April 10, 2021

ಜಾಗತಿಕ ಬಂಟರ ಸಂಘದ ಒಕ್ಕೂಟರ್ದ್ ಪಣವುದ ಸಹಾಯ

ಕುಡ್ಲ , ಎ.10: ಸಮಾಜದ ಅಶಕ್ತೆರೆಗ್ ಜಾಗತಿಕ ಬಂಟರ ಸಂಘದ ಒಕ್ಕೂಟರ್ದ್ ಸುಮಾರು 15 ಲಕ್ಷ ರೂ. ಪನವುದ ಬೇತೆ ಬೇತೆ ರೀತಿದ ಆರ್ಥಿಕ ಸಹಾಯನ್ ಪೇಂಟೆದ ಬಂಟ್ಸ್ ಹಾಸ್ಟೆಲ್‌ಡ್ ಉಪ್ಪುನ ಅಮೃತೋತ್ಸವ ಕಟ್ಟಡಡ್ ನಡತಿನ ಲೇಸ್ ಡ್ ಪಾತೆರಿಯೆರ್.

ಈ ಪೊರ್ತು ಪಾತೆರಿನ ಸಂಘದ ಗುರ್ಕಾರ್ಲಾಯಿನ ಐಕಳ ಹರೀಶ್ ಶೆಟ್ಟಿ ಕೊರೋನದಂಚಿನ ಆರ್ಥಿಕ ಸಂಕಷ್ಟದ ನಡುಟುಲಾ ಬಂಟ ಸಮಾಜಡ್ ಅಸಹಾಯಕರಾದುಪ್ಪುನಕ್ಲೆನ್ ಗುರ್ತಿಸಾದ್ ವಸತಿ ನಿರ್ಮಾಣ, ವೈದ್ಯಕೀಯ, ವಿದ್ಯಾರ್ಥಿ ವೇತನ, ಪೊಣ್ಣು ಜೋಕ್ಲೆನ ಮದಿಮೆಗ್ ಸಹಾಯ ಮಲ್ತೊಂದು ಬೈದೆರ್ ಪಂದ್ ಪಂಡೆರ್.
ಒಕ್ಕೂಟದ ಪೋಷಕ ಸದಸ್ಯ ಗುರ್ಕಾರ್ಲಾಯಿನ ರವಿ ಶೆಟ್ಟಿ, ಉದ್ಯಮಿ ಗಜಾನನ ಪೂಂಜ ಪಾತೆರಿಯೆರ್ . ಒಕ್ಕೂಟದ ಪ್ರಧಾನ ಕಾರ್ಯದರ್ಶಿಯಾಯಿನ ಜಯಕರ ಶೆಟ್ಟಿ ಇಂದ್ರಾಳಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್.

ಒಕ್ಕೂಟದ ಆಡಳಿತಾಧಿಕಾರಿ ಸಚ್ಚಿದಾನಂದ ಹೆಗ್ಡೆ ಕೊಳ್ಕೆಬೈಲ್, ಸುರತ್ಕಲ್ ಬಂಟರ ಸಂಘದ ಗುರ್ಕಾರ್ಲಾಯಿನ ಸುಧಾಕರ ಪೂಂಜಾ, ಜೀವನ್ ಶೆಟ್ಟಿ ಮುಲ್ಕಿ, ದೇವಪ್ಪಶೇಖ, ಲೋಕಯ ಶೆಟ್ಟಿ ಮುಂಚೂರು, ಪ್ರಕಾಶ್ ಶೆಟ್ಟಿ ಪಡುಬಿದ್ರೆ, ಸುದರ್ಶನ್ ಶೆಟ್ಟಿ ಪೆರ್ಮಂಕಿ, ಪ್ರದೀಪ್ ರೈ, ಈಶ್ವರ್ ಶೆಟ್ಟಿ ಚಿಪ್ಪಾಡಿ ಪಾಲ್ ಪಡೆದಿತ್ತೆರ್ .