ಕಬಡ್ಡಿ ಕ್ಷೇತ್ರದ ಸಾಧಕಿ ಧನಲಕ್ಷ್ಮಿ ಪೂಜಾರಿಗ್ ಸನ್ಮಾನ
ಕುಡ್ಲ : ತುಳು ಭಾಷಾ ಪ್ರೇಮಿ, ತುಳು ಲಿಪಿ ಸಾಧಕೆರ್, ಉದ್ಯಮಿ ಡಿ.ಕೆ.ಶೆಟ್ಟಿ ಬೊಕ್ಕ ಅರೆನ ಮಗೆ ರೋಹಿತ್ ಡಿ. ಶೆಟ್ಟಿ ಮೊಕುಲು ನಿರ್ದೇಶಕೆರಾದುಪ್ಪುನ “ಇನ್ನಾ ಹಾಸ್ಪಿಟ್ಯಾಲಿಟಿ ಪ್ರೈವೆಟ್ ಲಿಮಿಟೆಡ್” ಪನ್ಪಿನ ಸೆಕ್ಯುರಿಟ್ ಸರ್ವಿಸ್ ಸಂಸ್ಥೆದ ಕುಡ್ಲ ಶಾಖೆ ಜನವರಿ 1 ಗುರುವಾರ ಬಯ್ಯಡ್ 4 ಗಂಟೆಗ್ ತೊರ್ತಲ್ (ಸುರತ್ಕಲ್) ದ ಅಭೀಷ್ ಸೆಂಟರ್ದ 2 ನೇ ಮಾಳಿಗೆಡ್ ಉದಿಪನ ಆವರೆ ಉಂಡು.
“ಚಾವಡಿ” ಬ್ಯಾಂಕ್ವೆಟ್ ಹಾಲ್ಡ್ ನಡಪುನ ಈ ಲೇಸ್ಡ್ ಇಂಚೊಗು ಕಬಡ್ಡಿಡ್ ವಿಶ್ವಕಪ್ ಗೆಂದಿನ ತಂಡದ ತುಳುನಾಡ ಸಾಧಕಿ, ಸುರತ್ಕಲ್ ಇಡ್ಯಾದ ಧನಲಕ್ಷ್ಮಿ ಪೂಜಾರಿ ಮೆರೆಗ್ ಸಾರ್ವಜನಿಕ ಮಾನಾದಿಗೆ ನಡಪರೆ ಉಂಡು. ಈ ಸನ್ಮಾನಡ್ ಅಭೀಷ್ ಮಾಲ್ದ ಸಿರಿ ಮಳಿಗೆ, ಸಿನೆ ಗ್ಯಾಲಕ್ಸಿ, ವಿಜಯಾ ಮೆಡಿಕಲ್ಸ್, ಡಿಆರ್ ಎನ್ಕೆ ಲ್ಯಾಬ್, ಚಾವಡಿ, ಇನ್ನಾ ಸೆಕ್ಯುರಿಟಿ ಗಾರ್ಡ್ಸ್ ಸಂಸ್ಥೆಲು ಪಾಲ್ ಪಡೆವರೆ ಉಂಡು.
ಲೇಸ್ಡ್ ಮಲ್ಲ ಬಿನ್ನೆರಾದ್ ಕುಡ್ಲ ಬಡಕಾಯಿ ಕ್ಷೇತ್ರದ ಶಾಸಕೆರ್ ಭರತ್ ವೈ.ಶೆಟ್ಟಿ, ನಿಟ್ಟೆ ಯುನಿವರ್ಸಿಟಿದ ವೈಸ್ ಪ್ರೆಸಿಡೆಂಟ್ ಡಾ.ಸತೀಶ್ ಕುಮಾರ್ ಭಂಡಾರಿ, ಅಭೀಷ್ ಬಿಲ್ಡರ್ಸ್ದ ಎಂಡಿ ಪುಷ್ಪರಾಜ್ ಜೈನ್ ಬೊಕ್ಕ ಕಬಡ್ಡಿ ಸಾಧಕೆರ್ ಧನಲಕ್ಷ್ಮಿ ಪೂಜಾರಿ ಮೊಕುಲು ಮಾತ ಪಾಲ್ ಪಡೆವೆರ್ ಪಂದ್ ನಿರ್ದೇಶಕೆರಾಯಿನ ಡಿ.ಕೆ.ಶೆಟ್ಟಿ, ರೋಹಿತ್ , ಅಡಿಶನಲ್ ಡೈರೆಕ್ಟರ್ ಎಲ್.ಪಿ. ತ್ರಿಪಾಠಿ, ಕುಡ್ಲ ಶಾಖೆದ ಸಿಇಒ ಎಸ್.ಜಿ.ಸೂರಿಂಜೆ, ಮಹಾರಾಷ್ಟ್ರ ಸಿಇಒ ಶಾಮ್ ಪ್ರಕಾಶ್ ಪಾಂಡೆ, ಜನರಲ್ ಮ್ಯಾನೇಜರ್ ದೀಪಾಲಿ ನಾಯ್ಕ್, ಆಪರೇಷನ್ ವಿಭಾಗದ ಹೆಡ್, ನಿವೃತ್ತ ಯೋಧೆರ್ ಶಶಿಧರ ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.