ರಜಕ ಸಂಘದ ನಿರೆಲ್ಡ್ ಶ್ರೀ ವರ ಮಹಾಲಕ್ಷ್ಮಿ ಪೂಜೆ

ಬೊಂಬೈದ ಪುಗರ್ತೆದ ಸಂಘಟನೆ ಶ್ರೀ ರಜಕ ಸಂಘ, ಬೊಂಬೈ ನೆತ್ತ ಸಾಂಸ್ಕೃತಿಕ ವಿಭಾಗ ಬೊಕ್ಕ ಮಹಿಳಾ ವಿಭಾಗದ ಒಟ್ಟುಸೇರಿಗೆಡ್ ಶ್ರೀ ವರಮಹಾಲಕ್ಷ್ಮಿ ಪೂಜೆ ಇಂಚಿಪ್ಪ ಸಂತಕ್ರೂಜ್ ದ ಪೇಜಾವರ ಮಠತ್ತ ಚಾವಡಿಡ್ ನಡತ್ಂಡ್.

ಸುರುಕ್ಕು ಮಂಜಲ್ ಕುಂಕುಮ ಪೂಜೆ ನಡತ್ಂಡ್. ಬೊಕ್ಕ ಸಂಘದ ಪದಾಧಿಕಾರಿಲು ತುಡರ್ ಅರ್ಲಾದ್ ಪೂಜೆದ ಉದಿಪನ ಮಲ್ತೆರ್. 5 ವಲಯದ ಸದಸ್ಯೆರ್ದ್ ಭಜನೆ, ನಲಿಕೆ ಭಜನೆ ನಡತ್ಂಡ್.

ಈ ಪೊರ್ತುಡು ಶುಭ ಗುಜರನ್ ಮೇರ್ ವರಮಹಾಲಕ್ಷ್ಮಿ ದೇವಿನ ಮೂರ್ತಿನ್ ಶ್ರೀ ರಜಕ ಗುರು ಮಾಚಿದೇವ ಭಜನಾ ಮಂಡಳಿದ ಕಾರ್ಯದರ್ಶಿ ಪ್ರವೀಣ ಕುಂದರ್ ಮೆರೆನ ಮುತಾಲಿಕೆಡ್ ಕೋಲಾಟ, ನಲಿಕೆ ಭಜನೆದೊಟ್ಟಿಗೆ ಎದ್ಕೊಂದು ಪೂಜೆದ ಮಂಟಪಗ್ ಕನತೆರ್. ಬೊಕ್ಕ ಗೀತಾ ಭುಜಂಗ ಸಾಲ್ಯಾನ್ ಮೆರೆನ  ಪೌರೋಹಿತ್ಯಡ್ ಮಹಿಳಾ ವಿಭಾಗದ ಉಪ ಕಾರ್ಯಾಧ್ಯಕ್ಷೆ ನಯನ ಕುಂದರ್ ಬೊಕ್ಕ ವಿಠ್ಠಲ್ ಕುಂದರ್ ದಂಪತಿಲೆನ ಸಂಕಲ್ಪಡ್ ಗಣೇಶ ಪೂಜೆ ನಡತ್ಂಡ್.

ವನಿತಾ ಯೋಗೇಶ್ ಕುಂದರ್ ವರಮಹಾಲಕ್ಷ್ಮಿ ವೃತದ ಬಗೆಟ್ಟ್ ಪೊಲಬು ಕೊರಿಯೆರ್. ಬೊಕ್ಕ 5 ವಿಭಾಗದ ಮಹಿಳಾ ಕಾರ್ಯಾಧ್ಯಕ್ಷೆರ್, ಉಪ ಕಾರ್ಯಧ್ಯಕ್ಷೆರೆನ ಮುತಾಲಿಕೆಡ್ ಮಾತ ಭಕ್ತವೃಂದದ ಒಟ್ಟುಸೇರಿಗೆಡ್ ಶ್ರೀ ವರ ಮಹಾಲಕ್ಷ್ಮಿ ಪೂಜೆದ ಅರ್ಚನೆ ನಡತ್ಂಡ್.

