Tulu News

ಕುತ್ತೆತ್ತೂರ್ ಬಾಜಾವುದ ಶ್ರೀ ಕೋರ್ದಬ್ಬು ದೈವೊಲ್ಯಡ್ ವರ್ಷದ ನೇಮ

ಕುತ್ತೆತ್ತೂರ್ ಬಾಜಾವುದ ಶ್ರೀ ಕೋರ್ದಬ್ಬು ದೈವೊಲ್ಯಡ್ ವರ್ಷದ ನೇಮ ನ.17 ಬೊಕ್ಕ 18 ಕ್ಕ್ ನಡತ್ಂಡ್.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ದೈವೊಲೆನ ಕೃಪೆಗ್ ಪಾತ್ರರಾಯೆರ್.

ಉಪ್ಪಳ ಶ್ರೀ ಭಗವತೀ ಕ್ಷೇತ್ರಡ್ ಚಂಡಿಕಾ ಹೋಮ ಬೊಕ್ಕ ಸಾಮೂಹಿಕ ಇಸೇಸ ಪೂತ್ತ ಪೂಜೆ

ಕಾಸ್ರೋಡು: ಉಪ್ಪಳ ಶ್ರೀ ಭಗವತೀ ಮಹಿಳಾ ಸಂಘ (ರಿ.) ದ ಮುತಾಲಿಕೆಡ್ 20ನೇ ವರ್ಷದ ಲೆಕ್ಕೊಡು ಚಂಡಿಕಾ ಹೋಮ ಬೊಕ್ಕ ಸಾಮೂಹಿಕ ಇಸೇಸ ಪೂತ್ತ ಪೂಜೆ ನ.19 ಐತಾರ ಉಪ್ಪಳ ಶ್ರೀ ಭಗವತೀ ಕ್ಷೇತ್ರಡ್ ನಡತ್ಂಡ್.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾಯೆರ್.

ನೆಲ್ಲಿಕಾಯಿ ಆರೋಗ್ಯಗ್ ಎಡ್ಡೆ

ನೆಲ್ಲಿಕಾಯಿ ತಿನ್ಪುನೆರ್ದ್ ನರಮಾನಿನ ಆರೋಗ್ಯಗ್ ಮಸ್ತ್ ಎಡ್ಡೆ ಉಂಡು.

ನೆಲ್ಲಿಕಾಯಿಡ್ ಇಪ್ಪುನ ಫೈಬರ್ ಕರ್ಲ್ ದ ಚಲನೆನ್ ಸರಿ ಮಲ್ಪುಂಡು. ಉಂದು ಮಲಬದ್ಧತೆ ಬೊಕ್ಕ ಜೀರ್ಣಕಾರಿ ಸಮಸ್ಯೆನ್ ಕಮ್ಮಿ ಮಲ್ಪುಂಡು. ನೆಟ್ಟ್ ಇಪ್ಪುನ ಫ್ಲೇವನಾಯ್ಡ್, ಆ್ಯಂಟಿ ಆಕ್ಸಿಡೆಂಟ್ ಲು ಜೂವದುಲಯಿ ಡ್ ಇಪ್ಪುನ ಹಾನಿಕಾರಕ ಫ್ರೀ radical ದ ಮಿತ್ತ್ ಪೊರ್ಂಬಾಟ ಮಲ್ತ್ ದ್ ಒತ್ತಡನ್ ಕಮ್ಮಿ ಮಲ್ಪುಂಡು. ಬೊಕ್ಕ ಬೊಲ್ದು ನೆತ್ತೆರ್ ನ್ ಎಚ್ಚ ಮಲ್ಪುಂಡು. ಶೀತ, ತೆಮ್ಮ, ಜ್ವರತ್ತಂಚಿನ ಋತುಮಾನದ ಸೀಕ್ ನ್ ತಡೆಯೆರೆ ನೆಲ್ಲಿ ಆಮ್ಲ ಸಕಾಯ ಮಲ್ಪುಂಡು. ಚರ್ಮ, ತರೆತ್ತ ಪೊಟ್ಟು ಸಮಸ್ಯೆನ್ಲಾ ಉಂದು ಕಮ್ಮಿ ಮಲ್ಪುಂಡು.

