ಸಾರಂತಾಯ ಗರೊಡಿ ಉಳ್ಳಾಯ ದೈವಸ್ಥಾನದ ಬಹ್ಮಕಲಶೋತ್ಸವದ ಸುರುತ್ತ ದಿನತ್ತ ಧರ್ಮಸಭೆ
ಸಸಿಹಿತ್ಲು : ಸಾರ ವರ್ಷ ಕರಿಂಡಲ ಸಸಿಹಿತ್ಲುದ ಸಾರಂತಾಯ ಗರೊಡಿ ಗಟ್ಟಿಯಾದ್ ಉಂತುಂಡು ಪಂದ್ ಅವೆನ್ ಕಟ್ದಿನ ಪೊರ್ಲುನು ತೂನಗನೇ ಗೊತ್ತಾಪುಂಡು ಪಂದ್ ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಪ್ರಧಾನ ಅರ್ಚಕೆರ್ ಶ್ರೀ ಹರಿನಾರಾಯಣ ಅಸ್ರಣ್ಣೆರ್ ಪಂಡೆರ್.
ಆರ್ ಸಸಿಹಿತ್ಲು ಶ್ರೀ ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನದ
ಬ್ರಹ್ಮಕಲಶೋತ್ಸವ ಅಂಗವಾದ್ ಬುಧವಾರ “ಉಳ್ಳಾಯ ಮದಿಪು” ವೇದಿಕೆಡ್ ನಡತಿನ ಸುರುತ್ತ ದಿನತ್ತ ಧರ್ಮ ಸಭೆಟ್ ಆಶೀರ್ವಚನ ಮಲ್ತ್ ಪಾತೆರಿಯೆರ್.
ಪುಣ್ಯಕ್ಷೇತ್ರ ಕಟೀಲ್ದಪ್ಪೆನ ನಡೆರ್ದ್ ಪರತೊಂದು ಬರ್ಪಿನ ನಂದಿನಿ ತುದೆ ಬರಿತ್ತ ಸಸಿಹಿತ್ಲುದ ಜಾಗೆಡ್ ನಿರ್ಮಾಣವಾಯಿನ ಈತ್ ಗಟ್ಟಿಮುಟ್ಟುದ ದೈವಸ್ಥಾನದ ಬೇಲೆನ್ ತೂನಗ ಈ ಊರುದ ಜನಕ್ಲೆನ ಒಗ್ಗಟ್ಟ್ ಸಂಕೇತವಾದ್ ತೋಜುಂಡು. ಮಾತಾ ಧಾರ್ಮಿಕ ಕ್ಷೇತ್ರಲೆನ ಜೀರ್ಣೋದ್ಧಾರಗ್ ಈ ಕ್ಷೇತ್ರ ಮಾದರಿಯಾದುಂಡು. ವಾಸ್ತುಬದ್ಧವಾದ್ ಶಾಸ್ತ್ರೀಯವಾದ್ ಗರೊಡಿ ಪುನರ್ ನಿರ್ಮಾಣದ ಕೆಲಸ ಆತ್ಂಡ್ ಪಂದ್ ಆರ್ ಪುಗರಿಯೆರ್.
ಬಿಲ್ಲವರ ಹಿತವರ್ದಕ ಸಂಘ ಸಸಿಹಿತ್ಲು ನೆತ್ತ ಅಧ್ಯಕ್ಷೆರ್ ಜಗನ್ನಾಥ ಕೋಟ್ಯಾನ್ ಅಧ್ಯಕ್ಷತೆ ವಹಿಸ್ದಿತ್ತೆರ್. ಮಲ್ಲ ಬಿನ್ನೆರಾದ್ ಮಂಗಳೂರು ಅಸೋಸಿಯೇಶನ್ ಆಫ್ ಸೌದಿ ಅರೇಬಿಯಾದ ಸ್ಥಾಪಕ ಅಧ್ಯಕ್ಷೆರ್ ರವಿ ಎಲ್ ಕರ್ಕೇರ, ಬಿಲ್ಲವರ ಅಸೋಶಿಯೇಶನ್ ಮುಂಬೈ ಉಪಾಧ್ಯಕ್ಷೆರ್ ಸುರೇಶ್ ಕುಮಾರ್ ಕದ್ರಿ, ಶ್ರೀ ಕ್ಷೇತ್ರದ ಜೀರ್ಣೋದ್ದಾರ ಸಮಿತಿದ ಅಧ್ಯಕ್ಷೆರ್ ಸಿ.ಬಿ.