ತುಳುನಾಡು ತುಳುವೆರೆನ ಬೂಡು. ಬೇತೆ ಬೇತೆ ಕಲೆಕ್ಲೆನ ನೆಲೆ ಉಂದು. ಪಡ್ಡಾಯಿ ಕಡಲ್ ಮೂಡಾಯಿ ಘಟ್ಟ, ತೆನ್ಕಾಯಿ ಚಂದ್ರಗಿರಿ, ಕೇರಳದ ಕಾಸ್ರೋಡು, ಬಡಕಾಯಿ ಅಂಕೋಲ ಗಡಿ ಮುಟ್ಟ ವಿಸ್ತಾರವಾಯಿನವು ತುಳುನಾಡು.
ಮುಲ್ಪದ ತುಳುವೆರೆನ ಆಚರಣೆ ಬೇಸಾಯ ಮಲ್ಪುನ ಕಲೆ, ದೈವ ದೇವೆರ್ ನಾಗಾರಾಧನೆ, ವನಸ್ ತಿಂಡಿ ತೆನಸ್, ಉಡುಗೆ ತೊಡುಗೆ, ಜನಪದ ಗೊಬ್ಬು, ಪರ್ಬದ ದಿನ ಮಾತಲ ಸೇರ್ದ್ ತುಳು ಸಂಸ್ಕ್ರತಿ ಪಂದ್ ಲೆಪ್ಪುವೆರ್. ತುಳುನಾಡು ಬೊಕ್ಕ ಬಂಟೆರ್ ಒಂಜೇ ಪಾವೊಲಿದ ರಡ್ಡ್ ಮೋನೆಲು ಪಂಡ ತಪ್ಪಾವಂದ್. ತುಳುನಾಡ್ ದ ಸಾಮಾಜಿಕ, ಆರ್ಥಿಕ, ಸಾಂಸ್ಕ್ರತಿಕ ಬೊಕ್ಕ ಧಾರ್ಮಿಕ ರಂಗಡ್ ಬಂಟ ಸಮುದಾಯದ ಕೊಡುಗೆ ಅನನ್ಯವಾಯಿನವು. ಇತ್ತೆದ ಆಧುನಿಕ ಕಾಲ ಸ್ಥಿತಿ ಬಿರುಗಾಳಿಗ್ ತಿಕ್ಕೊಂದು ಅವಿಭಕ್ತ ಕುಟುಂಬಲು ಹಾಳಾವೊಂದು ಉಂಡು. ಅಜ್ಜೆರ್ ಅಜ್ಜಿ, ಪಿಜ್ಜೆರ್, ಪಿಜ್ಜಿ, ಮಾಮು ಮಾಮಿ, ಮೈತಿನೆ, ಮೈತಿದಿ, ಜೋಕುಲು, ಪುಲ್ಲಿಯಲ್ಲು ಇಪ್ಪುನ ಇಲ್ಲ್ ಲು ಇತ್ತೆ ಬಜೀ ಅಪ್ಪೆ ಅಮ್ಮೆ, ಜೋಕುಲು ಪನ್ಪುನಡೆಗ್ ಬೈದ್ಂಡ್. ಎಚ್ಚದ ಬಂಟೆರ್ ಬೆಂಗ್ಲೂರು ಬೊಂಬೈ, ವಿದೇಶಡ್ ಉಲ್ಲೆರ್. ಅಲ್ಪದ ಸಂಸ್ಕ್ರತಿಗ್ ಸೇರೊಂದೆರ್.
ಇತ್ತೆದ ಜೋಕುಲು ನನದ ಭವಿಷ್ಯ. ಸಂಸ್ಕ್ರತಿನ್ ಒರಿಪಾದ್ ಬುಲೆಪಾವೊಡಾಂಡ ಅಕುಲು ಸಂಸ್ಕ್ರತಿನ್ ಮರತ್ ಬುಡ್ಪುನ ಅಪಾಯನ್ ತೆರಿನ ಬೊಂಬೈ ಬಂಟರ ಸಂಘದ ಸಿಟಿ ಪ್ರಾದೇಶಿಕ ಸಮಿತಿ ಆಯೋಜನೆ ಮಲ್ತಿನ ಸತ್ಸಂಗ ಲೇಸ್ ನಿಜವಾದ್ಲ ಎಡ್ಡೆ ಪ್ರಯತ್ನ. ಬೊಕ್ಕ ಸಕಾಲಿಕ ಬೇಲೆ ಆತ್ಂಡ್.
