ರಾಜ್ಯದ ಸುಮಾರ್ ಜಿಲ್ಲೆಡ್ ಇನಿರ್ದ್ 3 ದಿನ ಭಾರೀ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.
ಇನಿ ಕೊಡಗು, ಮೈಸೂರ್ ಜಿಲ್ಲೆಗ್, ಎಲ್ಲೆ ತುಳುನಾಡ್ ದ ಉತ್ತರ ಕನ್ನಡ, ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆಗ್, ಬೊಕ್ಕ ಎಲ್ಲಂಜಿ ಚಾಮರಾಜನಗರ, ಚಿಕ್ಕಮಗಳೂರು, ಕೊಡಗು, ಶಿವಮೊಗ್ಗ ಬೊಕ್ಕ ಹಾಸನ ಜಿಲ್ಲೆಡ್ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್. ಉತ್ತರ ಕರ್ನಾಟಕದ ಕೆಲವು ಭಾಗಲೆಡ್ ಎಡ್ಡೆ ಬರ್ಸ ಬರ್ಪುಂಡು. ಬೆಂಗ್ಲೂರ್ ಡ್ ಇನಿಲ ಬರ್ಸ ಬರ್ಪುಂಡು ಪಂದ್ IMD ಪಂತ್ಂಡ್.
ಬೆಸ್ಕಾಂ ಸೇರ್ದ್ ರಾಜ್ಯ ಇಡೀ ಮತ 5 ಕರೆಂಟ್ ಸರಬರಾಜು ಕಂಪನಿದ ವ್ಯಾಪ್ತಿಡ್ 3 ದಿನ ಆನ್ ಲೈನ್ ಸೇವೆ ಬಂದ್ ಆಪುಂಡು.
ನ.24-26 ಮುಟ್ಟ ಪೊಸ ಕರೆಂಟ್ ಸಂಪರ್ಕ, ಪುದರ್/ ಲೋಡ್ ಬದಲಾವಣೆ, ನಗದು ಪಾವತಿ, ಆನ್ ಲೈನ್ ಮುಖೇನ ಬಿಲ್ ಪಾವತಿ ಸೇರಿನಂಚೆನೆ ಬೇತೆ ಸೇವೆಗ್ ಇಪ್ಪುಜಿ ಪಂದ್ ಮೆಸ್ಕಾಂ ತೆರಿಪಾದ್ಂಡ್. IT ಸೇವೆಗ್ ಸಂಬಂಧಪಟ್ಟಿನಂಚೆನೆ ತಂತ್ರಾಂಶ ಬೊಕ್ಕ ಹಾರ್ಡ್ ವೇರ್ ಅಪ್ ಗ್ರೇಡ್ ಮಲ್ಪುನ ಬಗೆಟ್ಟ್ 3 ದಿನ ಆನ್ ಲೈನ್ ಸೇವೆ ಇಪ್ಪುಜಿ ಪಂದ್ ಪಂತ್ಂಡ್.
ಕೇರಳದ ಬೇತೆ ಬೇತೆ ಭಾಗಡ್ ಬರ್ಸ ಬರೊಂದು ಉಂಡು. ಅಂಚೆನೆ ಶಬರಿಮಲೆಟ್ಟ್ ಭಾರೀ ಬರ್ಸ ಬರೊಂದು ಇಪ್ಪುರ್ನೆದಾವೆರ ರೆಡ್ ಅಲರ್ಟ್ ಘೋಷಣೆ ಆತ್ಂಡ್.
ಅತ್ತಂದೆ ನೀಲಕಲ್ ರ್ದ್ ಪಂಪೈಗ್ ಪೋಪುನ ಮಾರ್ಗಡ್ ಗುಡ್ಡೆ ಜರಿದ್ ಆ ಮಾರ್ಗಡ್ ಸಂಚಾರ ಮಲ್ಪೆರೆ ಆವೊಂದು ಇಜ್ಜಿ. ಅಂಗಾರೆ ಬೊಕ್ಕ ಬುಧಾರ ಬತ್ತಿನ ಭಾರೀ ಬರ್ಸದಾವೆರ ಶಬರಿಮಲೆ ಯಾತ್ರಿಲು ಪರದಾಡುಲೆಕ್ಕ ಆತ್ಂಡ್.
ಕಾರ್ಲದ ಜಯಂತಿನಗರ ಶ್ರೀ ರಾಮ ಮಂದಿರಡ್ ನ.24 ಕ್ಕ್ ತುಳಸಿ ಪೂಜೆ ನಡಪರೆ ಉಂಡು.
