ತುಳು ಅಧಿಕೃತ ಭಾಷೆಗಾದ್ ರಿಜಿಸ್ಟರ್ಡ್ ಪೋಸ್ಟ್ ಅಭಿಯಾನ

ಕುಡ್ಲ, ಎಪ್ರಿಲ್ 06: ೧೮೩೭ ಎಪ್ರಿಲ್ ೫ ತಾರೀಕ್ ಗ್ ತುಳುನಾಡ್ ದ ಸ್ವಾತಂತ್ರ್ಯ ಹೋರಾಟದ ನೆಂಪುಗಾದ್ ಟೈಮ್ಸ್ ಆಫ್ ಕುಡ್ಲ ಬೊಕ್ಕ ಜೈ ತುಳುನಾಡ್ (ರಿ) ಮೆಕ್ಲೆನ ಒಟ್ಟು ಸೇರಿಗೆಡ್ ತುಳುನಾಡ ದುನಿಪು ರಿಜಿಸ್ಟರ್ಡ್ ಪೋಸ್ಟ್ ಅಭಿಯಾನ ಲೇಸ್ ಕುಡ್ಲದ ಸೂರ್ಯ ಹೋಟೆಲ್ ಸಭಾಭವನಡ್ ತಾರೀಖ್ 5/4/2021 ನೇ ಸೋಮವಾರದಾನಿ ಬಾರಿ ಗೌಜಿಡ್ ನಡತ್oಡ್.

ಈ ಲೇಸ್ ನ್ ತುಡರ್ ಅರ್ಲಾವುನ ಮುಖೇನ ಉದಿಪನ ಮಲ್ತ್ ಪಾತೆರಿನ ಆಳುಪ ಅರಸರ ವಂಶಸ್ಥೆರಾಯಿನ ಡಾ. ಆಕಾಶ್ ರಾಜ್ ಜೈನ್ ಮೇರ್ ಆರ್ಟಿಕಲ್ ೩೪೪(೧) ಬೊಕ್ಕ ೩೫೧ ವಿದಿತ ಪ್ರಕಾರ ಹಿಂದಿ ದ ಒಟ್ಟುಗು ಭಾರತದ ಸಾಹಿತ್ಯ ಬೊಕ್ಕ ಸಂಸ್ಕೃತಿನ್ ಬಿಂಬಿಸಾವುನ ಬಾಕಿ ಬಾಷೆಗ್ ಲಾ ಸ್ಥಾನ ಮಾನ ಕೊರ್ಪಿನ ಅವಕಾಶ ಉಂಡು ಅಂಚಾದ್ ನೆಟ್ಟ್ ನಮ್ಮ ತುಳು ಮಣ್ಣ್ ದ ಬಾಷೆಯಾಯಿನ ತುಳುವು ವಂಚಿತವಾದುಂಡು ಐರ್ದಾವರ ರಾಜ್ಯ ಬೊಕ್ಕ ಕೇಂದ್ರ ಸರ್ಕಾರದ ಗೇನೊನು ತುಳು ಬಾಷೆದ ಮಿತ್ತ್ ಕನಯರೆ ರಿಜಿಸ್ಟರ್ಡ್ ಪೋಸ್ಟ್ ಅಭಿಯಾನ ಲೇಸ್ ಅನಿವಾರ್ಯ ಪಂದ್ ಪಂಡೆರ್. ತುಳು ಸಿನೇಮಾ ನಟ ಬೋಜಾರಾಜ್ ವಾಮಂಜೂರು ರಿಜಿಸ್ಟರ್ಡ್ ಪೋಸ್ಟ್ ಅಭಿಯಾನಗ್ ಚಾಲನೆ ಕೊರ್ದು ತಾನೇ ಸ್ವತಃ ತುಳು ೮ ನನೇ ಪರೀಚೆದಗ್ ಸೇರ್ಯರೆ ಅಂಚನೇ ರಾಜ್ಯದ ಅಧಿಕೃತ ಭಾಷೆಯಾದ್ ಮಲ್ಪರೆ ಬಿನ್ನಾಪು ಮಲ್ದಿನ ಪತ್ರಿಕೆಗ್ ಸಹಿ  ಪಾರ್ದ್ ಮಾತೆರ್ನ ಮನ ಗೆಂದಿಯೆರ್.

