ಕುಡ್ಲ: ರೋಹಿತ್ ಚಕ್ರತೀರ್ಥ ಮುತಾಲಿಕೆದ ಪಠ್ಯ ಪುಸ್ತಕ ಪರಿಷ್ಕರಣೆ ಸಮಿತಿ ಏಳ್ನೇ ಕ್ಲಾಸ್ ದ ಸಮಾಜ ವಿಜ್ಞಾನ ಪುಸ್ತಕಡ್ ಕಯ್ಯಾರ ಕಿಂಞಣ್ಣ ರೈ ಮೆರ್ನ ವಿಚಾರೊನು ಕೈ ಬುಡ್ತಿನವು ಸರಿ ಅತ್ತ್, ಅವೆನ್ ಕೂಡ್ಲೆ ಸೇರ್ಸಾವೊಡು ಪಂದ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ರ್ ಸರ್ಕಾರೊನು ಒತ್ತಾಯ ಮಲ್ದೆರ್.
“ಕರ್ನಾಟಕ ಏಕೀಕರಣ ಅಂಚನೆ ಗಡಿ ವಿವಾದಲು” ಪನ್ಪಿನ ಪಠ್ಯಡ್ ಕಯ್ಯಾರ ಕಿಂಞಣ್ಣ ರೈಕುಲು ಕರ್ನಾಟಕನ್ ಒಂಜಿ ಮಲ್ಪುನೆಕ್ಕಾದ್ ಆರ್ನ ಕಡೆತ್ತ ಉಸುಲ್ ಇಪ್ಪುನ ಮುಟ್ಟ ಪೊರ್ಂಬಾಟ ಮಲ್ತ್ ದಿತ್ತೆರ್ ಪಂದ್ ಪಾಠೊಡು ಇತ್ತ್ಂಡ್. ಇತ್ತೆ ಆ ವಾಕ್ಯನ್ ದೆತ್ತ್ ದ್, ಮಂಜೇಶ್ವರ ಗೋವಿಂದ ಪೈ ಮೆರ್ನ ಪುದರ್ ನ್ ಸೇರ್ಸಾದೆರ್. ಆ೦ಡ ಗೋವಿಂದ ಪೈಕುಲು 1963 ಟ್ಟ್ ಪ್ರಾಯ ಆಯಿನೆಡ್ದಾವರ ತೀರ್ ಪೋದಿತ್ತ್ ದ್, ಅರೆಗ್ ಏಕೀಕರಣದ ವಿಷಯಡ್ ಸರಿಯಾದ್ ಪೊರ್ಂರ್ಬಾಟ ಮಲ್ಪರೆ ಅವಕಾಶ ತಿಕ್ಕ್ ದಿಜಿ.
1956 ಟ್ಟ್ ಭಾಷಾವಾರು ಪ್ರಾಂತ್ಯ ರಚನೆಯಾದಿತ್ತ್ ದ್, ಆಯಿಬೊಕ್ಕ ಆರ್ ಬದ್ ಕ್ ದ್ ಇತ್ತಿನವ್
7 ವರ್ಷ ಮಾತ್ರ. ಅಂಚಾದ್ ಅರೆಗ್ ಹುಷಾರ್ ಇಜ್ಜಂದೆ ಇತ್ತ್ ದ್ ಅರ್ನೊಟ್ಟುಗ್ ಶಿಷ್ಯೆರಾದಿತ್ತಿನ ಕಯ್ಯಾರ ಕಿಂಞಣ್ಣ ರೈ ಮೆರೆನ್ ಲೆತೊಂದ್ ಪೋವೊಂದಿತ್ತೆರ್. ಅವ್ವೆ ಕಯ್ಯಾರ ಕಿಂಞಣ್ಣ ರೈ ಮೇರ್ 2015 ಟ್ಟ್ ತೀರ್ ಪೋಪಿನ ಪೊರ್ತುಡು ಕಾಸ್ರೋಡ್ ಕರ್ನಾಟಕಗ್ ಸೇರೋಡ್ ಪಂದ್ ಪೊರ್ಂಬಾಟ ಮಲ್ತ್ ದಿತ್ತೆರ್. ಅಂಚಿತ್ತ್ ನ ಮಹಾನ್ ವ್ಯಕ್ತಿನ ಪುದರ್ ನ್ ಪಾಠ ಪುಸ್ತಕರ್ದ್ ಕೈ ಬುಡ್ತಿನವ್ ಒವ್ವೆ ಕಾರಣಗ್ ಲ ಸರಿ ಅತ್ತ್ ಪಂದ್ ಐಕಳ ಹರೀಶ್ ಶೆಟ್ರ್ ಪಂಡೆರ್.
