Tulu News

ಅಯೋಧ್ಯೆ ರಾಮಮಂದಿರಗ್ ಬತ್ತ್ಂಡ್ ತಮಿಳುನಾಡ್ ರ್ದ್ 1,200 KGದ 42 ಘಂಟೆ

ಅಯೋಧ್ಯೆ ರಾಮಮಂದಿರ ಜ.22 ಕ್ಕ್ ಉದಿಪನ ಆವೆರೆ ಉಂಡು. ಅಂಚಾದ್ ಇಡೆಗ್ ತಮಿಳುನಾಡ್ ರ್ದ್ 1,200 ಕೆಜಿ ತೂಕದ ಒಟ್ಟು 42 ಘಂಟೆನ್ ಕನದೆರ್.

ನಾಮಕ್ಕಲ್ ಜಿಲ್ಲೆಡ್ ತಯಾರ್ ಮಲ್ತಿನ ಈ ಘಂಟೆಗ್ ಇಸೇಸ ಪೂಜೆ ಸಂದಾದ್ ಬೊಕ್ಕ ರಾಮಜನ್ಮಭೂಮಿಗ್ ಕಡಪಾದೆರ್.

ಈ ಬಗೆಟ್ಟ್ ಆಂಡಾಲ್ ಮೋಲ್ ಡಿಂಗ್ ವರ್ಕ್ಸ್ ದ ಧಣಿ ಆರ್. ರಾಜೇಂದ್ರನ್ ಪಾತೆರ್ದ್, ಒಂಜಿ ಘಂಟೆಗ್ 1,200 ರೂ. ಆಪುಂಡು. ಆಂಡ ರಾಮಮಂದಿರಗ್ ಕೇವಲ 600 ರೂ. ದಲೆಕ್ಕ ಕಾರ್ಮಿಕೆರೆನ ಸಂಬಳನ್ ದೆತೊಂದುಂಡು. ಈ ಘಂಟೆಲೆಡ್ 5 ಘಂಟೆ 120 ಕೆ.ಜಿ ತೂಕುಂಡ, 6 ಘಂಟೆ 70 ಕೆ.ಜಿ ತೂಕುಂಡು. ಆಂಡ 1 ಘಂಟೆ ಮಾತ್ರ 25 ಕೆ.ಜಿ ತೂಕುಂಡು ಪಂದ್ ಪಂಡೆರ್.

ತಿರುಪತಿ ತಿರುಮಲ ಕಾಣಿಕೆ ಡಬ್ಬಿಡ್ ಒಂಜೇ ದಿ‌ನ 5.5 ಕೋಟಿ ರೂ. ಆದಾಯ

ತಿರುಪತಿ ತಿರುಮಲ ಶ್ರೀವಾರಿ ಕಾಣಿಕೆ ಡಬ್ಬಿಡ್ ಡಿ.24 ಐತಾರ ಒಂಜೇ ದಿ‌ನ 5.5 ಕೋಟಿ ರೂ. ಆದಾಯ ಬೈದ್ಂಡ್ ಪಂದ್ ಟಿಟಿಡಿ ಅಧಿಕಾರಿಲು ತೆರಿಪಾದೆರ್.

ಡಿ.25 ಕ್ಕ್ 63519 ಭಕ್ತೆರ್ ಸ್ವಾಮಿನ ದರ್ಶನ ಪಡೆತೆರ್. ಉಂದುವೇ ಡಿ.23 ಕ್ಕ್ ವೈಕುಂಠ ದ್ವಾರದ ದರ್ಶನ ಸುರು ಆತ್ಂಡ್. ನನ ಜ.1 ಮುಟ್ಟ ನಡಪರೆ ಉಂಡು.

