August 23, 2023

ಆ.27 : ಚಿಣ್ಣರ ಬಿಂಬ ಭಯಂಧರ್ ಶಿಬಿರ, ಸಾಂಸ್ಕೃತಿಕ ಪ್ರತಿಭಾ ಪಂತೊ

ಬೊಂಬೈ : ಚಿಣ್ಣರ ಬಿಂಬ ನೆತ್ತ ಮುತಾಲಿಕೆಡ್ ಭಯಂಧರ್  ಶಿಬಿರ ಬೊಕ್ಕ ಸಾಂಸ್ಕೃತಿಕ ಪ್ರತಿಭಾ ಸ್ಪರ್ಧೆ ಆ.27 ದಾನಿ ಸೈಂಟ್  ಆಗ್ನೇಸ್ ಹೈಸ್ಕೂಲ್ ಡ್ ನಡಪರೆ ಉಂಡು.

ಲೇಸ್‌ದ ಉದಿಪನನ್ ರೈ ಸುಮತಿ ಎಜುಕೇಶನ್ ಟ್ರಸ್ಟ್, ಸೈಂಟ್ ಆಗ್ನೇಸ್ ಇಂಗ್ಲಿಷ್ ಹೈಸ್ಕೂಲ್ ಬೊಕ್ಕ ಕೆ.ಎಸ್ ಮೆಹತ ಸ್ಕೂಲ್& ಜೂನಿಯರ್ ಕಾಲೇಜ್‌ದ ಚೇರ್‌ಮನ್ ಡಾ.ಅರುಣೋದಯ್ ಎಸ್. ರೈ ಬಿಳಿಯೂರುಗುತ್ತು ಮೇರ್ ನಡಪಾಯೆರೆ ಉಲ್ಲೆರ್. ಲೇಸ್‌ದ ಗುರ್ಕಾರ್ಮೆನ್ ಭಯಂಧರ್ ಎಕ್ಸ್ ಕಾರ್ಪೊರೇಟರ್ ಅರವಿಂದ್ ಎ ಶೆಟ್ಟಿ ವಹಿಸೊನಿಯೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಬೊಂಬೈ ಬಂಟ್ಸ್ ಸಂಘದ ಪನವುದ ಒತ್ತು ಪಾಲವೆರ್ ರಮೇಶ್ ಎಮ್ ಶೆಟ್ಟಿ ಸಿದ್ದಕಟ್ಟೆ, ಎಮ್.ಬಿ.ಆರ್ ಗ್ಲೋಬಲ್ ಸರ್ವೀಸ್, ಮೈಡ್ ಸ್ಪೇಸ್ ಮಲಾಡ್ ಫೌಂಡರ್ ವಿಜಯ್ ಬಾಲಕೃಷ್ಣ ರಾವ್, ಭಯಂದರ್ ಕರ್ನಾಟಕ ಮಹಾ ಮಂಡಲದ  ಫೌಂಡರ್ ಚಂದ್ರಶೇಖರ್ ವಿ ಶೆಟ್ಟಿ, ಅರುಣ್ ಕಾಮರ್ಸ್ ಕ್ಲಾಸಸ್  ಭಯಂದರ್ ಈಸ್ಟ್ ನೆತ್ತ ಸ್ಥಾಪಕೆರ್ ಅರುಣ್ ಟಿ ಪಕ್ಕಳ, ಮಾಟುಂಗ ಲಯನ್ಸ್ ಇಂಗ್ಲೀಷ್ ಸ್ಕೂಲ್‌ದ ರಿ. ಪ್ರಿನಿಪಾಲ್ ಸುಮತಿ ಎಸ್ ಶೆಟ್ಟಿ, ಅಯ್ಯಪ್ಪ ಭಕ್ತವೃಂದದ ಶಿರಡಿ ನಗರ ನೆತ್ತ ಗುರ್ಕಾರೆ ಸತೀಶ್ ಜೆ ಪೂಜಾರಿ ಪಾಲ್ ಪಡೆಯೆರೆ ಉಲ್ಲೆರ್.