ಭಕ್ತಾದಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ರಾಮ ಪರಿವಾರ ದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಕಾರ್ಲ ಶ್ರೀ ರಾಮ ಮಂದಿರದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಧ್ಯಪ್ರದೇಶ, ರಾಜಸ್ಥಾನ, ಮಿಜೋರಾಂ, ತೆಲಂಗಾಣ ಬೊಕ್ಕ ಛತ್ತೀಸ್ ಗಢ ರಾಜ್ಯಲೆನ ವಿಧಾನಸಭಾ ಚುನಾವಣೆ ಘೋಷಣೆ ಆಯಿನ ಬೊಕ್ಕ ಚುನಾವಣಾ ಆಯೋಗ 1760 ಕೋಟಿ ರೂ.ನ್ ವಶಕ್ಕ್ ಪಡೆತ್ಂಡ್.
2018 ತ್ತ ವೋಟುದ ಪೊರ್ತುಡು 239.15 ಕೋಟಿ ರೂ.ನ್ ವಶಕ್ಕ್ ಪಡೆತ್ಂಡ್. ವೋಟುಡು ಆಪಿನ ಅಕ್ರಮನ್ ಉಂತಾಯೆರೆ ಆಯೋಗ ಕಟ್ಟ್ ನಿಟ್ಟ್ ದ ಕ್ರಮನ್ ಜಾರಿ ಮಲ್ದ್ಂಡ್. ನ.30 ಕ್ಕ್ ತೆಲಂಗಾಣದ ಮತ ತಾನಗ್ ಒಂಜೇ ಹಂತಡ್ ವೋಟು ನಡಪರೆ ಉಂಡು.
ನಿಗಮ ಮಂಡಳಿಗ್ ಅಧ್ಯಕ್ಷೆರೆನ ನೇಮಕಾತಿಗ್ ಸಂಬಂಧಪಟ್ಟಿನಂಚೆನೆ ಕಾಂಗ್ರೆಸ್ ನಾಯಕೆರೆನ ಮಹತ್ವದ ಸಭೆ ಇನಿ ಬೆಂಗ್ಲೂರ್ ಡ್ ನಡಪರೆ ಉಂಡು.
ಈ ಸಭೆಟ್ಟ್ ಕಾಂಗ್ರೆಸ್ ರಾಜ್ಯ ಉಸ್ತುವಾರಿ ರಣದೀಪ್ ಸುರ್ಜೆವಾಲಾ, ಸಿಎಂ ಸಿದ್ದರಾಮಯ್ಯ ಬೊಕ್ಕ ಡಿಸಿಎಂ ಡಿಕೆಶಿ ಸೇರಿನಂಚೆನೆ ಸುಮಾರ್ ನಾಯಕೆರ್ ಪಾಲ್ ಪಡೆಯೆರೆ ಉಲ್ಲೆರ್.
ನಿಗಮ ಮಂಡಳಿಡ್ ಮಂತ್ರಿ ಪಟ್ಟ ತಿಕ್ಕಂದಿನ 25 ಶಾಸಕೆರೆಗ್ ಅವಕಾಶ ಕೊರೊಡು ಪಂದ್ ಸಿಎಂ ಬಯಸ್ಂಡ, ಕಾರ್ಯಕರ್ತೆರೆಗ್ ಅವಕಾಶ ಕೊರೊಡು ಪಂದ್ ಡಿಕೆಶಿ ಬೇಡಿಕೆ ದೀತೆರ್ ಪಂದ್ ವರದಿ ಆತ್ಂಡ್.
ಯಕ್ಷಗಾನ ತೂಂಡ ಮನಸ್ ದ ಬೇನೆ ದೂರ ಆಪುಂಡು: ಸಂತೋಷ್ ಶೆಟ್ಟಿ ಪುಣೆ
ಕುಡ್ಲ: ಯಕ್ಷಗಾನ ಸುಮಾರ್ ಸೀಕ್ ಗ್ ಮರ್ದ್ ರೂಪಡ್ ಪರಿಣಾಮ ಬೂರುಂಡು. ಯಕ್ಷಗಾನ ತೂಪುನೆರ್ದ್ ಮಾನಸಿಕ ಒತ್ತಡ ದೂರವಾದ್ ನೆಮ್ಮದಿ ಪಡೆವೊಲಿ. ತಾಳಮದ್ದಳೆ ಸಪ್ತಾಹದ ಮುಖೇನ ಯಕ್ಷಾಂಗಣ ಸಂಸ್ಥೆ ಕನ್ನಡ ಬೊಕ್ಕ ತುಳು ಬಾಷೆನ್ ಒರಿಪಾವುನ ಕೆಲಸ ಮಲ್ತೊಂದು ಉಂಡು ಪಂದ್ ಪುಣೆ ಬಂಟರ ಸಂಘದ ಗುರ್ಕಾರೆ ಸಂತೋಷ್ ಶೆಟ್ಟಿ ಪುಣೆ ಪಂಡೆರ್.
