ಖಾಲಿ ಐವ ಜನತ್ತ ನಡುಟ್ಟು ಮದಿಮೆ, ಏರೆನ್ ಲೆಪ್ಪುನು ಏರೆನ್ ಬುಡ್ಪಿನಿ ?

ಕುಡ್ಲ : ಆಣ್-ಪೊಣ್ಣನ ಜೀವನದ ಮಾಮಲ್ಲ ಭಾಗ ಮದಿಮೆ. ಅಪ್ಪೆ ಅಮ್ಮೆ, ತಮ್ಮಲೆ ಮಾಮಿ, ಗುರು ಹಿರಿಯೆರ್ ಊರ್‍ದ ಗುರ್ಕಾರ್ಲು, ಅಜ್ಜಿ ಪುಳ್ಳಿ ಬೊಕ್ಕ ಸಂಸಾರದಕುಲು ಬೊಕ್ಕ ಊರುದಕುಲು ಸೇರ್‍ದ್ ಆಪಿನ ಒಂಜಿ ಎಡ್ಡೆ ಕಜ್ಜನೇ ಮದಿಮೆ. ಆಂಡ ಕೋವಿಡ್ ಕಾರಣೊಗು ಸರ್ಕಾರ ಇತ್ತೆ ಮದಿಮೆಗ್ ೫೦ ಜನ ಮಾತ್ರ ಪಂಡ್‌ದ್ ನಿಗದಿ ಮಲ್ದ್ಂಡ್. ಈ ಐವ ಜನಟ್ಟ್ ಅರ್ಚಕೆರ್, ಫೊಟೊಗ್ರಾಫರ್, ವೀಡಿಯೊಗ್ರಾಫರ್‌ಲ ಸೇರ್ದುಪ್ಪುವೆರ್. ಅಂಚಾಂಡ ಇಲ್ಲದಕುಲೇ ಬರ್ರೆ ಆವಂದಿನ ಮದಿಮೆ ಮದಿಮೆನಾ ಪನ್ಪಿನ ಬೇಜಾರ್ ಮಾತೆರೆಗ್ಲ ಸುರುವಾತ್ಂಡ್.
ಮದಿಮೆದ ವಿಚಾರೊಡು ಸರ್ಕಾರ ಕನದಿನ ನಿಯಮೊರ್ದಾತ್ರ ಮದಿಮೆದ ಇಲ್ಲದಕುಲು, ಅಂಚೆನೇ ಮದಿಮೆಗ್ ಪೋಪಿನಕುಲು ಪೂರ ಗೊಂದಲೊಡು ಬೂರ್‍ದೆರ್. ಅವ್ವತ್ತಾಂದೆ ತಲಪಾಡಿದಂಚಿನ ಗಡಿ ಭಾಗೊಲೆಡ್ ಗಡಿ ದಾಟ್‌ದ್ ಮದಿಮೆ ದೀತಿನಕುಲು ಕೋವಿಡ್ ನೆಗೆಟಿವ್ ಸರ್ಟಿಫಿಕೆಟ್ ಪತೊಂದು ಬರೊಡು ಪಂಡ್‌ದ್ ಪನೊಂದುಲ್ಲೆರ್.