ಸುರುತ್ತ ಸರ್ತಿ ಪಾಕಿಸ್ತಾನಡ್ ವೋಟುಗು ನಾಮಪತ್ರ ಸಂದಾಯಿನ ಹಿಂದೂ ಪೊಂಜೋವ್

ಇಸ್ಲಾಮಾಬಾದ್: ಪಾಕಿಸ್ತಾನಡ್ ಫೆ.8 ಕ್ಕ್ ಸಾರ್ವತ್ರಿಕ ವೋಟು ನಡಪರೆ ಉಂಡು.

ಈ ವೋಟುಗು ಸುರುತ್ತ ಸರ್ತಿ ಹಿಂದೂ ಪೊಂಜೋವ್ ಒರ್ತಿ ನಾಮಪತ್ರ ಸಂದಾದೆರ್ ಪಂದ್ ಅಲ್ಪದ ಮಾಧ್ಯಮವೊಂಜಿ ವರದಿ ಮಲ್ದ್ಂಡ್.

ಖೈಬರ್ ಪಖ್ತುಂಖ್ವಾದ ಬುನೇರ್ ಜಿಲ್ಲೆಡ್ ಸವೀರಾ ಪ್ರಕಾಶ್ ಪನ್ಪುನ ಹಿಂದೂ ಪೊಂಜೋವ್ PK-25 ತ್ಯ ಸಾಮಾನ್ಯ ತಾನಗ್ ಅಧಿಕೃತವಾದ್ ನಾಮಪತ್ರ ಸಂದಾದೆರ್. ಮೇರ್ ಪಾಕಿಸ್ತಾನ ಪೀಪಲ್ಸ್ ಪಾರ್ಟಿ (ಪಿಪಿಪಿ) ಟಿಕೆಟ್ ಡ್ ವೋಟುಗು ಉಂತಿಯೆರೆ ತಯಾರಿ ಮಲ್ತೊಂದೆರ್.

ಸವೀರಾ ಪ್ರಕಾಶ್ ನ ಪೊಪ್ಪ ನಿವೃತ್ತ ವೈದ್ಯೆರಾತೆರ್. ಮೇರ್ ಕರಿನ 35 ವರ್ಷೊದಿಂಚ ಪಾಕಿಸ್ತಾನ್ ಪೀಪಲ್ಸ್ ಪಾರ್ಟಿದ ಸದಸ್ಯೆರಾತೆರ್. ಇತ್ತೆ ಸವೀರಾ ಮೇರ್ ತನ್ನ ಪೊಪ್ಪನ ತಾದಿನೇ ಪತ್ತ್ ದೆರ್. ಸವೀರಾ ಮೇರ್ ಸಾಮಾನ್ಯ ತಾನಗ್ ಬುನೇರ್ ಜಿಲ್ಲೆರ್ದ್ ನಾಮಪತ್ರ ಸಂದಾಯಿ‌ನ ಸುರುತ್ತ ಪೊಂಜೋವ್ ಅಭ್ಯರ್ಥಿ ಆತೆರ್ ಪಂದ್ ಕೈತಲ್ದ ರಾಜಕಾರಣಿ ಸಲೀಂ ಖಾನ್ ತೆರಿಪಾದೆರ್.

ಹೊಕ್ಕಾಡಿಗೋಳಿ ಶ್ರೀ ವೀರ- ವಿಕ್ರಮ ಜೋಡುಕರೆ ಕಂಬುಲ ಕರೆ ಮೂರ್ತ

ಬಂಟ್ವಾಳ: ಹೊಕ್ಕಾಡಿಗೋಳಿ ಶ್ರೀ ಮಹಿಷಮರ್ದಿನಿ ಕಂಬುಲ ಸಮಿತಿದ ಮುತಾಲಿಕೆಡ್ ಮಾ.16 ಕ್ಕ್ ನಡಪುನ ಪುಗರ್ತೆದ ಹೊಕ್ಕಾಡಿಗೋಳಿ ಶ್ರೀ ವೀರ- ವಿಕ್ರಮ ಜೋಡುಕರೆ ಬಯಲು ಕಂಬುಲದ ಕರೆ ಮೂರ್ತ ನಡತ್ಂಡ್.