ಯಕ್ಷಾಂಗಣ ಕುಡ್ಲ, ಯಕ್ಷಗಾನ ಚಿಂತನ- ಮಂಥನ ಬೊಕ್ಕ ಪ್ರದರ್ಶನ ವೇದಿಕೆ ಕುಡ್ಲ, ವಿ.ವಿ. ಡಾ.ದಯಾನಂದ ಪೈ, ಸತೀಶ್ ಪೈ ಯಕ್ಷಗಾನ ಅಧ್ಯಯನ ಕೇಂದ್ರ ಬೊಕ್ಕ ಕರ್ನಾಟಕ ಯಕ್ಷ ಭಾರತಿ ಪುತ್ತೂರ್ ದ ಒಟ್ಟುಸೇರಿಗೆಡ್ ನಡಪಾವುನ ಕರ್ನಾಟಕ ರಾಜ್ಯೋತ್ಸವ ಕಲಾ ಸಂಭ್ರಮ, 11ನೇ ವರ್ಷದ ನುಡಿ ಪರ್ಬ ‘ಶ್ರೀಹರಿ ಚರಿತ್ರೆ’ ಯಕ್ಷಗಾನ ತಾಳಮದ್ದಳೆ ಸಪ್ತಾಹ-2023 ನ್ ಕುಡ್ಲ ವಿಶ್ವವಿದ್ಯಾನಿಲಯ ಕಾಲೇಜ್ ರವೀಂದ್ರ ಕಲಾಭವನಡ್ ಉದಿಪನ ಮಲ್ತ್ ದ್ ಐತಾರ ಮೇರ್ ಪಾತೆರಿಯೆರ್.
ಮಲ್ಲ ಬಿನ್ನೆರಾಯಿನ ಶಾಸಕೆರ್ ವೇದವ್ಯಾಸ ಕಾಮತ್ ಪಾತೆರ್ದ್, ಇತ್ತೆದ ಪೀಳಿಗೆ ಮೊಬೈಲ್ ತೂಪಿನೆಕ್ಕ್ ಜಾಸ್ತಿ ಸಮಯ ಕೊರೊಂದು ಉಂಡು. ಅಂಚಾದ್ ಅವೆರ್ದ್ ದೂರ ಆಯರೆ ಯಕ್ಷಗಾನ ಬೊಕ್ಕ ತಾಳಮದ್ದಳೆ ಬಗೆಟ್ಟ್ ಜೋಕುಲೆಗ್ ಆಸಕ್ತಿ ಮೂಡಿಸಾವೊಡು. ಕಲೆ ಒರಿಪಾಯೆರೆ ಮಾತೆರ್ಲಾ ಸಕಾಯ ಅವೊಡು ಪಂದ್ ಪಂಡೆರ್.
ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಪಾತೆರ್ದ್, ‘ನಮ್ಮ ಮಣ್ಣ್ ದ ಕಲೆನ್ ಬೇತೆ ಬೇತೆ ಆಯಾಮನ್ ಮೆರಪಾವುನ ಯಕ್ಷಾಂಗಣದಂಚಿನ ಸಂಸ್ಥೆಲೆಗ್ ಕುಡ್ಲ ಮಹಾನಗರ ಪಾಲಿಕೆರ್ದ್ ಕೈಟ್ಟಾಯಿನ ಸಕಾಯ ಮಲ್ಪೊಡು ಪಂದ್ ಪಂಡೆರ್.
ಯಕ್ಷಾಂಗಣದ ಮಾನಾದಿಗೆದ ಗುರ್ಕಾರೆ ಡಾ.ಎ.ಜೆ. ಶೆಟ್ಟಿ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಅಹಮದಾಬಾದ್ ಉದ್ಯಮಿ, ಉಪ್ಪಳ ರಾಜರಾಜೇಶ್ವರಿ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಕೆ.ಕೆ. ಶೆಟ್ಟಿ ಸಂಸ್ಥೆದ ಮಾನಾದಿಗೆದ ಒತ್ತು ಗುರ್ಕಾರೆಯಾದ್ ಪದಗ್ರಹಣ ಮಲ್ತೆರ್. ಕುಡ್ಲ ವಿ.ವಿ. ಡಾ.ದಯಾನಂದ ಪೈ, ಸತೀಶ್ ಪೈ ಯಕ್ಷಗಾನ ಅಧ್ಯಯನ ಕೇಂದ್ರ ನಿರ್ದೇಶಕೆರ್ ಡಾ.ಧನಂಜಯ ಕುಂಬ್ಳೆ ಎಡ್ಡೆಪ್ಪು ಬಯಕಿಯೆರ್.