ಮುಲ್ಪ ಮಸ್ತ್ ಕುಷಿ ಕೊರ್ನ ಇಸಯ ದಾದ ಪಂಡ 122 ಬಂಟ ಜೋಕ್ಲೆರ್ದ್ ಸನಾತನ ನಡತೆದ ಸತ್ಸಂಗ ನಡಪಾಯಿನವು. ಉಂದು ಮಸ್ತ್ ಅದ್ಭುತವಾಯಿನ ಪ್ರಯತ್ನ. ಜೋಕ್ಲೆನ ದೆಸೆಟ್ಟ್ ಅಕ್ಲೆನ್ ನೆತ್ತ ಪರಿಚಯ ಮಲ್ಪುನಗ ಪಜ್ಜಿ ಗೋಡೆಗ್ ದಕ್ಕಿನ ಕಲ್ಲ್ ಚುಚ್ಚಿದ್ ಉಂತುಲೆಕ್ಕ ಜೋಕ್ಲೆನ ಮನಸ್ಸ್ ಡ್ ಬೇರ್ ಊರುದು ಉಂತುಂಡು. ನೆಕ್ಕಾದ್ ಸಿಟಿ ಪ್ರಾದೇಶಿಕ ಸಮಿತಿದ ಮಾತೆರೆನ್ಲ ಮೆಚ್ಚೊಡು.
ಜನವರಿ 27 ಬಯ್ಯಗ್ ಶ್ರೀಮಹಾವಿಷ್ಣು ದೇವಲ್ಯಡ್ ಮಾತೆರ್ಲಾ ಒಟ್ಟಾದ್ ಮಲ್ತಿನ ಸಾಮೂಹಿಕ ಪ್ರಾರ್ತನೆ, ಜೋಕುಲು ಬೊಕ್ಕ ಪೋಷಕೆರ್, ಸಿಟಿ ಪ್ರಾದೇಶಿಕ ಕಾರ್ಯಕಾರಿ ಸಮಿತಿದ ಮಾತ ಸದಸ್ಯೆರ್ ಸೇರ್ದ್ ಭಾರಿ ಭಕ್ತಿ ಶ್ರದ್ಧೆಡ್ ನಡಪಾಯಿನ ಶ್ರೀ ಸರಸ್ವತೀ ದೇವಿನ ಮೆರವಣಿಗೆ ಲೇಸ್ ಗ್ ಧಾರ್ಮಿಕ ಸ್ಪರ್ಶ ಕೊರ್ಪುನಲ್ಪ ಯಶಸ್ವಿ ಆತ್ಂಡ್.
ಬಂಟರ ಭವಿಷ್ಯ ಪುದರ್ ದ ಇಸೇಸ ಬೊಕ್ಕ ಅಪರೂಪದ ಲೇಸ್ ಡ್ ಪಾಲ್ ಪಡೆಯಿನ ಮಾತ ಜೋಕುಲು ಮುಂಡೊಗು ಚಂದನ, ಕುಂಕುಮದ ನಾಮ, ಬಲತ್ತ ಬರಿಕ್ಕ್ ಚಕ್ರ ಎಡತ್ತ ಬರಿಕ್ಕ್ ಶಂಖದ ಮುದ್ರೆದೊಟ್ಟಿಗೆ ದೇವತಾ ಸ್ವರೂಪಿಯಾದ್ ಪೊರ್ಲು ತೋಜಿಯೆರ್. ಇಡೀ ಲೇಸ್ ಡ್ ಸತ್ಸಂಗದ ಸನಾತನ ಸನ್ನಡತೆದ ವಾತಾವರಣನ್ ನಿರ್ಮಿಸಾವೊನೊಟ್ಟಿಗೆ ಅಲೌಕಿಕ ಅನುಭವನ್ ಕೊರ್ತುಂಡು. ಸುರುಕ್ಕು ಲೇಸ್ ಗ್ ಬತ್ತಿನ ಬಂಟ ಪರಿವಾರಗ್ ಪಾನಕ ಕೊರ್ದು ಎದ್ಕೊನಿಯೆರ್. ಉದಿಪನದ ಪೊರ್ತುಡು ಗಣ್ಯೆರೆನ ಸಮಕ್ಷಮ, ಜೋಕ್ಲೆರ್ದೆ ತಾರೆದ ಸಿಂಗಾರ ಪೂ ಅರಳಾದ್, ತುಡರ್ ಅರ್ಲಾದ್ ಚಾಲನೆ ಕೊರಿಯೆರ್. ಗಣ್ಯೆರೆಗ್ ಪೂತ್ತ ಮಾಲೆ, ಪೇಟದ ಬದಲ್ ಗ್ ಸಿರಿಧಾನ್ಯ ಕೊರ್ದು ಮಾನಾದಿಗೆ ಮಲ್ತೆರ್. ಉಂದು ಸತ್ಸಂಗಗ್ ಒಂಜಿ ಇಸೇಸ ಮೆರುಗು ಕೊರ್ದಿತ್ತ್ಂಡ್.