ಬೊಕ್ಕ ಸಹಸ್ರ ನಾಮಾವಳಿ ಪಠಣೆ ಮಲ್ತ್ ದ್, ಮಹಾ ಮಂಗಳಾರತಿ ಮಲ್ತೆರ್. ಈ ಪೂಜೆಡ್ ಪಾಲ್ ಪಡೆದಿತ್ತಿನ ಭಕ್ತೆರ್ ತೀರ್ಥ ಪ್ರಸಾದ, ಮಹಾ ಪ್ರಸಾದ ದೆತೊಂಡೆರ್. ಗೀತಾ ಭುಜಂಗ ಸಾಲ್ಯಾನ್ ಪೂಜೆದ ವಿಧಿವಿಧಾನನ್ ಮಲ್ತೆರ್. ಸುಂದರಿ ರಘು ಕುಂದರ್ ಸಹಕಾರ ಮಲ್ತೆರ್.

1936 ಟ್ಟ್ ಸ್ಥಾಪನೆ ಆಯಿನ ಶ್ರೀ ರಜಕ ಸಂಘ ಸುಮಾರ್ ಸಾಮಾಜಿಕ,  ಸಾಂಸ್ಕೃತಿಕ, ಧಾರ್ಮಿಕ ಲೇಸ್ ನ್ ಮಲ್ತೊಂದುಂಡು. ಕರಿನ 13 ವರ್ಷೊದಿಂಚ ಮಾತ 5 ವಿಭಾಗದ ಸದಸ್ಯೆರೆನ್ ಒಟ್ಟು ಸೇರ್ಸಾದ್ ವರಮಹಾಲಕ್ಷ್ಮಿ ಪೂಜೆನ್ ಗೌಜಿಡ್ ಆಚರಣೆ ಮಲ್ತೊಂದು ಉಂಡು. ಇತ್ತೆ ಗುರ್ಕಾರ್ರ್ ಸಿ.ಎ. ವಿಜಯ್ ಕುಂದರ್, ಉಪಾಧ್ಯಕ್ಷೆರ್ ಹರೀಶ್ ವಿ ಸಾಲ್ಯಾನ್, ಕಾರ್ಯದರ್ಶಿ ಸುಮಿತ್ರಾ ಪಲಿಮಾರ್, ಜತೆ ಕಾರ್ಯದರ್ಶಿ ಕಿರಣ್ ಕುಂದರ್, ಕೋಶಾಧಿಕಾರಿ ಜಯ ಕುಂದರ್, ಜತೆ ಕೋಶಾಧಿಕಾರಿ ಸುಮಿತ ಸಾಲ್ಯಾನ್, ಸಂಯೋಜಕೆರ್ ಸತೀಶ್ ಸಾಲ್ಯಾನ್, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆ ವನಿತಾ ಎಸ್ ಸಾಲ್ಯಾನ್, ಉಪ ಕಾರ್ಯಾಧ್ಯಕ್ಷೆ ನಯನ ಕುಂದರ್, ಕಾರ್ಯದರ್ಶಿ ಉಷಾ ಎನ್ ಸಾಲ್ಯಾನ್, ಯುವ ರಜಕದ ಕಾರ್ಯಾಧ್ಯಕ್ಷೆರ್ ನಿತೀಶ್ ಸಾಲ್ಯಾನ್, ಉಪಾಧ್ಯಕ್ಷೆ ಸ್ವಸ್ತಿಕ ಕುಂದರ್, ಕಾರ್ಯದರ್ಶಿ ಸ್ತುತಿ ಕುಂದರ್ ಬೊಕ್ಕ ಮಾತ ಪದಾಧಿಕಾರಿಲು, ಸಾಂಸ್ಕೃತಿಕ ವಿಭಾಗ, ಮಹಿಳಾ ವಿಭಾಗ, ಯುವ ವಿಭಾಗ ಬೊಕ್ಕ ಮಾತ ವಲಯದ ಕಾರ್ಯಕರ್ತೆರೆನ, ಸದಸ್ಯೆರೆನ ಸಹಕಾರಡ್ ಈ ಸರ್ತಿದ ವರಮಹಾಲಕ್ಷ್ಮಿ ಪೂಜೆ ನಡತ್ ದ್ಂಡ್.

ವರದಿ: ಯೋಗೀಶ್ ಪುತ್ರನ್ ಬೊಂಬೈ