ನ.24: ಅರಮನೆ ಮೈದಾನಡ್ ಸಿರಿ ದೇವಿ ಮಹಿಮೆ ತುಳು ಆಟ

ತುಳುಕೂಟ 50ನೇ ವರ್ಷೊದ ವಾರ್ಷಿಕ ಉಚ್ಚಯದ ಲೆಕ್ಕೊಡು ಬೆಂಗ್ಲೂರ್ ಶ್ರೀ ಕಲಾ ಸಂಗಮ (ರಿ.) ಮೊಕ್ಲೆನ ಮುತಾಲಿಕೆಡ್ ಸಿರಿ ದೇವಿ ಮಹಿಮೆ ತುಳು ಆಟ ನ.24 ಸುಕ್ರಾರ ಬಯ್ಯಗ್  ನೀರ್ಚಲ್ಲ್ ಅರಮನೆ ಮೈದಾನಡ್ ನಡಪರೆ ಉಂಡು.

ಈ ಆಟನ್ ಶರವೂರು ಶ್ರೀನಿವಾಸ್ ರಾವ್ ಸಂಯೋಜನೆ ಮಲ್ದೆರ್. ಹಿಮ್ಮೇಳಡ್ ಉಂಡಮನೆ ಶ್ರೀಕೃಷ್ಣ ಭಟ್, ಶ್ರೀಶ ರಾವ್ ನಿಡ್ಲೆ, ಜಿತೇಶ್ ಬಿ ಕೋಳ್ಯೂರ್, ಕೀರ್ತನ್ ಕೋಳ್ಯೂರ್, ಶ್ರೇಯಸ್ ಕೃಷ್ಣಾಪುರ, ಬೊಕ್ಕ‌ ಮುಮ್ಮೇಳಡ್ ಅವಿನಾಶ್ ಉಬರಡ್ಕ, ಅಭಿಜಿತ್ ರಾಯಿ, ಪವನ್ ಕುಮಾರ್ ನಿರ್ಚಲ್, ಹೇಮಂತ್ ಆಚಾರ್ಯ, ಧನುಷ್ ರಾವ್ ಎಕ್ಕರ್, ಆದರ್ಶ್ ವಿ ಎ, ಕೃಷ್ಣ ಜೋಯಿಸ್, ಶ್ರೀ ಶಂಕರ ಜೋಯಿಸ್, ಸುಧಾಕರ್ ಜೈನ್ ಹೊಸಬೆಟ್ಟು, ಶ್ರೀನಿವಾಸ್ ರಾವ್ ಶರವೂರು, ಶ್ರದ್ಧಾ ರಾವ್ ಶರವೂರು, ಶ್ರೇಯಾ ರಾವ್ ಶರವೂರು, ಕಾರುಣ್ಯ ರಾವ್ ಶರವೂರು ಪಾಲ್ ಪಡೆಯೆರೆ ಉಲ್ಲೆರ್.

ಫಾತಿಮಾ ರಲಿಯಾ ಮೆರೆನ ‘ಕಡಲು ನೋಡಲು ಹೋದವಳು’ ಬೂಕುಗು ಪಿ. ಲಂಕೇಶ್ ಪ್ರಶಸ್ತಿ

ಒಡಿಪು ಜಿಲ್ಲೆ ಪೆಜಮಾಡಿ ಗ್ರಾಮದ ಫಾತಿಮಾ ರಲಿಯಾ ಮೆರೆನ ‘ಕಡಲು ನೋಡಲು ಹೋದವಳು’ ಬೂಕು ಶಿವಮೊಗ್ಗದ ಕರ್ನಾಟಕ ಸಂಘ ಪ್ರತಿ ವರ್ಷ ಕೊರ್ಪುನ ಪಿ.ಲಂಕೇಶ್ ಪ್ರಶಸ್ತಿಗ್ ಆಯ್ಕೆ ಆತ್ಂಡ್.

