“ಬಿಲ್ಲವರ ಗುತ್ತು ಬರ್ಕೆ ಮನೆಗಳು’ ಬೂಕು ಬುಡುಗಡೆ
ಕುಡ್ಲ : ಹಿರಿಯ ಸಂಶೋಧಕೆರ್ ಬಾಬು ಶಿವ ಪೂಜಾರಿ ಮೇರ್ ಬೊಕ್ಕ ಕೂಟದಕುಲು ತುಳುನಾಡ್ ಡ್ ಅಧ್ಯಯನ ಮಲ್ತ್ ದ್ ತಯಾರ್ ಮಲ್ದಿನ ‘ಬಿಲ್ಲವರ ಗುತ್ತು ಬರ್ಕೆಗಳು’ ಪನ್ಪಿನ ಬೂಕುನು ಕೇಂದ್ರದ ಮಾಜಿ ಸಚಿವೆರ್, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಅಭಿವೃದ್ಧಿ ದ ನಾಯಕೆರ್ ಬಿ.ಜನಾರ್ದನ ಪೂಜಾರಿ ಮೇರ್ ಐತಾರ ಕುದ್ರೋಳಿ ಕ್ಷೇತ್ರದ ಕೊರಗಪ್ಪ ಸಭಾಂಗಣಡ್ ಬುಡುಗಡೆ ಮಲ್ತೆರ್.
ಬಾಬು ಶಿವ ಪೂಜಾರಿ ಮೆರೆನ ಮುತಾಲಿಕೆದ ಕೂಟ 2009 ಟ್ಟ್ ಸಂಶೋಧನೆ ಸುರು ಮಲ್ತಿನ ಈ ಬೂಕುಡು ತುಳುನಾಡ್ ದ ಸಾಂಸ್ಕೃತಿಕ ಚರಿತ್ರೆಡ್ ಪೂಜಾರಿ, ಬೈದ್ಯ, ಬಿಲ್ಲವ, ಬೋಂಟ್ರ, ಬಿರುವ, ಹಳೆಪೈಕ ಪಂದ್ ಲೆಪ್ಪುನ ಪುದರ್ ದ ಈಡಿಗ ಸಮಾಜಡ್ ಒಂಜಾಯಿನ ಬಿಲ್ಲವ ಸಮುದಾಯದ ಗುತ್ತು ಬರ್ಕೆದ ಇತಿಹಾಸದ ಒಂಜಿ ಭಾಗ ಈ ಬೂಕುಡು ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಅಧ್ಯಯನ ಕೂಟದ ಪ್ರಮುಖೆರ್, ಹಿರಿಯ ಸಾಹಿತಿ ಬಿ.ಎಂ. ರೋಹಿಣಿ ಒಯಿಸ್ ದಿತ್ತೆರ್.
ಈ ಲೇಸ್ ಡ್ ಆರ್ಯ ಈಡಿಗ ಮಹಾ ಸಂಸ್ಥಾನ, ಸೋಲೂರು ನೆತ್ತ ಪೀಠಾಧಿಪತಿ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ ಪಾಲ್ ಪಡೆದ್ ಆಶೀರ್ವಚನ ಮಲ್ತೆರ್.
ಈ ಪೊರ್ತುಡು ಅಧ್ಯಯನ ದ ಮಾರ್ಗದರ್ಶಕೆರ್ ದಿ.ತಮ್ಮಯೆರ್ನ ನೆಂಪುಗಾದ್ ಅರೆನ ಬೊಡೆದಿ ಇಂದುಮತಿ ಮೆರೆಗ್ ಮಾನಾದಿಗೆ ಮಲ್ತೆರ್. ಅಂಚೆನೆ ಬೂಕುನು ಬೊಲ್ಪುಗು ಕನತಿನ ಬಾಬು ಶಿವ ಪೂಜಾರಿ ಬೊಕ್ಕ ಪ್ರೇಮಾ ದಂಪತಿಲೆಗ್ ತಮ್ಮನ ನಡತ್ಂಡ್.
