ತುಳುವೆರೆನ ಸ್ವಾತಂತ್ರ್ಯ ಪೊರ್ಂಬಾಟೊದ ‘ರಿಕಾಲಿಂಗ್ ಅಮರ ಸುಳ್ಯ ‘ ಬೂಕು ಬುಡುಗಡೆ

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಮುತಾಲಿಕೆಡ್ “ರಿಕಾಲಿಂಗ್ ಅಮರ ಸುಳ್ಯ” ಬೂಕುನ್ ಆ. 24 ತಾರೀಕ್ ಗ್ ಕುಡ್ಲದ ತುಳುಭವನ ಚಾವಡಿಡ್ ಲೋಕಾರ್ಪಣೆ ಮಲ್ತೆರ್.

ಬೂಕು ಲೋಕಾರ್ಪಣೆ ಮಲ್ಪುನ ಅಧ್ಯಕ್ಷತೆನ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾಯಿನ ತುಳುವ ಬೊಳ್ಳಿ ದಯಾನಂದ ಜಿ. ಕತ್ತಲ್ ಸಾರ್ ವಹಿಸೊಂದಿತ್ತೆರ್. ಮಲ್ಲ ಬಿನ್ನೆರಾದ್ ನಿವೃತ್ತ ಸೇನಾಧಿಕಾರಿಲು ಆಯಿನ ಕಾರ್ಗಿಲ್ ಯುದ್ಧದ ಪೊರ್ತುಡು ಸೇವೆ ಮಲ್ತಿನ ಕರ್ನಲ್ ಶರತ್ ಭಂಡಾರಿ ನಿಟ್ಟೆಗುತ್ತು ಬೊಕ್ಕ ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್ ಇತ್ತೆರ್. ಪುಗರ್ತೆದ ವಾಗ್ಮಿಲಾಯಿನ ಶ್ರೀಕಾಂತ್ ಶೆಟ್ಟಿ ಮೇರ್ ಬೂಕುದ ಸಂಕ್ಷಿಪ್ತ ಪರಿಚಯನ್ ಕೊರಿಯೆರ್.

ಈ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆ ಬೊಕ್ಕ ಸಂಚಾಲಕೆರ್ ಆಯಿನ ಯಕ್ಷರಂಗದ ಹಾಸ್ಯ ಕಲಾವಿದೆರ್ ಕಡಬ ದಿನೇಶ್ ರೈ ಅಂಚನೆ ಅಕಾಡೆಮಿದ ಸದಸ್ಯೆರ್ ನಾಗೇಶ್ ಕುಲಾಲ್ ಕುಳಾಯಿ ಇತ್ತೆರ್. ಈ ಪೊರ್ತುಡು ಕೃತಿತ್ತ ಲೇಖಕೆರ್ ಆಯಿನ ಅನಿಂದಿತ್ ಗೌಡ ಮೆರೆನ್ ಮಾನಾದಿಗೆ ಮಲ್ತೆರ್.