ಒಡಿಪುದ ಚೇರ್ಕಾಡಿಡ್ ಒಂಜಿ ಗುತ್ತುದ ಇಲ್ಲ ಇತ್ತ್ಂಡ್. ಇಲ್ಲದ ಗುರ್ಕಾರಗ್ ಅಜ್ಪ(60) ಕಡತ್ತಿಬೊಕ್ಕ ಜೋಕುಲು ಅರೆನ್ ತೂಪಿನ ಕಮ್ಮಿ ಮಲ್ತೆರ್.ಒಂಜಿ ಅರ್ತೊಡ್ ಆರ್ ಇಲ್ಲ್ ಬುಡ್ದ್ ಪೋವೊಡು ಪನ್ಪುನನೆ ಜೊಕುಲ್ನ ಉದ್ದೇಶ. ಮೊರನಿ ಮುಟ್ಟಲ ಬೆನ್ನಿ,ಸಾಗೊಲಿ ಬೆನ್ತಿನ ಜೀವ.ಜೊಕ್ಲೆನ ಹಂಗ್ ದ ಪಾತೆರ,ಕುಚ್ಚನೆ ಕೆಂಡ್ ದ್ ಸಾಕಾಂಡ್. ಗುರ್ಕಾರೆ ಪೇತ್ರಿ ಪೇಂಟೆಡ್ ತಿರ್ಗ್ದ್ ಅಕ್ಲೆಡ ಮೊಕ್ಲೆಡ ಕೆಂಡ್ ದ್ ತಿನೊಡಾಂಡ್.
ಬೈಯಡ್ ಇಲ್ಲಡೆ ಪೊಂಡಲ ಗಂಜಿ,ನುಪ್ಪು ಇಜ್ಜಿ.ಏರ್ಲ ಪಾತೆರುಜೆರ್.ಆಡಿಗೆನೆ ಜೆತ್ ದ್ ಕಾಂಡೆ ಪೇಂಟೆಗ್ ಬರೊಡು.ಚಾ,ತಿಂಡಿ,ಬಚ್ಚಿರೆ ಪೂಲ್ ಎಂಚಿನಾಲ ನಟ್ ದೆ ತಿನೊಡ್. ಅಜ್ಜೆರೆನ ಈ ಸ್ಥಿತಿನ್ ತೂದ್ ಒರಿ ಗುರ್ತಾದಾರ್ ಒಂಜಿ ಉಪಾಯ ಪಂಡ್ ಕೊರಿಯೆರ್.ಆತ್ ಮಲ್ತ್ಂಡ ಜೋಕುಲು,ಮರ್ಮಾಲ್ಲು ಇರೆನ್ ಮೋಕೆಡ್ ತೂಪೆರ್ ಗ್ಯಾರಂಟಿ ಅಂದ್ ಪಂಡೆರ್. ಈ ಪರಬೆ ಅಂಚನೆ ಮಲ್ತ್ಂಡ್. ಒಂಜಿ ಅದೊತ್ತ ಚಿರಾವುಡು ಅರ್ಧದಾತ್ ದಿಂಜದ್ ಒಂಜಿ ಕಟ್ಟ ಪಾಡ್ದ್ ಇಲ್ಲಡೆ ಕೊಣೊಯೆರ್.ಹಲ್ಲಿದಾಕ್ಲೆನ ಬಚ್ಚಿರೆದ ಚಿರಾವುಡ್ದುಲಾ ರಡ್ಡ್ ಪಾಲ್ ಮಲ್ಲ ಚಿರಾವು. ಇಲ್ಲಡ್ ಅರೆನಾನೆ ಒಂಜಿ ಪೆಟ್ಟಿಗೆ ಉಂಡು.
