ಆರ್ಥಿಕ ವ್ಯವಸ್ಥೆಡ್ ನನ ದುಂಬಗ್ ಸಹಕಾರಿ ಕ್ಷೇತ್ರಗ್ ಮಿತ್ತ್‌ದ ಸ್ಥಾನ: ಎಚ್. ವಸಂತ ಬರ್ನಾಡ್

ಹಳೆಯಂಗಡಿ : ದೇಶದ ಆರ್ಥಿಕ ವ್ಯವಸ್ಥೆನ್ ಅವಲೋಕನ ಮಲ್ತ್ಂಡ ಇಂಚೊಗು ಸಹಕಾರಿ ಕ್ಷೇತ್ರ ಬಲಿಷ್ಠವಾದ್ ಬುಳೆವೊಂದುಂಡು. ಅಂಚಾದ್ ದೇಶದ ಆರ್ಥಿಕ ವ್ಯವಸ್ಥೆ ಎಡ್ಡೆ ರೀತಿಡ್ ನಡತೊಂದುಂಡು
ಪಂದ್ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಅಧ್ಯಕ್ಷೆರಾಯಿನ ಎಚ್ ವಸಂತ ಬರ್ನಾಡ್ ತೆರಿಪಾಯೆರ್.
ಆರ್ ಸೊಸೈಟಿ ಆಶ್ರಯಡ್ ನಡತಿನ ಇಂಟರ್ನ್‌ಶಿಪ್ ತರಬೇತಿದ 2 ನೇ ಹಂತದ ವಿದ್ಯಾರ್ಥಿಲೆಗ್ ಪ್ರಮಾಣ ಪತ್ರ ಪಟ್ಟುನ ಲೇಸ್‌ಡ್ ಪಾಲ್ ಪಡೆದ್ ಪಾತೆರಿಯೆರ್. ಯುವಜನಕುಲು ಕೇವಲ ರಾಷ್ಟ್ರೀಕೃತ ಬ್ಯಾಂಕ್‌ಲೆನೇ ಬೆರಿಪತ್ತಂದೆ ಸಹಕಾರಿ ಕ್ಷೇತ್ರಡ್‌ಲ ಸೇವೆ ಮಲ್ಪರೆ ದುಂಬು ಬರೊಡು. ನನದ ದಿನೊಕ್ಲೆಡ್ ಸಹಕಾರಿ ರಂಗ ಮಾತಾ ಆರ್ಥಿಕ ವ್ಯವಸ್ಥೆಗೇ ಲೀಡರ್ ಆಪಿನ ದಿನ ಎಚ್ಚ ಇಜ್ಜಿ ಪಂದ್ ಪಂಡೆರ್.
ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಳ ಕಾಲೇಜಿದ ವಿದ್ಯಾರ್ಥಿಲೆಗ್ ಪ್ರಮಾಣ ಪತ್ರ ವಿತರಣೆ ಮಲ್ತೆರ್.
ಮುಖ್ಯ ಕಾರ್ಯನಿರ್ವಹಣೆ ಅಧಿಕಾರಿ ಸುದರ್ಶನ್ ಪಂಜ ಸ್ವಾಗತ ಮಲ್ತ್‌ದ್ ಪ್ರಾಸ್ತಾವಿಕವಾದ್ ಪಾತೆರಿಯೆರ್.
ಅಕೌಂಟೆಂಟ್ ಲೋಲಾಕ್ಷಿ ಧನ್ಯವಾದ ಕೊರಿಯೆರ್. ಈ ಕಾರ್ಯಕ್ರಮನ್ ಸಾಲ ವಿಭಾಗದ ಪ್ರಬಂಧಕೆರಾಯಿನ ಅಕ್ಷತಾ ಶೆಟ್ಟಿ ನಿರೂಪಣೆ ಮಲ್ತೆರ್.