“ಮಹಾಭಾರತ ಯುದ್ಧಗ್‌ ದುಂಬು ಯಕ್ಷೆ ಯುಧಿಷ್ಠಿರನ ಕೈತಲ್ ಬತ್ತ್ ದ್ ಜಗತ್ತ್‌ಡ್ ನಿಕ್ಕ್ ಮಲ್ಲ ಅಚ್ಚಿರದ ವಿಷಯ ಒವ್ವ್ ಪನ್ಪುನ ಪ್ರಶ್ನೆ ಕೇನ್‌ವೆರ್. ಅವೆಕ್ಕ್ ಯುಧಿಷ್ಠಿರೆ, ಜಗತ್ತ್‌ಡ್ ಈತೊಂಜಿ ಸಾವು-ಬೇನೆ ಇತ್ತ್‌ಂಡಲ ಬದ್ಕ್‌ದ ಬಗ್ಗೆ ಜನಕ್ಲೆಗ್‌ ದಾಯೆ ಈತ್ ಆಸಕ್ತಿ ಪನ್ಪುನವೆ ಅಚ್ಚರಿ ಪಂದ್ ಉತ್ತರನ್‌ ಕೊರ್ಪೆ. ಅಂಚೆನೆ ಯಕ್ಷೆ ಇತ್ತೆ ಜಮ್ಮು-ಕಾಶ್ಮೀರಗ್ ಬತ್ತ್‌ದ್ ಎನಡಲ, ನಿಕ್ಕ್ ಮಲ್ಲ ಅಚ್ಚಿರದ ವಿಷಯ ಒವ್ವ್ ಪಂದ್ ಕೇಂಡ, ಈತ್ ಜನ ಕರ್ನಾಟಕರ್ದ್‌ ಬತ್ತ್‌ದ್ ಶ್ರೀನಗರಡ್ ವೈಭವದ ಯಕ್ಷಗಾನ ಪ್ರದರ್ಶನ ಮಲ್ತಿನವೆ ಮಲ್ಲ ಅಚ್ಚಿರ ಪಂದ್ ಪನ್ಪೆ …” ಇಂಚ ಪಂಡಿನಾರ್ ಜಮ್ಮು-ಕಾಶ್ಮೀರದ ಲೆಫ್ಟಿನೆಂಟ್‌ ಗವರ್ನರ್‌ ಮನೋಜ್‌ ಸಿನ್ಹಾ.
ಮೇರ್ ಅ.2 ಗಾಂಧಿ ಜಯಂತಿ ಪ್ರಯುಕ್ತ ಜಮ್ಮು-ಕಾಶ್ಮೀರದ ರಾಜಧಾನಿ ಶ್ರೀನಗರದ ಶೇರ್-ಇ-ಕಾಶ್ಮೀರ್‌ ಇಂಟರ್‌ನ್ಯಾಷನಲ್‌ ಕಾನ್ಫರೆನ್ಸ್‌ ಸೆಂಟರ್‌ಡ್ ಯಕ್ಷಧ್ರುವ ಪಟ್ಲ ಫೌಂಡೇಷನ್‌ ಡೆಲ್ಲಿ ಘಟಕ, ಸುಳ್ಯದ ಬೆಳ್ಳಾರೆ ನಿನಾದ ಸಾಂಸ್ಕೃತಿಕ ಕೇಂದ್ರ ಬೊಕ್ಕ ಜಮ್ಮು-ಕಾಶ್ಮೀರ ಸರ್ಕಾರದ ಕಲೆ, ಸಂಸ್ಕೃತಿ ಬೊಕ್ಕ ಭಾಷಾ ಇಲಾಖೆ ಆಯೋಜನೆ ಮಲ್ತಿನ ಹಿಂದಿ ಯಕ್ಷಗಾನ ಬೊಕ್ಕ ಪಜ್ಜೆ-ಗೆಜ್ಜೆ ತುಳು-ಕನ್ನಡ ಶಾಸ್ತ್ರೀಯ, ಜಾನಪದ ನೃತ್ಯ ಪ್ರಕಾರ ಕಾರ್ಯಕ್ರಮಡ್ ಮಲ್ಲ ಬಿನ್ನೆರಾದ್‌ ಪಾಲ್‌ ಪಡೆದ್‌ ಪಾತೆರಿಯೆರ್. ಕರ್ನಾಟಕದ 2 ಕಲಾ ಪ್ರಕಾರಲು ದೇಶದ ಮುಕುಟದ ಮಣಿ ಕಾಶ್ಮೀರಡ್ ಪ್ರದರ್ಶನ ಕೊರ್ನವು ಎಂಕ್ ಭಾರಿ ಖುಷಿ ಕೊರ್ತುಡು ಪಂಡೆರ್. ತೆಂಕುತಿಟ್ಟು ಯಕ್ಷಗಾನದ ಖ್ಯಾತ ಭಾಗವತೆರ್ ಪಟ್ಲ ಸತೀಶ್‌ ಶೆಟ್ಟಿ ನೇತೃತ್ವ ಪಾವಂಡ್ಜೆ ಮೇಳದ ಕಲಾವಿದೆರ್ ಪ್ರದರ್ಶನ ಮಲ್ತಿನ ಶ್ರೀದೇವಿ ಮಹಾತ್ಮೆ ಯಕ್ಷಗಾನ ತೂಯಿನ ಲೆ.ಗವರ್ನರ್‌ ಸಿನ್ಹಾ, ಕಲೆ ಸಮಾಜನ್ ಒಟ್ಟುಮಲ್ತೊಂದು ಸಮಾಜ ಜಾಗೃತ ಆನಗ ರಾಷ್ಟ್ರ ನಿರ್ಮಾಣ ಸಾಧ್ಯ. ದೇಶದ ವೈವಿಧ್ಯಮಯ ಕಲೆ ಈ ಕೆಲಸ ಮಲ್ತೊಂದು ಉಂಡು. ನಮ್ಮ ವಿದ್ಯುತ್‌ ಇಲಾಖೆ ಪ್ರಿನ್ಸಿಪಲ್‌ ಸೆಕ್ರೆಟರಿ ರಾಜೇಶ್‌ ಪ್ರಸಾದ್‌ ಮೇರ್ ಗಾಂಧಿ ಜಯಂತಿಗ್ ಯಕ್ಷಗಾನ ಕಾರ್ಯಕ್ರಮ ಏರ್ಪಡ್‌ ಮಲ್ತಿನ ಬಗ್ಗೆ ಕೆನ್ನಗ ಖುಷಿಟ್‌ ಒಪ್ಪಿಗೆನ್‌ ಕೊರಿಯೆ. ಈ ಯಕ್ಷಗಾನ ಕಾರ್ಯಕ್ರಮ ಜಮ್ಮು-ಕಾಶ್ಮೀರದ ಸಭಿಕೆರೆನ್ ಮಂತ್ರಮುಗ್ಧ ಮಲ್ತ್ ದ್ಂಡ್. ಅಂಚಾದ್, ನವರಾತ್ರಿ ಪೊರ್ತುಡು ನಿಕ್ಲೆನ ತಂಡ ಜಮ್ಮುದ ವೈಷ್ಣೋದೇವಿ ಮಂದಿರಡ್ ಪಿರೊರ ಉಂದುವೆ ಪ್ರದರ್ಶನನ್‌ ಕೊರೊಡು ಪಂದ್ ಲೆಪ್ಪೋಲೆನ್‌ ಮಲ್ತೆರ್.
