ಹಳೆಯಂಗಡಿ : ಭಾರಿ ಗಾಳಿ ಬರ್ಸದ ಶುಭಾ ಶೀರ್ವಾದದ ನಡುಟ್ಟೇ ಪಾವಂಜೆ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಮೂಜನೇ ವರ್ಷದ ಯಕ್ಷಗಾನ ತಿರ್ಗಾಟ ಸನಿಯಾರ ಸುರುವಾಂಡ್.
ಬಯ್ಯಡ್ ಪಾವಂಜೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ಸನ್ನಿಧಿಡ್ ಬಯ್ಯಡ್ ಡಾ.ಯಾಜಿ ನಿರಂಜನ ಭಟ್ ಮೇರ್ನ ಮುತಾಲಿಕೆಡ್ ಪೂಜಾ ವಿಧಿ ನಡತ್ಂಡ್.
ಅವೆರ್ದ್ ಬೊಕ್ಕ ಮೇಳದ ದೇವೆರೆನ್ ಭಕ್ತೆರ್ ಕೊರ್ತಿನ ಬಂಗಾರ್ ಬೊಕ್ಕ ಬೊಲ್ಲಿದ ಕಿರೀಟ, ಗದೆ, ಬಿಲ್ಲ್ ಬಾಣಲೆನ್ ಪತೊಂದು ಚೆಂಡೆ ಮದ್ದಳೆ, ವಾದ್ಯ ಬ್ಯಾಂಡ್ ವಾದನ ಹಿನ್ನೆಲೆಡ್ ಚೌಕಿಗ್ ಕನತ್ ದ್ ಪೂಜೆ ಮಲ್ತೆರ್.
ರಂಗಸ್ಥಳೊಡು ನಡತಿನ ಎಲ್ಯ ಲೇಸ್ ಡ್ ಸಮಾಜ ಸೇವಕೆರ್ ಪ್ರಸಾದ್ ಶೆಟ್ಟಿ ಬೊಕ್ಕ ಮಲ್ಲಿಕಾ ಶೆಟ್ಟಿ ದಂಪತಿ ಪಾವಂಜೆ ಮೇಳದ ತಿರ್ಗಾಟೊಗು ಚಾಲನೆ ಕೊರಿಯೆರ್.
ಈ ಪೊರ್ತುಡು ಮೇಳದ ಸಂಚಾಲಕೆರ್ ಸತೀಶ್ ಶೆಟ್ಟಿ ಪಟ್ಲ ಪಾತೆರ್ದ್, ಸೇವಾದಾರೆರ್, ದಾನಿಲು, ಕಲಾವಿದೆರೆಗ್ ಸೊಲ್ಮೆ ಸಂದಾದ್ ಮೂಜಿನೇ ವರ್ಷದ ತಿರ್ಗಾಟೊಗು ಮಾತೆರ್ಡಲ ಆಶೀವಾರ್ದ ನಟ್ಟಿಯೆರ್. ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಶಶೀಂದ್ರಕುಮಾರ್ ದಾನಿಲೆನ್ ಬೊಕ್ಕ ವಿಶೇಷ ಸೇವಾಕರ್ತರೆನ್ ಗೌರವ ಮಲ್ತೆರ್.
ಇಂಚೊಗು ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ರಾಜ್ ಕುಮಾರ್ ಅಂಚೆನೆ ದಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಸರಪಾಡಿ ಅಶೋಕ್ ಶೆಟ್ಟಿ ಮೆರೆನ್ ಮಾನಾದಿಗೆ ಮಲ್ತೆರ್. ಪ್ರಸಿದ್ಧ ವೈದ್ಯೆರ್ ಡಾ. ಪದ್ಮನಾಭ ಕಾಮತ್ ಸಂಕಲನದ, ಅಕ್ಷಯಕೃಷ್ಣ ಒಟ್ಟು ಮಲ್ದಿನ 41 ಭಾಗವತೆರ್ ಪದ ಪನ್ತಿನ 400 ಪದ್ಯೊಲೆನ ಸಿಡಿ ಬುಡುಗಡೆ ಮಲ್ತೆರ್.
