ಕುಡ್ಲ: ಏಪ್ರಿಲ್ 29ಗ್ ತುಳುನಾಡ್ ಡ್ ಬುಡುಗಡೆ ಆಯರೇ ಉಂಡು ಮಗನೇ ಮಹಿಷ ಪನ್ಪಿನ ತುಳು ಪಿಚ್ಚರ್

ಕುಡ್ಲ, ಏ.26: ವೀರು ಟಾಕೀಸ್ ಬ್ಯಾನರ್ ಅಡಿಟ್ಟ್ ವೀರೇಂದ್ರ ಶೆಟ್ಟಿ ನಿರ್ದೇಶನ ಮಲ್ತಿನ ತುಳು ಪಿಚ್ಚರ್ ‘ಮಗನೆ ಮಹಿಷ’ ಏಪ್ರಿಲ್ 29 ಗ್ ತುಳುನಾಡ್ ಡ್ ಬುಡುಗಡೆ ಆಯರೇ ಉಂಡು.

ಈ ಪಿರವು 511 ದಿನತ್ತ ಕಾಲ ಥಿಯೇಟರ್‌ ಡ್ ಬಲ್ತಿನ ಬ್ಲಾಕ್‌ಬಸ್ಟರ್ ಪಿಚ್ಚರ್ ‘ಚಾಲಿ ಪೊಲಿಲು’ ಪಿಚ್ಚರ್ ನ್ ನಿರ್ದೇಶನ ಮಲ್ತಿನ ವೀರೇಂದ್ರ ಶೆಟ್ಟಿ ಮೆರ್ನ ರಡ್ಡನೇ ಪಿಚ್ಚರ್ ‘ಮಗನೆ ಮಹಿಷ’.

ದೇವದಾಸ್ ಕಾಪಿಕಾಡ್, ಅರವಿಂದ್ ಬೋಳಾರ್, ನವೀನ್ ಡಿ ಪಡೀಲ್, ಭೋಜರಾಜ್ ವಾಮಂಜೂರ್ ಇಂಚ ಮಸ್ತ್ ಕಲಾವಿದೆರ್ ಈ ಪಿಚ್ಚರ್ ಡ್ ನಟನೆ ಮಲ್ತ್ ದೆರ್.

ಪಿಚ್ಚರ್ ದ ನಿರ್ದೇಶನದ ಒಟ್ಟುಗ್ ವೀರೇಂದ್ರ ಶೆಟ್ಟಿ ಕಥೆ, ಸಂಭಾಷಣೆ, ಚಿತ್ರಕಥೆನ್ ಬರೆದ್ ವೀರು ಟಾಕೀಸ್ ಅಡಟ್ಟ್ ‘ಮಗನೇ ಮಹಿಷ’ ಪಿಚ್ಚರ್ ನ್ ನಿರ್ಮಾಣ ಮಲ್ತ್ ದೆರ್. ಮನೋಮೂರ್ತಿ ಪಿಚ್ಚರ್ ಗ್ ಪದನ್ ಸಂಯೋಜನೆ ಮಲ್ತ್ ದಿತ್ತ್ ದ್, ಸಂದೇಶ್ ನೀರುಮಾರ್ಗ, ಪ್ರಶಾಂತ್ ಕಂಕನಾಡಿ ಬೊಕ್ಕ ರಕ್ಷಣ್ ಮಾಡೂರು ಪದ ಪಂತೆರ್.

ಪುತ್ತೂರ್, ಕಾಸರಗೋಡ್, ಬೆದ್ರ, ಬೊಲ್ತೆರ್, ಕಾರ್ಲ, ಸುಳ್ಯ, ಮುಳ್ಳೇರಿಯ, ಒಡಿಪು ಬೊಕ್ಕ ಸುರತ್ಕಲ್‌ ಡ್ ಪಿಚ್ಚರ್ ಬುಡುಗಡೆ ಆಯರೇ ಉಂಡು.

ವಾರದ ಪಿರವು ಬುಡುಗಡೆಯಾಯಿನ ಟ್ರೇಲರ್‌ ಗ್ ಎಡ್ಡೆ ರೀತಿದ ಪ್ರತಿಕ್ರಿಯೆ ಬೈದ್ಂಡ್. ಪಿಚ್ಚರ್ ದ ವಿಶೇಷ ಭಾಗವಾಯಿನ ಪದಕ್ಕ್ ಸುಮಾರ್ 100 ಸೆಲೆಬ್ರಿಟಿಲು ಒಟ್ಟುಗ್ ಸೇರ್ದ್ ಪದ ಪಂತೆರ್.

ಪತ್ರಿಕಾಗೋಷ್ಠಿಡ್ ನಿರ್ದೇಶಕೆರ್ ವೀರೇಂದ್ರ ಶೆಟ್ಟಿ, ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್, ಗಾಯಕೆರ್ ಆಯಿನ ರಕ್ಷಣಾ ಮಾಡೂರು, ನಟೆ ಪ್ರಶಾಂತ್ ಸಿ ಕೆ, ಪ್ರಶಾಂತ್ ಕಂಕನಾಡಿ ಇತ್ತೆರ್.