ಮುಂಬೈ ನಗರದ ಮನೆ ಮಾತ್ ಆದ್ ಜೋಕ್ಲೆನ ಬದ್ಕ್ ಗ್ ದಾರಿದೀಪ ಆವೊಂದು ಇಪ್ಪುನ ಚಿಣ್ಣರಬಿಂಬದ ಶಿಬಿರ ಡ್ ಒಂಜಿ ಆಯಿನ ಭಯಂದರ್ ಶಿಬಿರದ ಚಿಣ್ಣೆರೆಗ್ ಪ್ರತಿಭಾನ್ವೇಷಣೆ ಲೇಸ್ ಆಯೋಜನೆ ಮಲ್ತ್ ದ್ ಈ ಲೇಸ್ ಗ್ ಎಚ್ಚಿನ ಸಂಖ್ಯೆಡ್ ತುಳು, ಕನ್ನಡಿಗೆ ಪಾಲ್ ಪಡೆದ್ ಚಿಣ್ಣರೆನ್ ಪ್ರೋತ್ಸಾಹ ಮಲ್ಪೆರೆ ಚಿಣ್ಣರ ಬಿಂಬದ ರೂವಾರಿ ಪ್ರಕಾಶ್ ಭಂಡಾರಿ ಬೊಕ್ಕ ಪದಾಧಿಕಾರಿಲು ಬಿನ್ನಾಪು ಮಲ್ತ್ ದೆರ್. .

ಬೊಕ್ಕ ಭಾಷಣ, ಭಾವಗೀತೆ, ಜನಪದ ಗೀತೆ, ಮೊನೋ ಆಕ್ಟ್, ದೇಶಭಕ್ತಿ ಗೀತೆ ಇಂಚನೆ ಕೆಲವು ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.

ಕಟ್ಟೊಂದಿತ್ತಿನ ರೈಲ್ವೇ ಸಂಕ ಬೂರ್ದು 17 ಜನ ತೀರ್ ಪೋಯೆರ್!

ಹೊಸದಿಲ್ಲಿ: ಬೇಲೆ ಆವೊಂದು ಇಪ್ಪುನ ರೈಲ್ವೇ ಸಂಕ ಬೂರ್ದು 17 ಜನ ತೀರ್ ಪೋಯಿನ ಘಟನೆ ಮಿಝೋರಾಂದ ಸಾಯಿರಾಂಗ್ ಪ್ರದೇಶಡ್ ಬುಧಾರ ನಡತ್ಂಡ್.

ಸಂಕ ಮಗ್ ರ್ನಗ ಸುಮಾರ್ 35 ರ್ದ್ 40 ಕಾರ್ಮಿಕೆರ್ ಇತ್ತೆರ್ ಪಂದ್ ಅಧಿಕಾರಿಲು ತೆರಿಪಾದೆರ್. ನೆಟ್ಟ್ ತಿಕ್ಕೊನಕ್ಲೆನ್ ಬಚಾವ್ ಮಲ್ಪುನ ಪ್ರಯತ್ನ ಮಲ್ತೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.

ಈ ಘಟನೆದ ಬಗೆಟ್ಟ್ ಸಂತಾಪ ತೆರಿಪಾಯಿನ ಪ್ರಧಾನಿ ನರೇಂದ್ರ ಮೋದಿ, ನೆಟ್ಟ್ ತೀರ್ ಪೋಯಿನಕ್ಲೆಗ್ ತಲಾ 2 ಲಕ್ಷ ರೂ. ಬೊಕ್ಕ ಪೆಟ್ಟಾಯಿನಕ್ಲೆನ್ ತಲಾ 50, ಸಾರ ರೂ. ಪರಿಹಾರನ್ ಘೋಷಣೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.

