ತುಳುನಾಡ್ ರಾಜ್ಯ ಆವೊಡು ಪಂದ್ ಟ್ವೀಟರ್ ಅಭಿಯಾನ
ಕುಡ್ಲ: ತುಳು ಬಾಸೆಗ್ ಮಾನಾದಿಗೆ ತಿಕ್ಕೊಡು ಪನ್ಪಿನ ಬೇಡಿಕೆ ಇನಿ ಕೋಡೆದವು ಅತ್ತ್. ಕರ್ನಾಟಕ ಕೇರಳ ರಾಜ್ಯ ರಚನೆ ಆಯಿನೆರ್ದಿಂಚಿ ತುಳು ಬಾಸೆಗ್ ತಿಕ್ಕೊಡಾಯಿನ ತಾನಮಾನ ತಿಕಿದಿಜಿ.
5 ದಶಕೊರ್ದಿಂಚಿ ಈ ಬೇಡಿಕೆ ಇತ್ತ್ಂಡಲಾ ಒವು ಸರಕಾರಲಾ ಈ ಇಸಯೊನು ಕೆಬಿಕ್ ಪಾಡೊಂದಿಜ್ಜಿ. ಕೊರಿನ ಮನವಿ ಪತ್ರೊನು ಕಜವುದ ಡಬ್ಬಿಗ್ ಪಾಡೊಂದುಲ್ಲೆರ್. ಆಂಡ ಕನ್ನಡ – ಮಲಯಾಳಂ ಬಾಸೆಗ್ ಕರ್ನಾಟಕ ಬೊಕ್ಕ ಕೇರಳ ಸರಕಾರೊಲು ಎಡ್ಡೆ ಕರ್ಚಿ ಮಲ್ತೊಂದುಲ್ಲೆರ್. ತುಳುಕು ಆನಗ ಅವೆನ್ ಕೋಂಟುಗು ಪಾಡಿಯೆರೆ ತೂವೊಂದುಲ್ಲೆರ್. 5 ದಶಕದ ಬೇಡಿಕೆಗ್ ಸರಿಯಾಯಿನ ಉತ್ತರ ತಿಕ್ಕೊಂದಿಜ್ಜಿ, ತಾನಮಾನ ನನ ತಿಕ್ಕುಂಡು ಪನ್ಪಿನ ಭರವಸೆ ತುಲುವೆರುಡಲ್ರ್ದ್ ದೂರ ಆವೊಂದುಂಡು. ತುಲುಕು ಮಾನಾದಿಗೆ ಕೇರಳ ಬೊಕ್ಕ ಕರ್ನಾಟಕೊಡು ತಿಕ್ಕುಜಿ ಪನ್ಪಿನ ಒಂಜಿ ಅಭಿಪ್ರಾಯೊಗು ಜನ ಬರೊಂದುಲ್ಲೆರ್. ಇಂಚಿನ ಪೊರ್ತುಡೇ ತುಳುನಾಡ್ದ ಯುವ ಪೀಳಿಗೆ ಕರ್ನಾಟಕ – ಕೇರಳ ಯಾವು, ತುಳುನಾಡ್ ರಾಜ್ಯ ಆವೊಡು ಪನ್ಪಿನ ಗಟ್ಟಿ ಸೊರೊನು ರಾಷ್ಟ್ರಮಟ್ಟೊಗು ಮುಟ್ಟಾವೊಂದುಲ್ಲೆರ್. ತುಳುನಾಡ್ ರಾಜ್ಯದ ಸೊರೊ ಮಲ್ಲ ಆಂಡನೇ ತುಳು ಬಾಸೆಗ್ಲಾ ನ್ಯಾಯ ತಿಕ್ಕು ಪನ್ಪಿನ ಪಾತೆರ ಸಾರ್ವಜನಿಕ ವಲಯೊಡುಲಾ ಕೇನೊಂದುಂಡು. ದುಂಬು ರಾಜ್ಯ ಬೊಡ್ಚಿ ಪನೊಂದಿತ್ತಿನಕುಲು ಮಾತೆರ್ಲಾ ತುಳುನಾಡ್ ರಾಜ್ಯದ ಪರ ಪಾತೆರಿಯರೆ ಸುರು ಮಲ್ದೆರ್. ಉಂದೆತ ಭಾಗವಾದ್ ಎಪ್ರಿಲ್ 4 ತಾರೀಕ್ಗ್ #TulunadState #SaveTuluFirst ಪನ್ಪಿನ ಹ್ಯಾಶ್ಟ್ಯಾಗ್ ಮುಕೇನ ತುಳುನಾಡ್ ರಾಜ್ಯ ಆವೋಡು, ತುಳುಕು ಸುರುತ್ತ ಮಾನಾದಿಗೆ ತಿಕ್ಕೊಡು ಪಂದ್ ಟ್ವೀಟ್ ತುಳುನಾಡ್ ಅಭಿಯಾನ ನಡತ್ತೊಂದುಂಡು.
