ಆದಿಸುಬ್ರಹ್ಮಣ್ಯ ಕಲ್ಯಾಣ ಮಂಟಪಡ್ ವರಮಹಾಲಕ್ಷ್ಮೀ ವೃತಾಚರಣೆ

ಕುಕ್ಕೆ ಸುಬ್ರಹ್ಮಣ್ಯ ಶ್ರೀ ವರಮಹಾಲಕ್ಷ್ಮೀ ಪೂಜಾ ಸಮಿತಿದ ಮುತಾಲಿಕೆಡ್ ಆದಿಸುಬ್ರಹ್ಮಣ್ಯ ಕಲ್ಯಾಣ ಮಂಟಪಡ್ ವರಮಹಾಲಕ್ಷ್ಮೀ ಪೂಜೆ ನಡತ್ಂಡ್.

ಪುರೋಹಿತೆರ್ ದಿನೇಶ್ ಬನ್ನಿಂತಾಯ ಮೆರೆನ ಸಮ್ಮುಖಡ್ ಪೂಜೆದ ಬೇತೆ ಬೇತೆ ವೈದಿಕ ವಿದಿವಿಧಾನಲು ನಡತ್ಂಡ್. ಸುರುಕ್ಕು ಪೊಂಜೋವ್ ನಕುಲು ಕಲಶದೊಟ್ಟಿಗೆ ಆದಿ ಸುಬ್ರಹ್ಮಣ್ಯ ದೇವಲ್ಯದ ಕೈತಲ್ ಪರಪುನ ದರ್ಪಣ ತೀರ್ಥ ತುದೆಕ್ಕ್ ಪೋಯೆರ್. ಅಲ್ಪ ತುದೆಕ್ಕ್ ಪೂಜೆ ಮಲ್ತ್ ದ್ ಬೊಕ್ಕ ಯಮುನೆದ ನೀರ್ ನ್ ಕಲಶಡ್ ಪತೊಂದು ಚಾವಡಿಗ್ ಬತ್ತೆರ್. ಬೊಕ್ಕ ಶ್ರೀ ದೇವಿನ ಪ್ರತಿಷ್ಠೆ ಆದ್ ಪೂಜೆದ ವಿದಿ-ವಿಧಾನಲು ನಡತ್ಂಡ್.

ಮಹಾಪೂಜೆದ ಬೊಕ್ಕ ಮಾತೆರೆಗ್ಲಾ ಪ್ರಸಾದ ಪಟ್ಟಿಯೆರ್. ಪ್ರಸಾದದೊಟ್ಟಿಗೆ ಕುಂಕುಮ, ಕಾಜಿ, ರವಿಕೆ ಫೀಸ್ ನ್ ಪೊಂಜೋವ್ ನಕ್ಲೆಗ್ ಕೊರಿಯೆರ್. ಅತ್ತಂದೆ ಪೂಜೆದ ಲೆಕ್ಕೊಡು ಪೂರ್ದ್ ರಂಗೋಲಿನ್ ಬುಡ್ಪಾದೆರ್. ವೃತಾಚರಣೆದ ಲೆಕ್ಕೊಡು ಲಲಿತಾ ಸಹಸ್ರನಾಮನ್ ಪಠಣ ಮಲ್ತೆರ್.

ಈ ಪೊರ್ತುಡು ಸಮಿತಿದ ಗುರ್ಕಾರ್ದಿ ಗಂಗಾದೇವಿ, ಕಾರ್ಯದರ್ಶಿ ಸುಭಾಷಿಣಿ ಶಿವರಾಂ, ಕೋಶಾಧಿಕಾರಿ ಆಶಾ.ವಿ.ಶೆಣೈ, ಪದಾಧಿಕಾರಿ ಶಾರದಾ ಭಟ್, ಹರಿಣಾಕ್ಷಿ, ಶೋಭಾ ಗಿರಿಧರ್, ಜಯಲಕ್ಷ್ಮಿ ಪಿ.ಎಸ್, ವನಜಾ.ವಿ.ಭಟ್, ಶ್ರೀದೇವಿ, ತ್ರಿವೇಣಿ ದಾಮ್ಲೆ, ಲತಾ ಸವೇಶ್ವರ ಭಟ್ ಸೇರಿನಂಚೆನೆ ಭಕ್ತೆರ್ ಪಾಲ್ ಪಡೆದಿತ್ತೆರ್.

ವರದಿ: ಗೋಪಿಚಂದನ್ ಕೆ.ಎಸ್