ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಜೀರ್ಣೋದ್ಧಾರ ಬೊಂಬೈ ಸಮಿತಿದ ಸಮಲೋಚನ ಸಭೆ

ಸುಮಾರ್ ಶತಮಾನದ ಇತಿಹಾಸ ಇಪ್ಪುನ ತೋಕೂರು ಹಳೆಯಂಗಡಿ ಶ್ರೀ ಸುಬ್ರಹ್ಮಣ್ಯ ದೇವಾಲಯದ ಜೀರ್ಣೋದ್ಧಾರ, ಪುನರ್ ನಿರ್ಮಾಣದ ಬೇಲೆ ಶಾಸ್ತ್ರೋಕ್ತವಾದ್ ನಡತೊಂದು ಉಂಡು. ವಾಸ್ತುಶಿಲ್ಪ ತಜ್ಞೆರೆನ ಮಾರ್ಗದರ್ಶನದಂಚನೆ ನ್ಯಾಯ ಬದ್ದ, ಶಾಸ್ತ್ರ ಬದ್ದ, ನಿಯಮಬದ್ದ ರಚನೆದ ಗರ್ಭ ಗೃಹ ಸಂಪೂರ್ಣ ಶಿಲಾಮಯ ಆತ್ಂಡ್. ದೇವಲ್ಯದ ನಿರ್ಮಾಣದ ಜಾಗೆ, ವಾಸ್ತು, ದೇವಲ್ಯದ ಪೀಠೋಪಕರಣ ಸೇರ್ದ್ ಮಾತಲ ಧಾರ್ಮಿಕ ವಿಧಿ ವಿಧಾನದಂಚನೆ ಮಲ್ಪರೆ ಉಂಡು ಪಂದ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಹರಿದಾಸ್ ಭಟ್ ತೆರಿಪಾಯೆರ್.

ಮೇರ್ ಘಾಟ್ಕೋಪರ್ ಪೂರ್ವದ ರೈಲ್ವೆ ಸ್ಟೇಷನ್ ದ ಹೋಟೆಲ್ ಸಾಮ್ರಾಟ್ ಜಾವಡಿಡ್ ನ.13 ಕ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಜೀರ್ಣೋದ್ಧಾರ ಬೊಂಬೈ ಸಮಿತಿ ಅಟ್ಟಣೆ ಮಲ್ತಿನ ಸಮಾಲೋಚನೆ ಸಭೆತ ಅಧ್ಯಕ್ಷತೆ ಒಯಿಸೊಂದು ಪಾತೆರಿಯೆರ್. ಸುಮಾರ್ 10 ಕೋಟಿ ರೂಪಾಯಿ ಕರ್ಚಿಡ್ ಶ್ರೀ ಸುಬ್ರಹ್ಮಣ್ಯ, ಶ್ರೀ ಮಹಾಗಣಪತಿ ಬೊಕ್ಕ ಶ್ರೀ ದುರ್ಗೆನ ಗರ್ಭ ಗುಡಿ, ನಮಸ್ಕಾರ ಮಂಟಪ, ಮುಖ ಮಂಟಪ, ಸುತ್ತುಪೌಳಿದ ಪುನರ್ ನಿರ್ಮಾಣ, ಧ್ವಜಸ್ತಂಬ, ಪೊಸ ಬ್ರಹ್ಮರಥ, ದೇವಲ್ಯದ ಎದುರುಭಾಗದ ರಾಜಗೋಪುರ ನಿರ್ಮಾಣ, ಸಾಂಸ್ಕೃತಿಕ ಲೇಸ್ ದ ಸಭಾಭವನನ್ ನಿರ್ಮಾಣ ಮಲ್ಪುನ ಯೋಜನೆ ಉಂಡು. ಮಾತ ಭಕ್ತೆರೆನ ಮನಸ್ಸ್ ಒಂಜಾದ್ ಸಾವಿರ ಕೈಕುಲು ಒಂಜಾದ್ ಉಂತುಂಡ ನನದ ಏಪ್ರಿಲ್ ಮೇ ತಿಂಗೊಲ್ಡ್ ಜೀರ್ಣೋದ್ಧಾರ ಕಜ್ಜೊಲೆನ್ ಮುಗಿತ್ ದ್, ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶಾಭಿಷೇಕ ನಡಪಾವುನ ಯೋಜನೆ ಉಂಡು. ಈ ನಿಟ್ಟಿಡ್ ಬೊಂಬೈ ಸಮಿತಿದ ಪಾತ್ರ ಮಸ್ತ್ ಮಹತ್ವ ಆತ್ಂಡ್. ಸಂಕಲ್ಪ ನಮ್ಮ, ಪ್ರಚೋದನೆ ಶ್ರೀ ಸುಬ್ರಹ್ಮಣ್ಯ ಸ್ವಾಮಿನ ಬೆಂಬಲ ನಿಕ್ಲೆನ ಮತ ಪಂದ್ ಪಂಡೆರ್.

