ಉರ್ವಡ್ ಶ್ರೀ ಗುರು ಸೌಹಾರ್ದ ಸಹಕಾರಿದ 6 ನೇ ಎಗ್ಗೆ ಉದಿಪನ

ಕುಡ್ಲ: ಶ್ರೀ ಗುರು ಸೌಹಾರ್ದ ಸಹಕಾರಿ ನಿಯಮಿತದ 6 ನೇ ಪೊಸ ಶಾಖೆನ್ ಉರ್ವ ಮಾರ್ಕೆಟ್ ಕಟ್ವಾಣೊಡು ಶಾಸಕೆರ್ ಡಿ. ವೇದವ್ಯಾಸ್ ಕಾಮತೆರ್ ಉದಿಪನ ಮಲ್ತೆರ್.

ಆರ್ ಪಾತೆರ್ದ್, ಕರಾವಳಿ ಬ್ಯಾಂಕಿಂಗ್ ಕ್ಷೇತ್ರದ ಊರು.ಮೂಲು ಸಹಕಾರಿ ಸಂಸ್ಥೆಲು ಗ್ರಾಹಕೆರೆಗ್ ಎಡ್ಡೆ ಸೇವೆ ಕೊರೊಂದುಪ್ಪುನೆಟ್ಟಾತ್ರ ತುಳುನಾಡ್ ಆರ್ಥಿಕ ಕ್ಷೇತ್ರೊಡು ಎಡ್ಡೆ ಪುಗರ್ತೆ ಪಡೆತ್ಂಡ್.ಪೊಂಜೊವುಲೇ ನಿರ್ದೇಶಕೆರಾದ್ ನಡಪಾವುನ ಶ್ರೀ ಗುರು ಸೌಹಾರ್ದ ಸಹಕಾರಿ ಸಂಸ್ಥೆ ಸುಮಲತ ನವೀನ್ ಚಂದ್ರ ಸುವರ್ಣೆರೆನ ಗುರ್ಕಾರ್ಮೆಡ್ ಅರೆನ ಇಡೀ ತಂಡ ಬ್ಯಾಂಕಿಂಗ್ ಕ್ಷೇತ್ರೊಡು ಕಡಿಮೆ ಅವಧಿಡ್ ಮಲ್ತಿನ ಸಾಧನೆ ಮೆಚ್ಚೊಡಾಯಿನವು ” ಪಂಡ್ ದ್ ಪಂಡೆರ್. ಮೂಡಾ ಅಧ್ಯಕ್ಷೆರ್ ರವಿಶಂಕರ್ ಮಿಜಾರ್ ಭದ್ರತಾ ಕೋಶ ಉದಿಪನ ಮಲ್ತ್ ದ್ ” ಪರಿಶ್ರಮ ಬೊಕ್ಕ ಪ್ರಾಮಾಣಿಕತೆಡ್ ಗ್ರಾಹಕೆರೆಗ್ ಎಡ್ಡೆ ಸೇವೆ ಕೊರ್ಪಿನ ಶ್ರೀ ಗುರು ಸೌಹಾರ್ದ ಸಹಕಾರಿದ ಶಾಖೆಲು ನನಲಾತ್ ಹೆಚ್ಚಾವಡ್ ” ಪಂಡ್ ದ್ ಎಡ್ಡೆಪ್ಪು ಕೊರಿಯೆರ್.

ಮೇಯರ್ ಪ್ರೇಮಾನಂದ ಶೆಟ್ಟಿ ” ಪೊಂಜೊವುಲೇ ಸೇರೊಂದು ಬ್ಯಾಂಕಿಂಗ್ ಕ್ಷೇತ್ರೊಡು ಸಾಧನೆ ಮಲ್ತಿನ ಶ್ರೀ ಗುರು ಸೌಹಾರ್ದ ಸಹಕಾರಿ ಮಾತೆರೆಗ್ಲಾ ಮಾದರಿ ಆದುಂಡು. ಸಾಧನೆಗ್ ಲಿಂಗಭೇದ ಇಜ್ಜಿ ” ಪಂಡ್ ದ್ ಪಂಡೆರ್.

ಅಖಿಲ ಭಾರತ ಬಿಲ್ಲವರ ಯೂನಿಯನ್ ದ ಗುರ್ಕಾರ್ಲು ನವೀನ್ ಚಂದ್ರ ಡಿ ಸುವರ್ಣೆರ್, ” 15 ವರ್ಷೊಗು ದುಂಬು ಪೊಂಜೊವುಲೇ ಸೇರ್ದ್ ನಡ್ತಿನ ಈ ದೈ ಇನಿ ಮಲ್ಲ ಮರ ಆದ್ ಬಡಪತ್ತ್ ದಕಲ್ನ ಕುಟುಂಬೊಗು ಆರ್ಥಿಕ ಬಲ ಕೊರ್ದು ಅಕ್ಲೆಗ್ ತಂಪು ನಿರೆಲ್ ಕೊರೊಂದುಂಡು ಪನ್ಪಿನ ವಿಷಯ ಎಂಕ್ಲೆಗ್ ಮಸ್ತ್ ಕುಶಿ ಕೊರೊಂದುಂಡು ” ಪಂಡ್ ದ್ ಪಂಡೆರ್. ಶ್ರೀ ಗುರು ಸೌಹಾರ್ದ ಸಹಕಾರಿದ ಗುರ್ಕಾರ್ದಿ ಸುಮಲತ ನವೀನ್ ಚಂದ್ರ ಸುವರ್ಣ ಬಿನ್ನೆರೆನ್ ಎದ್ಕೊಂಡೆರ್. ಒತ್ತು ಗುರ್ಕಾರ್ದಿ ಸುಖಲಾಕ್ಷಿ ವೈ. ಸುವರ್ಣ ಲೇಸ್ ಸುದಾರ್ತೆರ್. ನಿರ್ದೇಶಕಿ ಶಕಿಲಾರಾಜ್ ಪ್ರಾಸ್ತಾವಿಕ ಪಾತೆರಿಯೆರ್. ನಿರ್ದೇಶಕಿ ಮೋಹಿನಿ ರಾಮಚಂದ್ರ ಸೊಲ್ಮೆ ಸಂದಾಯೆರ್.

ನಿರ್ದೇಶಕೆರಾಯಿನ ದಯಾಮಣಿ ವಿ.ಕೋಟ್ಯಾನ್, ಶುಭಾ ಜಯಚಂದ್ರ,ಅಮೃತಾ ಕೂಳೂರು, ರೇವತಿ ಅಶೋಕ್, ಭಾರತಿ ದೇವದಾಸ್, ಸಿಇಓ ಪುಷ್ಪಾನಂದ ಕುಮಾರ್ ಚಾವಡಿಡ್ ಪಾಲ್ ಪಡೆದಿತ್ತೆರ್. ಮಾತ ಸಿಬ್ಬಂದಿ ವರ್ಗದಕ್ಲೆಗ್ ಅಕ್ಲೆನ ಸೇವೆನ್ ಗುರುತಿಸಾದ್ ಮಾನಾದಿಗೆ ಮಲ್ತೆರ್.