ಪೂಂಜ ಶ್ರೀ ಪಂಚ ದುರ್ಗಾಪರಮೇಶ್ವರಿ ದೇವಲ್ಯದ ಕೃಷ್ಣ ಪ್ರಸಾದ್ ಆಸ್ರಣ್ಣೆರ್ ಈ ಲೇಸ್ ವೈದಿಕ ವಿಧಿವಿಧಾನನ್ ಮಲ್ತೆರ್.

ಈ ಪೊರ್ತುಡು ಹೊಕ್ಕಾಡಿಗೋಳಿ ಕಂಬುಲ ಸಮಿತಿದ ಗುರ್ಕಾರೆ ರಶ್ಮಿತ್ ಶೆಟ್ಟಿ ಕೈತ್ರೋಡಿ ನೊಣಲ್ ಗುತ್ತು, ಮಾನಾದಿಗೆದ ಗುರ್ಕಾರೆ ಸಂಜೀವ ಶೆಟ್ಟಿ ಗುಂಡ್ಯಾರು, ಪ್ರದಾನ ಕಾರ್ಯದರ್ಶಿ ಪ್ರಭಾಕರ್ ಎಚ್. ಹುಲಿಮೇರು, ಕಾರ್ಯದರ್ಶಿ ಪುಷ್ಪರಾಜ್ ಜೈನ್, ಪೂಂಜ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ರತ್ನಕುಮಾರ್ ಚೌಟ, ಕಂಬುಲ ಸಂಘಟಕೆರ್ ಜಗತ್ಪಾಲ್ ಶೆಟ್ಟಿ ಉಮನೊಟ್ಟು, ಕುಟ್ಟಿ ಶೆಟ್ಟಿ ಹಕ್ಕೇರಿ, ಆನಂದ್ ಶೆಟ್ಟಿ ಹಕ್ಕೇರಿ, ಸುರೇಶ್ ಕೆ. ಶೆಟ್ಟಿ ಹಕ್ಕೇರಿ, ಸಚಿನ್ ಶೆಟ್ಟಿ ಹಕ್ಕೇರಿ, ಜಯಂತ್ ಶೆಟ್ಟಿ ಹಕ್ಕೇರಿ, ಸಂತೋಷ್ ಶೆಟ್ಟಿ ಕೊನೆರೊಟ್ಟು, ರಾಜೇಶ್ ಶೆಟ್ಟಿ ಸಿದ್ದಕಟ್ಟೆ, ಜಾಗೆದ ದಾನಿಲು ರಾಜು ಶೆಟ್ಟಿ ಬೊಕ್ಕ ಸಹೋದರೆರ್ ಹೊಕ್ಕಾಡಿಗೋಳಿ, ಸುಧೀರ್ ಶೆಟ್ಟಿ ಹೊಕ್ಕಾಡಿಗೋಳಿ, ಕೊಲ್ಯ ಬಾಬು ಶೆಟ್ಟಿ, ಪ್ರವೀಣ್ ಕುಲಾಲ್ ಬೊಕ್ಕ ಸಹೋದರೆರ್ ಹೊಕ್ಕಾಡಿಗೋಳಿ, ಹರೀಶ್ ಶೆಟ್ಟಿ ಹೊಕ್ಕಾಡಿಗೋಳಿ, ಮಹಾವೀರ್‌ಚೌಟ ಉಗ್ರಡಿ, ಸುಂದರ್ ಪೂಜಾರಿ ನಿಡ್ಯಾಲ, ಕುಕ್ಕಿಪಾಡಿ ಗ್ರಾ.ಪಂ. ಗುರ್ಕಾರೆ ಶೇಖರ್ ಶೆಟ್ಟಿ ಬದ್ಯಾರು, ಯೋಗೀಶ್ ಆಚಾರ್ಯ, ಲಿಂಗಪ್ಪ ಪೂಜಾರಿ, ಮಹಾಬಲ ಶೆಟ್ಟಿ, ಆರಂಬೋಡಿ ಗ್ರಾ.ಪಂ. ಸದಸ್ಯೆರ್ ಸತೀಶ್ ಪಿ.ಮಠ, ಸುರೇಂದ್ರ ಶೆಟ್ಟಿ ಅಜ್ಜಾಡಿ, ಸುರೇಶ್ ಕುಲಾಲ್ ಪಾಲ್ ಪಡೆದಿತ್ತೆರ್.