ಶ್ರೀ ಮಹಾವಿಷ್ಣು ಜಾತ್ರೆದ ಪೊರ್ತುಡು ಜೋಕ್ಲೆರ್ದ್ ಶ್ಲೋಕ ಪಠಣ, ಭಜನೆ ಮಲ್ಪುನ ಲೇಸ್ ನಡಪಾವ ಪಂದ್ ನಿರ್ಧಾರ ಮಲ್ದ್ಂಡ್. ಉಂದು ಮಾತೆಕ್ಲಾ ಮಿಗಿಲಾದ್ ಕಣ್ಣ್ ಗ್ ತೋಜುನ ನಿಜ ದೇವೆರ್ ಅಪ್ಪ, ಅಮ್ಮಗ್ ಜೋಕ್ಲೆಲೆರ್ದ್ ಪಾದ ಪೂಜೆ, ಪುಷ್ಪಾರ್ಚನೆ, ಆರತಿ ಬೆಳಗಾವುನವು ಇಡೀ ಲೇಸ್ ದ ಮುಖ್ಯ ಇಸಯ ಆತ್ಂಡ್. ಬೊಕ್ಕ ಉಂದುವೇ ಸನಾತನ ಸನ್ನಡತೆ. ಉಂದುವೇ ಸತ್ಸಂಗ. ಮಾತ ಜೋಕುಲು ಮನಸಾರೆ ಈ ಪಾದ ಪೂಜೆನ್ ಮಲ್ಪುನಗ ಪೋಷಕೆರೆನ ಕಣ್ಣ್ ಡ್ ಖುಷಿ ತೋಜೊಂದು ಇತ್ತ್ಂಡ್.
ಜೋಕುಲು ಆರತಿ ಮಲ್ಪುನಗ ಅಂತೂ ಕೆಲವು ಪೊಷಕೆರೆನ ಮನಸ್ ದಿಂಜಿದ್ ಬತ್ತ್ಂಡ್. ಉಂದುವೇ ಲೇಸ್ ದ ಯಶಸ್ವಿ ಅತ? ಜೋಕ್ಲೆನೊಟ್ಟಿಗೆ ತರೆಕ್ಕ್ ಅಪ್ಪ ಅಮ್ಮ ಪೋಷಕೆರ್ ಆಯಸ್ಸು ವೃದ್ದಿಗಾದ್ ಮಂತ್ರಾಕ್ಷತೆ ಪಾಡ್ದ್ ಆಶೀರ್ವಾದ ಮಲ್ತೆರ್. ಪಾದ ಪೂಜೆ ಮಲ್ಪುನಗ ಮಂತ್ರಘೋಷ ಮಾತೆರೆನ್ಲಾ ನನಾತ್ ಭಕ್ತಿಭಾವದಡಿಕ್ಕ್ ಕೊನೊಂಡು. ಅವೆರ್ದ್ ಬೊಕ್ಕ ಪ್ರತಿಯೊರಿ ಜೋಕ್ಲೆಗ್ಲಾ ಕಾಣಿಕೆ ಡಬ್ಬಿ ಕೊರ್ದು ಅಕ್ಲೆನ ಕೈಕ್ಕ್ ಕಾಸ್ ನ್ ಕೊರ್ದು ಆ ಕಾಣಿಕೆನ್ ಶ್ರೀ ಮಹಾವಿಷ್ಠು ದೇವೆರೆಗ್ ಅರ್ಪಣೆ ಮಲ್ತೆರ್. ಕಾಣಿಕೆ ಡಬ್ಬಿನ್ ಜೋಕ್ಲೆಗ್ ಕೊರಿಯೆರ್. ಅವ್ವತ್ತಂದೆ ಜೋಕ್ಲೆಗ್ ಪಾದ ಪೂಜೆಗ್ ಪ್ಲೇಟ್ ನ್ ಕೊರ್ದು ಪಾದ ಪೂಜೆ ಆಯಿನ ಬೊಕ್ಕ ನೆಂಪುಗಾದ್ ಆ ಪ್ಲೇಟ್ ನ್ ಜೋಕ್ಲೆಗ್ ಕೊರಿಯೆರ್. ನೆತ್ತೊಟ್ಟಿಗೆ ಪ್ರತಿ ಬಾಲೆಗ್ ವಸ್ತ್ರದಾನ ಮಲ್ತೆರ್. ಬೊಕ್ಕ ಉಡುಗಿರ, ಚಾಕೋಲೇಟ್‌ ಕೊರಿಯೆರ್.