ತುಳುವೆರ್ನ ಮನಸ್ಸ್ ಮಲ್ಲ ಲಾಕ್ ಡೌನ್ ಆದ್ ಆರ್ಥಿಕ ಪರಿಸ್ಥಿತಿ ಕುಗ್ಗಿನ ಪೊರ್ತುಡು ನಾಟಕ ಸಿನೇಮ ತೂಪಿನ ಮುಖೇನ ತುಳುಕಲಾವಿದೆರೆಗ್ ಪ್ರೋತ್ಸಾಹ ಕೊರ್oಡ ನೆರ್ದ್ ಊರುಡು ಉಪ್ಪುನ ಮಾತಾ ವರ್ಗದ ಜನಕ್ಲೆಗ್ ತುಳು ಬಾಷೆದ ಮಿತ್ತ್ ಉಪ್ಪುನ ಪ್ರೀತಿ ಗೊತ್ತಾಪುಂಡು ಇಂಚಿನ ಜನಪ್ರೀತಿ ಉಪ್ಪುನ ಬಾಷೆ ೮ ನೇ ಪರೀಚೆದಗ್ ಸೇರೋಡು ಉಂದು ನಮ್ಮ ದುನಿಪು ಪಂದ್ ಪಂಡೆರ್. ತುಳು ವಿದ್ವಾಂಸ ಉಡುಪಿ ಸಿರಿ ತುಳು ಚಾವಡಿ ಕೂಟದ ಗುರ್ಕಾರ್ಲಾಯಿನ ಕುದಿ ವಸಂತ ಶೆಟ್ಟಿ ಪಾತೆರ್ದ್ ತುಳುವೆರ್ ತುಳುವ ಪೆಲಕಾಯಿದಲಕ ಬಾರಿ ಮೃದು ಮನಸ್ ದಕುಲು ನನ ಆಂಡಲಾ ತುಳು ಭಾಷೆದ ಚೈತನ್ಯ ಗಾದ್ ತುಳುವೆರ್ ಮಾತಾ ಒಟ್ಟಾದ್ ಸೊರ ಲಪಂದ್ ಪಂಡೆರ್.

ಮತ್ತರ್ಮೆಡ್ ಪೆರಿಯ ಪತ್ರಕರ್ತ ಡಾ ಶೇಕರ್ ಅಜೆಕಾರು, ಸೂರ್ಯ ಹೋಟೆಲ್ ದ ಗುರ್ಕಾರ್ಲಾಯಿನ ತಾರಾನಾಥ್ ಶೆಟ್ಟಿ, ಸೃಷ್ಠಿ ಕಲಾಭೂಮಿ ಬೆಂಗಳೂರು ನೆತ್ತ ಗುರ್ಕಾರ್ಲಾಯಿನ ಮಂಜುನಾಥ ಅಡಪ್ಪ, ತುಳುವೆರೆ ಅಯಾನೋ ಕೂಟ ದ ಗುರ್ಕಾರ್ಲಾಯಿನ ಡಾ ರಾಜೇಶ್ ಆಳ್ವ ,ತುಳು ಸಿನೇಮಾ ನಿರ್ಮಾಪಕ ರವಿ ಬೋಳೂರು , ಜೈ ತುಳುನಾಡ್ ಸಂಘಟನೆದ ಗುರ್ಕಾರ್ಲಾಯಿನ ಸುದರ್ಶನ್ ಸುರತ್ಕಲ್ , ಟೈಮ್ಸ್ ಆಫ್ ಕುಡ್ಲದ ಜನರಲ್ ಮ್ಯಾನೇಜರ್ ಯಶೋದ ಕೇಶವ್, ಮ್ಯಾನೇಜರ್ ಕ್ರಿಶನ್ ತಿಮ್ಮಯ್ಯ, ಸಹ ಸಂಪಾದಕ ಯಶೋಧರ ಕೋಟ್ಯಾನ್, ಜೈ ತುಳುನಾಡು ಸಂಘಟನೆದ ಸಂಘಟನಾ ಪ್ರಮುಖೆರಾಯಿನ ಕಿರಣ್ ತುಳುವ, ಪಾಲ್ ಪಡೆದ್ ಇತ್ತೆರ್ , ಶ್ರೀನಿಧಿ ಶೆಟ್ಟಿ ಬೊಕ್ಕ ರಕ್ಷಣ್ ಪೂಜಾರಿ ಲೇಸ್ ನಡಪಾದ್ ಕೊರಿಯೆರ್. ಭುವನ ದಿನೇಶ್ ಪ್ರಾಸ್ತಾವಿಕ ನುಡಿ ಪಂಡೆರ್ , ದೀಕ್ಷಿತ ಸೊಲ್ಮೆ ಸಂದೈತ ಮಲ್ತೆರ್ .