ಮಹಾತ್ಮ ಗಾಂಧಿಜಿಗ್ ಕರ್ನಾಟಕದೊಟ್ಟಿಗೆ ಆತ್ಮೀಯ ಒಡನಾಟನ್ ಉಲ್ಲೇಖ ಮಲ್ತಿನ ಆರ್, ಹಿಂದುಸ್ತಾನಿ ಬೊಕ್ಕ ಕರ್ನಾಟಕ ಸಂಗೀತ ಕರ್ನಾಟಕಡ್‌ ಮುಗರ್ತೆನ್‌ ಪಡೆಯೊಂದುಂಡ್. ಗಂಗೂಬಾಯಿ ಹಾನಗಲ್ಲ, ಪಂಡಿತ್ ಭೀಮಸೇನ ಜೋಶಿ, ಪಾಟೀಲ ಪುಟ್ಟಪ್ಪ ಬೊಕ್ಕ ಮಸ್ತ್‌ ಜನ ಸಾಂಸ್ಕೃತಿಕ, ಸಾಹಿತ್ಯ ಲೋಕಗ್ ಕೊರ್ನ ಕೊಡುಗೆ ಅವಿಸ್ಮರಣೀಯ. ಇತ್ತೆಲ ಕರ್ನಾಟಕದ ಹಳ್ಳಿಹಳ್ಳಿಡ್ ಬಸವಣ್ಣನ ವಚನ ಪನೊಂದು ಇಪ್ಪುವೆರ್. ಕಲೆ, ಸಂಸ್ಕೃತಿ, ಪರಂಪರೆದ ನೆಲೆಬೀಡು ಕರ್ನಾಟಕ ಪಂದ್ ಮೆಚ್ಚುಗೆನ್‌ ವ್ಯಕ್ತಪಡಿಸಾಯೆರ್. ಸರ್ಕಾರದ ಮುಖ್ಯ ಕಾರ್ಯದರ್ಶಿ ಡಾ. ಅರುಣ್‌ ಕುಮಾರ್‌ ಮೆಹ್ತಾ ಪಾತೆರ್ದ್, ಎನ್ನ 35 ವರ್ಷದ ವೃತ್ತಿ ಜೀವನಡ್‌ ಇಂಚಿನ ಒಂಜಿ ಜಾನಪದ ಕಲಾ ಪ್ರದರ್ಶನನ್‌ ತೂದು ಇತ್ತಿಜಿ. ಬಾರಿ ಸೊಗಸಾದ್‌ ಮನಸ್ಸ್‌ಗ್‌ ಮುಟ್ಟುನಂಚ ಯಕ್ಷಗಾನ ಪ್ರದರ್ಶನ ಕೊರ್ತರ್. ಕಥೆನ್ ತೆರಿಪಾವುನ ರೀತಿ ಬಾರಿ ಪೊರ್ಲು ಪಂದ್ ಪಂಡೆರ್. ಲೆ.ಗವರ್ನಲ್‌ ಕಚೇರಿ ಸಲಹೆಗಾರೆರ್ ರಾಜೀವ್‌ ರೈ ಭಟ್ನಾಗರ್‌ ಪಾತೆರ್ದ್, ಯಕ್ಷಗಾನ ತೂಪುನ ನಮಕ್ಕ್‌ ಒಂಜಿ ಪೊಸ ಅನುಭವ. ಅವೆನ್ ಪ್ರಸ್ತುತಪಡಿಸಾಯಿನ ರೀತಿಯಂತೂ ಅದ್ಭುತ. ನೆಕ್ಕ್ ಕಾರಣಕರ್ತೆರಾಯಿನ ಮಾತೆರೆಗ್‌ ಸೊಲ್ಮೆ ಸಂದಾವೆ ಪಂಡೆರ್.