ಸುಬ್ರಹ್ಮಣ್ಯಡ್ ಧರ್ಮಾರ್ಥ ಫೂಟ್ ಪಲ್ಸ್ ತೆರಪಿ ಶಿಬಿರ ಉದಿಪನ

ಡಾ. ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ಸುಬ್ರಹ್ಮಣ್ಯ ಬೊಕ್ಕ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ನೆತ್ತ ಒಟ್ಟುಸೇರಿಗೆಡ್ ಇನಿ ಬೊಲ್ಪುಗು ಪಂಚಾಯತ್ ದ ಚಾವಡಿಡ್ ಧರ್ಮೊಗು ಫೂಟ್ ಪಲ್ಸ್ ತೆರಪಿ ಶಿಬಿರ ಉದಿಪನ ಆಂಡ್.

ಶಿಬಿರದ ಉದಿಪನ ಮಲ್ತಿನ ವಿಶ್ರಾಂತ ಪ್ರಾಧ್ಯಾಪಕೆರ್ ಡಾ.ಎಸ್ ಎನ್ ಉಡುಪ ಮೇರ್ ಪಾತೆರ್ದ್, ದುಂಬುದ ಕಾಲರ್ದಿಂಚಲ ವೈದ್ಯೆರೆನ್ ಡೋಂಗಿ ಮಲ್ಪುನ ಸ್ಥಿತಿ ಬತ್ತ್ ದ್ ಇತ್ಂಡ್. ಆಂಡ ನಮ ವೈದ್ಯೆರೆನ್ ಡೋಂಗಿ ಮಲ್ಪುನ ಸರಿ ಅತ್ತ್, ಶ್ರದ್ಧೆರ್ದ್ ವೈದ್ಯೆರ್ದ್ ದೆತೊನ್ನ ಮರ್ದ್, ಅವು ವಿಷ್ಣುಪಾದಗ್ ಅತ್ತಂಡ ಅಮೃತಗ್ ಸಮಾನ ಪಂದ್ ಪಂಡೆರ್. ಅತ್ತಂದೆ ಇನಿ ಬೇತೆ ಬೇತೆ ಪೊಸತ್ ದ ವೈದ್ಯ ಪದ್ಧತಿರ್ದ್ ಒವ್ವೇ ಸೀಕ್ ನ್ ಸುಲಭವಾದ್ ಗುಣ ಮಲ್ಪರೆ ಸಾಧ್ಯ ಉಂಡು ಪಂದ್ ಪಂಡೆರ್.

ಈ ಲೇಸ್ ದ ಗುರ್ಕಾರ್ಮೆನ್ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ.ರವಿ ಕಕ್ಕೆಪದವು ಒಯಿಸ್ ದಿತ್ತೆರ್. ಪುತ್ತೂರ್ ದ ನೆಮ್ಮದಿ ವೆಲ್ನೆಸ್ ಸೆಂಟರ್ ದ ಮಾಲಕೆರ್ ಪ್ರಭಾಕರ ಸಾಲ್ಯಾನ್ ಮೇರ್ ಧರ್ಮಾರ್ಥ ಫೂಟ್ ಪಲ್ಸ್ ತೆರಪಿದ ಬಗೆಟ್ಟ್ ಪೊಲಬು ಕೊರಿಯೆರ್.

ಚಾವಡಿಡ್ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ರಾಮಚಂದ್ರ ಪಲಂಗಾಯ, ರೋಟರಿ ಕ್ಲಬ್ ಅಧ್ಯಕ್ಷೆರ್ ರೋ. ಪ್ರಶಾಂತ್ ಕೋಡಿಬೈಲ್, ಕುಕ್ಕೆ ಶ್ರೀ ಆಟೋ ಚಾಲಕ ಮಾಲಕ ಸಂಘದ ಅಧ್ಯಕ್ಷೆರ್ ವಿವೇಕ ದೇವರಗದ್ದೆ, ಬಿಎಂಎಸ್ ಆಟೋ ಚಾಲಕ ಮಾಲಕ ಸಂಘದ ಅಧ್ಯಕ್ಷೆರ್ ದಿನೇಶ್, ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಮೋನಪ್ಪ ಇತ್ತೆರ್. ಸುಬ್ರಹ್ಮಣ್ಯ ಸೀನಿಯರ್ ಚೇಂಬರ್ ಲೀಜನ್ ಅಧ್ಯಕ್ಷೆರ್ ವಿಶ್ವನಾಥ ನಡುತೋಟ ಈ ಲೇಸ್ ನ್ ಸುಧಾರಿಕೆ ಮಲ್ತೆರ್. ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಮೋನಪ್ಪ ಎದ್ಕೊನಿಯೆರ್. ಗ್ರಾಮ ಪಂಚಾಯತ್ ಸದಸ್ಯೆ ಭಾರತಿ ದಿನೇಶ್ ಸೊಲ್ಮೆ ಸಂದಾಯೆರ್.

