ಏಣಗುಡ್ಡೆ ಶ್ರೀ ಬ್ರಹ್ಮಬೈದೆರ್ಲೆನ ಗರಡಿ

ನಿನೆತ್ತಿನಡೆ ನಿರ್ಮಿತ್ತಾಪೊ, ನ್ಯಾಯೊಗು ಸಾರೆತ್ಯಾಪೊ, ಸತ್ಯ ಗೆಂದಾದ್ ಕೊರ್ಪೆ, ಮಾಯೊಡೆಂಕುಲು ನಂಬಿನಕ್ಲೆಗ್ ಇಂಬು ಕೊರೊಂದು ಬರುವೊ…

ಪನ್ಪಿನ ಆಭಯನ್ ಕೊರ್ದ್, ಕಾಯ ಬುಡ್ದ್ ಮಾಯ ಸೇರಿನ ತುಳುನಾಡ್ ದ ಅವಳಿ ವೀರೆರಾಯಿನ ಕೋಟಿ ಚೆನ್ನಯೆರ್ ಬ್ರಹ್ಮಬೈದೇರ್ ಆದ್ ಗರಡಿಡ್ ಸಾನಿಧ್ಯನ್ ಮಲ್ತ್ ದ್, ಬುಳೆ ಭಾಗ್ಯಗ್ ದಯೆರಕ್ಷಣೆ ಮಲ್ತೊಂದ್, ನಂಬಿನಕ್ಲೆಗ್ ರಕ್ಷಣೆ ಮಲ್ತೊಂದ್ ತುಳುನಾಡ್ ದ ಆರಾಧನಾ ಶಕ್ತಿಲಾದ್ ಜನಪ್ರಿಯೆರಾಯೆರ್.

ನಮ್ಮ ತುಳುನಾಡ್ ಡ್ ಇಪ್ಪುನ ಪ್ರತಿ ಬ್ರಹ್ಮ ಬೈದೇರ್ಲೆನ ಗರಡಿಗ್ ತನ್ನನೇ ಆಯಿನ ಹಿನ್ನಲೆ ಉಂಡು. ಪವಾಡ ಮೆರೆಯಿನ ಕಥಾನಕ ಉಂಡು. ಕಾರ್ನಿಕ ಶಕ್ತಿಲು ಇಪ್ಪುನ ಕುರುಹುಲು ಉಂಡು. ಅಂಚಿನ ವಿಶೇಷಲೆಡ್ ಆಜಿಪತ್ತಾಜಿ ಮೂಲ ಗರಡಿಡ್ ಒಂಜಾಯಿನ ಏಣಗುಡ್ಡೆ ಬ್ರಹ್ಮ ಬೈದೇರ್ಲೆನ ಗರಡಿಲ ಒಂಜಿ. ಈ ಸನ್ನಿಧಾನಗ್ ಇತಿಹಾಸ ಉಂಡು. ಮುಲ್ಪ ಮಸ್ತ್ ಅದ್ಭುತ ಸಾನಿಧ್ಯಲು ಉಲ್ಲ. ಕಾಲಕ್ರಮೇಣ ಜೀರ್ಣ ಆಯಿನ ಈ ಪುರಾತನ ಗರಡಿಡ್ ಸಮಗ್ರವಾಯಿನ ಜೀರ್ಣೋದ್ಧಾರಗ್ ಸಂಕಲ್ಪ ಮಲ್ತ್ ದೆರ್. ಇತ್ತೆ ಈ ಸಾನಿಧ್ಯದ ಪುನರುತ್ಥಾನಗ್ ನಿಕ್ಲೆಡ ಮಲ್ಪಿನ ಬಿನ್ನಾಪು..