ಗೋವಿಂದ ಪೈ ಮೆರ್ನ ಪುದರ್ ಸೇರ್ಸಾಯಿನೆಕ್ಕ್ ಎಂಕ್ಲೆಗ್ ಒವ್ವೆ ರೀತಿದ ಆಕ್ಷೇಪ ಇಜ್ಜಿ. ಆಂಡ ಕವಿ ಕಯ್ಯಾರೆರ್ನ ಪುದರ್ ನ್ ದೆತ್ತಿನವ್ ಇಡೀ ಬಂಟ ಸಮುದಾಯಗ್ ಅಪಮಾನ ಮಲ್ತಿಲೆಕ್ಕ ಆತ್ಂಡ್. ಅಂಚಾದ್ ಆರ್ನ ಪುದರ್ ನ್ ಕೂಡ್ಲೆ ಪಠ್ಯಡ್ ಸೇರ್ಸಾವುನ ಕ್ರಮ ದೆತೊನೊಡ್ ಪಂದ್ ಐಕಳ ಹರೀಶ್ ಶೆಟ್ಟಿ ಮೇರ್ ಸರಕಾರೊಗು ಒತ್ತಾಯ ಮಲ್ದೆರ್.
ಕಯ್ಯಾರ ಕಿಂಞಣ್ಣ ರೈ ಮೇರ್ ಬಂಟ ಸಮುದಾಯ ದ ಪೆರ್ಮೆಯಾದಿತ್ತ್ ದ್, ಆರ್ ಇಡೀ ತುಳುನಾಡ್ ದ ಪ್ರತೀಕ ಆತೆರ್. ಅಂಚಾದ್ ಅರೆಗ್ ನೇರವಾದ್ ಅಂಚನೆ ಪರೋಕ್ಷವಾದ್ ಮಲ್ಪಿನ ಒವ್ವೆ ಅವಮಾನಲ ಇಡೀ ಬಂಟ ಸಮುದಾಯ ಅಂಚನೆ ಇಡೀ ತುಳುನಾಡ್ ಗ್ ಮಲ್ಪುನ ಅನ್ಯಾಯ ಆಪುಂಡ್. ಜೂನ್ 30 ಗು ಬಂಟ್ಸ್ ಹಾಸ್ಟೆಲ್ ದ ಅಮೃತೋತ್ಸವ ಕಟ್ವಾಣದ ಚಾವಡಿಡ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಕಾರ್ಯಕಾರಿ ಸಮಿತಿ ಸಭೆಟ್ಟ್ ಈ ಬಗೆಟ್ ನಿರ್ಣಯ ದೆತೊನರೆ ಉಂಡು. ಈ ವಿಚಾರೊಡು ಮುಖ್ಯಮಂತ್ರಿಲೆಗ್ ಮನವಿ ಕೊರಿಯರೆಲ ಒಕ್ಕೂಟ ತೀರ್ಮಾನ ಮಲ್ತ್ ದ್ಂಡ್ ಪಂದ್ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ್ ಹೆಗ್ಡೆ, ಜೊತೆ ಕಾರ್ಯದರ್ಶಿ ಸತೀಶ್ ಅಡಪ ಸಂಕಬೈಲ್ ತೆರಿಪಾದೆರ್.
pallavi shetty