ಕೊಲ್ಲಂಡ್ ನಡತಿನ ರಾಜ್ಯಮಟ್ಟದ ಬಲ್ಲ್ ಒಯಿಪುನ ಪಂತೊಡು ಆಂಜನೇಯ ಕಣ್ವತೀರ್ಥ ಮಂಜೇಶ್ವರ ಕೂಟಗ್ ಸುರುತ್ತ ಇನಾಮು

ಸ್ಟಾರ್ ಆರ್ಟ್ಸ್ ಆ್ಯಂಡ್ ಸ್ಪೋರ್ಟ್ಸ್ ಮುತಾಲಿಕೆಡ್ ಕೊಲ್ಲಂ ಡ್ ನಡತಿನ ರಾಜ್ಯಮಟ್ಟದ ಬಲ್ಲ್ ಒಯಿಪುನ ಪಂತೊಡು ಆಂಜನೇಯ ಕಣ್ವತೀರ್ಥ ಮಂಜೇಶ್ವರ ಕೂಟ ಸುರುತ್ತ ಬೊಕ್ಕ ನಾಲ್ ನೇ ಇನಾಮುನ್ ಪಡೆತ್ಂಡ್.‌

ಅತ್ತಂದೆ ಮೊಕ್ಲೆನ ಒಂಜಿ ಕೂಟ 12 ಅಡಿ ಎತ್ತರದ ಶಾಶ್ವತ ಫಲಕ ಬೊಕ್ಕ 50 ಸಾರ ರೂ.ನ್ ಪಡೆತ್ಂಡ್.

ಭಾರತ್ ಬ್ಯಾಂಕ್ ದ ಗೋರೆಗಾಂವ್ (ಪ) ಶಾಖೆಡ್ ಸಂಸ್ಥಾಪನಾ ದಿನಾಚರಣೆ

ಬೊಂಬೈ: ದೇಶಡ್ ಪುಗರ್ತೆ ಪಡೆಯಿನ ಭಾರತ್ ಕೋ.ಆಪರೇಟಿವ್ ಬ್ಯಾಂಕ್ (ಬೊಂಬೈ) ಲಿಮಿಟೆಡ್ ನೆತ್ತ 45ನೇ ಸಂಸ್ಥಾಪನಾ ದಿನಾಚರಣೆನ್ ಗೋರೆಗಾಂವ್ (ಪ) ಶಾಖೆಡ್ ಆ.21 ಕ್ಕ್ ಸೋಮಾರ ಆಚರಣೆ ಮಲ್ತೆರ್.

ಶಾಖೆದ ಗ್ರಾಹಕೆರ್ ಮೆ. ಸ್ಮೃತಿ ಸರ್ವಿಸಸ್ ದ ಪಂಕಜ್ ಸಾವಂತ್, ಮಾರ್ಕೋ ವಾಯು ನಿಯಂತ್ರಣಾ ಸರ್ವಿಸಸ್ ದ ಪ್ರತಿಪಾಲ್ ಸಿಂಘ್, ಮೆ. ದಲ್ವಿ ಎಂಡ್ ಸನ್ಸ್ ದ ರಾಜೇಂದ್ರ ಗೋಪಾಲ್ ದಲ್ವಿ, ನಾಮ್ ದೇವ್ ಸನಪ್ ಬೊಕ್ಕ ಗ್ರಾಹಕೆರ್ ಪಾಲ್ ಪಡೆದಿತ್ತೆರ್. ಶಾಖೆದ ಪ್ರಬಂಧಕೆರ್ ಮಧುಕರ್ ಕೋಟ್ಯಾನ್, ಉಪಪ್ರಬಂಧಕೆರ್ ಶಕುಂತಲಾ ಜೆ. ಕುಲಾಯಿ ಮೊಕ್ಲೆನ ಸಮ್ಮುಖಡ್ ಕೇಕ್ ಕಟ್ ಮಲ್ಪುನ ಮುಖೇನ ಸಂಸ್ಥಾಪನಾ ದಿನಾಚರಣೆನ್ ಗೌಜಿಡ್ ಆಚರಣೆ ಮಲ್ತೆರ್.

ಈ ಪೊರ್ತುಡು ದಿವ್ಯಾ ಉದಯ್ ಅಂಚನ್, ವಿಜಯ್ ಕುಮಾರ್ ಸನಿಲ್, ಪ್ರಸನ್ನ ಬಂಗೇರ, ರವೀಂದ್ರ ಪೂಜಾರಿ, ರಿತೇಶ್ ಗುಜರನ್, ಅಂಕಿತಾ ಅಮೀನ್, ಪ್ರದೀಪ್ ನಾಯಕ್, ನಿದಿಶಾ ಕೋಟ್ಯಾನ್, ಐಶ್ವರ್ಯ ಪೂಜಾರಿ, ಹರ್ಷದ್ ಪಾಟೀಲ್ ಬೊಕ್ಕ ಸಿಬ್ಬಂದಿ ವರ್ಗದಕುಲು ಇತ್ತೆರ್.

ಭಾರತ್ ಬ್ಯಾಂಕ್ ದಹಿಸರ್ ಶಾಖೆಡ್ ಬ್ಯಾಂಕ್ ದ 45ನೇ ಸಂಸ್ಥಾಪನಾ ದಿನಾಚರಣೆ

ಭಾರತ್ ಬ್ಯಾಂಕ್ (ಬೊಂಬೈ) ಲಿಮಿಟೆಡ್ ದ ದಹಿಸರ್ ಶಾಖೆಡ್ ಬ್ಯಾಂಕ್ ದ 45ನೇ ಸಂಸ್ಥಾಪನಾ ದಿನಾಚರಣೆನ್ ಸೋಮಾರ ಕೇಕ್ ತುಂಡು ಮಲ್ಪುನ ಮುಖೇನ ಆಚರಣೆ ಮಲ್ತೆರ್.

ಈ ಪೊರ್ತುಡು ಪಾಲ್ ಪಡೆಯಿನ ಗ್ರಾಹಕೆರ್ ವಿಜಯ ಶಿಂದೆ, ದೇಶಪಾಂಡೆ, ರಂಗಪ್ಪ ಸಿ ಗೌಡ, ಜಯ ಪೂಜಾರಿ, ದಿನೇಶ್ ಪೂಜಾರಿ, ಶಂಕರ್ ಪೂಜಾರಿ, ನಿವೃತ್ತ ಉದ್ಯೋಗಿ ಕರುಣಾಕರ್ ಪೂಜಾರಿ, ಕೃಷ್ಣ ಪೂಜಾರಿ ಬೊಕ್ಕ BDD Agent ಬೊಕ್ಕ ಬ್ಯಾಂಕ್ ದ ಸಿಬ್ಬಂದಿಲು ಪಾಲ್ ಪಡೆದಿತ್ತೆರ್. ಸಹಾಯಕ ಪ್ರಬಂಧಕಿ ಶಾಲಿನಿ ಅಮೀನ್ ಬತ್ತಿನ ಗ್ರಾಹಕೆರೆನ್ ಎದ್ಕೊಂದು ಸೊಲ್ಮೆ ಸಂದಾಯೆರ್.

ವರದಿ: ಯೋಗೀಶ್ ಪುತ್ರನ್

ರೇಡಿಯೊ ಮಣಿಪಾಲಡ್ ‘ಚಿಣ್ಣರ ದನಿ’ ಲೇಸ್

ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಒಟ್ಟುಸೇರಿಗೆಡ್ ‘ಚಿಣ್ಣರ ದನಿ’ ಲೇಸ್ ಆ.23 ಬುಧಾರ 5.30 ಕ್ಕ್ ಪ್ರಸಾರ ಆಪುಂಡು.

