ಅಕ್ಟೋಬರ್ 4 ತಾರೀಕ್ ಗ್ ಪಿಲಿಕುಲು ಕುಡ್ಲ ನಿಲಿಕೆ
ಯಶ್, ಅಲ್ಲು ಅರ್ಜುನ್, ಸುನೀಲ್ ಶೆಟ್ಟಿ, ಪೂಜಾ ಹೆಗ್ಡೆ, ಕೊಟ್ಟು ವಿಶಾಲ್ ಮೊಕ್ಲೆನ ಸ್ಟಾರ್ ಅಟ್ರ್ಯಾಕ್ಷನ್
ಕುಡ್ಲ: ತುಳುನಾಡ್‌ಡ್ ಕುಡ್ಲ ದಸರಾ ಮಹೋಚ್ಚಯಗ್ ನನ ಒಂತೆ ದಿನ ಮಾತ್ರ ಬಾಕಿ. ತುಳುನಾಡ್‌ಡ್ ಮಾರ್ನೆಮಿದ ಪೊರ್ತುಡು ಪಿಲಿ ಏಸ ಸೆಂಟರ್ ಆಫ್ ಅಟ್ರಾಕ್ಷನ್. ಈ ಕಾರಣರ್‍ದಾವರ ಪಿದಯಿದ ಜಿಲ್ಲೆ, ರಾಜ್ಯರ್ದ್ ಬರ್ಪಿನ ಪ್ರವಾಸಿಗೆರೆನೆ ಕುಷಿ ಮಲ್ಪಾವರೆ ಈ ಸರ್ತಿಲ ಪಿಲಿ ನಲಿಕೆ ಪಂತೊ ಖದರ್ ಪಡೆಯೊಂದು ಉಂಡು.
ಕುಡ್ಲದ ಪಿಲಿ ನಲಿಕೆ ಪ್ರತಿಷ್ಠಾನ 7ನೇ ವರ್ಸದ ಪಿಲಿ ನಲಿಕೆ ಪಂತೊಗ್ ಅಟ್ಟಣೆ ಮಲ್ತೊಂದುಂಡು. ಪಿಲಿ ನಲಿಕೆ ಪ್ರತಿಷ್ಠಾನರ್ದ್ ಮಿಥುನ್ ರೈ ಮೆರೆನ ಮುತಾಲಿಕೆಡ್ ಅಕ್ಟೋಬರ್ 4 ತಾರೀಕ್‌ಗ್ ಅಂಗಾರೆದಾನಿ ಪಿಲಿ ನಲಿಕೆ -2022 ಲೇಸ್ ಪೇಂಟೆದ ಕರಾವಳಿ ಉತ್ಸವ ಮೈದಾನಡ್ ನಡಪರೆ ಉಂಡು. ಲೆಪ್ಪು ಕೊರಿನ ಕೂಟಲು ಮಾತ್ರ ಈ ಪಂತೊಡ್ ಪಾಲ್ ಪಡೆಯರೆ ಇತ್ತ್‌ದ್, ಪ್ರತಿಯೊಂಜಿ ಕೂಟಗ್‌ಲ 20 ನಿಮಿಷದ ಕಾಲಾವಕಾಶ ಕೊರಿಯರೆ ಉಂಡು. ಪಂತೊದ ಪೊರ್ತುಡು ಪೌಲಕುಣಿತ, ಜಂಡ ಮೆರವಣಿಗೆ, ಮುಡಿ ದಕ್ಕ್‌ನವ್, ಲಾಟೆ ಮುಡಿ ನಲಿಕೆ, ಪಲ್ಟಿ ವಿಶೇಷವಾದ್ ನಡಪರೆ ಉಂಡು.