ಯಕ್ಷಗಾನ ಕಲಾ ಪೋಷಕೆರಾದ್ ಕೊರ್ಪುನ ಯಕ್ಷಾಂಗಣ ರಾಜ್ಯೋತ್ಸವ ಪುರಸ್ಕಾರನ್ ಉದ್ಯಮಿ – ಸಮಾಜ ಸೇವಕೆರ್ ಯಾದವ ಕೋಟ್ಯಾನ್ ಪೆರ್ಮುದೆ ಮೆರೆಗ್ ಪ್ರದಾನ ಮಲ್ತೆರ್.
ಕುಡ್ಲ ವಿಶ್ವವಿದ್ಯಾನಿಲಯದ ಕುಲಪತಿ ಪ್ರೊ.ಜಯರಾಜ್ ಅಮೀನ್ ಮೇರ್ ಪ್ರಶಸ್ತಿ ಪ್ರದಾನ ಮಲ್ತ್ ದ್ ಪಾತೆರ್ದ್, ಆಧುನಿಕ ಸಮಾಜಡ್ ಸುಮಾರ್ ಸವಾಲ್ ದ ನಡುಟ್ಟ್ ಲ ಯಕ್ಷಗಾನ ಸಂಪ್ರದಾಯದೊಟ್ಟಿಗೆ ನಮ್ಮ ನಾಡ್ ದ ಸಂಸ್ಕೃತಿನ್ ಬುಲೆಪಾವೊನ ಕಾರ್ಯನ್ ಮಲ್ತೊಂದು ಉಂಡು. ಯಕ್ಷಗಾನ ತುಳುನಾಡ್ ದ ಪೆರ್ಮೆದ ಕಲೆಯಾದ್ ನೈತಿಕವಾದ್, ಶೈಕ್ಷಣಿಕವಾದ್ ಸಮಾಜಡ್ ಜಾಗೃತಿ ಮೂಡಿಸಾವುನ ಬೇಲೆ ಮಲ್ತೊಂದು ಉಂಡು ಪಂದ್ ಪಂಡೆರ್.
ಯಕ್ಷಾಂಗಣದ ಕಾರ್ಯಾಧ್ಯಕ್ಷೆರ್ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಎದ್ಕೊಂದು ಪ್ರಸ್ತಾವನೆ ಮಲ್ತೆರ್. ಉಪಾಧ್ಯಕ್ಷೆರ್ ರವೀಂದ್ರ ರೈ ಕಲ್ಲಿಮಾರು ಅಭಿನಂದನಾ ಭಾಷಣ ಮಲ್ತೆರ್. ಮಹಿಳಾ ಪ್ರತಿನಿಧಿ ನಿವೇದಿತಾ ಎನ್.ಶೆಟ್ಟಿ ಸನ್ಮಾನ ಪತ್ರ ಓದಿಯೆರ್.
ಕಾರ್ಯದರ್ಶಿ ಕೆ.ಲಕ್ಷ್ಮೀನಾರಾಯಣ ರೈ-ಹರೇಕಳ ಸೊಲ್ಮೆ ಸಂದಾಯೆರ್. ಪ್ರಧಾನ ಕಾರ್ಯದರ್ಶಿ ತೋನ್ಸೆ ಪುಷ್ಕಳ ಕುಮಾರ್ ಲೇಸ್ ನ್ ಸುಧಾರಿಕೆ ಮಲ್ತೆರ್.
ಈ ಪೊರ್ತುಡು ಪ್ರಮುಖೆರ್ ಎಂ. ಸುಂದರ ಶೆಟ್ಟಿ ಬೆಟ್ಟಂಪಾಡಿ, ಕರುಣಾಕರ ಶೆಟ್ಟಿ ಪಣಿಯೂರು, ಸುಧಾಕರ ರಾವ್ ಪೇಜಾವರ, ಸಿದ್ದಾರ್ಥ ಅಜ್ರಿ, ಶರತ್ ಕುಮಾರ್ ಕದ್ರಿ, ಸುಮಾ ಪ್ರಸಾದ್ ಪಾಲ್ ಪಡೆದಿತ್ತೆರ್.