ಕೋವಿಡ್ ಸೀಕ್ ಪರಡಂದಿಲೆಕ್ಕ ಸರ್ಕಾರ ಕಟ್ಟ್‌ನಿಟ್ಟ್‌ದ ಕಾನೂನು ಜಾರಿಗ್ ಕನೊವೊಡು ನಿಜ. ಆಂಡ ಇಲ್ಲದಕುಲು, ಕುಟುಮದಕುಲು ದಾಂತೆ ಮದಿಮೆ ಮಲ್ಪುನ ವಿಚಾರೊಡು ಮದಿಮೆದ ಇಲ್ಲದಕ್ಲೆಗ್ ಬಾರಿ ಮಂಡೆ ಬೆಚ್ಚ ಆತ್ಂಡ್. ಅವುಲ ಶನಿಯಾರ, ಐತಾರ ಇಡೀ ದಿನ ಕರ್ಫ್ಯೂಲ ಜಾರಿ ಆತ್ಂಡ್. ಒಂಜಿ ಮೈಟ್ ಸರ್ಕಾರ ಮದಿಮೆ ಮಲ್ಪೊಲಿ ಪನ್ತ್ಂಡ್. ಆಂಡ ಅಡೆ ಬರ್‍ಪಿನಕುಲು ಪಾಸ್ ತೋಜಾವೊಡು ಪನ್ಪೆರ್. ಉಂದು ಸಾಧ್ಯನಾ ಪನ್ಪಿನ ವಿಚಾರೊಡು ಮದಿಮಾಲ್, ಮದಿಮಾಯನ ಅಪ್ಪೆ ಅಮ್ಮೆ ತರೆಕ್ಕ್ ಕೈ ದೀದ್ ಕುಲ್ದೆರ್. ಅಂಚಿಡ್ ಮದಿಮೆ ಮಲ್ಪರೆಲ ಅತ್ತ್, ಉಂತಾವರೆಲ ಅತ್ತ್ ಪನ್ಪಿನ ಸ್ಥಿತಿಟ್ಟ್ ಅಕುಲು ಉಲ್ಲೆರ್.
ಐವ ಜನೊಟ್ಟು ಮದಿಮಾಲ್, ಮದಿಮಾಯೆ, ಅಕ್ಲೆನ ಅಪೆ ಅಮ್ಮೆ, ಧಾರೆ ಮೈಪುನಕುಲು, ಫೊಟೊತ್ತಕಲು ವಿಡಿಯೊದಕುಲು,ಬಲಸುನಕುಲು ಪಂಡನೇ ಐವ ಜನ ದಾಂಟುವೆರ್. ಇಲ್ಲರ್ದ್ ಮೆಗ್ಯೆ , ಪಲಯೆ, ಮಾಮಿ, ಮರ್ಮಾಲ್, ಜೋಕುಲು ಮದಿಮೆಗ್ ಪೋವರೆನೇ ಇಜ್ಜಿ. ಅಂಚಾದುಪ್ಪುನಗ ಒಂಜಿ ಇಲ್ಲಡ್ ೫೦೦ ರ್ದ್ ಲ ಎಚ್ಚ ಜನಕ್ಕ್ ಮದಿಮೆದ ಕಾಕಜಿ ಪಟ್ಟ್‌ದಿನಕುಲು ಜನೊಕ್ಲೆಗ್ ಎಂಚಿನ ಉತ್ತರ ಕೊರ್ಪಿನಿ ಪಂಡ್‌ದ್ ಮದಿಮಾಲ್‌ನ ಅಪ್ಪೆ ಅಮ್ಮೆ ಪನೊಂದುಲ್ಲೆರ್. ಇಂಚಿಡ್ ಇತ್ತೆದ ಮದಿಮೆದ ಪರಿಸ್ಥಿತಿನ್ ತೆರಿಪಾವುನ ತಮಾಷೆದ ಪದ್ಯೊಲು, ವಾಟ್ಸಾಪ್ ಮೆಸೇಜ್, ಸೋಶಿಯಲ್ ಮೀಡಿಯಾಲೆಡ್ ವೈರಲ್ ಆವೊಂದುಂಡು. ಕುಡ್ಲರ್ದ್ ೫ ಜನ, ಬೆದ್ರರ್ದ್ ೪ ಜನ, ಒಡಿಪುರ್ದು ಆಜಿ ಜನ…..ಮದಿಮೆ ಒಂಜಿ ಆವೊಡತ್ತಾ.. ಪಂಡ್‌ದ್ ಜನೊಕ್ಲು ತಮಾಷೆದ ವೀಡಿಯೊಲೆನ್ಲ ಪಾಡ್ದ್ ಕುಸಿ ಪಡೆವೊಂದುಲ್ಲೆರ್.