ಕುಡ್ಲದ ಸುದ್ದಿ | Mangalore News

ಸಸಿಹಿತ್ಲು ಭಾಸ್ಕರ ಸುವರ್ಣರೆಗ್ ವಿಶ್ವೇಶತೀರ್ಥ ಜೀವಮಾನ ಪ್ರಶಸ್ತಿ

ಕುಡ್ಲ : ಸಮಾಜಡ್ ಎಡ್ಡೆ ಬೇಲೆ ಮಲ್ತಿನ ಸಜ್ಜನ ಮಹೋದಯರೆನ್ ಗುರುತಿಸಾದ್ ಕಲ್ಕೂರ ಪ್ರತಿಷ್ಠಾನ ಪ್ರತಿವರ್ಷ ಕೊರ್ಪಿನ “ಪೇಜಾವರ ಶ್ರೀ ವಿಶ್ವೇಶತೀರ್ಥ ಜೀವಮಾನ ಪ್ರಶಸ್ತಿ”ನ್ ಬೊಂಬೈದ ಪುಗರ್ತೆದ ರಂಗನಟೆ, ಸಮಾಜ ಸೇವಕೆರ್ ಭಾಸ್ಕರ ಸುವರ್ಣ ಸಸಿಹಿತ್ಲು ಪಡೆಯೊಂದೆರ್.

ಕಲ್ಕೂರ ಪ್ರತಿಷ್ಠಾನ ಒಡಿಪುದ ಪೇಜಾವರ ಸ್ವಾಮಿಲೆನ ಕೈರ್ದ್ ಪ್ರಶಸ್ತಿನ್ ಪಡೆನ ಭಾಸ್ಕರ ಸುವರ್ಣ ಸಸಿಹಿತ್ಲು ಮೇರೆಗ್ ಶ್ರೀಕೃಷ್ಣ ಪರಮಾತ್ಮನ ಆಶೀರ್ವಾದದೊಟ್ಟಿಗೆ ಪ್ರಶಸ್ತಿನ್ ಹಸ್ತಾಂತರ ಮಲ್ತೆರ್.

ಮಸ್ತ್ ಸಂಘಟೆನೆದೊಟ್ಟುಗೆ ತನ್ನನ್ ತಾನ್ ತೊಡಗಿಸಿಸಾವೊಂದು ನಾಡು -ನುಡಿ ಸೇವೆಗೆ ತನ್ನನ್ ಅರ್ಪಣೆ ಮಲ್ತೊಂದು ಬತ್ತಿನಾರ್ ಭಾಸ್ಕರ್ ಸುವರ್ಣ.

ಈ ಪ್ರಶಸ್ತಿ ವಿತರಣೆದ ಪೊರ್ತುಡು ಚಾವಡಿಡ್ ಶ್ರೀ ಪೇಜಾವರ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ, ಶಿರೂರು ಮಠದ ಸ್ವಾಮೀಜಿ, ಸಂಘಟಕೆರ್ ಡಾ. ಎಂ ಮೋಹನ‌ ಆಳ್ವ, ಶಾಸಕೆರ್ ವೇದವ್ಯಾಸ ಕಾಮತ್, ಕುಡ್ಲ ನಗರದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪಡೆನ ಲಕ್ಮೀಶ ತೋಳ್ಪಾಡಿ,ಕಲ್ಕೂರ ಪ್ರತಿಷ್ಠಾನದ ಮುಖ್ಯಸ್ಥೆರ್ ಪ್ರದೀಪ ಕುಮಾರ್ ಕಲ್ಕೂರ ಇತ್ತೆರ್.