ಆಶಾ ಪ್ರಕಾಶ್ ಶೆಟ್ಟಿ ಸಹಾಯ ಹಸ್ತ ಕೊರ್ಪಿನ “ನೆರವು” ಲೇಸ್

ದಾನ ಮಲ್ತ್‌ದ್ ಬದ್ಕ್‌ನ್ ಪೊರ್ಲು ಮಲ್ಪುಲೆ; ರಮೇಶ್ ಅರವಿಂದ್

ಕುಡ್ಲ: ನಿಷ್ಠೆಡ್ ಬೇಲೆ ಮಲ್ತ್‌ದ್ ಜನಕ್ಲೆನ ವಿಶ್ವಾಸ ಪಡೆಂಡ ಸಮಾಜಡ್ ಮಿತ್ತ್‌ದ ತಾನೊಗ್ ಪೋಯರೆ ಸಾಧ್ಯ. ಇಂಚಿನ ವಿಶೇಷ ಗುಣ ಇಪ್ಪುನ ಉದ್ಯಮಿ ಪ್ರಕಾಶ್ ಶೆಟ್ಟಿ ಮೇರ್ ತನ್ನ ನಿಸ್ವಾರ್ಥವಾಯಿನ ದಾನ ಧರ್ಮದ ಮುಕೇನ ಬದ್ಕ್‌ನ್ ಸಾರ್ಥಕತೆ ಮಲ್ತ್‌ದೆರ್ ಪಂದ್ ಪುಗರ್ತೆದ ಸಿನೆಮಾ ನಟೆ ರಮೇಶ್ ಅರವಿಂದ್ ಪಂಡೆರ್.

ಮೇರ್ ಪೇಂಟೆದ ಬಂಗ್ರಕೂಳೂರ್‌ದ ಗೋಲ್ಡ್ ಫಿಂಚ್ ಸಿಟಿಟ್ಟ್ ಡಿ.25 ಕ್ಕ್ ನಡತಿನ 5ನೇ ವರ್ಷದ ಎಂ.ಆರ್.ಜಿ. ಗ್ರೂಪ್ ಆಶಾ ಪ್ರಕಾಶ್ ಶೆಟ್ಟಿ ಸಹಾಯ ಹಸ್ತ “ನೆರವು” ಲೇಸ್‌ನ್ ಉದಿಪನ ಮಲ್ತ್‌ದ್ ಪಾತೆರಿಯೆರ್. ನನೊರಿಯಗ್ ಸಹಾಯ ಮಲ್ಪುನವ್ವೇ ಬದ್‌ಕ್‌ದ ಮಾಮಲ್ಲ ಗೆಲ್ಮೆ. ಬಂಗಡ್ ಇತ್ತಿನಕ್ಲೆಗ್ ಮನಪೂರ್ವಕವಾದ್ ನೆರವು ಕೊರ್ಪಿನ ಮುಕೇನ ಪ್ರಕಾಶ್ ಶೆಟ್ಟಿ ಮೇರ್ ಅಸಹಾಯಕೆರೆನ ಮನಸ್ಸ್‌ನ್ ಗೆಂದ್‌ದೆರ್. ಪ್ರಕಾಶ್ ಶೆಟ್ಟಿ ಮೆರೆನ ಪುದರ್‌ಡ್ ಇಪ್ಪುಲೆಕ್ಕನೆ ಅರೆನ ಜೀವನಲ ಪ್ರಕಾಶಮಾನವಾದ್ ಉಂಡು. ಮನಸ್ಸ್‌ನ್ ಗೆಂದುನ ಅರೆನ ಪಯಣ ನನಲ ಇಂಚನೇ ದುಂಬರಿಯಡ್. ಅರೆನ ನೆರವು ಪಡೆಯಿನಕುಲು ಬದ್‌ಕ್‌ಡ್ ಎಡ್ಡೆ ಆವಡ್ ಪಂದ್ ರಮೇಶ್ ಅರವಿಂದ್ ಪಂಡೆರ್.