ಆ ಪೆಟ್ಟಿಗೆಡ್ ಈ ಚಿರಾವುದ ಗಂಟ್ ನ್ ದೀದ್ ಬೀಗ ಪಾಡ್ಯೆರ್.ಚೀರಾವುನ್ ಪೆಟ್ಟಿಗೆಡ್ ದಿಪುನೈಕ್ ದುಂಬು ಒರಾ ಅಲ್ಗಾದ್ ಗಜ ಗಜ ಸಬ್ಡ ಮಲ್ತೆರ್. ಈ ಪರಬೆ ಕಾಂಡೆ ಲಕ್ಕ್ ದ್ ಮೊನೆ ದೆಕ್ಕಿ ಬೊಕ್ಕ ಉಲಾಯಿ ಬತ್ತಿನಾರ್ ಪೆಟ್ಟಿಗೆದ ಬೀಗ ದೆತ್ತ್ ದ್ ಆ ಚಿರಾವುನು ಅಲ್ತಾಡೆಗೆ ದೆರ್ತ್ ದ್ ನಾಲ್ ಸರ್ತಿ ಅಲ್ಗಾದ್ ಗಜಗಜ,ಝೈಂಝೈಂ. ಸಬ್ದ ಮಲ್ತ್ ದ್ ಆಂಚೆನೆ ದೀದ್ ಬೀಗ ಪಾಡ್ದ್ ಪೇಂಟೆಗ್ ಪೋಪುನ.ಕುಡಾ ಬಯ್ಯಡ್ ಬತ್ತಿನಾರ್ಲ ಅವ್ವೆ ಪ್ರಕಾರ ಸಬ್ದ ಮಲ್ತ್ ದ್ ಬೀಗ ಪಾಡ್ದ್ ಜೆಪ್ಪುನ.ದಿನೋಲ ಈ ಗಂಟ್ ದ ಶಬ್ದ ಕೇಂಡ್ದ್ ಜೋಕುಲ್,ಮರ್ಮಾಲಾರ್ಲೆನ ಕೆಬಿ ಸರ್ತಾಂಡ್.ಪರಬಡ ಬೊಳ್ಳಿದ ದುಡ್ಡು ಉಂಡುಂದು ಅಂದಾಜಿ ಮಲ್ತೆರ್.ಆಂಚನೆ ದಿನ ಪೊಯಿ ಬೊಕ್ಕ ಅರೆಗ್ ಮೀಯರೆ ಬೆಚ್ಚ ನೀರ್ಡ್ದಿಂಚ ಕೊರ್ರ ಸುರು ಮಲ್ತೆರ್.ಕಾಂಡೆ ಚಾ,ಅಡ್ಡ್ಯೆ,ರಾತ್ರೆಗ್ ವೊಣಸ್ ಕೊರ್ರಾ ಸುರು ಆಂಡ್.ಆಂಚನೆ ಬೊಕ್ಕಾ ಪೇಂಟೆಗ್ ಪೋವರೆ ಬಲ್ಲಿಂದ್ ಪಂಡೆರ್.
ಜೋಕುಲ್ ಪಂಡಿಲೆಕ್ಕನೆ ಅಮ್ಮೆರ್ ಇಲ್ಲಾಡೆ ಕುಲ್ಲ್ ದ್ ದಿನ ದೆತ್ತೆರ್.ಆಂಡಾ ಮಾತ್ರ ದಿನೊಕ್ಕ್ ರಡ್ಡ್ ಪೊರ್ತು ಚಿರಾವು ಪಂದಾವುನಾ ತಪ್ಪರೆ ಇಜ್ಜಿ. ಇಂಚನೆ ವರ್ಷ ಕರಿಂಡ್. ಒಂಜಿ ದಿನ ಇತ್ತಿ ಲೆಕ್ಕನೆ ಪರಬೆ ತೀರ್ ಪೋಂಡು. ಕುಟುಂಬ,ಪೊದ್ದೆರ್,ಇಸ್ಟೆರ್,ಊರು ಸರ್ಕೆ ಸುದ್ದಿ ತೆರ್ಪಾದ್ ಭಾರಿ ಕ್ರಮೊಟ್ ಪುಣ ಪೊತ್ತಾಯೆರ್. ಐನನೆ ದಿನಾತ್ತಾನಿ ದೂಳು ರಾಶಿಗ್ ಪುರಾ ಸೇರ್ದಾಂಡ್.ಬೊಜ್ಜದ ಕರ್ಚಿ ಎಂಕ್ ಲೆ ಮಲ್ಪುಬ ಪಂಡ್ ದ್ ಜೋಕುಲು ಹಿರಿಯಕ್ ಲ್ಡ ಪಂಡೆರ್.ಅಂತೂ ಮಾತೆರ್ಲಾ ಕೂಡ್ದ್ ಭಾರಿ ಗೌಜಿಡ್ ಬೊಜ್ಜಾಂಡ್.ಅನಿ ರಾತ್ರೆ ಉಲಾಯಿ ಲೆಪ್ಪುನ ಕ್ರಮಲಾ ಭಾರಿ ಗೌಜಿಡಾಂಡ್.
