ಒಡಿಪು, ಎಪ್ರಿಲ್ 18: ಪ್ರಾದೇಶಿಕ ಭಾಷೆದ ಬುಲೆಚ್ಚಿಲ್ ಈ ಮಣ್ಣ್ ದ ಸಂಸ್ಕೃತಿ,ಆಚಾರ, ವಿಚಾರಲೆನ್ ಒರಿಪಾದ್ ಬುಲೆಪಾಯರೇ ಪೂರಕ ಆಪುಂಡು . ಅವ್ವೆತೋ ವರ್ಷದ ಇತಿಹಾಸ ಉಪ್ಪುನ,ಪಂಚದ್ರಾವಿಡ ಭಾಷೆಡ್ ಬಾರಿ ಶ್ರೇಷ್ಠಭಾಷೆ ಪಂದ್ ಪುಗಾರ್ತೆ ಪಡೆಯಿನ ತುಳು ಭಾಷೆದ ಬುಲೆಚ್ಚಿಲ್ ಗ್ ತಾನ್ ಸಂಪೂರ್ಣ ಸಾಕಾರ ಕೊರ್ಪೆ ಪಂದ್ ಒಡಿಪು ಜಿಲ್ಲಾಧಿಕಾರಿ ಜಿ. ಜಗದೀಶ್ ತೆರಿಪಾಯೆರ್ .
ಈ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಡಾ.ಆಕಾಶರಾಜ್ ಜೈನ್ ಮೇರ್ ಜಿಲ್ಲಾಧಿಕಾರಿ ಜಿ ಜಗದೀಶ್ ರೆಗ್ ತುಳುಲಿಪಿ ಪುದರ್ ಪಲವೆದ ಬೋರ್ಡ್ ಕೊರ್ದು, ತುಳು ಭಾಷೆ ಬೊಕ್ಕ ತುಳು ಲಿಪಿತ ಬಗ್ಗೆ ಮಾಹಿತಿ ತೆರಿಪಾಯೆರ್ ಅಂಚನೇ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ತಾರಾ ಉಮೇಶ್ ಆಚಾರ್ಯ ಮೇರ್ ಒಡಿಪುಡು ಕನ್ನಡ ಪುದರ್ ಪಲವೆದ ಒಟ್ಟುಗು ತುಳುಲಿಪಿತ ಪುದರ್ ಪಲವೆನ್ ಜನಕುಲು ಜಾಸ್ತಿ ಉಮೇದ್ ತೋಜಾವುನೆರ್ದಾವರ ತುಳುವೆರೆಗ್ ಮುಕ್ತ ಅವಕಾಶ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.
ತುಳು ಭಾಷೆ ರಾಜ್ಯದ ಅಧಿಕೃತ ಭಾಷೆಯಾವೊಡು ಅಂಚನೇ ಒಡಿಪುಡು ತುಳುಭಾಷೆಗ್ ಮಾನ್ಯತೆ ಕೊರೊಡು ಪಂದ್ ಜೈ ತುಳುನಾಡ್(ರಿ) ಸಂಘಟನೆದ ಪರವಾದ್ ತುಳು ಲಿಪಿ ಶಿಕ್ಷಕಿಯಾಯಿನ ಅಕ್ಷತಾ ಕುಲಾಲ್ ಬಿನ್ನಾಪು ಮಲ್ತೆರ್ ಅಂಚನೇ ಜೈ ತುಳುನಾಡ್(ರಿ) ಸಂಘಟನೆದ ತುಳುಲಿಪಿ ಮೇಲ್ವಿಚಾರಕೆರಾಯಿನ ಶರತ್ ಕೊಡವೂರು ಮೇರ್ ತುಳು ಲಿಪಿ ಕಲಿಕಾ ತರಬೇತಿದ ಬಗ್ಗೆ ಅಂಚನೇ ಆನ್ಲೈನ್ ಡ್ ಬಲೆ ತುಳು ಲಿಪಿ ಕಲ್ಪುಗ ಕಜ್ಜ ಕೊಟ್ಟ್ಯ ರ್ದ್ ಸುಮಾರ್ 8000ರ್ದ್ ಲಾ ಜಾಸ್ತಿ ಜನ ಅಧಿಕ ತುಳುವೆರ್ ತುಳು ಲಿಪಿ ಕಲ್ದಿನ ಬಗ್ಗೆ ಮಾಹಿತಿ ಕೊರಿಯೆರ್ .
ಹಳೆ ವಿದ್ಯಾರ್ಥಿ ಸಂಘ , ಕೊಡವೂರು ಗುರ್ಕಾರ್ಲಾಯಿನ ಸತೀಶ್ ಕೊಡವೂರು ಮೇರ್ ತುಳು ಲಿಪಿ ಕಲಿತ ಕಾರ್ಯಗಾರಡ್ ತುಲುವೆರ್ನ ಬಾರಿ ಎಡ್ಡೆ ಸ್ಪಂದನೆ ಉಂಡು ಪಂದ್ ಪಂಡೆರ್.
ತುಳುಕೂಟ ಒಡಿಪು (ರಿ) ಇದರ ಕಾರ್ಯದರ್ಶಿ,ಶ್ರೀಯುತ ಗಂಗಾಧರ್ ಕಿದಿಯೂರು,ತುಳುಕೂಟ ಉಡುಪಿ ದ ಸ್ಥಾಪಕ ಸದಸ್ಯೆರಾಯಿನ ಶ್ರೀಯುತ ಯು.ಜಿ. ದೇವಾಡಿಗ ಮೇರ್ ತುಳುಕೂಟ ಉಡುಪಿ (ರಿ) ದ ಪರವಾದ್ ಮನವಿ ಮಲ್ತೆರ್ ಅಂಚನೇ ಶ್ರೀಯುತ ಗಂಗಾಧರ ಕಿದಿಯೂರು ಮೇರ್ ತಾನ್ ಬರೆದ್ ತುಳುಲಿಪಿಟೇ ಪ್ರಕಟ ಮಲ್ತಿನ “ಪಿಂಗಾರದ ಬಾಲೆ ಸಿರಿ” ಪುಸ್ತಕನ್ ಜಿಲ್ಲಾಧಿಕಾರಿಲೆಗ್ ಗೌರವ ಪ್ರತಿಯಾದ್ ಕೊರಿಯೆರ್.
ಈ ಪೊರ್ತುಡು ಜೈ ತುಳುನಾಡ್(ರಿ) ತುಳು ಲಿಪಿ ಶಿಕ್ಷಕೆರಾಯಿನ ಕಿನ್ನು ಭಂಡಾರಿ ಬೊಕ್ಕ ಸ್ವಾತಿ ಸುವರ್ಣ ಪಾಲ್ ಪಡೆದಿತ್ತೆರ್ .
pallavi shetty