ಕುಲಕಸುಬು ಒರಿಪುಲೆ: ಎನ್. ಶಶಿಕುಮಾರ್
ಪಕ್ಷಿಕೆರೆಟ್ಟ್ ಪೇಪರ್ ಸೀಡ್ ವಿಲೇಜ್ಗ್ ಕೆಸರ್ ಕಲ್ಲ್ ಪಾಡುನ ಲೇಸ್
ಪಕ್ಷಿಕೆರೆ: ಪಿರಾಕ್ದ ಕಾಲೊಡು ಜನಕುಲು ಜೀವನ ಕರಿಪರೆ ಪರಂಪರೆಡ್ ಮಲ್ತೊಂದು ಬೈದಿನ ಕುಲ ಕಸುಬುಲೆನ್ ನಮ ಒರಿಪೊಡು ಪಂದ್ ಕುಡ್ಲ ಪೊಲೀಸ್ ಕಮಿಷನರ್ ಎನ್. ಶಶಿಕುಮಾರ್ ಪಂಡೆರ್.
ಪರಿಸರಪ್ರೇಮಿ ನಿತಿನ್ ವಾಸ್ ಮೇರ್ನ ಮುತಾಲಿಕೆದ ಪೇಪರ್ ಸೀಡ್ ಸಂಸ್ಥೆದ ಪೇಪರ್ ಸೀಡ್ ವಿಲೇಜ್ಗ್ ಸನಿಯಾರ ಶಂಕುಸ್ಥಾಪನೆ ಮಲ್ತ್ದ್ ಆರ್ ಪಾತೆರಿಯೆರ್.
ಕರ ಮಲ್ಪುನಕುಲು, ಕಮ್ಮಾರೆರ್, ಚಮ್ಮಾರೆರ್, ಕ್ಷೌರಿಕೆರ್ ಇಂಚಿನ ಮಾತಾ ಜನಾಂಗದಕುಲು ಅಕ್ಲೆನ ಕುಲಕಸುಬುಲೆನ್ ಬುಡಿಯರೆ ಬಲ್ಲಿ. ಜಾಗತೀಕರಣರ್ದ್ ಅಕ್ಲೆನ ಬೇಲೆಗ್ ಬಿಲೆ ಇಜ್ಜಾಂದೆ ಪೋಂಡಲ ಕೋವಿಡ್ ೧೯, ಲಾಕ್ಡೌನ್ರ್ದ್ ಬೊಕ್ಕ ಎಚ್ಚಿನಕ್ಲೆಗ್ ಅಕ್ಲೆನ ಕುಲಕಸುಬೇ ಜೀವನಾಧಾರ ಆಂಡ್. ಅಂಚಾದ್ ಮಾತಾ ಕುಲಕಸುಬುಲೆನ್ ಒರಿಪೊಡು. ಅಂಚಿನ ಒಂಜಿ ಪ್ರಯತ್ನೊಗು ಪೇಪರ್ ಸೀಡ್ ವಿಲೇಜ್ ಬೆರಿತಾಂಗ್ ಕೊರಡ್ ಪಂಡೆರ್.
ಮಲ್ಲ ಬಿನ್ನೆರಾದ್ ಎನ್ ಐಟಿಕೆ ಪ್ರೊಫೆಸರ್ ಡಾ. ಕೆ.ವಿ.ಗಂಗಾಧರನ್, ಡಾ. ಬಿಜುನ ಮೋಹನ್, ಕೆಮ್ರಾಲ್ ಗ್ರಾ.ಪಂ. ಅಧ್ಯಕ್ಷೆರ್ ಲೀಲಾ ಕೃಷ್ಣಪ್ಪ ಪೂಜಾರಿ ಬತ್ತಿತ್ತೆರ್.
ಪರಿಸರ ಪ್ರೇಮಿ ಜೀತ್, ನೆಹರೂ ಯುವ ಕೇಂದ್ರದ ಅಧಿಕಾರಿ ರಘುವೀರ ಸೂಟರ್ ಪೇಟೆ ಎಡ್ಡೆಪ್ಪು ಬಯಕಿಯೆರ್.
ನಾ.ದಾ.ಮಣಿನಾಲ್ಕೂರು ಪದ ಪಂದ್ ಮಾತೆರೆಗ್ಲ ರಂಜನೆ ಕೊರಿಯೆರ್.
ನಿತಿನ್ ವಾಸ್ ಪ್ರಸ್ತಾವಿಕವಾದ್ ಪಾತೆರಿಯೆರ್. ಅರ್ಪಿತಾ ಶೆಟ್ಟಿ ಲೇಸ್ ನಡಪಾದ್ ಕೊರಿಯೆರ್.