ಆಳ್ವಾಸ್ ಶಿಕ್ಷಣ ಸಂಸ್ಥೆದ ಅಧ್ಯಕ್ಷೆರ್ ಡಾ.ಎಂ.ಮೋಹನ್ ಆಳ್ವ ಪಾತೆರ್ದ್, ಪ್ರಕಾಶ್ ಶೆಟ್ಟಿ ಮೇರ್ ಒವ್ವೇ ಭಾಷೆ, ಜಾತಿ, ಮತ, ಧರ್ಮನ್ ತೂವಂದೆ ಮಾನವೀಯ ದೃಷ್ಠಿಡ್ ಬಡವೆರೆಗ್, ಅಶಕ್ತೆರೆಗ್ ಪಣವುದ ಸಹಾಯನ್ ಮಲ್ತೊಂದುಲ್ಲೆರ್. ತನ್ನ ಸಂಪಾದನೆದ ಒಂಜಿ ಭಾಗನ್ ದಾನವಾದ್ ಕೊರ್ಪಿನ ಅರೆನ ಮಾನವೀಯ ಸೇವೆ ಮಾತೆರೆಗ್ಲಾ ಮಾದರಿ ಆವಡ್ ಪಂದ್ ಪಂಡೆರ್.

ಎಂ.ಆರ್.ಜಿ ಗ್ರೂಪ್ ಸಮೂಹ ಸಂಸ್ಥೆದ ಚೇರ್ಮನ್ ಕೆ.ಪ್ರಕಾಶ್ ಶೆಟ್ಟಿ ಪಾತೆರ್ದ್, ತುಳುನಾಡ್‌ಡ್ ಪುಟ್ಟಿನವೇ ಯನ್ನ ಭಾಗ್ಯ. ಯಾನ್ ಬಡತನರ್ದ್ ಕತ್ತಲೆದ ಸಾದಿನ್ ಕಡತ್ತ್‌ದ್ ಇತ್ತೆ ದೇವೆರೆನ ಅನುಗ್ರಹರ್ದ್ ಬೊಲ್ಪುನ್ ತೋಜುಲೆಕ್ಕ ಆತ್ಂಡ್. ಹಂತಹಂತವಾದ್ ಬದ್‌ಕ್‌ಡ್ ಯಶಸ್ಸ್‌ನ್ ತೋಜಿದ್ ಸುರುಕ್ಕ್ ಎನ್ನ 60ನೇ ಪುಟ್ಟುಪರ್ಬದಾನಿ ಅಶಕ್ತೆರೆಗ್ 1.25 ಕೋಟಿ ರೂಪಾಯಿ ನೆರವುನ್ ಕೊರಿಯೆ. ಈ ವರ್ಷ 1,828 ಜನಕ್ಕ್ 4 ಕೋಟಿ 90 ಲಕ್ಷರ್ದ್‌ಲ ಮಸ್ತ್ ರೂಪಾಯಿನ್ ನೆರವು ಕೊರ್ಪುನ ಶಕ್ತಿ ಬೈದ್ಂಡ್. ಎನ್ನ ಕುಟುಮದಕುಲುಲ ಉಂದೆನ್ ದುಂಬರಿಸಾವೊಂದ್ ಪೋವೊಡು ಪನ್ಪಿನ ಆಶಯ ಎನ್ನ ಪಂದ್ ಪಂಡೆರ್.