ಅಶಕ್ತರೆಗ್ ಎಂ.ಆರ್.ಜಿ. ಗ್ರೂಪ್ ರ್ದ್ 4 ಕೋಟಿ ರೂ. ನೆರವು : ಕೆ. ಪ್ರಕಾಶ್ ಶೆಟ್ಟಿ

ಕುಡ್ಲ: “ಎನ್ನ ಆದಾಯದ ಒಂಜಿ ಭಾಗನ್ ಸಮಾಜಗ್ ಮೀಸಲ್ ದೀದ್ ಅಶಕ್ತೆರ್ ಬೊಕ್ಕ ಆರ್ಥಿಕವಾದ್ ಕಷ್ಟ ಇಪ್ಪುನಕ್ಲೆಗ್ ಶಿಕ್ಷಣ, ಅರೋಗ್ಯ ಕೊರ್ಪಿನ ಉದ್ದೇಶಡ್ ಎಂ.ಆರ್.ಜಿ. ಗ್ರೂಪ್ ಮುಖೆನ ಪ್ರತಿವರ್ಷ ನೆರವು ಪಟ್ಟುನ ಕಾರ್ಯಕ್ರಮಗ್ ಚಾಲನೆ ಕೊರ್ತೆ ಉಲ್ಲ. ಸುರುಟ್ಟು 1 ಕೋಟಿ 25 ಲಕ್ಷ ರೂ. ನೆರವು ಕೊರ್ದು ಇತ್ತ. ಈ ಸರ್ತಿ 4 ಕೋಟಿ ರೂ. ನೆರವು ಕೊರಿಯೆರೆ ಎದುರು ಬೈದ. ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆದ ಮಾತ ಸಂಘ ಸಂಸ್ಥೆಲೆಗ್ ನೆತ್ತ ಅರ್ಜಿ ನಮೂನೆನ್ ಕಡಪಾದ್ ಪ್ರತೀ ಭಾಗರ್ದ್ 25 ದಾತ್ ಅರ್ಜಿನ್ ಸ್ವೀಕಾರ ಮಲ್ತ್ ಅವೆನ್ ಪರಿಶೀಲಿಸಾದ್ 2000 ಅರ್ಜಿಡ್ 1800 ಅರ್ಜಿಲೆನ್ ಸ್ವೀಕಾರ ಮಲ್ತ್ ದ. ಸಮಾಜಡ್ ಬೇನೆ ಪಡೆನಕುಲು ಅಶಕ್ತೆರೆಗ್ ನೆರವು ಕೊರ್ಪಿನ ಉದ್ದೇಶರ್ದ್ ಈ ಕಾರ್ಯಕ್ರಮ ದೀಯೊಂದ ಪಂದ್ ಎಂ.ಆರ್.ಜಿ. ಗ್ರೂಪ್ ಚೇರ್ ಮೆನ್ ಕೆ. ಪ್ರಕಾಶ್ ಶೆಟ್ಟಿ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರಿಯೆರ್.

“ಆಶಾ ಪ್ರಕಾಶ್ ಶೆಟ್ಟಿ ಸಹಾಯ ಹಸ್ತ ಯೋಜನೆದ ನೆರವು ಪ್ರದಾನ ಕಾರ್ಯಕ್ರಮ ಡಿಸೆಂಬರ್ 25 ಬಯ್ಯಗ್ 3 ಗಂಟೆಗ್ ಕುಡ್ಲದ ಗೋಲ್ಡ್ ಫಿಂಚ್ ಸಿಟಿಟ್ ನಡಪೆರೆ ಉಂಡು. ಕಾರ್ಯಕ್ರಮಡ್ ಚಲನಚಿತ್ರ ನಟೆ, ನಿರ್ದೇಶಕೆರ್ ರಮೇಶ್ ಅರವಿಂದ್, ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಗುರ್ಕಾರ್ಲು ಡಾ.ಎಂ.ಮೋಹನ್ ಆಳ್ವ, ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಆಡಳಿತ ನಿರ್ದೇಶಕೆರ್ ಗೌರವ್ ಪಿ. ಶೆಟ್ಟಿ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.

ನೆರವು ಪಟ್ಟುನ ಲೇಸ್ ಡ್ 25 ಕೌಂಟರ್ ಇಪ್ಪುಂಡು. ಅಲ್ಪ ಫಲಾನುಭವಿಲು ತಮ್ಮ ಪುದರ್ ಪಂದ್ ಬೊಕ್ಕ ವಿತರಣೆ ಮಲ್ತಿನ ಟೋಕನ್ ತೊಜಪಾದ್ ಚೆಕ್ ದೆತೊನೊಲಿ ಪಂದ್ ಪಂಡೆರ್.

ಮಾನವೀಯ ನೆರವು:

ಬೆಂಗ್ಲೂರುಡು ಕಂಬುಲ ತೂದು ಊರುಗ್ ಪಿರ ಬನ್ನಗ ಆಕ್ಸಿಡೆಂಡ್ ಆದ್ ತೀರ್ ಪೋಯಿನ ಕುಟುಂಬದಕ್ಲೆಗ್ ಬೊಕ್ಕ ಗಾಯ ಆಯಿನಕ್ಲೆಗ್ ಮಾನವೀಯ ನಿಲೆಟ್ಟ್ ನೆರವು ಕೊರೊಂದು ಉಲ್ಲ ಪಂದ್ ಆರ್ ಪಂಡೆರ್.