ಕುಟುಂಬದ ಇಲ್ಲಾಡ್ ಪದಿನಾಜಿ ಅಗೆಲ್ ದ ಕ್ರಮೊಲಾ ಬಾರಿ ಎಡ್ಡೆಡಾಂಡ್.ನೆತ್ತ ಇಡೆಟ್ ಗೋಕರ್ಣ ಪೋದ್ ಪಿಂಡ ಬುಡ್ದುಲ ಬತ್ತೆರ್. ಜೋಕುಲೆನಾ ಮಂಡೆಡ್ ಅಮ್ಮೆರೆನಾ ಚಿರಾವುದನೆ ಗ್ಯಾನ.ಒಂಜಿ ದಿನ ಅಣ್,ಪೊಣ್ಣ್ ಜೋಕುಲು,ನನ್ಕ,ಭಾವನಕುಲು ಪೂರಾ ಎದುರ್ಕೆದುರು ಕುಲ್ಲುದ್ ಅಮ್ಮೆರ್ನ ಪೆಟ್ಟಿಗೆದ ಬೀಗ ದೆತ್ತ್ಂಡ್.ಪೆಟ್ಟಿಗೆಡ್ ಆ ಚಿರಾವುದ ಗಂಟ್ ಅತ್ತಾಂದೆ ಬೇತೆ ದಾಲಾ ಇಜ್ಜಿ.ಸೈದಿನ ಒಂಜಿ ಎಕ್ಕಲೆಲಾ ಇಜ್ಜಾಂಡ್.ಬೊಲ್ಲಿದ ರುಪಾಯಿದ ಗಂಟ್ ಪಂಡ್ ದ್ ಇ ಜೋಕುಲು ದಾದ ನಂಬುದೆರ ಅವ್ವೆ ಇ ಚಿರಾವುನು ದೆರ್ತ್ ದ್ ಪೆಟ್ಟಿಗೆಡ್ದ್ ಪಿದಾಯಿ ದೀಯೆರ್.
ದೊರ್ಪುನಗ ಒಂಚಿ ರಟ್ಟುಂಡ ದಾದನ ಪಂಡ್ ದ್ ಜೋಕುಲು ಕಣ್ಣ್ ಬುಲಾದ್ ಚಿರಾವ್ನೆ ತೂವೊಂದ್ ಕುಲ್ಲಿಯೆರ್.ಮಲ್ಲ ಮಗೆ ಚಿರಾವುದ ಗಂಟ್ ನ್ ಬಿಚ್ಚಾದ್ ಬಾರಿ ತಿರ್ತ್ ಡ್ದೆ ನೆಲಕ್ ದೊರ್ತೆ.ಕಣ ಕಣ ಕಣ ಶಬ್ಡಾಂಡ್,ದಾದ ತೂಪಿನಿ ಅವು ಬೊಳ್ಲಿಲ ಅತ್ತ್,ದುಡ್ಡುಲಾ ಅತ್ತ್.ಒಂಜಿ ಸೇರ್ದಾತ್ ಮರ್ವಯಿದ ಗೋಡು!. ಜೊಕುಲೆಗ್ ತೆಲ್ಪರೆಲ ಅತ್ ಜಿ ಬುಲ್ಪಾರೆಲ ಅತ್ ಜಿ.”ಅಮ್ಮೆರ್ ಎಂಕ್ಲೆಗೆ ಕಲ್ಪಾಯೆರಾತ್ತ…..”ಪಂಡ್ಂದ್ ಪೆಟ್ಟಿಗೆನ್ ಬುಡ್ದ್ ಲಕ್ಕೊಂದ್ ಪೋಯೆರ್. ಅಜ್ಜೆರೆನ್ ಕಡೆಕಾಲೊಡ್ ಸುಕೊಟ್ಟ್ ಬದ್ಕಾಯಿನ ಮರ್ವಯಿದ ಮಹಾತ್ಮೆ ಎಂಚಾ? ಮಾಂತೆರ್ಲ ಅರ್ಧ ಸೇರ್ ಮರ್ವಯಿದ ಗೋಡು ದೆತ್ತ್ ದಿಪುನ ಎಡ್ಡೆ.ದಾನೆ ಪನ್ಪಾರ್!?
ಬರವು : ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ
