ಬಂಟ್ವಾಳ: ಕೆದಿಲ ಗ್ರಾಮದ ಸಾಕೇತನಗರ ಶ್ರೀರಾಮ ಭಜನಾ ಮಂದಿರಡ್ ಜ.6 ಸನಿಯಾರ 32 ನೇ ವರ್ಷದ ವಾರ್ಷಿಕೋತ್ಸವ, ಏಕಾಹ ಭಜನೆ ಬೊಕ್ಕ ಸಾಮೂಹಿಕ ಶನೀಶ್ವರ ಪೂಜೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಸಾಕೇತನಗರ ಶ್ರೀರಾಮ ಭಜನಾ ಮಂಡಳಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕೆದಿಲ: ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂದಿರಡ್ ಡಿ.31 ಐತಾರ ಏಕಾಹ ಭಜನಾ ಸಂಕೀರ್ತನೆ, 18 ನೇ ವರ್ಷದ ಸಾಮೂಹಿಕ ಸತ್ಯನಾರಾಯಣ ಪೂಜೆ ಬೊಕ್ಕ ಧಾರ್ಮಿಕ ಸಭಾ ಲೇಸ್ ನಡಪರೆ ಉಂಡು.
ಆನಿ ಬೊಲ್ಪುಗು ಗಣಹೋಮ, ಭಜನೆ, ಬಯ್ಯಗ್ ಮಂಗಳ, ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ, ರಾತ್ರೆ ಸಭಾ ಲೇಸ್, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ಬೊಕ್ಕ ಶ್ರೀ ಕೃಷ್ಣ ಕಲಾವೃಂದ ಕರಿಮಜಲು ಮೊಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂಡಳಿ (ರಿ.) ದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನಡ್ ಸಮ್ಮೇಳನಾಧ್ಯಕ್ಷೆರ್ನ ಮದಿಪು
ಮುಲ್ಕಿ : ಧರ್ಮ ಬೊಕ್ಕ ಶಿಕ್ಷಣಡ್ ರಾಜಕೀಯ ಸೇರ್ರೆ ಬಲ್ಲಿ. ಅವು ಸೇರ್ಂಡ ಸಂಸ್ಕೃತಿ ಸೈಪುಂಡು ಪಂದ್ ಮುಲ್ಕಿ ತಾಲೂಕು ಸಾಹಿತ್ಯ ಸಮ್ಮೇಳನಾಧ್ಯಕ್ಷೆರ್ ಡಾ.ಗಣೇಶ ಅಮೀನ್ ಸಂಕಮಾರ್ ಎಚ್ಚೆರ್ಗೆ ಕೊರಿಯೆರ್.
ಆರ್ ಮುಲ್ಕಿ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನದ ಉದಿಪನದ ಲೇಸ್ ಡ್ ಸಮ್ಮೇಳನಾಧ್ಯಕ್ಷೆರ್ ನ ಭಾಷಣೊಡು ಪಂಡೆರ್.
ದಕ್ಷಿಣ ಕನ್ನಡ ಜಿಲ್ಲೆಡ್ ಉಪ್ಪುನ ಜಾತಿ ಸಂಘಟನೆಲೆನ ಅತಿಯಾಯಿನ ಮೋಹ ಬಹುಸಂಸ್ಕೃತಿದ ಸಮಾಜದ ವಿಕೃತಿಗ್ ಕಾರಣ ಆವೊಂದುಂಡು. ಇತ್ತೆದ ರಾಜಕೀಯೊಡು ಬ್ರಿಟಿಷೆರೆನ ಒಡೆದು ಆಳುನ ನೀತಿ ಅಪಾಯಕಾರಿ. ಶಿಕ್ಷಣ ಬೊಕ್ಕ ಮಾಧ್ಯಮ ಜಗತ್ತ್ ಉದ್ಯಮ ಆವಂದೆ ಕರ್ತವ್ಯ, ಜಬದಾರಿನ್ ತೆರಿಪಾವುನ ಕೆಲಸ ಮಲ್ಪೊಡು. ಸೋಶಿಯಲ್ ಮೀಡಿಯಾಡ್ ಕನ್ನಡ ಭಾಷೆ ಬೊಕ್ಕ ಸಂಸ್ಕೃತಿನ್ ವಿಕೃತಿ ಮಲ್ಪುನ ವಿರುದ್ಧ ಜಾಗ್ ರ್ತೆಡ್ ಉಪ್ಪೊಡು ಪಂದ್ ಆರ್ ಪಂಡೆರ್.
ಮುಲ್ಕಿ ಪಂಡ ಒಂಜಿ ಕಾಲೊಡು ನೀರ್ ಡ್ ಮುರ್ಕುದು ಲಕ್ ದಿನ ಊರು. ಮರ್ದ್ ದ ದೈಕುಲು ಉಪ್ಪುನ ಮೂಲಿಕಾಪುರ. ಕಡಲ್ ಪಿರ ಜಾರ್ ದ್ ಒರಿದಿನ ಜಾಗೆ ಗಜನಿ . ಶಾಂಭವಿ ಬೊಕ್ಕ ನಂದಿನಿ ತುದೆಕ್ಲೆನ ನಡುಟ್ಟು ಉಪ್ಪುನ ಈ ಊರುಡು ಮಾರಿ ಕೈಗಾರಿಕೆ ಇಜ್ಜಿ. ಉಂದು 9 ಮಾಗಣೆದ ಸಾಂಸ್ಕೃತಿಕ ಶ್ರೀಮಂತಿಕೆದ ಊರು. ಬಪ್ಪನಾಡ್ ದುರ್ಗಾಪರಮೇಶ್ವರಿ, ಕಟೀಲು ದುರ್ಗೆ, ಶಿಮಂತೂರು ಆದಿ ಜನಾರ್ದನ ದೇವಸ್ಥಾನ, ಪಡುಪಣಂಬೂರು ಅರಮನೆ, ಇಗರ್ಜಿ, ಮಸೀದಿ, ಬಸದಿ ಪುಣ್ಯದ ಮಣ್ಣ್. ತುಳು, ಕೊಂಕಣಿ , ಬ್ಯಾರಿ ಬಾಷೆ ಪಾತೆರುನ ಸರ್ವ ಧರ್ಮ, ಸೌಹಾರ್ದತೆದ ಕೃಷಿ ಸಂಪತ್ತ್ ದ ಪುಣ್ಯ ನೆಲ ಉಂದು. ಅಗೊಳಿ ಮಂಜಣ್ಣೆ, ಕಾಂತಾಬಾರೆ ಬೂದಬಾರೆರ್ ಪುಟ್ಟುದು ಬಲದಿನ ತಾಕತ್ತ್ ದ ನಾಡ್. ಕಟೀಲ್, ಬಪ್ಪನಾಡ್, ಪಾವಂಜೆ, ಸಸಿಹಿತ್ಲು ಸೇರ್ದ್ 9 ಯಕ್ಷಗಾನ ಮೇಳ ಉಂಡು. ಪಾಡ್ದನದ ರಾಮಕ್ಕ, ಸಿಂದು ಗುಜರನ್ ಮೊಕ್ಲೆನ ಜಾನಪದ ಸಾಹಿತ್ಯ, ಅರಸು ಕಂಬುಲ, ಐಕಳ ಕಂಬುಲ ಇಂಚ ದೆತ್ತಿನಾತ್ ಲ ಮುಗಿಯಂದಿನ ಸಾಂಸ್ಕೃತಿಕ, ಜಾನಪದ, ಧಾರ್ಮಿಕ ವೈಭವದ ಈ ನಮ್ಮ ಮುಲ್ಕಿ ತಾಲೂಕುಡು ಪುಟ್ಟಿನನೇ ನಮ್ಮ ಭಾಗ್ಯ ಪಂದ್ ಆರ್ ಪಂಡೆರ್.
ನಾರಾವಿ ತುಳಸಿ ಕ್ರಿಯೇಷನ್ಸ್ ದ ಮುತಾಲಿಕೆಡ್ ಜ.1 ಸೋಮಾರ ಶಿವ ದೇವೆರ್ ಪನ್ಪುನ ತುಳು ಭಕ್ತಿ ಸುಗಿಪು ಬುಡುಗಡೆ ಆವೆರೆ ಉಂಡು.
ಈ ಭಕ್ತಿ ಸುಗಿಪುಗು ಸುಜಿತ್ ಎಸ್ ನಾರಾವಿ ಸಾಹಿತ್ಯ ಬೊಕ್ಕ ನಿರ್ಮಾಣ, ಶಮಿತಾ ನಿಟ್ಟೆ ಕಾರ್ಲ ಗಾಯನ ಬೊಕ್ಕ ಅಭಿನಯ, 7D ಸಂತು ವೀಡಿಯೋಗ್ರಫಿ ಬೊಕ್ಕ ಸಂಕಲನ, ಯಶವಂತ ಕುಲಾಲ್ ಗಂಜಿಮಠ ರೆಕಾರ್ಡಿಂಗ್ ಬೊಕ್ಕ ಪ್ರಚಾರ ಕಲೆ, ಕುಡ್ಲ ರೆಮೊನಾ ಇವೆಟ್ ಪಿರೇರಾ ಭರತನಾಟ್ಯ ಕಲಾವಿದೆಯಾದ್ ಅಭಿನಯ ಮಲ್ದೆರ್.
ಮುಲ್ಕಿ: ಗ್ರಾಮೀಣ ಮಟ್ಟಡ್ ಕ್ರಿಕೆಟ್ ಆನ್ ಲೆಗ್ ಮಾತ್ರ ಸೀಮಿತ ಅವಂದೆ ಪೊಣ್ಣು ಜೋಕುಲುಲ ಗೊಬ್ಬುವೆರ್. ಅಕ್ಲೆಗ್ ಸರಿಯಾಯಿನ ಮಾರ್ಗದರ್ಶನ ತರಬೇತಿ ಕೊರ್ಂಡ ಸಾಧನೆ ಮಲ್ಪುವೆರ್ ಪಂದ್ ಬೆಂಗ್ಲೂರು ಬಸವೇಶ್ವರ ಕಾನೂನು ಪದವಿ ಕಾಲೇಜ್ ದ ಪ್ರಾಚಾರ್ಯೆ ದೇವಿಕಾ ಎಸ್ ಅಜಿಲ ಪಂಡೆರ್.
ಮೇರ್ ಕಿನ್ನಿಗೋಳಿ ಕೈತಲ್ದ ಐಕಳದ ಪೊಂಪೈ ಕಾಲೇಜ್ ದ ಗೊಬ್ಬುನ ಮೈದಾನಡ್ ಸಂಘಟನೆದ ಮುಕೇನ ಪುಗರ್ತೆ ಪಡೆದಿಪ್ಪುನ 25 ವರ್ಷೊದಿಂಚ ಪುದರ್ ಪಡೆಯಿನ ಕೆ.ಎಫ್.ಸಿ ಕೂಟದ ಮುತಾಲಿಕೆಡ್ ಆಹ್ವಾನಿತ ಮಹಿಳಾ ಕೂಟಲೆಗಾದ್ ನಡತಿನ ಲೀಗ್ ಮಾದರಿದ ಕಿನ್ನಿಗೋಳಿ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಪಂತೊದ ಸಮಾರೋಪ ಸಮಾರಂಭಡ್ ಇನಾಮು ಪಟ್ಟ್ ದ್ ಪಾತೆರಿಯೆರ್.
ಸಂಘಟಕೆರ್ ಈಶ್ವರ್ ಕಟೀಲ್ ಪಾತೆರ್ದ್, ರಾಜ್ಯ ಬೊಕ್ಕ ಪಿದಯಿ ರಾಜ್ಯಲೆನ 8 ಪುಗರ್ತೆದ ಮಹಿಳಾ ಕ್ರಿಕೆಟ್ ಕೂಟಲು ಈ ಪಂತೊಡು ಪಾಲ್ ಪಡೆದಿತ್ತ್ಂಡ್. ಒವ್ವೇ ಡೊನೇಶನ್, ಪ್ರವೇಶ ಶುಲ್ಕನ್ ಪಡೆಯಂದೆ ಕೇವಲ ಕ್ರಿಕೆಟ್ ನ್ ಪ್ರೋತ್ಸಾಹ ಮಲ್ಪುನ ಉದ್ದೇಶರ್ದ್ ಕರಿನ ಮೂಜಿ ವರ್ಷಡ್ ಆನ್ ಲೆನ ಲೀಗ್ ಮಾದರಿದ ಕ್ರಿಕೆಟ್ ಪಂತೊನ್ ಭಾರೀ ಯಶಸ್ವಿಯಾದ್ ನಡಪಯಿನ ಹಿನ್ನೆಲೆ ಇಪ್ಪುನ ಕೆಎಫ್ಸಿ ಕೂಟದ ಮುತಾಲಿಕೆಡ್ ಈ ಪಂತೊ ನಡತ್ಂಡ್ ಪಂದ್ ಪಂಡೆರ್.
ಐಕಳ ಪೊಂಪೈ ಕಾಲೇಜ್ ದ ನಿವೃತ್ತ ದೈಹಿಕ ಶಿಕ್ಷಣ ನಿರ್ದೇಶಕೆರ್ ಜೇಮ್ಸ್ ಒಲಿವರ್, ಅಕ್ಷತಾ ಪೂಜಾರಿ ಬೋಳ, ಸಂತೋಷ್, ಸಾಧಕಿ ಕೃಪಾ, ಶಶಿಕಿರಣ್ ಬೊಕ್ಕ ಕ್ರೀಡಾ ಸಾಧಕೆರೆಗ್ ಮಾನಾದಿಗೆ ಮಲ್ತೆರ್.
ಈ ಪೊರ್ತುಡು ಪೊಂಪೈ ಕಾಲೇಜ್ ದ ಪ್ರಾಚಾರ್ಯೆರ್ ಡಾ| ಪುರುಷೋತ್ತಮ ಕೆ. ವಿ, ಉದ್ಯಮಿ ಗಿರೀಶ್ ಶೆಟ್ಟಿ ಕಟೀಲ್, ಕೆಎಫ್ಸಿದ ಸಂಸ್ಥಾಪಕ ಗುರ್ಕಾರೆ ಗಣೇಶ್ ಎಸ್, ಗುರ್ಕಾರೆ ಅರುಣ್ ಕುಮಾರ್, ಮಾನಾದಿಗೆದ ಗುರ್ಕಾರೆ ಪ್ರಮೋದ್ ಕುಮಾರ್, ಸಂಘಟಕೆರ್ ಪ್ರವೀಣ್ ಕುಮಾರ್, ದಾಮೋದರ ಶೆಟ್ಟಿ, ಮಮತಾ ಗಣೇಶ್, ಶ್ರೀಶ ಸರಾಫ್ ಐಕಳ ಪಾಲ್ ಪಡೆದಿತ್ತೆರ್.
ಕ್ರಿಕೆಟ್ ಪಂತೊಡು ಆರ್ಯನ್ ಪಿಂಕ್ ಪ್ಯಾಂಥರ್ಸ್ ಸುರುತ್ತ ಇನಾಮುನ್, ಬ್ರಹ್ಮಾವರದ ಎಸ್ಎಂಎಸ್ ಪ್ಯಾಂಥರ್ಸ್ ರಡ್ಡನೇ ಇನಾಮುನ್ ಪಡೆತೆರ್. ಚೈತ್ರಾ ಸೇರಿಗಾರ್ ಉತ್ತಮ ದಾಂಡಿಗ ಸರಣಿ ಶ್ರೇಷ್ಟ ಪ್ರಶಸ್ತಿನ್ ಪಡೆತೆರ್. ಸಂಧ್ಯಾ ಭಟ್ ಪಂದ್ಯ ಶ್ರೇಷ್ಟ, ಲಕ್ಷ್ಮಿ ಉತ್ತಮ ವಿಕೇಟ್ ಕೀಪರ್, ಸೌಜನ್ಯ ಬೆಸ್ಟ್ ಕ್ಯಾಚರ್, ಚಿತ್ರಾ ಉತ್ತಮ ಎಸೆತಗಾರಿಗೆ ಪ್ರಶಸ್ತಿನ್ ಪಡೆತೆರ್. ಈ ಕ್ರಿಕೆಟ್ ಟೂರ್ನಿಡ್ 8 ಪ್ರಬಲ ಮಹಿಳಾ ಕ್ರಿಕೆಟ್ ಕೂಟಲು ಪಾಲ್ ಪಡೆದಿತ್ತ್ಂಡ್.
ಉಬಾರ್: ಪೊಂಜೋವ್ ನ ಮಿತ್ತ್ ಪೆಟ್ಟ್ ಮಲ್ತ್ ದ್, ಬೊರ್ಚಂದಿನ ನೆರ್ನ ಕೇಸ್ ದ ಬಗೆಟ್ಟ್ ಗಂಗಾಧರ ಪನ್ಪುನಾರೆನ ಮಿತ್ತ್ ಉಬಾರ್ ಠಾಣೆಡ್ ಕೇಸ್ ದಾಖಲಾತ್ಂಡ್.
ಈ ಬಗೆಟ್ಟ್ ಮೋಹಿನಿ ನೆಕ್ಕರಾಜೆ ಮೇರ್ ಉಬಾರ್ ಠಾಣೆಗ್ ದೂರು ಕೊರ್ತೆರ್. ದೂರು ಸ್ವೀಕಾರ ಮಲ್ತಿನ ಉಬಾರ್ ಪೊಲೀಸೆರ್ ಆರೋಪಿನ ಮಿತ್ತ್ ಕೇಸ್ ದಾಖಲ್ ಮಲ್ದೆರ್.
ಥಾಣೆ: ಮೀರಾರೋಡ್ ಅಯ್ಯಪ್ಪ ಸೇವಾ ಸಮಿತಿದ ಮುತಾಲಿಕೆಡ್ ತುಳು ಹರಿಕಥಾ ಸಂಕೀರ್ತನೆ ಏಕಾದಶಿ ವೃತ ಮಹಿಮೆ ಡಿ.30 ಕ್ಕ್ ಮೀರಾರೋಡ್ ಅಯ್ಯಪ್ಪ ಮಂದಿರಡ್ ನಡಪರೆ ಉಂಡು.
ಈ ಲೇಸ್ ವಿಶ್ವೇಶ ದಾಸ ಹರಿಕಥಾ ವಿದ್ವಾನ್ ಕೈರಬೆಟ್ಟು ವಿಶ್ವನಾಥ ಭಟ್ ಮೆರೆರ್ದ್ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲದ ಸರ್ಕಾರಿ ಪದವಿಪೂರ್ವ ಬೊಕ್ಕ ಪದವಿ ಕಾಲೇಜ್ ಲೆಡ್ ಎಡ್ಡೆ ರಿಸಲ್ಟ್ ದಾಖಲ್ ಮಲ್ಪುನ ದಿಟ್ಟಿಡ್ ಶಿಕ್ಷಕೆರೆಗ್ ಬೊಕ್ಕ ಪ್ರತಿಭಾವಂತ ವಿದ್ಯಾರ್ಥಿಲೆಗ್ ಸನ್ಮಾನದ ಮುಕೇನ ಪ್ರೋತ್ಸಾಹ ಬೊಕ್ಕ ನನದ ದಿನಟ್ಟ್ ವಿದ್ಯಾರ್ಥಿಲೆಗ್ ಕೌನ್ಸೆಲಿಂಗ್ ಸುರು ಮಲ್ಪುನ ದಿಟ್ಟಿಡ್ ಸುರುಕು ಶಿಕ್ಷಕೆರೆಗ್ ಇಸೇಸ ತರಬೇತಿ ಲೇಸ್ ನ್ ಶಾಸಕೆರ್ ವೇದವ್ಯಾಸ ಕಾಮತ್ ಮೆರೆನ ಮುತಾಲಿಕೆಡ್ ಏರ್ಪಾಡ್ ಮಲ್ದೆರ್. ಅತ್ತಂದೆ ಉಂದುವೇ ಬರ್ಪಿನ ಡಿ.30 ಸನಿಯಾರದಾನಿ ಲಾಲ್ ಬಾಗ್ ದ ಮಣ್ಣಗುಡ್ಡೆ ಮಾರ್ಗಡ್ ಇಪ್ಪುನ ಭಾರತ್ ಸ್ಕೌಟ್ಸ್ ಬೊಕ್ಕ ಗೈಡ್ಸ್ ಸಭಾಂಗಣಡ್ ಲೇಸ್ ನಡಪರೆ ಉಂಡು.
ಕುಡ್ಲ ಪೇಂಟೆ ದಕ್ಷಿಣ ವಿಧಾನಸಭೆ ಕ್ಷೇತ್ರ ವ್ಯಾಪ್ತಿದ ಸರ್ಕಾರಿ ಪದವಿಪೂರ್ವ ಬೊಕ್ಕ ಪದವಿ ಕಾಲೇಜ್ ಲೆನ ವಿದ್ಯಾರ್ಥಿಲು ಬೊಕ್ಕ ಶಿಕ್ಷಕೆರೆಗ್ ಮಾತ್ರ ಅನ್ವಯ ಆಪುನ ಈ ಲೇಸ್ ಡ್, ಈ ದುಂಬುದ ಸೆಮಿಸ್ಟರ್/ಅವಧಿಡ್ ಅಕ್ಲೆನ ಅಕ್ಲೆನ ಇಸಯಡ್ 100 % ದಾತ್ ರಿಸಲ್ಟ್ ಪಡೆಯಿನ ಶಿಕ್ಷಕೆರೆಗ್ ಬೊಕ್ಕ ನೆರ್ದ್ ದುಂಬುದ ಸೆಮಿಸ್ಟರ್/ಅವಧಿದ ಒವ್ವೇ ಇಸಯಡ್ ನೂದೆಕ್ಕ್ ನೂದು ಮಾರ್ಕ್ ಪಡೆಯಿನ ವಿದ್ಯಾರ್ಥಿಲೆಗ್ ಇಸೇಸ ಸನ್ಮಾನ ಲೇಸ್ ಆಯೋಜನೆ ಮಲ್ದ್ಂಡ್. ಬೊಕ್ಕ ಶಿಕ್ಷಕೆರೆಗ್ ಇಸೇಸ ತರಬೇತಿ ಲೇಸ್ ನ್ ಆಯೋಜನೆ ಮಲ್ದ್ಂಡ್ ಪಂದ್ ಅಟ್ಟಣೆ ಸಭೆಟ್ಟ್ ಶಾಸಕೆರ್ ಪಂಡೆರ್.
ಉಂದು ಪ್ರತಿಭಾನ್ವಿತ ವಿದ್ಯಾರ್ಥಿಲೆಡ ನನಾತ್ ಎಚ್ಚದ ವ್ಯಕ್ತಿತ್ವ ವಿಕಸನ, ಶೈಕ್ಷಣಿಕ ಅಭಿವೃದ್ಧಿ, ಪ್ರೇರಣೆ ಆಪುನೆತ್ತೊಟ್ಟಿಗೆ ಶಿಕ್ಷಕೆರೆಗ್ ತನ್ನ ಕರ್ತವ್ಯದಡೆಗ್ ನನಾತ್ ಜಬದಾರಿಯಾದ್ ಬೇಲೆ ಮಲ್ಪರೆ ಪ್ರೋತ್ಸಾಹ ಕೊರ್ಪುಂಡು ಪನ್ಪುನವು ಶಾಸಕೆರ್ ವೇದವ್ಯಾಸ್ ಕಾಮತ್ ಮೆರೆನ ಆಶಯ ಆತ್ಂಡ್.
ಸರಕಾರಿ ಪದವಿ ಪೂರ್ವ ಕಾಲೇಜ್ ನಾಲ್ಯಪದವು ಶಕ್ತಿನಗರ, ಕಾರ್ ಸ್ಟ್ರೀಟ್ ಪದವಿ ಪೂರ್ವ ಬೊಕ್ಕ ಪದವಿ ಕಾಲೇಜ್ ರಥಬೀದಿ, ಮಹಿಳಾ ಪದವಿ ಪೂರ್ವ ಬೊಕ್ಕ ಪದವಿ ಕಾಲೇಜ್ ಬಲ್ಮಠ, ಬೊಕ್ಕಪಟ್ಣ ಪದವಿ ಪೂರ್ವ ಕಾಲೇಜ್ ಬೊಕ್ಕ ಹಂಪನಕಟ್ಟೆದ ಮಂಗಳೂರು ವಿಶ್ವವಿದ್ಯಾನಿಲಯ ಪದವಿ ಕಾಲೇಜ್ ಈ ಪಟ್ಟಿಡ್ ಉಂಡು.
ಪುತ್ತೂರು: ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಶ್ರೀ ಅಯ್ಯಪ್ಪ ದೀಪೋತ್ಸವ ಬ್ರಹ್ಮಶ್ರೀ ಕುಂಟಾರು ರವೀಶ ತಂತ್ರಿಲೆನ ಮುತಾಲಿಕೆಡ್ ಡಿ.27 ಕ್ಕ್ ನಡಪರೆ ಉಂಡು.
ಬೊಲ್ಪುಗು ದೇವೆರೆನ ಪ್ರಾರ್ತನೆ, ಗಣಪತಿ ಹವನ, ಭಜನೆ, ಶ್ರೀ ಅಯ್ಯಪ್ಪ ಗುಡಿಟ್ಟ್ ಶ್ರೀ ಅಯ್ಯಪ್ಪ ದೇವೆರೆಗ್ ದ್ರವ್ಯ, ಭಸ್ಮ, ಸುವಸ್ತುಲೆರ್ದ್ ಅಭಿಷೇಕ, ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಬೊಳುವಾರು ಶ್ರೀ ಆಂಜನೇಯ ಮಂತ್ರಾಲಯರ್ದ್ ಪಾಲ್ ಕೊಂಬು/ ಪಾಲಶ ಮರತ್ತ ಕೊಂಬೆದ ಮೆರವಣಿಗೆ, ರಾತ್ರೆ ಶ್ರೀ ಅಯ್ಯಪ್ಪ ಗುಡಿಟ್ಟ್ ಮಂಗಳಾರತಿ, ದೀಪಾರಾಧನೆ, ಅಯ್ಯಪ್ಪ ವಳಕ್ಕು ಲೇಸ್, ಅಯ್ಯಪ್ಪ ವಾವರಯುದ್ದ, ಕೇರಳದ ವಿಳಕ್ಕು ಲೇಸ್, ಕೆಂಡ ಸೇವೆ ನಡಪರೆ ಉಂಡು ಪಂದ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಕೇಶವಪ್ರಸಾದ್ ಬೊಕ್ಕ ಕಾರ್ಯನಿರ್ವಹಣಾಧಿಕಾರಿ ಕೆ.ವಿ.ಶ್ರೀನಿವಾಸ್ ತೆರಿಪಾದೆರ್.
ಪಾಕಿಸ್ತಾನ: ಪಾಕಿಸ್ತಾನಡ್ ತೆತ್ತಿದ ಕಿರಯ ಎಚ್ಚಾವೊಂದು ಉಂಡು. ಮುಲ್ಪ ಒಂಜಿ ತೆತ್ತಿಗ್ 30 ರೂ. ಆತ್ಂಡ್.
ಒಂಜಿ ಡಜನ್ ತೆತ್ತಿದ ಕಿರಯ 360 ರೂ. ಪಂಡ, 30 ಡಜನ್ ತೆತ್ತಿದ ಕಿರಯ 10,500 ರೂ. ರ್ದ್ 12,500 ರೂ. ಗ್ ಎಚ್ಚಾತ್ಂಡ್ ಪಂದ್ ಪಾಕಿಸ್ತಾನದ ಮಾಧ್ಯಮಲು ವರದಿ ಮಲ್ದ್ಂಡ್.