ಕಾಪು ಶಾಲೆಡ್ ಶಿಕ್ಷಕೆರ್ನ ನೇಮಕ:

ಸಮಾಜ ಸೇವಾ ರತ್ನ ದಿ. ಕಾಪು ಲೀಲಾಧರ ಶೆಟ್ರ್ ನಡಪಾವೊಂದು ಇತ್ತಿನ ಶಾಲೆಡ್ ಶಿಕ್ಷಕರ ಕೊರತೆ ಇಪ್ಪುನೆದಾತ್ರ ಶಿಕ್ಷಕೆರ್ನ ನೇಮಕ ಮಲ್ತ್ ಖರ್ಚಿನ್ ಆರೇ ತೂವೊಂದಿನ ನಿಲೆಟ್ಟ್ ನನ ದುಂಬಗ್ ಶಿಕ್ಷಕೆರೆಗ್ ಸಂಬಳದ ಸಮಸ್ಯೆ ಆವೆರೆ ಬಲ್ಲಿ ಪಂದ್ ಬೊಕ್ಕ ಜೋಕುಲು ವಿದ್ಯಾ ವಂಚಿತ ಆವೆರೆ ಬಲ್ಲಿ ಪಂದ್ ಎಂದು ಈ ನೆರವು ಕೊರೊಂದು ಉಲ್ಲ ಪಂದ್ ತೆರಿಪಾಯೆರ್.

ಡಿಜಿಟಲ್ ಗ್ಯಾಪ್ ನಿವಾರಣೆ:
ಬಂಟ್ವಾಳದ ಒಂಜಿ ಶಾಲೆಗ್ ಕಂಪ್ಯೂಟರ್ ಕೊರ್ಪುನ ಮುಖೆನ ಅಲ್ಪದ ಜೋಕ್ಲೆನ್ ಕಂಪ್ಯೂಟರ್ ಸಾಕ್ಷರೆರಾದ್ ಮಲ್ಪುನ ಪ್ರಯತ್ನ ಮಲ್ತೊಂದು ಉಲ್ಲ.

ಶೌಚಾಲಯ ನೆರವು:

ಕಾಪು ಕೈಪುಂಜಾಲ್ ಒಡಿಪು ಶ್ರೀ ಪೇಜಾವರ ಮಠದ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಗುರ್ಕಾರ್ಲು ಆದ್ ಇಪ್ಪುನ ವಿದ್ಯಾ ಸಾಗರ ಎಜ್ಯುಕೇಶನ್ ಟ್ರಸ್ಟ್ ಶಾಲೆಡ್ ಶೌಚಾಲಯ ನಿರ್ಮಾಣ.

ಕ್ರೀಡಾ ಪ್ರೋತ್ಸಾಹ:
ಅಂತಾರಾಷ್ಟ್ರೀಯ ಮಟ್ಟಡ್ ದೇಶನ್ ಪ್ರತಿನಿಧಿಸಾಯಿನ ನಮ್ಮ ಜಿಲ್ಲೆದ ಕ್ರೀಡಾಳು ಆಯುಷ್ ಶೆಟ್ಟಿ ಅಮೆರಿಕಾಡ್ ನಡತ್ತಿನ ವಿಶ್ವ ಜ್ಯೂನಿಯರ್ ಚಾಂಪಿಯನ್ ಶಿಪ್ ಡ್ ಕಂಚ್ ದ ಪದಕ ಪಡೆಯೊಂದೆರ್. ವಿಶ್ವ ಚಾಂಪಿಯನ್ ಶಿಪ್ ಡ್ ಭಾರತದ ಪತ್ತನೇ ಶಟ್ಲರ್ ಬೊಕ್ಕ ವಿಶ್ವ ಚಾಂಪಿಯನ್ ಶಿಪ್ ಡ್ ಪದಕ ಪಡೆನ ಕರ್ನಾಟಕ ಸುರುತ ಶಟ್ಲರ್ ಅರ್ಜುನ್ ಶೆಟ್ಟಿ. ಅರೆಗ್ ನೆರವು ಕೊರೊಂದುಲ್ಲ

ಶೈಕ್ಷಣಿಕ ಸಾಧಕೆರೆಗ್ ವಿದ್ಯಾರ್ಥಿ ವೇತನ:

ಪಿ.ಯು.ಸಿ.ಡ್ 600/600 ಅಂಕ ದೆತ್ತೊನ್ನ ಅನನ್ಯ ಬೊಕ್ಕ ಎಸ್.ಎಸ್.ಎಲ್.ಸಿ.ಡ್ 625/625 ಅಂಕ ಪಡೆನ ವೀಕ್ಷಿತಾ ಮೊಕ್ಲೆಗ್ ಶೈಕ್ಷಣಿಕ ಸಾಧನೆಗಾದ್ ವಿದ್ಯಾರ್ಥಿ ವೇತನ ಕೊರೊಂದುಲ್ಲ.

