ದುಬೈ: ಮಸ್ತ್ ಜನತ್ತ ನಿರೀಕ್ಷೆದ ಪುಳಿಮುಂಚಿ ತುಳು ಪಿಕ್ಚರ್ ದ ಯುಎಇದ ಪ್ರೀಮಿಯರ್ ಪ್ರದರ್ಶನದ ಟಿಕೆಟ್ ಬುಡುಗಡೆ ಲೇಸ್ ಸೆ.24 ಕ್ಕ್ ಇಂಡಿಯನ್ ಅಸೋಸಿಯೇಷನ್ ಸಭಾಂಗಣ ಅಜ್ಮಾಡ್ ನಡಪರೆ ಉಂಡು.
ಮಾರ್ಗದೀಪ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ಯುಎಇದ ಮುತಾಲಿಕೆಡ್ ನಡಪುನ 9ನೇ ವರ್ಷೊದ ಸಾರ್ವಜನಿಕ ಗಣೇಶೋತ್ಸವದ ಶುಭ ಚಾವಡಿಡ್ ಮಧ್ಯಾಹ್ನ 12.30 ಕ್ಕ್ ಟಿಕೆಟ್ ಬುಡುಗಡೆ ಲೇಸ್ ನಡಪರೆ ಉಂಡು.
ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಶಾಸ್ತ್ರ ಶೆಟ್ಟಿ (Femina Miss India Goa 2019) ಮೇರ್ ಪಾಲ್ ಪಡೆಯೆರೆ ಉಲ್ಲೆರ್. ಯುಎಇದ ಪ್ರೀಮಿಯರ್ ಪ್ರದರ್ಶನ ಅಕ್ಟೋಬರ್ 7 ಬೊಕ್ಕ 8 ಕ್ಕ್ ದುಬೈ, ಅಬುಧಾಬಿ, ಶಾರ್ಜಾಡ್ ಪ್ರದರ್ಶನ ಆಪುಂಡು.
ತ್ರಿಶೂಲ್ ಶೆಟ್ಟಿ ನಿರ್ದೇಶನ ಮಲ್ತಿನ ಈ ಪಿಕ್ಚರ್ ನ್ ಹರಿ ಪ್ರಸಾದ್ ರೈ ನಿರ್ಮಾಣ ಮಲ್ದೆರ್. ನಾಯಕೆಯಾದ್ ವಿನಿತ್ ಕುಮಾರ್, ನಾಯಕಿಯಾದ್ ಸಮಂತಾ ಅಮೀನ್, ರಾಹುಲ್ ಅಮೀನ್, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ನವೀನ್ ಡಿ.ಪಡಿಲ್, ಆರಾಧ್ಯ ಶೆಟ್ಟಿ, ಸಾಯಿಕೃಷ್ಣ ಕುಡ್ಲ, ಪ್ರಸನ್ನ ಶೆಟ್ಟಿ, ರವಿ ರಾಮಕುಂಜ, ಸಂದೀಪ್ ಶೆಟ್ಟಿ ಅಭಿನಯಿ ಮಲ್ದೆರ್. ಕಾಂತಾರ ಖ್ಯಾತಿದ ಸ್ವರಾಜ್ ಶೆಟ್ಟಿ ಇಸೇಸ ಪಾತ್ರಡ್ ಅಭಿನಯ ಮಲ್ದೆರ್ ಪಂದ್ ಸಹ ನಿರ್ಮಾಪಕೆರ್ ದೇವಿ ಪ್ರಸಾದ್ ಜಿ.ಎಸ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.
ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ ದುಬೈ
Editorial