ಇನಿ ಪ್ರಸಾರ ಆಪುನ ಈ ಲೇಸ್ ದ 22ನೇ ಸಂಚಿಕೆಡ್ ಬಾಲ ಪ್ರತಿಭೆ ಶ್ರೇಯಾ ಎಂ.ಜಿ ಪಾಲ್ ಪಡೆಯೆರೆ ಉಲ್ಲೆರ್.‌ ಆ.24 ಗುರುವಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal
ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ಮುಖೇನ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ರೇಡಿಯೋ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಸೋಣದ ಇಸೇಸತೆದ ಬಗೆಟ್ಟ್ ಉಪನ್ಯಾಸ

ಮಣಿಪಾಲ: ರೇಡಿಯೋ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಸೋಣದ ಇಸೇಸತೆದ ಬಗೆಟ್ಟ್ ಉಪನ್ಯಾಸ ಆ.23 ಬುಧಾರ ಬಯ್ಯಗ್ 6 ಗಂಟೆಗ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಚಿಂತಕೆರ್ ನಟರಾಜ್ ಪರ್ಕಳ ಉಪನ್ಯಾಸ ಕೊರಿಯೆರೆ ಉಲ್ಲೆರ್. ಆ.24 ಗುರುವಾರ ಮಧ್ಯಾಹ್ನ 2 ಗಂಟೆಗ್ ಕುಡೊರ ಆಪುಂಡು. ಉಂದು ರೇಡಿಯೊಡ್ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal
ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ಮುಖೇನ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕುಕ್ಕೆ ಸುಬ್ರಹ್ಮಣ್ಯಡ್ ನಾಗರಪಂಚೆಮಿ

ತುಳುನಾಡ್ ದ ಪುಗರ್ತೆದ ನಾಗಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯಡ್ ನಾಗರಪಂಚೆಮಿದಾನಿ ನಾಗಗ್ ಇಸೇಸ ಪೂಜೆ ನಡತ್ಂಡ್.

ನೆತ್ತೊಟ್ಟಿಗೆ ನಾಗದೇವೆರೆನ ಮೂರ್ತಿಗ್ ಪೇರ್, ಬೊಂಡದಾಭಿಷೇಕ ನಡತ್ಂಡ್. ಈ ಲೇಸ್ ಗ್ ಸಾರರ್ದ್ ಎಚ್ವ ಸಂಖ್ಯೆದ ಭಕ್ತೆರ್ ಪಾಲ್ ಪಡೆದಿತ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ವಸಾಯಿ ಕರ್ನಾಟಕ ಸಂಘ (ರಿ.) ಮುತಾಲಿಕೆಡ್ ಸ್ವಾತಂತ್ರೋತ್ಸವ, ಪ್ರತಿಭಾ ಪುರಸ್ಕಾರ

ಬೊಂಬೈ: ವಸಾಯಿ ಕರ್ನಾಟಕ ಸಂಘ (ರಿ.) ಮುತಾಲಿಕೆಡ್ ಸ್ವಾತಂತ್ರೋತ್ಸವ ಬೊಕ್ಕ ಪ್ರತಿಭಾ ಪುರಸ್ಕಾರ ಲೇಸ್ ಸಂಘದ ಅಧ್ಯಕ್ಷೆರ್ ದೇವೇಂದ್ರ ಬುನ್ನನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.

ಈ ಲೇಸ್ ಡ್ ಎಸ್ ಎಸ್ ಸಿ, ಎಚ್ ಎಸ್ ಸಿ, ಡಿಗ್ರಿಡ್ ಎಚ್ಚ ಮಾರ್ಕ್ಸ್ ಪಡೆದ್, ಪಾಸಾಯಿನ ಜೋಕುಲೆನ್ ಗುರುತಿಸಾದ್ ಪ್ರತಿಭಾ ಪುರಸ್ಕಾರನ್ ಕೊರ್ದು ಗೌರವಿಸಾಯೆರ್. ಬೊಕ್ಕ ಆರ್ಥಿಕ ಪರಿಸ್ಥಿತಿಡ್ ಬಡಪತ್ತ್ ಡ್ ಇಪ್ಪುನ ಜನಕ್ಲೆನ್ ಗುರುತಿಸಾದ್ ಅಕ್ಲೆಗ್ ಪನವುದ ಸಕಾಯ ಮಲ್ತೆರ್.