ಪುರುಷೋತ್ತಮ ಭಂಡಾರಿ ಲೇಸ್ ದ ಸುದಾರಿಕೆ ಮಲ್ತೆರ್.

ಡಿ.22-30: ಉರ್ವ ಶ್ರೀ ರಾಮ ಭಜನಾ ಮಂದಿರಡ್ ಏಕಾಹ ಭಜನೋಚ್ಚಯ

ಶ್ರೀ ರಾಮ ಭಜನಾ ಮಂದಿರ ಶ್ರೀ ಕೊರಗಜ್ಜ ಕ್ಷೇತ್ರ ಉರ್ವ ಬೋಳೂರು ಮೂಲು ಡಿ.22 ರ್ದ್ 30 ಮುಟ್ಟ 27ನೇ ವಾರ್ಷಿಕ ಏಕಾಹ ಭಜನೋಚ್ಚಯ ಉರ್ವ ಶ್ರೀ ರಾಮ‌ ಮಂದಿರಡ್ ನಡಪೆರೆ ಉಂಡು.

ಅಂಚನೆ ನಗರ ಭಜನೆ, ನೃತ್ಯ ಬಲಿ ಸೇವೆ, ಪಲ್ಲಕ್ಕಿ ಉತ್ಸವ, ತುಳಸಿ ಅರ್ಚನೆ, ಯಕ್ಷಗಾನ ಬಯಲಾಟ ನಡಪೆರೆ ಉಂಡು.

ಬೇತೆ ಬೇತೆ ಭಜನಾ ತಂಡೊಲು ಪಾಲ್ ಪಡೆದ್ ಈ ಭಜನೋಚ್ಚಯಡ್ ಪಾಲ್ ಪಡೆಯೆರೆ ಉಲ್ಲೆರ್.

ಮಾತ ಭಕ್ತಾದಿಲು ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್, ತನು, ಮನ, ಧನದೊಟ್ಟಿಗೆ ಸಹಕಾರ ಮಲ್ತ್, ಶ್ರೀ ಹರಿನಾಮ ಸಂಕೀರ್ಣಡ್ ಪಾಲ್ ಪಡೆದ್, ಶ್ರೀ ರಾಮ ದೇವೆರ್ನ ಪ್ರಸಾದನ್ ಸ್ವೀಕಾರ ಮಲ್ಪೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಮಧುರಗಾನ ಲೇಸ್

ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರ ಅರ್ಪಣೆ ಮಲ್ಪುನ ಮಧುರಗಾನ ಕಾರ್ಯಕ್ರಮದ ಸಂಚಿಕೆ ಡಿ.6 ತಾನಿ 6.30ಕ್ಕ್ ಪ್ರಸಾರ ಆವೆರೆ ಉಂಡು.

ಲತಾಚೇತನ್ ಅಶ್ವತ್ಥಕಟ್ಟೆ ಪಾಲ್ ಪಡೆದ್ ಪದ್ಯ ಪನಿಯೆರೆ ಉಲ್ಲೆರ್. ಡಿ.7 ತಾನಿ ಮಧ್ಯಾಹ್ನ 2.30ಕ್ಕ್ ನೆತ್ತ ಮರುಪ್ರಸಾರ ಆವೆರೆ ಉಂಡು.

ಡಿ.17: ತಿಬಾರ ಕೊಡಮಂದಾಯನ ನಡೆಟ್ಟ್ ತಿಬರಾಯನ

ಕುಡ್ಲ: ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಶಿಬರೂರು ದೇಲಂತಬೆಟ್ಟು ಮೂಲು ಡಿ.16ರ್ದ್‌ 23 ಮುಟ್ಟ ವಾರ್ಷಿಕ ಮಹೋತ್ಸವ ತಿಬರಾಯನ ನಡಪೆರೆ ಉಂಡು. ಶನಿವಾರ ಕಾಂಡೆ ನವಕ ಕಲಶಾಭಿಷೇಕ, ಮಹಾಪೂಜೆ ಆದ್ ರಾತ್ರೆ ಕೊಡಿ ಏರುಂಡು. ಡಿ.17 ತಾನಿ ತುಲಾಭಾರ ಸೇವೆ, ಕಾಂಡೆ ಶ್ರೀ ಉಳ್ಳಾಯ ದೈವದ ನೇಮೋತ್ಸವ, ಮಡಸ್ತಾನ ಸೇವೆ, ಕಂಚಿಲ್ ಸೇವೆ, ಅನ್ನಸಂತರ್ಪಣೆ, ರಾತ್ರೆ ಕೊಡಮಣಿತ್ತಾಯ ದೈವದ ನೇಮೋತ್ಸವ ನಡಪೆರೆ ಉಂಡು.

