ಉಜಿರೆ: ಸತ್ಯ, ಧರ್ಮ, ನ್ಯಾಯ ಬೊಕ್ಕ ನೀತಿದ ನಿಲೆಟ್ ಬೇಧ ಭಾವ ದಾಂತೆ ಮಾತೆರ್ಲ ಒಂಜೇ ಮನಸ್ ಡ್ ಮೆಗ್ಯೆ ಪಲಯಲೆಕ್ಕ ಸಹಬಾಳ್ವೆದ ನಿಲೆಟ್ ಧರ್ಮಸ್ಥಳದ ಮಾತ ಸೇವಾ ಕಾರ್ಯ ನಡತೊಂದುಂಡು. ಅನ್ನದಾನ, ವಿದ್ಯಾದಾನ, ಔಷಧಿದಾನ ಬೊಕ್ಕ ಅಭಯದಾನ ಬೊಕ್ಕ ಮಾತ ಸೇವಾ ಕಾರ್ಯಲೆನ್ ಮಲ್ಪುನಗ ಜಾತಿ-ಮತ-ಬೇಧ ಇಜ್ಜಂದೆ ಮಾತ ಭಕ್ತರೆನ್ ಸಮಾನವಾದ್ ಗೌರವ ಕೊರೊಂದುಲ್ಲ ಪಂದ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ ಪಂಡೆರ್.
ಆರ್ ಲಕ್ಷ ದೀಪ ಉಚ್ಚಯದ ಸುರುತ ದಿನವಾಯಿನ ಶನಿಯಾರ ಉಜಿರೆರ್ದ್ ಧರ್ಮಸ್ಥಳಗ್ 25 ಸಾರರ್ದ್ ಹೆಚ್ಚ ಭಕ್ತೆರ್ ಬೊಕ್ಕ ಸಾರ್ವಜನಿಕೆರ್ ಶಿವ ಪಂಚಾಕ್ಷರಿ ಪಠಣ ಬೊಕ್ಕ ಭಜನೆ ಮಲ್ತೊಂದು ಪಾದಯಾತ್ರೆಡ್ ಬತ್ತಿನ ನಿಲೆಟ್ಟ್ ಅಮೃತವರ್ಷಿಣಿ ಸಭಾಭವನಡ್ ಅಟ್ಟಣೆ ಮಲ್ದಿನ ಅಭಿನಂದನ ಲೇಸ್ ಡ್ ಪಾತೆರಿಯೆರ್.
ಈ ಪೊರ್ತುಡು ಊರುದ ನಾಗರಿಕೆರ್ ಬೊಕ್ಕ ಪಾದಯಾತ್ರಿಲೆನ ಪರವಾದ್ ವೀರೇಂದ್ರ ಹೆಗ್ಗಡೆ ದಂಪತಿಲೆನ್ ಮಾನಾದಿಗೆ ಮಲ್ತೆರ್. ಪ್ರಧಾನಮಂತ್ರಿಲೇ ಎನನ್ ರಾಜ್ಯಸಭೆ ಸದಸ್ಯೆರಾದ್ ನಾಮನಿರ್ದೇಶನ ಮಲ್ಪುನಗ ರಾಷ್ಟ್ರಮಟ್ಟಡ್ ಸೇವೆ ಮಲ್ಪರೆ ಎಂಕ್ ತಿಕ್ಕಿನ ಅವಕಾಶ ಪಂದ್ ದೆತ್ತೊಂಡೆ. ಉಂದು ಎಂಕ್ ಬೊಕ್ಕ ಧರ್ಮಸ್ಥಳ ಕ್ಷೇತ್ರಗ್ ತಿಕ್ಕಿನ ಮಾನಾದಿಗೆ ಪಂದ್ ಪಂಡೆರ್. ಶ್ರೀ ಮಂಜುನಾಥ ಸ್ವಾಮಿ ಬೊಕ್ಕ ಧರ್ಮದೇವತೆಲೆನ ಅನುಗ್ರಹ, ಕುಟುಂಬದ ಮಾತಾ ಸದಸ್ಯೆರೆನ ಸಕ್ರಿಯ ಸಹಕಾರ, ಜನತ ಪ್ರೀತಿ-ವಿಶ್ವಾಸ, ಶ್ರದ್ಧೆ ಬೊಕ್ಕ ಭಕ್ತಿರ್ದ್ ಯಾನ್ ಮಾತಾ ಕಜ್ಜೊಲೆನ್ ಯಶಸ್ವಿಯಾದ್ ಮಲ್ಪರೆ ಸಾಧ್ಯ ಆಂಡ್. ಬೇಧ-ಭಾವ ಮರತ್ ದ್ ಮಾತೆರ್ಲ ಪ್ರೀತಿ-ವಿಶ್ವಾಸರ್ದ್, ಸಮಾನತೆ ಬೊಕ್ಕ ಸಾಮರಸ್ಯದ ಜೀವನ ನಡಪಾಲೆ ಪಂದ್ ಆರ್ ಸಲಹೆ ಕೊರಿಯೆರ್.