ಜೀರ್ಣೋದ್ಧಾರ ಸಮಿತಿದ ಜತೆ ಕಾರ್ಯದರ್ಶಿ ಅನಂತರಾಮ ಶಿಮಂತರಾಯ ಪಾತೆರ್ದ್, 9 ಮಾಗಣೆದ ಅರಾಧಕ ಶ್ರೀ ಸುಬ್ರಹ್ಮಣ್ಯ ದೇವೆರೆನ ಕರುಣಾಮಯಿ ಭಕ್ತ ವತ್ಸಲಗ್ ನಮ ಕೊರ್ಪುನ ಎಲ್ಯ ಕಾಣಿಕೆ ದೇವಲ್ಯ ಕಟೈನಾತ್ ಪುಣ್ಯ ತಿಕ್ಕುಂಡು. ಇಂಚಿನ ಅವಕಾಶ ಕುಡೊರ ತಿಕ್ಕಾದ್. ಬಾಲಾಲಯಡ್ ಇಪ್ಪುನ ದೇವೆರೆನ್ ದೇವಲ್ಯಗ್ ಕನಪುನ ಈ ಪುಣ್ಯ ಕಾರ್ಯಗ್ ಬೊಂಬೈದ ಜನಕುಕು ಸಕಾಯ ಮಲ್ಪೊಡು ಪಂದ್ ಪಂಡೆರ್. ಗೌ.ಕಾರ್ಯದರ್ಶಿ ರಾಮಣ್ಣ ಬಿ.ದೇವಾಡಿಗ ಪಾತೆರ್ದ್, ಪ್ರಾಮಾಣಿಕತೆ, ಪಾರದರ್ಶಕ, ಸೃಜನಶೀಲತೆದ ಹರಿದಾಸ್ ಭಟ್ ಅಭಿವೃದ್ಧಿದ ಹರಿಕಾರೆರ್ ಆತೆರ್. 800 ವರ್ಷದ ಇತಿಹಾಸದ ಚಿತ್ರಣನ್ ಬದಲ್ ಮಲ್ತ್ ದ್, ಶಿಲಾಮಯ ದೇವಲ್ಯದ ರಚನೆಗ್ ದುಂಬಾತೆರ್. ಬ್ರಹ್ಮಚಾರಿ ಆಯಿನ ಮೇರ್ ಶ್ರೀ ಸುಬ್ರಹ್ಮಣ್ಯ ದೇವೆರೆನ ಪ್ರತಿನಿಧಿ ಪನ್ಪುನ ಭಾವನೆ ನಮಡ ಉಂಡು. ಆರೆನ ಪ್ರತಿಯೊಂಜಿ ಕಾರ್ಯಡ್ಲಾ ತನು ಮನ ಧನರ್ದ್ ಸಹಕಾರ ಮಲ್ಪೊಡು ಪಂದ್ ಪಂಡೆರ್. ಬೊಂಬೈ ಸಮಿತಿದ ಅಧ್ಯಕ್ಷೆರ್ ನಾಗೇಶ್ ಜಿ.ಶೆಟ್ಟಿ ಪಾತೆರ್ದ್, ಸಮಗ್ರ ಅಭಿವೃದ್ಧಿದ ಬಹು ಕೋಟಿ ರೂಪಾಯಿ ಯೋಜನೆ ಪೂರ್ಣ ಆಯೆರೆ ಸರ್ವ ಭಕ್ತೆರೆನ ಪನವುದ ಸಕಾಯ ದೇವ್ಯದ ಅಣು ಅಣುಟ್ಲಾ ಇಪ್ಪೊಡು. ಇಂಚಿನ ಅವಕಾಶ ಕುಡೊರ ತಿಕ್ಕಡ್ ಪಂದ್ ಪಂಡೆರ್. ಜೀರ್ಣೋದ್ಧಾರ ಸಮಿತಿದ ಗೌರವ ಅಧ್ಯಕ್ಷೆರ್ ತೋಕೂರು