ಡಿ.18 ಕಾಂತೇರಿ ಜುಮಾದಿ ನೇಮೋತ್ಸವ, ಡಿ.19 ಸರಳ ಧೂಮಾವತಿ ನೇಮೋಚ್ಚಯ, 20 ಗು ಜಾರಂದಾಯ ದೈವದ ನೇಮೋಚ್ಚಯ, 21 ಕ್ಕೆ ಕೈಯ್ಯೂರು ಧೂಮಾವತಿ ದೈವದ ನೇಮೋಚ್ಚಯ, 22 ತಾನಿ ಪಿಲಿಚಾಮುಂಡಿ ದೈವದ ನೇಮೋಚ್ಚಯ, 23 ತಾನಿ ಕಾಂಡೆ ತುಲಾಭಾರ ಸೇವೆ, ಕೊಡಿ ಜಾವರೆ. ಮದ್ಯಾಹ್ನ ಅನ್ನಸಂತರ್ಪಣೆ ನಡಪೆರೆ ಉಂಡು. ಡಿ.24 ಐತಾರ ಕಟೀಲು ದುರ್ಗಾಪರಮೇಶ್ವರಿ ಕೃಪಾಪೋಷಿತ ಯಕ್ಷಗಾನ ಮಂಡಳಿರ್ದ್‌ ಯಕ್ಷಗಾನ ಬಯಲಾಟ ನಡಪೆರೆ ಉಂಡು. ಅಂಚನೆ ಕ್ಷೇತ್ರಡ್‌ ಜೀರ್ಣೋದ್ದಾರದ ಬೇಲೆಲ ಆವೊಂದು ಇತ್ತ್‌ದ್‌ ಮಾತೆರ್ಲ ಸಹಕಾರ ಕೊರೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ಡಿ.16,17: ಕರ್ನಾಟಕ ಶಿವ ಸೇನಾ ಸಮಿತಿದ ವಾರ್ಷಿಕೋತ್ಸವ

ಕುಡ್ಲ: 2022 ನೇ ಸಾಲ್‌ದ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಸಂಸ್ಥೆ ಕರ್ನಾಟಕ ಶಿವ ಸೇನಾ ಸಮಿತಿದ 95ನೇ ವರ್ಷದ ವಾರ್ಷಿಕೋತ್ಸವ ಡಿ.16 ಬೊಕ್ಕ 17 ತಾನಿ ನಡಪೆರೆ ಉಂಡು. ಡಿ.16 ಕಾಂಡೆ ಗಣಹೋಮ, ಧ್ವಜಾರೋಹಣ, ಶ್ರೀ ಸತ್ಯನಾರಾಯಣ ಪೂಜೆ , ಮಹಾಪೂಜೆ, ಬೊಕ್ಕ ಅನ್ನಸಂತರ್ಪಣೆ ನಡಪೆರೆ ಉಂಡು.

ಡಿ.17 ಕ್ಕ್ ವಾರ್ಷಿಕೋತ್ಸವದ ಸಮಾರಂಭ ನಡಪರೆ ಉಂಡು. ಅಂಚೆನೆ ಕೊಡಿಯಲ್‌ಬೈಲ್‌ ರಚನೆ ಬೊಕ್ಕ ನಿರ್ದೇಶನದ ಮೈತಿದಿ ತುಳು ನಾಟಕ ನಡಪೆರೆ ಉಂಡು. ಈ ವಾರ್ಷಿಕೋತ್ಸವಗ್‌ ತನು-ಮನ-ಧನದೊಟ್ಟುಗೆ ಸಹಕಾರ ಕೊರ್ದು, ಲೇಸ್‌ಡ್‌ ಎಚ್ಚಿನ ಸಂಖ್ಯೆಡ್‌ ಪಾಲ್‌ ಪಡೆಯೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗದ 36 ನೇ ಸಂಚಿಕೆ ಸರಣಿ ಕಾರ್ಯಕ್ರಮ ಡಿ.4 ತಾನಿ ಬಯ್ಯ 4.15ಕ್ಕೆ ಪ್ರಸಾರ ಆವೆರೆ ಉಂಡು ಒಡಿಪು ಚಿಟ್ಪಾಡಿಯ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನದ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಲೇಸ್ ನ್ ನಡಪಾದ್ ಕೊರಿಯೆರೆ ಉಲ್ಲೆರ್.