ಚಾವಡಿಡ್  ಉಪಾಧ್ಯಕ್ಷೆರ್ ಕರ್ನೂರು ಶಂಕರ್ ಆಳ್ವ, ಅಧ್ಯಕ್ಷೆರ್ ದೇವೇಂದ್ರ ಬುನ್ನನ್, ಗೌರವಾಧ್ಯಕ್ಷೆರ್ ವಿಶ್ವನಾಥ್ ಪಿ ಶೆಟ್ಟಿ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಪ್ರಮೀಳಾ ಎನ್ ಅಮೀನ್, ಯುವ ವಿಭಾಗದ ಅಧ್ಯಕ್ಷೆರ್ ರಿತೇಶ್ ಶೆಟ್ಟಿ, ಗೌರವ ಖಜಾಂಚಿ ವಿಜಯ ಎಂ ಶೆಟ್ಟಿ, ವಸಾಯಿ ಕರ್ನಾಟಕ ಸಂಘ ಕೋ ಕ್ರೆಡಿಟ್ ಸೊಸೈಟಿದ ಅಧ್ಯಕ್ಷೆರ್ ಭಾಸ್ಕರ್ ಶೆಟ್ಟಿ, ಗೌರವ ಪ್ರಧಾನ ಕಾರ್ಯದರ್ಶಿ ರವೀಂದ್ರ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಸಲಹಾ ಸಮಿತಿ ಅಧ್ಯಕ್ಷೆರ್ ಪಾಂಡು ಎಲ್ ಶೆಟ್ಟಿ, ಒಪಿ ಪೂಜಾರಿ, ಜತೆ ಕಾರ್ಯದರ್ಶಿ ಸಿಎ ವಿಜಯ್ ಕುಂದರ್, ಕ್ರೀಡಾ ಸಮಿತಿದ ಅಧ್ಯಕ್ಷೆರ್ ಮಂಜುನಾಥ ಎಸ್ ಶೆಟ್ಟಿ, ಕಾರ್ಯಕ್ರಮ ಸಮಿತಿದ ಅಧ್ಯಕ್ಷೆರ್ ಯಶೋಧರ್ ಕೋಟ್ಯಾನ್, ವಸಾಯಿ ತಾಲೂಕ್ ಮೊಗವೀರ ಸಂಘದ ಅಧ್ಯಕ್ಷೆರ್ ಮೋಹನ್ ಜೆ.ಪುತ್ರನ್, ಬಿಲ್ಲವರ ಅಸೋಸಿಯೇಷನ್ ಬೊಂಬೈದ ವಸಾಯಿ ಸ್ಥಳೀಯ ಕಚೇರಿದ ಅಧ್ಯಕ್ಷೆರ್ ಕರುಣಾಕರ್ ಜಿ ಅಮೀನ್,  ಮಹಿಳಾ ವಿಭಾಗ, ಯುವ ವಿಭಾಗದಕುಲು ಪಾಲ್ ಪಡೆದಿತ್ತೆರ್. ಈ ಲೇಸ್ ನ್ ಪ್ರಚಾರ ಸಮಿತಿದ ಅಧ್ಯಕ್ಷೆರ್ ಸುಕೇಶ್ ಸುಧಾರಿಕೆ ಮಲ್ತೆರ್. ಕಾರ್ಯದರ್ಶಿ ರವೀಂದ್ರ ಕೆ ಶೆಟ್ಟಿ ಸೊಲ್ಮೆ ಸಂದಾಯೆರ್.

ವರದಿ : ಯೋಗೀಶ್ ಪುತ್ರನ್ ಬೊಂಬಾಯಿ