ಗೆಜ್ಜೆಗಿರಿತ ಮಾದರಿಡ್ ನಿರ್ಮಾಣ ಆಯಿನ ಹೊಸಾಳ ಗರಡಿ : ಮೇ 28 ಮುಟ ಪ್ರತಿಷ್ಟಾ ಉಚ್ಚಯ
ಬ್ರಹ್ಮವರ : ಬಾರ್ಕೂರುಡು ಗೆಜ್ಜೆ ಗಿರಿತ ಮಾದರಿಡ್ ಹೊಸಾಳ ಗರಡಿ ನಿರ್ಮಾಣ ಆವೊಂದು ಉಂಡು . ಅವ್ವೆ ಕುಶಲ ಕರ್ಮಿಲೆರ್ದ್ ಕೆಂಪು ಕಲ್ಲ್ ಡ್ ಕಲಾತ್ಮಕವಾದ್ ಗರಡಿ ಮೂಡುದು ಬೈದುಂಡು . ಮೇ 22ರ್ದ್ 28 ತಾರಿಕ್ ಮುಟ ಬೇತೆ ಬೇತೆ ಧಾರ್ಮಿಕ ಲೇಸ್ ದೊಟ್ಟುಗು ಪುನಃ ಪ್ರತಿಷ್ಟಾ ಉಚ್ಚಯ ನಡಪೆರೆ ಉಂಡು.
ಶಿಲ್ಪಿ ಇನ್ವ ಯೋಗೀಶ್ ಆಚಾರ್ಯೆರ್ನ ಕೂಟದಕುಲು ಮರತ ಬೇಲೆ ಮಲ್ತೊಂದು ಉಲ್ಲೆರ್. ದುಂಬು ಇತ್ತಿನ ಮೂರ್ತಿಲೆಗ್ ರಂಗ್ ಪಾಡುನ ಕಜ್ಜ ನಡತೊಂದು ಉಂಡು.
ಮೈಸೂರುದ ಡಿ. ಎಂ. ಎಸ್ ಲಲಿತಕಲಾ ಸಂಸ್ಥಾನಡ್ 5 ವರ್ಷ ಕಲಾ ಶಿಕ್ಷಣ ಪಡೆಯಿನ ಕೇರಳದ ಜಗದೀಶ್ ಪಾಲಿಯಾಟ್ ಮುತಾಲಿಕೆದ 7 ಜನ ನುರಿತ ಕಲಾವಿದೆರ್ನ ಕೂಟರ್ದ್ ಕರಿನ ಒಂಜಿ ತಿಂಗೊಲುರ್ದು ರಂಗ್ ಪಾಡುನ ಕಜ್ಜ ನಡತೊಂದು ಉಂಡು. ಇತ್ತೇ ಕಡೆತ ಹಂತ ಮುಟ್ಟುದುಂಡು.
ಕಲ್ಲ್ ದ ರೂಪೊಡು ಉಪ್ಪುನ 7 ರಂಗ್ ದ ಕಲ್ಲ್ ನ್ ಪೊಡಿ ಮಲ್ತ್ ಬ್ರಷ್ ದ ಮುಖೇನ ರಂಗ್ ಪಾಡೊಂದು ಉಲ್ಲೆರ್. ಈ ರಂಗ್ ಗ್ ಕೆಜಿಗ್ 19 ಸಾರ ರೂ ಬಿಲೆ ಉಂಡು ಅವೆನ್ ಮಿಶ್ರಣ ಮಲ್ತ್ ಪಾಡಿಬೊಕ್ಕ ಏತೇ ವರ್ಷ ಆಂಡಲಾ ಕಟ್ಟಿನ ಕಲ್ಲ್ ದ ರಂಗ್ ಮಾಜುಜಿ.
ಸಮಿತಿ ರಚನೆ : ಪೊಸ ಗುಡಿಟ್ ನಾಗ ದೇವೆರ್ , ಸಪರಿವಾರ, ಬ್ರಹ್ಮಬೈದರ್ಕಳ ದೈವ, ಶಿವರಾಯ, ಜೀರ್ಣೋದ್ಧಾರದ ಗೌರವಾಧ್ಯಕ್ಷ ಡಾ.ವೈ.ಎಸ್. ಹೆಗ್ಡೆ ಮುತಾಲಿಕೆಡ್ ಗುರ್ಕಾರ್ಲಾಯಿನ ರಾಘವ ಶೆಟ್ಟಿ, ಪಾತ್ರಿಲು , ಅರ್ಚಕೆರ್ , ಗರಡಿದ ಇಲ್ಲದಕುಲು , ಗುರ್ಕಾರ್ಲು ಊರ ಪರವೂರ ಭಕ್ತೆರ್ನ ಸಮಿತಿ ರಚನೆ ಮಲ್ದೆರ್ .
ಕೋಟೆಕೇರಿ ದೇವಲ್ಯೊರ್ದು ಪುದೆಕಾಣಿಕೆ ಮೆರವಣಿಗೆ: ಐತಾರ ಕೋಟೇಕೇರಿ ಶ್ರೀ ಪಂಚಲಿಂಗೇಶ್ವರ, ದೇವಲ್ಯೊರ್ದು ಮೆರವಣಿಗೆ ಮುಖೇನ ಪುದೆ ಕಾಣಿಕೆ ಅರ್ಪಣೆ ಮಲ್ತೆರ್. ಪ್ರತಿಷ್ಠಾಪನಾ ಕಲಶ, ಪ್ರಭಾವಳಿದೊಟ್ಟುಗು ಪೊಂಜೊವ್ಲೆನ ಪೂರ್ಣಕುಂಭ, ಕುಣಿತದ ಭಜನೆ, ಚೆಂಡೆ ಕೂಟ , ನಾನಾಬೇತೆ ಬೇತೆ ಟ್ಯಾಬೋ ಪುದೆ ಕಾಣಿಕೆ ಮೆರವಣಿಗೆನ್ ನನಾತ್ ಪೊರ್ಲು ಮಲ್ತುಂಡು.
ಈ ಪೊರ್ತುಡು ಡಾ.ವೈ.ಎಸ್.ಹೆಗ್ಡೆ ಗುರ್ಕಾರ್ಲು ರಾಘವ ಶೆಟ್ಟಿ, ಪ್ರಧಾನ ಪಾತಿ ರಘು ಪೂಜಾರಿ, ಉಪಾಧ್ಯಕ್ಷೆರಾಯಿನ ಶ್ರೀನಿವಾಸ ಶೆಟ್ಟಿಗಾರ್, ಸಿ.ಎ.ಗಣೇಶ್ ಕಾಂಚನ್, ಕೃಷ್ಣ ಪೂಜಾರಿ ಬೌಂಡಿಮನೆ, ರಾಜು ಟಿ.ಪೂಜಾರಿ, ಪ್ರಧಾನ ಕಾರ್ಯದರ್ಶಿ ರಕ್ಷಿತ್, ಜೊತೆ ಕಾರ್ಯದರ್ಶಿ ಪ್ರಮೋದ್‌ ಪೂಜಾರಿ, ಕೋಶಾಧಿಕಾರಿ ಜಗದೀಶ್ ಪೂಜಾರಿ ಪಾಲ್ ಪಡೆದಿತ್ತೆರ್.
Editorial