ಗುರುಕುಲಾಯಿನ ವಿದ್ವಾನ್ ಅರವಿಂದ ಬನ್ನಿಂತಾಯೆರ್ ವೇದ, ಶಾಸ್ತ್ರ, ದಿನ ನಿತ್ಯ ಚಟುವಟಿಕೆಡ್ ದೇವೆರೆನ್ ಪ್ರಾರ್ಥನೆ ಮಲ್ಪುನ ರೀತಿ ಬಗೆಟ್ಟ್ ವಿವರಣೆ ಕೊರ್ದು, ನನಗ್ ಸುರು ಮಲ್ಪುನ ಗುರುಕುಲಡ್ ಜೋಕ್ಲೆಗ್ ಸವಿಸ್ತಾರವಾಯಿನ ಭೋದನೆ ಕೊರ್ರೆ ಉಂಡು ಪಂದ್ ಭರವಸೆ ಕೊರಿಯೆರ್. ನೆತ್ತೊಟ್ಟಿಗೆ ಪ್ರತಿ ವರ್ಷ ನಡಪುನ ಶ್ರೀ ಮಹಾವಿಷ್ಣು ಜಾತ್ರೆಡ್ ಈ ಚಿಣ್ಣರ ಶ್ಲೋಕ ಪಠಣ ಭಜನೆದೊಟ್ಟಿಗೆ ದೇವೆರೆನ ಬಲಿಪೂಜೆ ನಡಪಾಯೆರೆ ಉಂಡು ಪಂದ್ ತೆರಿಪಾಯೆರ್.
ಈ ಸತ್ಸಂಗಡ್ 122 ಜೋಕುಲು ಬೊಕ್ಕ ಅಕ್ಲೆನ ಪಾಲಕೆರ್ ಪೋಷಕೆರ್ ಪಾಲ್ ಪಡೆದಿತ್ತೆರ್. ಬೊಂಬೈದ ಇತಿಹಾಸಡೇ ಸುರುತ್ತ ಸರ್ತಿ ಪನ್ಪುನಂಚಿನ ಸತ್ಸಂಗ ನಡತ್ಂಡ್. ಈತೆ ಅತ್ತ್ ಚಿಣ್ಣೆರೆರ್ದ್ ಲೇಸ್ ಉದಿಪನ ಮಲ್ಪುನಗ ಬಂಟ ಭವಿಷ್ಯ ಪದ್ಯ ಪಂಡೆರ್. ಈ ಪದ್ಯನ್ ಈ ಲೇಸ್ ಗ್ ಪಂದೇ ಐಲೇಸಾ ದಿ ವಾಯ್ಸ್‌ ಆಫ್ ಓಷನ್‌ (ರಿ.) ಸಂಸ್ಥೆ ನಿರ್ಮಾಣ ಮಲ್ದ್ಂಡ್. ಈ ಪದ್ಯಗ್ ಅಂಧ್ರಪ್ರದೇಶದ ಯುವ ಕಂಪೋಸರ್‌ ಅಕ್ಷಯ್‌ ಮ್ಯೂಸಿಕ್‌ ಕೊರ್ಂಡ ಅಶೋಕ್ ಪಕ್ಕಳ ಮೇರ್ ಪದ್ಯ ಬರೆತೆರ್. ಈ ಪದ್ಯ ಬಂಟರ ಸಂಘದ ಶೈಲಜಾ ಅಮರನಾಥ್‌ ಶೆಟ್ಟಿ, ಪ್ರಶಸ್ತಿ ವಿಜೇತೆರ್ ಡಾ. ಪಲ್ಲವಿ ಬೊಕ್ಕ ರಾಶಿ, ಮಾಸ್ಟರ್‌ ಸುವಿದ್‌ ಮಾರ್ನಾಡ್, ಸ್ವರ ಮಾರ್ನಾಡ್ ಮೊಕ್ಲೆನ ಸ್ವರಟ್ಟ್ ರೇವತಿ ರಾಗಡ್ ಪಂತೆರ್. ಮಾತೆರೆನ್ಲಾ ಈ ಪದ್ಯ ಮೋಡಿ ಮಲ್ದ್ಂಡ್.