ಸುಮಾರ್ ಮೂಜರೇ ಕೋಟಿ ರೂಪಾಯಿ ವೆಚ್ಚಡ್ ಸಮಗ್ರ ಜೀರ್ಣೋದ್ಧಾರದ ಬೇಲೆ ಶಾಸ್ತ್ರೋಕ್ತವಾದ್, ಸಾಂಪ್ರಾದಾಯಕವಾದ್ ಬೈದೆರ್ಲೆನ ನುಡಿ ಪ್ರಕಾರ ಅಷ್ಟಮಂಗಳ ಪ್ರಶ್ನೆದ ನಿರ್ದೇಶನದಂಚನೆ ನಡಪರೆ ಉಂಡು. ಒವ್ವೆ ಒಂಜಿ ಕಾಲಡ್, ಸುಮುಹೂರ್ತಡ್ ಸತ್ಯದ ಮನಸ್ಸ್ ದ ಅವಳಿ ವೀರೆರಿಗಾದ್ ಗರಡಿ ನಿರ್ಮಾಣ ಮಲ್ತ್ ದ್, ಅವ್ವೇ ಜಾಗೆಡ್ ಅವ್ವೇ ಆಯಡ್ ಪುನರ್ ನಿರ್ಮಾಣದ ಕಾರ್ಯ ನಡಪರೆ ಉಂಡು.

ಕೋಟಿ-ಚೆನ್ನಯೆರ್ ನ್ ಯನ್ನ ಮೆಗ್ದಿನ ಭಾವರ್ದ್ ತೂಯಿನ “ಮಾಯಂದಾಲ್” ಫಲ ಕೊರ್ಪಿನ ಸಂಕೇತವಾದ್ ಜೋಕ್ಲೆನ ಮೂರ್ತಿಯಾದ್ ಮುಲ್ಪ ನೆಲೆಯಾತೆರ್. ಮಾತೆರ್ದ್ ಲಾ ಎಚ್ಚಯಾದ್, ಮಾಯಂದಾಲ್ ಪುಟ್ಟಿನ ಏಣಗುಡ್ಡೆ ಗರಡಿದ ಕೈತಲ್ ಇಪ್ಪುನ ಮಮ್ಮೇರಿ ತೋಟದ ಇಲ್ಲಲ್. ಅಂಚಾದ್ ಮುಲ್ಪದ ಮಾಯಂದಾಲ್ ಸಾನಿಧ್ಯಗ್ ವಿಶೇಷವಾಯಿನ ಪ್ರಾಶಸ್ತ್ಯ ಉಂಡು.

ಗರಡಿ ಸ್ಥಾಪನೆ ಮಲ್ತ್ ದ್ ಬತ್ತಿನ ಯಮಳ ವೀರೆರ್ ನೆಲೆಯಾಯಿನ ಸನ್ನಿವೇಶಡ್ ತಮ್ಮ ಕಾರ್ಣಿಕನ್ ಪ್ರಕಟನೆ ಮಲ್ತಿನ ವಿಶೇಷತೆ ಉಂಡು. ಇಂಚಾದ್ ಕಾರಣಿಕ ಶಕ್ತಿಲಾದ್ “ಗುಪ್ಪೆಗಳೆರಡು” ಮೂಡಬೆಟ್ಟು ಗ್ರಾಮದ ಕುದ್ರಾಡಿ ಕೈತಲ್ ಗದ್ದೆಡ್ ಇತ್ತೆಲಾ ಉಂಡು. ಆಂಡ ನಮ್ಮ ದೃಢ ನಿರ್ಧಾರರ್ದ್ ದುಂಬು ದೀತಿನ ಪಜ್ಜೆನ್ ಪಿರ ದಿವಂದಿನ ವೀರೆರ್ ಕಾಣಿಕೆ ಪಾರಾದ್ ಶಾಶ್ವತವಾದ್ ನೆಲೆಯಾಯಿನವ್ ಏಣಗುಡ್ಡೆ ಗರಡಿಡ್.

ಬೆರ್ಮೆರ್ ಗುಂಡ, ಕೋಟಿ- ಚೆನ್ನಯೆರ್ನ ಪಾಪೆಲು, ಮುಸ್ಲಿಂ ಜೋಕ್ಲೆನ ರಚನೆಲು, ಬೆರ್ಮೆರ್ ಬಲಬದಿಟ್ಟ್ ಒಕ್ಕುಬಲ್ಲಾಳ ಕುಜುಂಬ ಕಾಂಜವ ಊರುಲು ಉಂಡು. ಗುರು ಸಂಕಲ್ಪ, ಜೋಗಿಪುರುಷ, ಗುರುಕಂಬ ಇಂಚಿತ್ತಿನ ಸಾನಿಧ್ಯಲು ಮುಲ್ಪ ಉಂಡು.

