ಪೂಜೆಗ್ ಕುಲ್ಲುನಗ ಬಿರೆಲ್ ಗ್ ದರ್ಬೆದ ಉಂಗಿಲ ದಾಯೆ ಪಾಡುವೆರ್?

ದರ್ಬೆನ್ ಪಿರಾಕ್ ದ ಕಾಲರ್ದ್ ಲ ಪೂಜೆದ ಪೊರ್ತುಡು ಗಲಸೊಂದ್ ಉಲ್ಲೆರ್. ವೇದದ ಕಾಲರ್ದ್ ಲ ದೇವೆರ್ ಕುಲ್ಲುನ ಜಾಗೆಡ್ ಗ್ರಹಣಗ್ ದುಂಬು ದರ್ಬೆನ್ ದೀಪುನ ಪದ್ಧತಿ ಆಚರಣೆಡ್ ಉಂಡು. ದರ್ಬೆ ಇಂದ್ರನ ವಜ್ರಾಯುಧ ಇತ್ತಿಲೆಕ್ಕ. ದರ್ಬೆನ್ ದೇವಲೋಕರ್ದ್ ಯಜ್ಞ ಯಾಗಾದಿಗ್ ಪಂದೇ ಭೂ ಲೋಕಗ್ ಭಗವಂತೆ ಕಡಪುರ್ದ್ ಕೊರ್ತೆ ಪಂದ್ ನಮ್ಮ ಶಾಸ್ತ್ರಲೆಡ್ ಉಲ್ಲೇಖ ಉಂಡು. ಹೋಮ ಮಲ್ಪುನಗ ದರ್ಬೆನ್ ಹೋಮಕುಂಡದ ಸುತ್ತ 4 ಬರಿಟ್ಟ್ ಲ ದೀಪೆರ್.

ಇಲ್ಲಡ್ ನಮ ಮಲ್ಪುನ ಒವ್ವೆ ಕಾರ್ಯಕ್ರಮದ ಸುರುಕ್ಕ್ ಒಂಜಿ ಆಚರಣೆ ರೂಢಿಡ್ ಉಂಡು. ಅವ್ ದಾದ ಪಂಡ ದರ್ಬೆದ ಒಂಜಿ ಗೊಂಚಲ್ ನ್ ಪತೊಂದ್ ಆಯಿತ್ತ ಕೊಡಿರ್ದ್ ಮಾತ ಪೂಜೆದ ಸಾಮಾನ್ ದ ಮಿತ್ತ್, ಪೂಜೆ ಮಲ್ಪುನ ಜಾಗೆದ ಪ್ರತಿ ಮೂಲೆಗ್, ಪೂಜೆಗ್ ಕುಲ್ಲ್ ನಕ್ಲೆನ ಮಿತ್ತ್ ನೀರ್ ನ್ ಪಾಡುವೆರ್. ಇಂಚ ಮಲ್ಪರೆ ಕಾರಣ ಉಂಡು. ಅವ್ ದಾದ ಪಂಡ ದರ್ಬೆದ ಕೊಡಿರ್ದ್ ಶಬ್ದ ಸಂವೇದನಾ ಕಂಪನನ್ ಉಂಡು ಮನ್ಪುನ ಶಕ್ತಿ ಉಂಡು ಪನ್ಪಿನ ನಂಬಿಕೆ. ದರ್ಬೆಡ್ ಇಪ್ಪುನ ಕಂಪನಾ ಶಕ್ತಿನ್ ನೀರ್ ಪತ್ತೊನುಂಡು. ಈ ನೀರ್ ಒಲ್ಪ ಪೂರ ಪಾಡುವೆರಾ ಅಲ್ಪ ಪೂರ ಶಕ್ತಿದ ಸಂಚಲನ ಆಪುಂಡ್.