ಬಂಟ ಭವಿಷ್ಯ ಸತ್ಸಂಗಡ್ ಶ್ರೀ ಮಹಾವಿಷ್ಣು ಪಾಠ ಶಾಲೆನ್ ಉದಿಪನ ಮಲ್ತೆರ್. ನೆತ್ತ ವರ್ಷಪೂರ್ತಿ ಪ್ರಾಯೋಜಕತ್ವನ್ ಡಾ. ಆರ್‌ ಕೆ ಶೆಟ್ಟಿ ಮೇರ್ ಮಲ್ಪುವೆ ಪಂಡೆರ್. ಲೇಸ್ ನ್ ಡಾ. ಪೊರ್ಣಿಮಾ ಶೆಟ್ಟಿ ನಡಪಾದ್ ಕೊರಿಯೆರ್. ಸುರೇಂದ್ರಕುಮಾರ್ ಮಾರ್ನಾಡ್ ಸೊಲ್ಮೆ ಸಂದಾಯೆರ್.
ಈ ಲೇಸ್ ಗ್ ಅನುವು ಮಲ್ತ್ ದ್ ಕೊರಿನ ಬೊಂಬೈ ಬಂಟರ ಸಂಘದ ಗುರ್ಕಾರೆ ಪ್ರವೀಣ್ ಭೋಜ ಶೆಟ್ಟಿ ಬೊಕ್ಕ ಕೂಟ, ಸಿಟಿ ಪ್ರಾದೇಶಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಅಶೋಕ್ ಪಕ್ಕಳ, ಸಿಟಿ ಪ್ರಾದೇಶಿಕ ಸಮಿತಿದ ಸರ್ವ ಸದಸ್ಯೆರ್, ಮಹಿಳಾವಿಭಾಗ, ಯೂತ್ ವಿಂಗ್‌ ಸಹಕಾರ ಮಲ್ತಿನ ಸರ್ವೆಗ್ಲಾ ಅಭಿನಂದನೆಲು. ಸೊಲ್ಮೆದ ಭಾವನೆ ಮೂಡಿಸಾಯಿನ ಸಾರ್ಥಕ ಲೇಸ್. ಲೇಸ್ ದ ಅಕೇರಿಡ್ ಊರುದ ರುಚಿಶುಚಿ ಆಯಿನ ತೆನಸುಲು ಮಾತೆರ್ನಲ ಬಂಜಿ ತಂಪು ಮಲ್ತ್ಂಡ್ . ಈ ಲೇಸ್ ನ್ ಆಯೋಜನೆ ಮಲ್ತಿನ ಸಿಟಿ ಪ್ರಾದೇಶಿಕ ಸಮಿತಿಗ್ ಕೈ ಜೋಡಿಸಾಯಿನ ಮಾತೆರೆಗ್ಲಾ ಕುಡೊರ ಸೊಲ್ಮೆಲು.
ವರದಿ: ನೀತಾ ರಾಜೇಶ್ ಶೆಟ್ಟಿ
niriksha