ಲೇಸ್ ಗ್ ಮಲ್ಲ ಬಿನ್ನೆರಾದ್ ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ.ಹರಿಪ್ರಸಾದ್, ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ, ಮುಲ್ಕಿ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್, ಕುದ್ರೋಳಿ ಕ್ಷೇತ್ರಾಡಳಿತ ಮಂಡಳಿದ ಊರ್ಮಿಳಾ ರಮೇಶ್, ಕುಡ್ಲ ವಿವಿ ಬ್ರಹ್ಮಶ್ರೀ ನಾರಾಯಣ ಗುರು ಅಧ್ಯಯನ ಪೀಠದ ಡಾ. ಗಣೇಶ್ ಅಮೀನ್ ಸಂಕಮಾರ್, ಶ್ರೀ ಗೆಜ್ಜೆಗಿರಿ ಕ್ಷೇತ್ರದ ಪೀತಾಂಬರ ಹೆರಾಜೆ, ಕಟಪಾಡಿ ಶ್ರೀ ಕ್ಷೇತ್ರದ ಬಿ.ಎನ್. ಶಂಕರ ಪೂಜಾರಿ, ಅಖಿಲ ಭಾರತ ಬಿಲ್ಲವ ಯೂನಿಯನ್ ದ ನವೀನ್ಚಂದ್ರ ಸುವರ್ಣ, ಬೆಂಗಳೂರು ಬಿಲ್ಲವ ಸಂಘದ ವೇದಕುಮಾರ್, ಬೊಂಬಯಿ ಬಿಲ್ಲವ ಸಂಘದ ಹರೀಶ್ ಪೂಜಾರಿ, ಬಿಲ್ಲವ ಚೇಂಬರ್ ಆಫ್ ಕಾಮರ್ಸ್ ದ ಎನ್.ಟಿ. ಪೂಜಾರಿ, ಬೆಳಗಾಂವ್ ಬಿಲ್ಲವ ಸಂಘದ ಸುನೀಲ್ ಪೂಜಾರಿ, ಹಿರಿಯ ಪತ್ರಕರ್ತೆರ್ ದಿನೇಶ್ ಅಮೀನ್ ಮಟ್ಟು, ಗುತ್ತು ಗಡಿ ಪ್ರದಾನೆರ್ ಗೋಪಾಲ ಬಂಗೇರ ಯಾನೆ ದಂಡು ದೇವು ಬೈದ್ಯೆರ್, ಕುದ್ರೋಳಿ ಕ್ಷೇತ್ರದ ಅಧ್ಯಕ್ಷೆರ್ ಎಚ್.ಎಸ್.ಸಾಯಿರಾಂ, ಗುರು ಬೆಳದಿಂಗಳು ಅಧ್ಯಕ್ಷೆರ್ ಪದ್ಮರಾಜ್ ಆರ್., ಶ್ರೀ ನಾರಾಯಣ ಗುರು ವೇದಿಕೆದ ಪ್ರೊ. ಎಂ. ಶಶಿಧರ ಕೋಟ್ಯಾನ್, ಆತ್ಮಶಕ್ತಿದ ಚಿತ್ತರಂಜನ್ ಬೋಳಾರ ಮಿತ್ತರ್ಮೆಡ್ ಇತ್ತೆರ್.
ಅಧ್ಯಯನ ಕೂಟದ ಮುದ್ದು ಮೂಡುಬೆಳ್ಳೆ, ರಮಾನಾಥ್ ಕೋಟೆಕಾರ್, ವೆಂಕಪ್ಪ ಮಾಸ್ಟರ್ ಬೆಳ್ತಂಗಡಿ ಸಂಕೇತ್ ಪೂಜಾರಿ, ಯೋಗೇಶ್ ಕುಮಾರ್, ಮೊಕುಲು ಮಾತ ಇತ್ತೆರ್. ರತ್ನಾವತಿ ಬೈಕಾಡಿ ಬೊಕ್ಕ ಜಯಲಕ್ಷ್ಮಿ ದೇವೆರೆನ್ ಸುಗಿತೆರ್. ನರೇಶ್ ಕುಮಾರ್ ಸಸಿಹಿತ್ಲು ನಿರೂಪಣೆ ಮಲ್ತೆರ್. ಶೈಲು ಬಿರ್ವ ಅಗತ್ತಾಡಿ ಸೊಲ್ಮೆ ಸಂದಾಯೆರ್.