ಯಕ್ಷಧ್ರುವ ಪಟ್ಲ ಫೌಂಡೇಷನ್‌ ಮುಖ್ಯಸ್ಥೆರ್ ಪಟ್ಲ ಸತೀಶ್‌ ಶೆಟ್ಟಿ ಬೊಕ್ಕ ಫೌಂಡೇಷನ್‌ನ ದೆಹಲಿ ಘಟಕದ ಗುರ್ಕಾರ್ಲು ವಸಂತ ಶೆಟ್ಟಿ ಬೆಳ್ಳಾರೆ ಮೊಕ್ಲೆಗ್ ಲೆ.ಗವರ್ನರ್‌ ಮನೋಜ್‌ ಸಿನ್ಹಾ ಸರ್ಕಾರದ ಮುತಾಲಿಕೆಡ್‌ ಮಾನಾದಿಗೆ ಮಲ್ತೆರ್. ಸುರುಕ್ಕು ಸುಳ್ಯದ ಬೆಳ್ಳಾರೆದ ನಿನಾದ ಸಾಂಸ್ಕೃತಿಕ ಕೇಂದ್ರದ ಕಲಾವಿದೆರ್ ಶಾಸ್ತ್ರೀಯ, ಜನಪದ ನೃತ್ಯ ಪ್ರದರ್ಶನ ಕೊರಿಯೆರ್. ಕಾರ್ಯಕ್ರಮದ ರೂವಾರಿ ರಾಜೇಶ್‌ ಪ್ರಸಾದ್‌, ವಸಂತ ಶೆಟ್ಟಿ ಜಮ್ಮು-ಕಾಶ್ಮೀರ ಬೊಕ್ಕ ಯಕ್ಷಗಾನ ಕಲೆ ಉಂದೊಂಜಿ ಐತಿಹಾಸಿಕ ಕಾರ್ಯಕ್ರಮ. ದಾಯೆ ಪಂಡ, ಜಮ್ಮು-ಕಾಶ್ಮೀರಡ್ ಯಕ್ಷಗಾನ ಪ್ರದರ್ಶನ ನಡಪುನ ಉಂದುವೇ ಸುರುತ ಸಲ. ಉಂದೆನ್ ನಿಜ ಮಲ್ತ್ ಪೊಸ ಇತಿಹಾಸ ಸೃಷ್ಟಿ ಮಲ್ಪೆರೆ ಕಾರಣ ಆಯಿನ ಜಮ್ಮು-ಕಾಶ್ಮೀರ ವಿದ್ಯುತ್‌ ಇಲಾಖೆದ ಪ್ರಿನ್ಸಿಪಲ್‌ ಸೆಕ್ರೆಟರಿ ರಾಜೇಶ್‌ ಪ್ರಸಾದ್‌ ಹಿರಿಯಡ್ಕ ಬೊಕ್ಕ ದಿಲ್ಲಿ ಕನ್ನಡ ಶಾಲೆ ಬೊಕ್ಕ ಕರ್ನಾಟಕ ಸಂಘದ ಮಾಜಿ ಗುರ್ಕಾರ್ಲು ವಸಂತ ಶೆಟ್ಟಿ ಬೆಳ್ಳಾರೆ ಇಂಚಿನ ಒಂಜಿ ಕಾರ್ಯಕ್ರಮ ನಡಪಾವುನ ಬಗ್ಗೆ ಲೆ.ಗವರ್ನರ್‌ನ ಒಟ್ಟಿಗೆ ಪಾತೆರ್ದ್, ಗಾಂಧಿ ಜಯಂತಿದಾನಿಯೆ ಯಕ್ಷಗಾನ ಕಾರ್ಯಕ್ರಮ ಏರ್ಪಡ್‌ ಮಲ್ತಿತ್ತೆರ್.
ಈ ಕಾರ್ಯಕ್ರಮ ತೂವೆರೆ ಪಂದೆ ದಕ್ಷಿಣ ಕನ್ನಡದ 130ರ್ದ್‌ ಎಚ್ಚ ಯಕ್ಷಗಾನ ಅಭಿಮಾನಿಲ ಶ್ರೀನಗರಗ್‌ ಬೈದೆರ್. ವಿಶೇಷ ಪಂಡ, ಕಾರ್ಯಕ್ರಮ ತೂಯಿನ ಲೆ.ಗ. ಮನೋಜ್‌ ಸಿನ್ಹಾ, ಪಿರ ಒರ ಕೇಂದ್ರಾಡಳಿತ ಪ್ರದೇಶಗ್‌ ಬರಿಯೆರೆ ಲೆತ್ತ್‌ದ್, ವೈಷ್ಣೋದೇವಿ ಮಂದಿರಡ್ ದೇವಿ ಮಹಾತ್ಮೆ ಯಕ್ಷಗಾನ ಪ್ರದರ್ಶನ ಆವೊಡು ಪಂದ್ ನಿರ್ದೇಶನ ಕೊರಿಯೆರ್.
Editorial