ಬಹರೈನ್: ಬಹರೈನ್ ದ್ವೀಪ ರಾಷ್ಟ್ರಡ್ ತುಳು ಕಲೆ, ಭಾಷೆ, ಸಂಸ್ಕೃತಿಗ್ ವೇದಿಕೆನ್ ಕಲ್ಪಿಸಾಯೆರೆ, ಬೊಕ್ಕ ಒರಿಪಾದ್ ಬುಲೆಪಾಯೆರೆ ಅಸ್ತಿತ್ವಗ್ ಬತ್ತಿನ “ತುಳುಕೂಟ ಬಹರೈನ್ ” ಸಂಘಟನೆ ಸೋಮಾರ ಪ್ಯಾಪಿಲಾನ್ ರೆಸ್ಟೋರೆಂಟ್ ದ ಚಾವಡಿಡ್ ಉದಿಪನ ಆಂಡ್.
ಲೇಸ್ ಡ್ ಪಾಲ್ ಪಡೆದಿತ್ತಿನ ಹಿರಿಯೆರ್ ತುಡರ್ ಅರ್ಲಾವುನ ಮುಖೇನ “ತುಳುಕೂಟ ಬಹರೈನ್” ದ ಉದಿಪನ ಮಲ್ತೆರ್. ದ್ವೀಪ ರಾಷ್ಟ್ರಡ್ ಸುಮಾರ್ ನಾಲ್ ದಶಕರ್ದ್ ಕನ್ನಡ ತುಳು ಭಾಷೆ, ಸಂಸ್ಕೃತಿದ ಸೇವೆಡ್ ಇಪ್ಪುನ ಸಮಾನ ಮನಸ್ಕ ಹಿರಿಯೆರ್ ಕನ್ನಡಿಗೆರಾಯಿನ ರಾಜ್ ಕುಮಾರ್, ಆಸ್ಟಿನ್ ಸಂತೋಷ್, ವಿಜಯ ನಾಯಕ್ ಬೊಕ್ಕ ರಾಜೇಶ್ ಶೆಟ್ಟಿ ಮೆರೆನ ಮುತಾಲಿಕೆಡ್ “ತುಳುಕೂಟ ಬಹರೈನ್” ದ ಉದಿಪನ ಮಲ್ತೆರ್.
ಈ ಪೊರ್ತುಡು ಕನ್ನಡ ಸಂಘದ ಮಾಜಿ ಗುರ್ಕಾರೆ, ಇಂಡಿಯನ್ ಸ್ಕೂಲ್ ಡ್ 1989ಟ್ಟ್ ಕನ್ನಡ ತರಗತಿನ್ ಸುರು ಮಲ್ಪರೆ ಕಾರಣ ಆಯಿನ ಸುರೇಂದ್ರ ಶೆಟ್ಟಿ, ದಕ್ಷಿಣ ಕನ್ನಡ ಮುಸ್ಲಿಂ ಅಸೋಸಿಯೇಶನ್ ಗುರ್ಕಾರೆ ಹಾಜಿ ಅಬ್ದುಲ್ ರಝಾಕ್, ಬಹರೈನ್ ಬಂಟ್ಸ್ ದ ಮಾಜಿ ಗುರ್ಕಾರೆ ಭರತ್ ಶೆಟ್ಟಿ, ಅಲ್ ಹಿಲಾಲ್ ವೈದ್ಯಕೀಯ ಸಮೂಹ ಸಂಸ್ಥೆಲೆನ ಉಪಾಧ್ಯಕ್ಷೆರ್ ಆಸೀಫ್, ಅಮ್ಮ ಕಲಾವಿದೆರ್ ಸಂಘಟನೆದ ಮುಖ್ಯಸ್ಥೆರ್ ಮೋಹನ್ ದಾಸ್ ರೈ, ವಿಶ್ವಕರ್ಮ ಬಳಗದ ಗುರ್ಕಾರೆ ಸತೀಶ್ ಉಳ್ಳಾಲ್, ಕೊಂಕಣ್ ಸಿಂಗರ್ಸ್ ದ ಮಾಜಿ ಗುರ್ಕಾರೆ ವಾಲ್ಟರ್ ನೊರೊನ್ಹಾ, ಹಿರಿಯ ಕನ್ನಡಿಗೆರ್ ಹುಂತ್ರಿಕೆ ಭಾಸ್ಕರ್ ಶೆಟ್ಟಿ, ಚಂದ್ರಹಾಸ ಐಲ್, ರಾಬರ್ಟ್ ಡಿ’ ಸೋಜಾ ಪಾಲ್ ಪಡೆದ್, ಎಡ್ಡೆಪ್ಪು ಬಯಕಿಯೆರ್.
ಎಡನೀರು ಮಠತ್ತ ಶ್ರೀ ಸಚ್ಚಿದಾನಂದ ಭಾರತೀ ಸ್ವಾಮೀಜಿಲು “ತುಳುಕೂಟ ಬಹರೈನ್” ದ ಸಂಘಟಕೆರೆಗ್ ಬೊಕ್ಕ ಬಹರೈನ್ ತುಳುವೆರೆಗ್ ಎಡ್ಡೆಪ್ಪು ಬಯಕ್ ದ್ ಕಡಪಾಯಿನ ಸಂದೇಶ ಬೊಕ್ಕ ಆಶೀರ್ವಚನದ ವಿಡಿಯೋನ್ ಪ್ರಸಾರ ಮಲ್ತೆರ್.
ಬೊಕ್ಕ ತುಳುಕೂಟದ ಚೊಚ್ಚಲ ಲೇಸಾದ್ ನನದ ಅ.13 ಕ್ಕ್ ತುಳುನಾಡ್ ಡ್ ಬುಡುಗಡೆಗ್ ದುಂಬೇ ಸೌಂಡ್ ಮಲ್ತೊಂದು ಇಪ್ಪುನ ಹರಿಪ್ರಸಾದ್ ರೈ ನಿರ್ಮಾಣದ, ತ್ರಿಶೂಲ್ ಶೆಟ್ಟಿ ನಿರ್ದೇಶನದ ವಿನೀತ್ ಕುಮಾರ್, ಸಮತಾ ಅಮೀನ್ ಅಭಿನಯದ “ಪುಳಿಮುಂಚಿ” ತುಳು ಚಿತ್ರದ ಗ್ರ್ಯಾಂಡ್ ಪ್ರೀಮಿಯರ್ ಪ್ರದರ್ಶನನ್ ತುಳುಕೂಟ ಬಹರೈನ್ ನ್ ಆಯೋಜನೆ ಮಲ್ತ್ ದ್ ಇತ್ತೆರ್. ನೆತ್ತ ಅಂಗವಾದ್ ಈ ಪೊರ್ತುಡು ಪಿಕ್ಚರ್ ದ ಪೋಸ್ಟರ್ ನ್ ಬುಡುಗಡೆ ಮಲ್ತೆರ್.
ಈ ಲೇಸ್ ನ್ ವಿಜಯ್ ನಾಯಕ್ ಸುಧಾರಿಕೆ ಮಲ್ತೆರ್. ರಾಜೇಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್.
pallavi shetty