ನ. 26 ಕ್ಕ್ ಶಿವಮೊಗ್ಗದ ಹಸೂಡಿ ವೆಂಕಟ ಶಾಸ್ತ್ರಿ ಸಾಹಿತ್ಯ ಭವನಡ್ ಪ್ರಶಸ್ತಿ ಪ್ರದಾನ ಸಮಾರಂಭ ನಡಪರೆ ಉಂಡು. 10 ಸಾರ ರೂ. ಪನವುದ ಇನಾಮು ಬೊಕ್ಕ ನೆಂಪು ಕಾಣಿಕೆ ಈ ಪ್ರಶಸ್ತಿಡ್ ಉಂಡು. ಫಾತಿಮಾ ರಲಿಯಾ ಮೆರೆನ ಸುರುತ್ತ ಬೂಕು ಉಂದಾತ್ಂಡ್. ಅಹರ್ನಿಶಿ ಪ್ರಕಾಶನ ಪ್ರಕಟ ಮಲ್ದ್ಂಡ್.

ಮೀನ್ ಮೇಳದ ಪೋಸ್ಟರ್‌ ಬುಡುಗಡೆ

ಒಡಿಪು: ದ.ಕ ಬೊಕ್ಕ ಒಡಿಪು ಜಿಲ್ಲಾ ಸಹಕಾರಿ ಮೀನ್ ಮಾರಾಟ ಫೆಡರೇಶನ್ ನಿ. ಕುಡ್ಲದ ಮುತಾಲಿಕೆಡ್, ಜಲಾನಯನ ಅಭಿವೃದ್ಧಿ ಇಲಾಖೆ, ಮೀನುಗಾರಿಕೆ ಇಲಾಖೆ ಬೊಕ್ಕ ಸ್ಕೋಡೈಸ್ ಸಂಸ್ಥೆ ಶಿರಸಿ ಮೊಕ್ಲೆನ ಒಟ್ಟುಸೇರಿಗೆಡ್ ರಚನೆ ಆಯಿನ ಮಲ್ಪೆ ಮೀನುಗಾರೆರೆನ ಉತ್ಪಾದಕೆರೆನ ಕಂಪನಿ ಡಿ.2 ಬೊಕ್ಕ 3 ಕ್ಕ್ ಅಟ್ಟಣೆ ಮಲ್ದಿನ ಮೀನ್ ಮೇಳ-2023 ತ್ತ ಪೋಸ್ಟರ್ ನ್ ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ ಬೊಕ್ಕ ಬೈಂದೂರು ಶಾಸಕೆರ್ ಗುರುರಾಜ್ ಗಂಟಿಹೊಳೆ ಮೇರ್ ಬುಡುಗಡೆ ಮಲ್ತೆರ್.

ಬೊಕ್ಕ ಪಾತೆರ್ನ ಮೇರ್, ಮತ್ರ್ಯಮೇಳ-2023 ಭಾರೀ ಯಶಸ್ವಿಯಾದ್ ನಡಪಡ್, ಒಡಿಪುದ ಬೊಕ್ಕ ಸುತ್ತಮುತ್ತದ ಊರುದ ಜನಕ್ಲೆಗ್ ಸಾಗರೋತ್ಪನ್ನಲೆನ ಕುಷಿ ಪಡೆಯೆರೆ ಮಲ್ಪೆ ಮೀನುಗಾರೆರೆನ ಉತ್ಪಾದಕೆರೆನ ಕಂಪನಿ ಆಯೋಜನೆ ಮಲ್ತಿನ ಲೇಸ್ ಯಶಸ್ವಿ ಆವಡ್ ಪಂದ್ ಎಡ್ಡೆಪ್ಪು ಬಾಮಿಯೆರ್‌.

ಈ ಪೊರ್ತುಡು ಮಲ್ಪೆ ಮೀನುಗಾರೆರೆನ ಉತ್ಪಾದಕೆರೆನ ಕಂಪನಿದ ಗುರ್ಕಾರ್ದಿ ವನಜ ಪುತ್ರನ್, ನಿರ್ದೇಶಕೆರ್ ಜಯಂತಿ ಸಾಲಿಯಾನ್, ನಿರ್ಮಲ ಸಾಲಿಯಾನ್, ವೇದಾವತಿ ಪುತ್ರನ್ ಬೊಕ್ಕ ರೇಣುಕಾ, ಮುಖ್ಯ ಕಾರ್ಯನಿರ್ವಾಹಕೆರ್ ವಿಷ್ಣುಪ್ರಸಾದ್ ಕಾಮತ್ ಇತ್ತೆರ್.