ಪುತ್ತೂರು ತಾಲೂಕ್ದ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಮೂಲತಾನೊ ಗೆಜ್ಜೆಗಿರಿ ಪೊಸ ಯಕ್ಷಗಾನ ಮೇಳ “ಶ್ರೀ ಗೆಜ್ಜೆಗಿರಿ ಮೇಳ” ಉಂದೆತ್ತ ಉದಿಪನ ಅಂಚನೆ ಸುರುತ್ತ ಸೇವೆ ಆಟ ನವೆಂಬರ್ 27 ತಾರೀಕ್ಗ್ ಐತಾರ ಬಯ್ಯಗ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ಟ್ ನಡಪರೆ ಉಂಡು.
ಬಯ್ಯಗ್ 5.30 ಗಂಟೆಗ್ ಸಭಾ ಕಾರ್ಯಕ್ರಮದ ಲೇಸ್ ನಡಪರೆ ಉಂಡು. ಆರ್ಯ-ಈಡಿಗ(ಬಿಲ್ಲವ) ಮಹಾಸಂಸ್ಥಾನ ಸೋಲೂರು ಮಠತ್ತ ಪೀಠಾಧಿಪತಿ ಶ್ರೀಶ್ರೀಶ್ರೀ ವಿಖ್ಯಾತನಂದ ಸ್ವಾಮೀಜಿ ಲೇಸ್ಗ್ ಎಡ್ಡೆಪ್ಪುನು ಬಯಕ್ಯೆರ ಉಲ್ಲೆರ್. ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಅಧ್ಯಕ್ಷೆರ್ ಪೀತಾಂಬರ ಹೆರಾಜೆ ಲೇಸ್ದ ಗುರ್ಕಾರ್ಮೆ ವಹಿಸೊನರೆ ಉಲ್ಲೆರ್.
ಯುವ ಸಂಶೋಧಕೆರ್ ಡಾ. ಅರುಣ್ ಉಳ್ಳಾಲ್ ಧರ್ಮದ ಮದಿಪು ಪನಿಯರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬಿಜೆಪಿ ರಾಜ್ಯಾಧ್ಯಕ್ಷೆರ್, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ವಿಧಾನ ಪರಿಷತ್ದ ವಿರೋಧ ಪಕ್ಷದ ನಾಯಕೆರ್ ಬಿ.ಕೆ.ಹರಿಪ್ರಸಾದ್, ದ.ಕ.ಜಿಲ್ಲಾ ಉಸ್ತುವಾರಿ ಸಚಿವೆರ್ ವಿ.ಸುನೀಲ್ ಕುಮಾರ್, ಕೋಟ ಶ್ರೀನಿವಾಸ ಪೂಜಾರಿ ಸೇರ್ದ್ ಮಸ್ತ್ ಬಿನ್ನೆರ್ ಲೇಸ್ಡ್ ಪಾಲ್ ಪಡೆಯರೆ ಉಲ್ಲೆರ್.