ಲೇಸ್‌ಡ್ ಎಂ.ಆರ್.ಜಿ ಸಮೂಹ ಸಂಸ್ಥೆದ ಆಡಳಿತ ನಿರ್ದೇಶಕೆರ್ ಗೌರವ್ ಪಿ. ಶೆಟ್ಟಿ, ಆಶಾ ಪ್ರಕಾಶ್ ಶೆಟ್ಟಿ ಇತ್ತೆರ್. ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಅನುಷ್ಕಾ ಗೌರವ್ ಶೆಟ್ಟಿ ಸೊಲ್ಮೆ ಸಂದೈತ ಮಲ್ತೆರ್. ನಿತೇಶ್ ಶೆಟ್ಟಿ, ಪುರುಷೋತ್ತಮ ಭಂಡಾರಿ ಲೇಸ್ ಸುಧಾರಿಕೆ ಮಲ್ತೆರ್.

ಗೋಲ್ಡ್‌ಫಿಂಚ್ ಟೌನ್‌ಶಿಪ್:

ವರ್ಷಲ ನೆರವು ಪನ್ಪಿನ ಲೇಸ್‌ರ್ದ್ ಗೋಲ್ಡ್‌ಫಿಂಚ್ ಇತ್ತೆ ಪುಣ್ಯ ಭೂಮಿ ಆತ್ಂಡ್. ನನದ ದಿನಟ್ಟ್ ಮಾಮಲ್ಲ ಟೌನ್‌ಶಿಪ್ ಈ ಜಾಗೆಡ್ ನಿರ್ಮಾಣ ಆವರೆ ಉಂಡು. ಆಸ್ಪತ್ರೆ, ಶಾಲೆ, ಮಾಲ್, ಹೋಟೆಲ್, ವೃದ್ದಾಶ್ರಮ, ಐಟಿ ಪಾರ್ಕ್ ಇಂಚಿತ್ತಿನ ಯೋಜನೆಲೆನ್ ಈ ಟೌನ್‌ಶಿಪ್‌ಡ್ ಮಲ್ಪರೆ ಉಂಡು. ಟೌನ್‌ಶಿಪ್‌ರ್ದ್ ಬರ್ಪಿನ ಆದಾಯದ ಒಂಜಿ ಭಾಗನ್ ಬಡವೆರೆಗ್ ನೆರವು ಕೊರ್ಪುನ ಕಾರ್ಯ ಆಯರೆ ಉಂಡು ಪಂದ್ ಕೆ. ಪ್ರಕಾಶ್ ಶೆಟ್ಟಿ ಪಂಡೆರ್.

ಶೈಕ್ಷಣಿಕ ಕ್ಷೇತ್ರಡ್ ಸಾಧನೆ ಮಲ್ತಿನಕ್ಲೆಗ್ ವಿದ್ಯಾರ್ಥಿ ವೇತನ

ಎಸ್.ಎಸ್.ಎಲ್.ಸಿ ಡ್ 625/625 ಅಂಕ ಪಡೆಯಿನ ವೀಕ್ಷಿತಾ ಬೊಕ್ಕ ಪಿ.ಯು.ಸಿ. ಡ್ ವಾಣಿಜ್ಯ ವಿಭಾಗಡ್ 600/600 ಅಂಕ ಪಡೆಯಿನ ಅನನ್ಯ ಮೊಕಲೆಗ್ ಶೈಕ್ಷಣಿಕ ಸಾಧನೆಗಾದ್ ಮಾನಾದಿಗೆ ಮಲ್ತ್‌ದ್ ವಿದ್ಯಾರ್ಥಿ ವೇತನ ಕೊರಿಯೆರ್.