ಕಾಂತಾರ ಜುಮಾದಿ-ಬಂಟ ಪಿಲಿಚಂಡಿ, ದೈವಲು ಸ್ಥಾನ ಪಡೆದ್ಂಡ್. ಪಿದಾಯಿ ಜಾಲ್ ದ ಮೂಲೆಡ್ ಬಬ್ಬರ್ಯ ಸಾನಿಧ್ಯ, ನೈಋತ್ಯಡ್ ಆಯದಕಲ್ಲ್ ಬೊಕ್ಕ ಗರಡಿಗ್ ಸಂಬಂಧ ಪಟ್ಟಿನ ನಾಗಬನ ಪಡುಮಲ ದಿಕ್ಕ್ ಡ್ ಉಂಡು.

ಕೊಡಿ ಇಪ್ಪುನ ಒಂಜೇ ಒಂಜಿ ಗರಡಿ ಉಂದಾತ್ತ್ಂಡ್. ಗ್ರಾಮದ ಏಣಗುಡ್ಡೆ ಆಗ್ರಹಾರ ದೇವಲ್ಯದ ವಾರ್ಷಿಕ ಮಹೋಚ್ಚಯದಾನಿ ಗರಡಿಡ್ ಕೊಡಿ ಮರ ಏರುನ, ಕತ್ತಲೆಗ್ ಅಗೇಲ್, ಮನದಾನಿ ಬೈದೇರ್ಲೆನ ನೇಮ, ಕತ್ತಲೆಗ್ ಪರಿವಾರ ದೈವದ ನೇಮ ನಡತ್ತ್ ದ್, ಕೊಡಿ ಮರ ಜಪ್ಪುನಿ, ಕಾಂಡೆ ಶುದ್ಧೀಕರಣ ಹೋಮ ನಡಪ್ಂಡ್.

ನಂಬಿನಕ್ಲೆಗ್ ಇಂಬುಕೊರ್ಪಿನ ಶ್ರೀ ಬ್ರಹ್ಮ ಬೈದೇರ್ಲೆನ ಸನ್ನಿಧಾನ ಇಪ್ಪುನ ಏಣಗುಡ್ಡೆ ಗರಡಿಗ್ ಸಾಂಪ್ರಾದಾಯಿಕವಾಯಿನ ಕೂಡಕಟ್ಟು ಉಂಡು. ಏಣಗುಡ್ಡೆ ಬೊಕ್ಕ ಆಜಿ ಮಾಗಣೇ ಪನ್ಪಿನವ್ ಪುರಾತನ ವ್ಯಾಪ್ತಿಯಾತ್ಂಡ್.

ಬಂಧುಲೇ ಈ ಮಿತ್ತ್ ಪಂಡಿಲೆಕ್ಕ ಒಂಜಿ ಕಾಲ-ಸಂದರ್ಭ-ಮನೋಧರ್ಮ-ಅ ಭಿವ್ಯಾಕ್ತವಾದ್ ನಮ್ಮ ನಂಬಿನ ಪುಣ್ಯ ಕ್ಷೇತ್ರವಾಯಿನ ಏಣಗುಡ್ಡೆ ಶ್ರೀ ಬ್ರಹ್ಮಬೈದೇರ್ಲೆನ ಗರಡಿದ ಸಂಪೂರ್ಣ ಜೀರ್ಣೋದ್ಧಾರ ಪುನರುತ್ಥಾನಗ್ ತನು-ಮನ-ಧನತ್ತ ಸಾಕಾಯ ಕೊರ್ದ್ ಶ್ರೀ ಬ್ರಹ್ಮ ಬೈದೇರ್ಲೆನ ಪೂರ್ಣ ಕೃಪಾಕಟಾಕ್ಷಗ್ ಪಾತ್ರರಾವೊಡ್ ಪಂದ್ ಏಣಗುಡ್ಡೆ ಶ್ರೀ ಬ್ರಹ್ಮಬೈದೇರ್ಲೆನ ಗರಡಿ ಕ್ಷೇತ್ರದ ಅಧ್ಯಕ್ಷೆರ್, ಪದಾಧಿಕಾರಿಲು ಅಂಚನೇ ಸರ್ವ ಸದಸ್ಯೆರ್ ಬಿನ್ನಾಪು ಮಲ್ತ್ ದೆರ್.