ವಿಧಾನಪರಿಷತ್ ಸದಸ್ಯೆರ್ ಕೆ. ಹರೀಶ್ಕುಮಾರ್ ಪಾತೆರ್ದ್, ಶ್ರದ್ಧೆ-ಭಕ್ತಿರ್ದ್ ಮಲ್ತಿನ ಪಾದಯಾತ್ರೆಡ್ ಬಚ್ಚುನ ಆವಡ್ ಪೊರ್ತು ಪೋಯಿನ ಗೊತ್ತೇ ಆಯಿಜಿ. ಮಾತೆರೆಡ್ಲಾ ಉತ್ಸಾಹ, ಸಂತೋಷ ಬೊಕ್ಕ ನೆಮ್ಮದಿ ಇತ್ತ್ಂಡ್ ಪಂದ್ ಪಂಡೆರ್. ವಿಧಾನಪರಿಷತ್ ಸದಸ್ಯೆರ್ ಕೆ. ಪ್ರತಾಪಸಿಂಹ ನಾಯಕ್ ಪಾತೆರ್ದ್, ಕಲಿಯುಗಡ್ ಸಾತ್ವಿಕ ಶಕ್ತಿದ ಸಂಘಟನೆನೇ ಬಲ ಆತ್ಂಡ್. ಧರ್ಮಸ್ಥಳದ ಬಗೆಟ್ ಇಪ್ಪುನ ಗೌರವ ಬೊಕ್ಕ ಭಕ್ತಿರ್ದ್ ಪ್ರತಿವರ್ಷ ಪಾದಯಾತ್ರೆ ಸುಗಮ ಆವೊಂದುಂಡು ಪಂದ್ ಪಂಡೆರ್. ಹೇಮಾವತಿ ಹೆಗ್ಗಡೆ, ಉಜಿರೆದ ಶರತ್ಕೃಷ್ಣ ಪಡ್ವೆಟ್ನಾಯ, ಡಿ. ಸುರೇಂದ್ರಕುಮಾರ್, ಡಿ. ಹರ್ಷೇಂದ್ರಕುಮಾರ್, ಸುಪ್ರಿಯಾ ಹರ್ಷೇಂದ್ರಕುಮಾರ್, ಕು. ಮಾನ್ಯ, ಸೋನಿಯಾ ವರ್ಮ ಬೊಕ್ಕ ಪೂರಣ್ ವರ್ಮ ಇತ್ತೆರ್.ಶಾಸಕೆರ್ ಹರೀಶ್ ಪೂಂಜ ಪ್ರಾಸ್ತಾವಿಕ ಪಾತೆರ್ದ್ ಎದ್ಕೊನಿಯೆರ್. ಗ್ರಾಮಾಭಿವೃದ್ಧಿ ಯೋಜನೆ ದ ಸಿ.ಒ.ಒ. ಅನಿಲ್ ಕುಮಾರ್ ಸೊಲ್ಮೆ ಸಂದಾಯೆರ್. ಶ್ರೀನಿವಾಸ್ರಾವ್ ಧರ್ಮಸ್ಥಳ ಲೇಸ್ ದ ನಿರ್ವಹಣೆ ಮಲ್ತೆರ್. ಉಜಿರೆಡ್ ಶ್ರೀ ಜನಾರ್ದನ ಸ್ವಾಮಿ ದೇವಲ್ಯಡ್ ಶರತ್ಕೃಷ್ಣ ಪಡ್ವೆಟ್ನಾಯ ಬೊಕ್ಕ ಶಾಸಕೆರ್ ಹರೀಶ್ ಪೂಂಜ ಪಾದಯಾತ್ರೆ ಉದಿಪನ ಮಲ್ತೆರ್. ಧರ್ಮಸ್ಥಳ ಡ್ ಡಿ. ಹರ್ಷೇಂದ್ರಕುಮಾರ್ ಪಾದಯಾತ್ರಿಲೆನ್ ಎದ್ಕೊನಿಯೆರ್.
pallavi shetty