ಮಾರ್ಗದ ಗುಂಡಿ ಮುಚ್ಚುನ ಬೇಲೆ ಮೆಚ್ಚೊಡಾಯಿನವು: ಡಾ| ಹರಿಕೃಷ್ಣ ಪುನರೂರು

ಮುಲ್ಕಿ: ಹೊಸ ಅಂಗಣ ತಿಂಗಳ ಬೆಳಕು ಲೇಸ್ ಮುಲ್ಕಿದ ಟೂರಿಸ್ಟ್ ಹೋಮ್ ಚಾವಡಿಡ್ ನಡತ್ಂಡ್.

ಲೇಸ್‌ದ ಗುರ್ಕಾರ್ಮೆ ವಹಿಸೊನಿನ ಕಸಾಪ ಮಾಜಿ ರಾಜ್ಯಾಧ್ಯಕ್ಷೆರ್ ಡಾ| ಹರಿಕೃಷ್ಣ ಪುನರೂರು ಪಾತೆರ್ದ್, ಮುಲ್ಕಿ ಪರಿಸರಡ್ ಕೆಲವು ಜವನೆರ್ ಒವ್ವೇ ರೀತಿದ ಫಲಾಫೇಕ್ಷೆ ಇಜ್ಜಂದೆ ಮಾರ್ಗದ ಗುಂಡಿನ್ ಮುಚ್ಚುನ ಬೇಲೆ ಮಲ್ತ್‌ದೆರ್. ಸರ್ಕಾರರ್ದ್ ಆವಂದಿನ ಬೇಲೆನ್ ಜವನೆರ್ ಮಲ್ತ್‌ದ್ ತೋಜಾದೆರ್. ಅವು ಜನ ಮೆಚ್ಚೊಡಾಯಿನ ಬೇಲೆ ಪಂದ್ ಪಂಡೆರ್.

ಮಲ್ಲ ಬಿನ್ನೆರ್, ಉದ್ಯಮಿ ಜಾನ್ ಕ್ವಾಡ್ರಸ್ ಪಾತೆರ್ದ್, ಮಾರ್ಗದ ಗುಂಡಿಲೆರ್ದ್ ಮಸ್ತ್ ರೀತಿದ ಅವಘಡ ನಡತೊಂದು ಇತ್ತ್‌ದ್ ಈ ಯುವಪಡೆ ಮಾರ್ಗದ ಗುಂಡಿ ಮುಚ್ಚುನ ಮುಕೇನ ಸಾಮಾಜಿಕ ಕಾರ್ಯಕ್ರಮನ್ ಮಲ್ತ್‌ದೆರ್ ಪಂದ್ ಪಂಡೆರ್. ಮಾರ್ಗದ ಗುಂಡಿ ಮುಚ್ಚಿದ್ ಎಡ್ಡೆಂತಿನ ಬೇಲೆ ಮಲ್ತಿನ ಸುಪ್ರೀತಾ ಪುನರೂರು ಅಂಚನೆ ಯುವಪಡೆತ್ತ ಸದಸ್ಯೆರೆನ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ನಿವೃತ್ತ ಬ್ಯಾಂಕ್ ಅಧಿಕಾರಿ ಸತೀಶ್ ಭಂಡಾರಿ, ಬೊಂಬಾಯಿ ಸಾಹಿತಿ ಕೆ ಎನ್ ಕೋಟ್ಯಾನ್ ಚಿತ್ರಾಪು, ರೊ. ನಾರಾಯಣ ಗೌಡ, ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಹೊಸ ಅಂಗಣದ ಸಂಪಾದಕೆರ್ ಡಾ| ಹರಿಶ್ಚಂದ್ರ ಸಾಲ್ಯಾನ್ ಸೇರಿನಂಚನೆ ಮಸ್ತ್ ಜನ ಲೇಸ್‌ಡ್ ಇತ್ತೆರ್.