ವೇದಮೂರ್ತಿ ಕಾಶೀನಾಥ್ ಭಟ್ರೆನ ಕೈಟ್ ಅರಳ್ಂಡ್ ದರ್ಬೆದ ಅನಂತ ಶೇಷ ನಾಗೆ

ಒಡಿಪು: ಒಡಿಪು ಕೈತಲ್ ದ ಗ್ರಾಮೀಣ ಪ್ರದೇಶವಾಯಿನ ಕಲ್ಯಾಣಪುರ ಶ್ರೀ ರಾಮಾಂಜನೇಯ ದೇವಲ್ಯದ ಅರ್ಚಕೆರ್ ವೇದಮೂರ್ತಿ ಕಾಶೀನಾಥ್ ಭಟ್ ಮೇರ್ ಕರಿನ 35 ವರ್ಷೊದಿಂಚ ಶ್ರೀ ಅನಂತ ಪದ್ಮನಾಭ ವೃತತ್ತ (ನೋಂಪಿ) ಪೂಜೆಗ್ ಅಗತ್ಯವಾದ್ ಬೋಡಾಯಿನ ಅನಂತ ಶೇಷನಾಗ, ವಿಶೇಷವಾದ್ ಅಷ್ಟ ಪವಿತ್ರ ನಾಗಮಂಡಲದ ಸ್ವರೂಪಡ್ ದರ್ಬೆ ದ ಮುಖೇನ ಏಳ್ ಜೆಡೆತ್ತ ನಾಗದೇವೆರೆನ ಬಿಂಬ ಸ್ವರೂಪದ ಕಲಾಕೃತಿ ರಚನೆ ಮಲ್ತ್ ದ್ ಒಡಿಪು ಕೈತಲ್ ದ ದೇವಲ್ಯಗ್ ಧರ್ಮೊಗು ಕೊರೊಂದು ಉಲ್ಲೆರ್.

ಜಿ ಎಸ್ ಬಿ ಸಮಾಜದ ಪುರೋಹಿತೆರ್ ವೇದಮೂರ್ತಿ ಕಾಶಿ ಭಟ್ರೆನ ಪೊಪ್ಪ ಹರಿನಾರಾಯಣ ಭಟ್ರೆರ್ದ್ ಕಲ್ತಿನ ಈ ದರ್ಬೆದ ಕಲಾಕೃತಿಗ್ ಬೋಡಾಯಿನ ದರ್ಬೆನ್ ಕೆಮ್ಮಣ್ಣುರ್ದ್ ಕನತ್ ದ್ ಆಯಿನ್ ಶ್ರೀ ರಾಮ ನಿವಾಸಡ್ 15 ದಿನ ಮುಟ್ಟ ಸಮತಟ್ಟು ಮಲ್ತ್ ದ್ ನೆಯಿದ್ 2 ಅಡಿ ಎತ್ತರದ ಏಳ್ ಜಿಡೆತ್ತ ನಾಗದೇವೆರೆನ ಬಿಂಬ ಸ್ವರೂಪದ ಕಲಾಕೃತಿ ರಚನೆ ಮಲ್ಪುವೆರ್.

ಈ ಸರ್ತಿ ಸುಮಾರ್ 19 ಬಿಂಬ ಕಲಾಕೃತಿ ರಚನೆ ಮಲ್ತ್ ದ್ ಒಡಿಪು ಕೈತಲ್ ದ ಉದ್ಯಾವರ ವೀರ ವಿಠಲ ದೇವಲ್ಯ, ಚೇಂಪಿ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಲ್ಯ, ತೆಂಕಪೇಟೆದ ಆಚಾರ್ಯ ಮಠ, ಕಲ್ಯಾಣಪುರದ ಶ್ರೀ ವೆಂಕಟರಮಣ ದೇವಲ್ಯ, ಬ್ರಹ್ಮಾವರ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಲ್ಯ ಬೊಕ್ಕ ಹಿರಿಯ ಮನೆತನದ ದೇವೆರೆನ ಪೂಜೆಗ್ ಕೊರ್ತೆರ್.

ಬಹು ಅಪರೂಪದ ಈ ಕಲಾಕೃತಿ ಕಲೆನ್ ತನ್ನೊಟ್ಟಿಗೆ ಬೇಲೆ ಮಲ್ಪುನ ಕಾಶಿನಾಥ್ ಭಟ್ರ್, ಜೋಕುಲೆಗ್, ಬೊಡೆದಿ ಭಾಗ್ಯಲಕ್ಷ್ಮೀ ಭಟ್, ಮರ್ಮಾಲ್ ನಕ್ಲೆಗ್ ತರಬೇತಿ ಕೊರೊಂದು ದೇವೆರೆನ ಸೇವೆನ್ ಮಲ್ಪುನೆತ್ತೊಟ್ಟಿಗೆ ಕಲೆ ಒರಿಪಾದ್-ಬುಲೆಪಾವೊಂದುಲ್ಲೆರ್.

ಒಡಿಪು ನಯಂಪಳ್ಳಿ ಕಾಶೀಮಠ, ಶ್ರೀ ರಾಮ ಮಂದಿರ ದೊಂಡೇರಂಗಡಿ, ಶ್ರೀ ವೀರ ವಿಠಲ್ ದೇವಲ್ಯ ಭದ್ರಗಿರಿ, ಶ್ರೀ ರಾಮಾಂನೇಯ ದೇವಲ್ಯ ಕಲ್ಯಾಣಪುರ, ಬೊಕ್ಕ ದೇವಲ್ಯದ ಧಾರ್ಮಿಕ ಕಾರ್ಯ, ಹೋಮ, ಯಜ್ಞಡ್, ನಾಗಮಂಡಲ, ಆಶ್ಲೇಷಾ ಬಲಿ, ನಾಗ ಪ್ರತಿಷ್ಠೆಡ್ ಸೇವೆ ಸಂದಾವೊಂದು ಉಲ್ಲೆರ್.