ಕಿನ್ಯ ಪಿಲಿ ಪ್ರಶಸ್ತಿ, ಕಪ್ಪು ಪಿಲಿ, ತಾಸೆ ಕೂಟ, ಮುಡಿ ದಕ್ಕುನವ್, ಬಣ್ಣಗಾರಿಕೆ ಪಂತೊಲು ನಡಪರೆ ಉಂಡು. ಲೆಪ್ಪು ಕೊರಿನ ಕೂಟಲೆಗ್ ಪ್ರೋತ್ಸಾಹ ಧನ, ಪ್ರತಿ ವಿಭಾಗಡ್ ಗೆಂದಿನಕ್ಲೆಗ್ 30 ಸಾರ ರೂ. ಇನಾಮು, ಚಾಂಪಿಯನ್ ಕೂಟಗ್ ವಿಶೇಷ ಬಹುಮಾನ ತಿಕ್ಕರೆ ಉಂಡು. 12 ತಂಡಲು ಈ ಸರ್ತಿ ಪಂತೊಡ್ ಪಾಲ್ ಪಡೆಯರೆ ಉಂಡು. ಪಿಲಿನಲಿಕೆ ಪಂತೊಗು ಪಿದಯ್೬ ದೇಶಡ್‌ಲ ಮಲ್ಲ ಮಟ್ಟ್‌ಡ್ ಪ್ರಚಾರಗ್ ತಯಾರಿ ನಡತೊಂದು ಉಂಡು.
ಯುವ ನಾಯಕೆ ಮಿಥುನ್ ರೈ ಮೆರೆನ ಮುತಾಲಿಕೆಡ್ ನಡತ್ತೊಂದು ಇಪ್ಪುನ ಈ ಲೇಸ್‌ಡ್ ಸ್ಟಾರ್ ಪಿಚ್ಚರ್ ಆಕ್ಟರ್ ಆಯಿನ ಯಶ್, ತೆಲುಗು ನಟೆ ಆಯಿನ ಅಲ್ಲು ಅರ್ಜುನ್, ನಟೆ ಸುನೀಲ್ ಶೆಟ್ಟಿ, ತೆಲುಗು ಪಿಚ್ಚರ್ ದ ಪುಗರ್ತೆದ ನಟಿ ಪೂಜಾ ಹೆಗ್ಡೆ, ಸಂಗೀತ ನಿರ್ದೇಶಕೆರ್ ಗುರುಕಿರಣ್, ಕೊಟ್ಟು ವಿಶಾಲ್ ಪಾಲ್ ಪಡೆಯರೆ ಉಲ್ಲೆರ್.
ತುಳುನಾಡ್‌ಡ್ ಕಂಬುಲದಂಚನೆ ಪಿಲಿ ಏಸಲ ವರ್ಷರ್‍ದ್ ವರ್ಷಗ್ ಪುಗರ್ತೆ ಪಡೆಯೊಂದು ಉಂಡು. ಪಿಲಿಏಸದ ತಾಸೆದ ಪೆಟ್ಟ್‌ಗ್ ಎಲ್ಯ ಜೋಕುಲೆರ್‍ದ್ ಪತ್ತ್‌ದ್ ಪೊಂಜೊವುಲು, ಪೆರಿಯೆರ್ ಮಾತೆರ್‍ಲಾ ಪಜ್ಜೆ ಪಾಡುವೆರ್. ಪಿಲಿಏಸದ ಕಸರತ್ತ್‌ಡ್ ಜವನೆರೆನ ಪಾತ್ರ ಮಸ್ತ್ ಉಂಡು. ಇತ್ತೆದ ದಿನಟ್ ಪೊಣ್ಣ್ ಜೋಕುಲ್‌ಲ ಪಿಲಿಏಸ ಪಾಡ್ದ್ ಮಿನ್ಕೊಂದುಲ್ಲೆರ್. ಒಟ್ಟಾರೆ ಮಾರ್ನೆಮಿದ ಪೊರ್ತುಡು ಕುಡ್ಲ ನಿಲಿಕೆ ಪಿಲಿಕುಲೇ ತೋಜಿದ್ ಬರ್ರೆ ಉಂಡು.
Editorial