ಗುತ್ತು ಭಾಸ್ಕರ ಶೆಟ್ಟಿ ಪಾತೆರ್ದ್, ಜೀರ್ಣೋದ್ಧಾರಗ್ ವಾಗ್ದಾನ ಮಲ್ತಿನ ಭಕ್ತೆರ್ ಆಯಿನಾತ್ ಬೇಗ ಪಣಪುದ ಸಕಾಯ ಮಲ್ತ್ಂಡ, ಬೊಕ್ಕ ಪಣಪುದ ಕೊರತೆ ಇಪ್ಪುಜಿ. ಸರಿಯಾಯಿನ ಸಮಯಗ್ ಯೋಜನೆ ಪೂರ್ಣ ಆಯೆರೆ ಶಕ್ತಾನುಸಾರದ ಸೇವೆ ಅಗತ್ಯ ಪಂದ್ ಪಂಡೆರ್. ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಹರಿದಾಸ ಭಟ್ ಮೆರೆನ್ ಬೊಂಬೈ ಸಮಿತಿದ ಪರವಾದ್ ತಮ್ಮಾನ ಮಲ್ತೆರ್. ಗೌರವ ಅಧ್ಯಕ್ಷೆರ್ ತೋಕೂರು ಗುತ್ತು ಭಾಸ್ಕರ ಶೆಟ್ಟಿ, ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಮೋಹನ್ ದಾಸ್, ಜತೆ ಕಾರ್ಯದರ್ಶಿ ಅನಂತರಾಮ ಶಿಮಂತರಾಯ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್. ಕೋಶಾಧಿಕಾರಿ ತೋಕೂರು ಗುತ್ತು ಶಶಿಧರ ಶೆಟ್ಟಿ, ರತ್ನಾಕರ ಶೆಟ್ಟಿ, ಪತ್ರಕರ್ತ ನರೇಂದ್ರ ಕೆರೆಕಾಡು, ನಾಗೇಶ್ ಶೆಟ್ಟಿ, ಬೆಂಗ್ಲೂರ್ ಸಮಿತಿದ ಕಾರ್ಯದರ್ಶಿ ಹರಿಪ್ರಸಾದ್ ಶೆಟ್ಟಿ, ಸತೀಶ್ ಶೆಟ್ಟಿ ಪಾತೆರಿಯೆರ್. ಮಾಗಂದಡಿ ಭಾಸ್ಕರ ಶೆಟ್ಟಿ, ಸುರಪಾಲ ಶೆಟ್ಟಿ, ತಿಮ್ಮ ದೇವಾಡಿಗ, ನಿರ್ಮಲ ಆರ್ ದೇವಾಡಿಗ, ಶುಭಾ, ಗಣೇಶ್, ಅಶೋಕ್ ಕೋಟ್ಯಾನ್, ಮುರಳಿ ತಂತ್ರಿ, ಉಮೇಶ್ ಸನಿಲ್, ರಘು ಮೊಯ್ಲಿ ಸಹಕಾರ ಮಲ್ತೆರ್. ರಾಮಣ್ಣ ದೇವಾಡಿಗ ಸೊಲ್ಮೆ ಸಂದಾಯೆರ್.

ವರದಿ: ರಮೇಶ್ ಉದ್ಯಾವರ