ಬಿನ್ನೆರಾದ್ ಅಶೋಕ್ ಶೆಟ್ಟಿ ಕಲ್ಪವೃಕ್ಷ, ಸಚ್ಚಿದಾನಂದ ಶೆಟ್ಟಿ ಬೊಂಬೈ, ಪ್ರೊ. ಎಂ.ಎಲ್.ಸಾಮಗ, ಸಿಎ ದಿವಾಕರ ರಾವ್, ಯೋಗೀಂದ್ರ ಭಟ್ ಉಳಿ, ಬೆಹರೈನ್ ತುಳುಕೂಟದ ರಾಜ್ ಕುಮಾರ್, ಹಳೆಯಂಗಡಿ ಗ್ರಾಮ ಪಂಚಾಯಿತಿ ಸದಸ್ಯೆರಾಯಿನ ಸುಕೇಶ್ ಪಾವಂಜೆ, ಅಶ್ವಿನ್ ದೇವಾಡಿಗ, ಹಳೆಯಂಗಡಿ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಅಭಿವೃದ್ಧಿ ಸಮಿತಿದ ಹಿಮಕರ್ ಕದಿಕೆ, ಕದ್ರಿ ನವನೀತ್ ಶೆಟ್ಟಿ, ಪುರಷೋತ್ತಮ ಭಂಡಾರಿ ಅಡ್ಯಾರ್ ಮೊಕುಲು ಮಾತ ಇತ್ತೆರ್. ಅವೆರ್ದ್ ಬೊಕ್ಕ ಪಾಂಡವಾಶ್ವಮೇಧ ಯಕ್ಷಗಾನ ಬಯಲಾಟ ಪ್ರದರ್ಶನ ನಡತ್ಂಡ್.
ಬಿರುವೆರ್ ಕುಡ್ಲರ್ದ್ ಬೊಲ್ಲಿದ ಕಿರೀಟ
ಪಾವಂಜೆ ಮೇಳಡ್ ಎಚ್ಚಾದ್ ಸೇವಾರ್ಥಿಲು ಗೊಬ್ಬಾವುನ ಶ್ರೀ ದೇವಿ ಮಹಾತ್ಮೆ ಪ್ರಸಂಗದ ಶ್ರೀ ದೇವಿಗ್ ಕೂಳೂರು ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಇಂಚೊಗು ಸೇವಾ ರೂಪೊಡು ಕೊರ್ತಿನ ಬಂಗಾರ್ದ ಕಿರೀಟ ಈ ಸರ್ತಿದ ತಿರ್ಗಾಟದ ಆಕರ್ಷಣೆ ಆದುಂಡು. ಅಂಚೆನೆ ಪಾವಂಜೆ ಅಣ್ಣಪ್ಪಯ್ಯ ಯುವ ವೇದಿಕೆದ ಉಜ್ಜಾಲ್ ದ ಬೊಲ್ಲಿ ಪ್ರಭಾವಳಿ, ಬಿರುವೆರ್ ಕುಡ್ಲ ಈ ಸರ್ತಿ ಪೊಸತ್ತಾದ್ ಕೊರ್ತಿನ ಬೊಲ್ಲಿದ ದೇವೇಂದ್ರ ಕಿರೀಟ, ಯೋಗೀಂದ್ರ ಭಟ್ ಉಳಿ ಮೇರ್ ಕೊರ್ತಿನ ಬೊಲ್ಲಿದ ಶಂಖ, ರಾಮ್ ಪ್ರಸಾದ್ ಸಸಿಹಿತ್ಲು ಕೊರ್ತಿನ ಬೊಲ್ಲಿದ ಬಿಲ್ಲ್ ಬಾಣ, ಶರತ್ ಕಾರ್ನಾಡ್ ಕೊರ್ತಿನ ಆಜಿ ಆಯುಧ ಈ ಸರ್ತಿದ ವಿಶೇಷ ಆದುಂಡು. ಈ ವರ್ಷದ ತಿರ್ಗಾಟೊಡು ಪ್ರೊ. ಪವನ್ ಕಿರಣ್ ಕೆರೆ ಬರೆತಿನ ” ನಾಗ ಸಂಜೀವನ” ಪೊಸ ಪ್ರಸಂಗ ಪ್ರದರ್ಶನ ಆವರೆ ಉಂಡು. ಈ ಸರ್ತಿ ಪೂರ ಯಕ್ಷಗಾನ ಬುಕ್ಕಿಂಗ್ ಆದ್ , ದುಂಬುದ ವರ್ಷದಲ ಸೇವೆ ಎಚ್ಚಿನ ಸಂಖ್ಯೆಡ್ ಬುಕ್ ಆತ್ಂಡ್.
Editorial