ಕರ್ಕೇರ, ಭಾರತ್ ಕೋ ಆಪರೇಟಿವ್ ಬ್ಯಾಂಕ್ದ ನಿರ್ದೇಶಕೆರ್ ಗಣೇಶ್ ಡಿ ಪೂಜಾರಿ, ಸಾರಂತಾಯ ಗರೊಡಿ ಉಳ್ಳಾಯ ದೈವಸ್ಥಾನದ ಕೋಶಾಧಿಕಾರಿ ಮಂಜೋಡಿ ದೇವು ಗುರಿಕಾರೆರ್ ದಯಾನಂದ ಎಸ್., ಜುಮಾದಿ ಪಾತ್ರಿ ದಾಮೋದರ ಪೂಜಾರಿ ಅರುವೆದಕೋಡಿ, ಬಿಲ್ಲವರ ಹಿತವರ್ದಕ ಸಂಘ ಮುಂಬೈದ ಗೌರವ ಸಲಹೆಗಾರೆರ್ ಲಕ್ಷ್ಮಣ್ ಸನಿಲ್, ಸುನೀತಾ ಸುವರ್ಣ, ಭಾರತ್ ಬ್ಯಾಂಕ್ ದ ಮಾಜಿ ನಿರ್ದೇಶಕೆರ್ ರಾಜಾ ವಿ ಸಾಲ್ಯಾನ್, ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಂಘದ ಅಗ್ಗಿದಕಳಿಯದ ಅಧ್ಯಕ್ಷೆರ್ ಪ್ರಕಾಶ್ ನಿಸರ್ಗ, ಮುಂಬೈ ಸಮಿತಿದ ಸಂಚಾಲಕೆರ್ ಪದ್ಮನಾಭ ಸಸಿಹಿತ್ಲು, ಮಹಿಳಾ ಸಮಿತಿದ ಅಧ್ಯಕ್ಷೆ ಶಕುಂತಳ ಭೋಜ ಬಂಗೇರ, ಜೀರ್ಣೋದ್ದಾರ ಸಮಿತಿದ ಅಧ್ಯಕ್ಷೆ ಪುಷ್ಪಾ ದಯಾನಂದ್ , ಮಹಿಳಾ ಸಮಿತಿದ ಗೌರವಾಧ್ಯಕ್ಷೆರ್ ಲೀಲಾ ವಸಂತ ಪೂಜಾರಿ, ಬ್ರಹ್ಮಕಲಶೊತ್ಸವ ಸಮಿತಿದ ಸಂಯೋಜಕೆರಾಯಿನ ಅನಿಲ್ ಪೂಜಾರಿ, ಅಶೋಕ್ ಕುಕ್ಯಾನ್ ಮೊಕುಲು ಮಾತ ಮತ್ತರ್ಮೆಡ್ ಇತ್ತೆರ್.
ಈ ಪೊರ್ತುಡು ಕರಸೇವೆ ಮಲ್ದಿನ ಪೊಂಜೊವುಲೆಗ್ ಬೊಕ್ಕ ಸಂಘ ಸಂಸ್ಥೆದಕ್ಲೆಗ್ ಮಾನಾದಿಗೆ ಮಲ್ತೆರ್. ತೃಪ್ತಿ ಎಲ್ ಬಂಗೇರ ಕರಸೇವಕೆರ್ನ ಪುದರ್ ಲೆತ್ತ್ ಪಂಡೆರ್.
ಬಿಲ್ಲವ ಹಿತವರ್ಧಕ ಸಂಘ(ರಿ) ಮುಂಬೈ ಸಮಿತಿದ ಅಧ್ಯಕ್ಷೆರ್ ಸತೀಶ್ ಕೋಟ್ಯಾನ್ ಪ್ರಸ್ತಾವಿಕವಾದ್ ಪಾತೆರ್ದ್ ಸ್ವಾಗತ ಮಲ್ತೆರ್. ಆಡಳಿತ ಮಂಡಳಿದ ಕಾರ್ಯದರ್ಶಿ ನವೀನ್ ಕುಮಾರ್ ಸೊಲ್ಮೆ ಸಂದಾಯೆರ್. ದಿಲೀಪ್ ಕರ್ಕೇರ ಸಸಿಹಿತ್ಲು ನಿರೂಪಣೆ ಮಲ್ತೆರ್. ಎಸ್.ಆರ್ ಪ್ರಭಾತ್ ಬೊಕ್ಕ ಎಸ್ ಆರ್ ಪ್ರದೀಪ್ ನಿರ್ವಹಣೆ ಮಲ್ತೆರ್.
ನಗಾರಿ ಬೊಟುದು ಕಲೋತ್ಸವ ಉದಿಪನ
ಉದ್ಯಮಿ ವೇದ ಪ್ರಕಾಶ್ ಎಮ್ ಶ್ರೀಯಾನ್ ಸಾಂಸ್ಕ್ರತಿಕ ಕಲೋತ್ಸವನ್ ನಗಾರಿ ಬೊಟ್ಟುದು ಅಂಚೆನೆ ಭರತನಾಟ್ಯ ಕಲಾವಿದೆ ತವೇಶಿ ಜೆ ಕರ್ಕೇರ ಮೆರೆಗ್ ಪೊಣ್ಣು ಬಾಲೆಗ್ ಗೆಜ್ಜೆನ್ ಕೊರ್ದು ಉದಿಪನ ಮಲ್ತೆರ್. ಅವೆರ್ದ್ ಬೊಕ್ಕ ತವೇಶಿ ಕರ್ಕೇರ ಭರತನಾಟ್ಯ ಪ್ರದರ್ಶನ ಮಲ್ತೆರ್. ತೋನ್ಸೆ ಪುಷ್ಕಳ ಕುಮಾರ್ ಮೆರೆರ್ದ್ “ಸೀಮೆದ ಉಳ್ಳಾಯನ ಕಾರ್ನಿಕ” ಹರಿಕಥಾ ಕಾಲಕ್ಷೇಪ ನಡತ್ಂಡ್.