ಈ ಲೇಸ್ಡ್ ಬೇತೆ ಬೇತೆ ಕ್ಷೇತ್ರಡ್ ಸಾಧನೆ ಮಲ್ತಿನ ಸಾಧಕೆರೆಗ್ ಮಾನಾದಿಗೆ ಮಲ್ಪುನ ಲೇಸ್ಲ ನಡಪರೆ ಉಂಡು. ಕಂಕನಾಡಿ ಬ್ರಹ್ಮ ಬೈದರ್ಕಳ ಗರಡಿ ಕ್ಷೇತ್ರದ ಅಧ್ಯಕ್ಷೆರ್ ಕೆ.ಚಿತ್ತರಂಜನ್ ಮೆರೆಗ್ “ಶ್ರೀ ಧರ್ಮ ರತ್ನ ಪ್ರಶಸ್ತಿ” ಅಂಚನೆ ತೆಂಕು ಬಡಗುತಿಟ್ಟ್ದ ಪೆರಿಯ ಯಕ್ಷಗಾನ ಕಲಾವಿದೆರ್ ರಾಜ್ಯ ಪ್ರಶಸ್ತಿ ವಿಜೇತೆರ್ ಆಯಿನ ಐರೋಡಿ ಗೋವಿಂದಪ್ಪ ಮೆರೆಗ್ “ಶ್ರೀ ದೇಯಿ ಬೈದೆತಿ ಮಾತೃ ಸನ್ಮಾನ”, ಪೆರಿಯ ಕಲಾವಿದೆರ್ ಪೂಕಳ ಲಕ್ಷ್ಮೀ ನಾರಾಯಣ ಭಟ್ ಮೆರೆಗ್ “ಶ್ರೀ ಸಾಯನ ಬೈದ್ಯ ಗುರು ಸನ್ಮಾನ”, ಅರುವ ಕೊರಗಪ್ಪ ಶೆಟ್ಟಿ ಮೆರೆಗ್ “ಯಕ್ಷಕೋಟಿ ಸಾಧಕ ಸನ್ಮಾನ”, ಕಲಾ ಪೋಷಕೆರ್ ಆಯಿನ ಸೇಸಪ್ಪ ಕೋಟ್ಯಾನ್ ಪಚ್ಚಿನಡ್ಕ ಬೊಕ್ಕ ಯಾದವ ಕೋಟ್ಯಾನ್ ಪೆರ್ಮುದೆ ಮೊಕ್ಲೆಗ್ “ಕೋಟಿ-ಚೆನ್ನಯ ಕಲಾಪೋಷಕ ಸನ್ಮಾನ” ಮಲ್ಪರೆ ಉಲ್ಲೆರ್.
ಶ್ರೀ ಪಾವಂಜೆ ಮೇಳದ ಪುಗರ್ತೆದ ಭಾಗವತೆರ್ ಪಟ್ಲ ಸತೀಶ್ ಶೆಟ್ಟಿ, ಶ್ರೀ ಹನುಮಗಿರಿ ಮೇಳದ ಭಾಗವತೆರ್ ರವಿಚಂದ್ರ ಕನ್ನಡಿಕಟ್ಟೆ, ಶ್ರೀ ಗೆಜ್ಜೆಗಿರಿ ಮೇಳದ ಭಾಗವತೆರ್ ಗಿರೀಶ್ ರೈ ಕಕ್ಕೆಪದವು, ಯುವ ಭಾಗವತೆರ್ ನಿರಂಜನ ಪೂಜಾರಿ ಬಡಗ ಬೆಳ್ಳೂರು, ಬಡಗು ತಿಟ್ಟ್ದ ಭಾಗವತೆರ್ ಆರ್.ಡಿ.ಸಂತೋಷ್ ಪೂಜಾರಿ, ತೆಂಕು ತಿಟ್ಟ್ದ ಮಹಿಳಾ ಭಾಗವತೆರಾಯಿನ ಭವ್ಯಶ್ರೀ ಮಂಡೆಕೋಲು, ಕಾವ್ಯಶ್ರೀ ಅಜೇರು, ಬಡಗು ತಿಟ್ಟ್ದ ಮಹಿಳಾ ಭಾಗವತೆರ್ ಇಂಚರ ಪೂಜಾರಿ ಶಿವಪುರ ಈ ಲೇಸ್ಡ್ ಮಾನಾದಿಗೆನ್ ಪಡೆಯೊನ್ಯರೆ ಉಲ್ಲೆರ್. ಮಧ್ಯಾಹ್ನ 3 ಗಂಟೆಗ್ ತೆಂಕು ಬೊಕ್ಕ ಬಡಗು ತಿಟ್ಟ್ದ ಕಲಾವಿದೆರ್ದ್ ಯಕ್ಷನಾಟ್ಯ ಗಾನ ವೈಭವ ಲೇಸ್ ನಡಪರೆ ಉಂಡು. ಈ ಲೇಸ್ಗ್ ಮಾತೆರ್ಲಾ ಬರೋಡು ಪಂದ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಮೇಳದ ಅಧ್ಯಕ್ಷೆರ್ ಅಂಚನೆ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
pallavi shetty