ಇಂಚಾದ್ ಕೊಡಿ ಇಜ್ಜಂದಿನ ದರ್ಬೆನ್ ಗಲಸುಲೆಕ್ಕ ಇಜ್ಜಿ. ಉಂದು ಅತ್ತಂದೇ ದರ್ಬೆರ್ದ್ ಮಲ್ಪುನ ಪವಿತ್ರವಾಯಿನ ಉಂಗಿಲನ್ ಪೂಜೆದ ಪೊರ್ತುಡು ಆಣ್ ಲು ಬಲತ್ತ ಕೈಟ್ ಇಪ್ಪುನ ಉಂಗಿಲದ ಬಿರೆಲ್ ಗ್ ಪಾಡುವೆರ್. ಅಶುಭದ ಪೊರ್ತು ಆಯಿನ ಸಾವು ಇಂಚಿತ್ತಿನ ಪೊರ್ತುಡು ಒಂಜಿ ಎಸಲ್ ದ ದರ್ಬೆನ್, ಪೂಜೆ ಅಂಚನೆ ಶುಭವಾಯಿನ ಪೊರ್ತುಡು ರಡ್ಡ್ ಎಸಳ್ ದ ದರ್ಬೆನ್, ಅಮಾವಾಸ್ಯೆ ಅಂಚನೆ ಶ್ರಾದ್ಧ ಕಾರ್ಯಡ್ 3 ಎಸಳ್ ದ ದರ್ಬೆನ್, ದೇವಲ್ಯಡ್ ಮಲ್ಪುನ ಪೂಜೆಲೆಡ್ 4 ಎಸಳ್ ತ್ತ ದರ್ಬೆನ್ ಗಲಸುನ ವಾಡಿಕೆ ಉಂಡು. ಅಂಚಾಂಡ ಈ ದರ್ಬೆದ ಉಂಗಿಲದ ಮಹತ್ವ ದಾದ..?

ದರ್ಬೆ ಉಂಗಿಲದ ಮಹತ್ವ

ಒವ್ವೆ ಪೂಜೆ, ಯಜ್ಞ, ಹೋಮ, ಹವನಡ್ ದರ್ಬೆದ ಪವಿತ್ರವಾಯಿನ ಉಂಗಿಲನ್ ಪಾಡುನ ಪಿರಾಕ್ ರ್ದ್ ಲ ಬತ್ತಿನ. ಒಂಜಿ ಸುಂದರವಾಯಿನ ಸಂಪ್ರದಾಯ. ಬ್ರಾಣೆರ್ ಬೊಕ್ಕ ವೈಷ್ಣವೆರ್ ಶುಭ ಕಾರ್ಯಡ್ ಅತ್ತಂಡ ಅಶುಭ ಕಾರ್ಯಕ್ರಮನ್ ಮಲ್ಪುನ ಪೊರ್ತುಡು ದರ್ಬೆ ದರ್ಬೆದ ಉಂಗಿಲನ್ ಕೈತ್ತ ಬಿರೆಳ್ ಗ್ ಪಾಡುವೆರ್. ನಮ ಒವ್ವೆ ವ್ರತ, ಯಜ್ಞ-ಯಾಗಾದಿಲು, ಪೂಜೆನ್ ಮಲ್ಪುನಗ ಭಗವಂತನ ಶಕ್ತಿದ ಒಟ್ಟುಗ್ ದುಷ್ಟ ಶಕ್ತಿಲ ಇಪ್ಪುಂಡ್. ಅಪಗ ನಮ್ಮ ಕೈಟ್ ಇಪ್ಪುನ ದರ್ಬೆದ ದರ್ಶನರ್ದ್ ದುಷ್ಟ ಶಕ್ತಿಲು ಅಲ್ಪರ್ದ್ ಬಲ್ತ್ ಪೋಪ ಪನ್ಪಿನ ನಂಬಿಕೆ ಉಂಡು.

ದರ್ಬೆ ಮಿತ್ತ್ ರ್ದ್ ತೂನಗ ಸಂಗವಾದ್ ಬುಳೆಪುನ ಪಜೀರ್.ಆಂಡ ಜಾಗೆಡ್ ಇಪ್ಪುನ ದುಷ್ಟ ಶಕ್ತಿಲೆನ್ ನಿಯಂತ್ರಣ ಮಲ್ಪುನ ಶಕ್ತಿ ದರ್ಬೆಗ್ ಉಂಡು. ಆಯಿಕ್ಕಾದ್ ಯಜ್ಞ-ಯಾಗದ ಪೊರ್ತುಡು ದರ್ಬೆನ್ ಉಂಗಿಲ ಮಲ್ತ್ ದ್ ಬಿರೆಲ್ ಗ್ ಪಾಡುವೆರ್.