ಯೇಸು ಕ್ರಿಸ್ತೆರ್ನ ಆದರ್ಶ ಪಾಲನೆ ಮಲ್ಪುಗ: ರೆ. ಅಮೃತ ರಾಜ್ ಖೋಡೆ

ಹಳೆಯಂಗಡಿ : ಯೇಸು ಕ್ರಿಸ್ತೆರ್ ಶಾಂತಿದ ದೂತೆರಾದ್ ಈ ಲೋಕಗ್ ಬತ್ತೆರ್. ಅರೆನ ಜೀವಿತಾವಧಿಡ್ ಕ್ಷಮೆತ್ತ ಮಲ್ಲ ಗುಣತ್ತ ಒಟ್ಟಿಗೆ ಶಾಂತಿದೂತೆರಾದಿತ್ತೆರ್. ಮೆರೆನ ಆದರ್ಶನ್ ನಮ ಪಾಲನೆ ಮಲ್ಪುಗ ಪಂದ್ ಹಳೆಯಂಗಡಿ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ದ ಸಭಾ ಪಾಲಕೆರ್ ರೆ. ಅಮೃತ್ ರಾಜ್ ಖೋಡೆ ಪಂಡೆರ್.

ಮೇರ್ ಹಳೆಯಂಗಡಿ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ಡ್ ನಡತಿನ ಕ್ರಿಸ್ಮಸ್ ಇಸೇಸ ಲೇಸ್ ಡ್ ಪಾತೆರಿಯೆರ್.

ಮಣಿಪಾಲದ ಸಿಎಸ್ಐ ಇಂಗ್ಲಿಷ್ ಚರ್ಚ್ ದ ಸಭಾ ಪಾಲಕೆರ್ ರೆ.ಜಾನ್ ಬೆನಾಡಿಕ್ಟ್ ಪ್ರಾರ್ತನೆ ಮಲ್ತೆರ್. ಶಾಲೆದ ಕಲ್ಪಾರ್ಥಿಲೆರ್ದ್ ಸಾಂಸ್ಕೃತಿಕ ಲೇಸ್ ನಡತ್ಂಡ್. ಸಭಾ ಪಾಲನ ಸಮಿತಿದ ಕಾರ್ಯದರ್ಶಿ ಲಾವಣ್ಯ ಕೋಟ್ಯಾನ್ ಎದ್ಕೊನಿಯೆರ್. ಕೋಶಾಧಿಕಾರಿ ಶರ್ಲಿ ಬಂಗೇರ ಸೊಲ್ಮೆ ಸಂದಾಯೆರ್. ಈ ಪೊರ್ತುಡು ಸಭಾ ಪರಿಪಾಲನಾ ಸಮಿತಿದ ಸದಸ್ಯೆರ್ ಆಸ್ಟಿನ್ ಕರ್ಕಡ, ವಸಂತ ಬರ್ನಾಡ್, ಜೇಮ್ಸ್ ಕರ್ಕಡ, ಸಿಡ್ನಿ ಕರ್ಕಡ ಚಾವಡಿಡ್ ಇತ್ತೆರ್.

ಕೇರಳಡ್ ಕ್ರಿಸ್ ಮಸ್ ಆಚರಣೆಗ್ ನಿರ್ಮಾಣ ಮಲ್ತಿನ ಸಂಕ ಬೂರ್ದು ಸುಮಾರ್ ಜನಕ್ಕ್ ಪೆಟ್ಟ್

ತಿರುವನಂತಪುರಂ: ತಿರುವನಂತಪುರಂದ ನೆಯ್ಯಾಟಿಂಕರಾಡ್ ಡಿ.25 ಸೋಮಾರ ಕ್ರಿಸ್ ಮಸ್ ಆಚರಣೆಗಾದ್ ಸ್ಥಾಪನೆ ಮಲ್ತಿನ ತಾತ್ಕಾಲಿಕ ಸಂಕ ಬೂರ್ದು ಸುಮಾರ್ ಜನಕ್ಕ್ ಪೆಟ್ಟಾತ್ಂಡ್.

ಈ ಘಟನೆಡ್ ಪೆಟ್ಟಾಯಿನಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಬಗೆಟ್ಟ್ ಎಚ್ಚದ ಪೊಲಬು ನನ ಗೊತ್ತಾವೊಡಾತೆ.