ಡಿ. 5 ತಾನಿ ಮಧ್ಯಾಹ್ನ 12.15ಕ್ಕ್ ನೆತ್ತ ಮರುಪ್ರಸಾರ‌ ಆಪುಂಡು.

ಅಪ್ಪ ಅಮ್ಮಗ್, ಗುರುಕುಲೆಗ್ ಸುರುಕು ಗೌರವ ಕೊರೊಡು : ನಟಿ ರಚಿತಾ ರಾಮ್

ಕಲ್ಪಾರ್ಥಿಲು ಪುಟ್ಟಾಯಿನ ಅಪ್ಪ ಅಮ್ಮಗ್ ಅಂಚೆನೆ ವಿದ್ಯೆ ಕಲ್ಪಾವುನ ಗುರುಕುಲೆಗ್ ಸುರುಕ್ಕು ಗೌರವ ಕೊರಿಯೆರೆ ಕಲ್ಪೊಡು ಪಂದ್ ಸಿನಿಮಾ ನಟಿ ರಚಿತಾ ರಾಮ್ ಪಂಡೆರ್. ಆರ್ ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಶಿಕ್ಷಣ ಸಂಸ್ಥೆದ ವತಿರ್ದ್ ನಡತ್ತಿನ ಭ್ರಮರ ಇಂಚರ ನುಡಿಪರ್ಬ ಕಾರ್ಯಕ್ರಮಡ್ ಸಿನಿಮಾ ಬೊಕ್ಕ ರಂಗಭೂಮಿ ಕಾರ್ಯಕ್ರಮಡ್ ಪಾತೆರಿಯೆರ್.

ನಟೆ ರಮೇಶ್ ಭಟ್ ಪಾತೆರ್ದ್ ಮಾತ ಜನಕ್ಲೆಡ ಒರಿ ಒರಿ ಕಲಾವಿದೆ ಇಪ್ಪುವೆ, ಅವು ಬೇತೆ ಬೇತೆ ರೀತಿಡ್ ಆದಿಪ್ಪುಆಸಕ್ತಿದಾಯಕ ಬೇಲೆನ್ ಅಪಗ ಸಾಧನೆ ಮಲ್ಪೆರೆ ಸಾಧ್ಯ ಪಂದ್ ಪಂಡೆರ್. ಈ ಪೊರ್ತುಡು ಉದ್ಯಮಿ ಮೋಹನ್ ಕುಮಾರ್ ಕುಡ್ಲ, ಗಿರೀಶ್ ಶೆಟ್ಟಿ ಕಟೀಲು, ಪ್ರಶಿಲ್ ಶೆಟ್ಟಿ ಕುಡ್ತಿಮಾರುಗುತ್ತು, ವೃಂದಾ ಹೆಗ್ಡೆ, ಕಮಲಾದೇವಿ ಪ್ರಸಾದ್ ಆಸ್ರಣ್ಣ, ಬಿಪಿನ್ ಚಂದ್ರ ಶೆಟ್ಟಿ ಕೊಡೆತ್ತೂರುಗುತ್ತು ಇತ್ತೆರ್.

ಉಪ ಪ್ರಾಂಶುಪಾಲೆರ್ ರಾಜಶೇಖರ್ ಲೇಸ್ ದ ಸುದಾರಿಕೆ ಮಲ್ತೆರ್. ನಾಲ್ ವಿದ್ಯಾರ್ಥಿಲು ರಚಿತಾ ರಾಮ್ ಅರೆನ ಬೇತೆ ಬೇತೆ ರೀತಿದ ಭಾವಚಿತ್ರ ಬುಡ್ಪಾಯೆರ್. ಸ್ವತಃ ರಚಿತಾ ರಾಮ್ ಅಕ್ಲೆನ್ ಚಾವಡಿಗ್ ಲೆತ್ತ್ ದ್ ಬುಡ್ಪಾಯಿನ ಚಿತ್ರದ ಬಗ್ಗೆ ವಿವರಣೆ ಕೇಂಡೆರ್.