ಸೈನಿಕ ಶಾಲೆ ಆವೊಡು : ದಿನೇಶ್ ಅಮೀನ್ ಮಟ್ಟು
ಬಿಲ್ಲವೆರ್ ಮೂಲತಃ ಯೋಧೆರ್. ಬಿರು ಪಗರಿ ಪತ್ ದ್ ತುಳುನಾಡ್ ನ್ ರಕ್ಷಣೆ ಮಲ್ದಿನಕುಲು. ಆಂಡ ಮಿತ್ತ ಜಾತಿದಕುಲು ನಮಕ್ಕ್ ಮೂರ್ತೆದಾರಿಕೆ ಕುಲಕಸುಬು ಪಂದ್ ತೋಜಾದ್ ನಮನ್ ಮೂಲೆಡ್ ಕುಲ್ಲಾದೆರ್. ಯುದ್ಧ ಕಾಲೊಡು ಬಿಲ್ಲವೆರ್ ದಂಡ್ ಡ್ ಎದುರು ಉಂತುದು ಏತೋ ಜನ ಪ್ರಾಣ ಕಳೆವೊಂದೆರ್. ಅಯಿಕ್ಕಾದ್ ಬಿಲ್ಲವೆರ್ ಯೋಧೆರ್ ಪನ್ಪಿನೆನ್ ಸಾಬೀತು ಮಲ್ಪರೆ ಕೋಟಿ ಚೆನ್ನಯೆರ್ ನ ಪುದರ್ ಡ್ ಸೈನಿಕ ತರಬೇತಿ ಶಾಲೆ ಆವೊಡು ಪಂದ್ ಹಿರಿಯ ಪತ್ರಕರ್ತೆರ್ ದಿನೇಶ್ ಅಮೀನ್ ಮಟ್ಟು ಪಂಡೆರ್.
ಗುತ್ತುದ ಇಲ್ಲ್ ಸ್ವಂತ ಅತ್ತ್, ಬರ್ಕೆದ ಇಲ್ಲ್ ಸ್ವಂತ : ಬಾಬು ಶಿವ ಪೂಜಾರಿ
ತುಳುನಾಡ್ ಡ್ ಇಪ್ಪುನ ಅವ್ವೇತೋ ಗುತ್ತುದ ಇಲ್ಲ್ ಲು ಅವು ಅಕ್ಲೆನ ಸ್ವಂತ ಅತ್ತ್, ಅವು ಬ್ರಿಟಿಷೆರೆರ್ದ್ ಅತ್ತ್ ಡ ಜೈನ ಮನೆತನರ್ದ್ ಉಂಬೊಲಿಯಾದ್ ಬೈದಿನವು. ಆಂಡ ಬಿರುವೆರ್ನ ಬರ್ಕೆದ ಇಲ್ಲ್ ಲು ಸ್ವಂತದ ಮನೆತನ ಪಂದ್ ಸಂಶೋಧಕೆರ್ ಬಾಬು ಶಿವ ಪೂಜಾರಿ ಪಂಡೆರ್. ಈ ಮುಕೇನ ಬಿಲ್ಲವೆರ್ ಬೆನ್ನಿ ಸಾಗೊಳಿ ಮಲ್ತೊಂದಿತ್ತಿನಕುಲು ಪಂದ್ ಸ್ಪಷ್ಟ ಆಪುಂಡು ಪಂಡೆರ್.
ಬೂಕು ಬುಡುಗಡೆಗ್ ಸಕಾಯ ಮಲ್ಪುವೆ: ಬಿ.ಕೆ.ಹರಿಪ್ರಸಾದ್
ಬಿಲ್ಲವ ಸಮುದಾಯಗ್ ಸಂಬಂಧಪಟ್ಟಿನ ಒವ್ವೇ ಪುಸ್ತಕ ಬುಡುಗಡೆಗ್ ಪನವುದ ಅಡ್ಡಿ ಆವರೆ ಬಲ್ಲಿ. ಇಂಚಿನ ಪುಸ್ತಕೊಲೆನ್ ಸರಕಾರದ ಮುಕೇನ ಬೊಲ್ಪುಗು ಕನಪಿನ ಪ್ರಯತ್ನ ಮಲ್ಪುವೆ ಪಂದ್ ರಾಜ್ಯ ಸಭಾ ಸದಸ್ಯೆರ್ ಬಿ.ಕೆ.ಹರಿಪ್ರಸಾದ್ ಪಂಡೆರ್.
