತ್ರಿಕೆ “ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಇ-ಪೇಪರ್ ಬುಡುಗಡೆ ಲೇಸ್ ಜನವರಿ 4 ಕ್ಕ್ ಕುಡ್ಲದ ಪತ್ರಿಕಾ ಭವನಡ್ ನಡತ್ಂಡ್.

ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಈ ಪತ್ರಿಕೆನ್ ಬುಡುಗಡೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್, ಮಸ್ತ್ ವರ್ಷರ್ದ್ ಕುಡ್ಲ ಪ್ರೆಸ್ ಕ್ಲಬ್‌ರ್ದ್ ಪತ್ರಕರ್ತೆರ್ ಪೂರ ಸೇರ್ದ್ ಬೇತೆ ಬೇತೆ ಕಾರ್ಯಕ್ರಮದ ಮುಕೇನ ಸಾಧನೆ ಮಲ್ತಿನಕ್ಲೆನ್ ಗುರ್ತಿಸಾವೊಂದು ಬರೊಂದುಲ್ಲೆರ್. ಈ ಮಾತ ಕಾರ್ಯಕ್ರಮ ದಾಖಲೆ ಮಲ್ಪುನ ಅಗತ್ಯತೆ ಉಂಡು. ಉಂದು ಒಂಜಿ ಭಾರೀ ಎಡ್ಡೆ ಬೇಲೆ ಪಂದ್ ಪಂಡೆರ್.

ಮಾಜಿ ಎಂಎಲ್‌ಸಿ ಕ್ಯಾ.ಗಣೇಶ್ ಕಾರ್ಣಿಕ್ “ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಪತ್ರಿಕೆಗ್ ಎಡ್ಡೆಪ್ಪುನು ಬಯಕ್ಯೆರ್.

ಈ ಪೊರ್ತುಡು ಕುಡ್ಲ ಪ್ರೆಸ್ ಕ್ಲಬ್‌ದ ಅಧ್ಯಕ್ಷೆರ್ ಪಿ.ಬಿ.ಹರೀಶ್ ರೈ, ವಾರ್ತಾ ಇಲಾಖೆದ ಹಿರಿಯ ಸಹಾಯಕ ನಿರ್ದೇಶಕೆರ್ ಖಾದರ್ ಶಾ, ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರ್ ಶ್ರೀನಿವಾಸ ನಾಯಕ್ ಇಂದಾಜೆ, ಪತ್ರಿಕಾ ಭವನ ಟ್ರಸ್ಟ್ ಅಧ್ಯಕ್ಷೆರ್ ರಾಮಕೃಷ್ಣ ಆರ್ ಲೇಸ್‌ಡ್ ಪಾಲ್ ಪಡೆದ್ ಇತ್ತೆರ್.