ಬೊಕ್ಕ ಶ್ರೀ ಹರಿ ಚರಿತ್ರೆ ಏಕಾದಶ ಸರಣಿದ ಸುರುತ್ತ ತಾಳಮದ್ದಳೆ ಧ್ರುವ ಚರಿತ್ರೆ ಭವ್ಯಶ್ರೀ ಕುಲ್ಕುಂದ ಮೆರೆನ ಭಾಗವತಿಕೆಡ್ ನಡತ್ಂಡ್. ಪುಗರ್ತೆದ ಅರ್ಥಧಾರಿಲು ಪಾಲ್ ಪಡೆದಿತ್ತೆರ್.
ಸಹಕಾರಿ ವ್ಯವಸ್ಥೆನ್ ಪುಟ್ಟು ಪಾಡ್ದ್ ತುಳುನಾಡ್ ದ ಜನಕ್ ಸ್ವಾಭಿಮಾನದ ಬದ್ ಕ್ ನ್ ನಡಪಾಯೆರೆ ಕಾರಣಕರ್ತೆರಾಯಿನ ಮೊಳವಳ್ಳಿ ಶಿವರಾಯೆರೆನ ಬೇಲೆ ಸಹಕಾರಿ ಕ್ಷೇತ್ರಡ್ ಏಪಲ ನೆಂಪುಡು ಇಪ್ಪುನವು. ಮೇರ್ ತೋಜಾಯಿನ ಸಹಕಾರಿ ತತ್ವೊಲು ವ್ಯಾಪಾರ, ಕೃಷಿ ಬೊಕ್ಕ ಉದ್ಯೋಗ ಸೃಷ್ಟಿ ಗ್ ಪೂರಕ ಆತ್ಂಡ್ ಪಂದ್ ಹಳೆಯಂಗಡಿ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಗುರ್ಕಾರೆ ಎಚ್ ವಸಂತ ಬೆರ್ನಾಡ್ ಪಂಡೆರ್.
ಮೇರ್ ಪ್ರಿಯದರ್ಶಿನಿ ಸೊಸೈಟಿದ ಚಾವಡಿಡ್ ನಡತಿನ ಸಹಕಾರಿ ಸಪ್ತಾಹ ಲೇಸ್ ಡ್ ಪಾತೆರಿಯೆರ್. ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ ಸುದರ್ಶನ್ ಮೇರ್ ಪ್ರಸ್ತಾವಿಕವಾದ್ ಪಾತೆರಿಯೆರ್. ಹಿರಿಯ ಸಿಬ್ಬಂದಿ ಮೋಹನ ದಾಸ್ ಎದ್ಕೊನಿಯೆರ್. ಪ್ರಧಾನ ಕಚೇರಿದ ಸಿಬ್ಬಂದಿ ಲೋಲಾಕ್ಷಿ ಸೊಲ್ಮೆ ಸಂದಾಯೆರ್. ಈ ಪೊರ್ತುಡು ಅಭೀಷ್ಟ ಜೈನ್, ರಕ್ಷಿತಾ ಬೊಕ್ಕ ಲತೇಶ್ ಪಾಲ್ ಪಡೆದಿತ್ತೆರ್.
ಮುಲ್ಕಿ : ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಕೃಪಾಶೀರ್ವಾದೊಡು ನಡಪುನ ಶ್ರೀ ಭಗವತಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದ 2023-24 ನೇ ವರ್ಷದ ಬೊಳ್ಳಿ ಪರ್ಬದ ತಿರ್ಗಾಟದ ಗೌಜಿ ನ.24 ಸುಕ್ರಾರ ರಾತ್ರೆ 9 ಗಂಟೆಗ್
ಶ್ರೀ ಕ್ಷೇತ್ರಡ್ ನಡಪರೆ ಉಂಡು ಪಂದ್ ಶ್ರೀ ಭಗವತಿ ದೇವಸ್ಥಾನದ ಆಡಳಿತ ಸಮಿತಿದ ಅಧ್ಯಕ್ಷೆರ್ ವಾಮನ ಇಡ್ಯಾ ತೆರಿಪಾಯೆರ್.
ಆರ್ ಮುಲ್ಕಿ ಸ್ವಾಗತ್ ಹೋಟೆಲ್ದ ಚಾವಡಿಡ್ ಸೋಮಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿಯೆರ್.
1999ನೇ ಇಸವಿಡ್ ಸಸಿಹಿತ್ಲು ಮೇಳನ್ ಉದಿಪನ ಮಲ್ತ್ ದ್ ಆಶೀರ್ವಾದ ಮಲ್ದಿತ್ತಿನ ಒಡಿಯೂರು ಶ್ರೀ ಗುರುದೇವಾನಂದ ಸ್ವಾಮೀಜಿ ಈ ಬೊಳ್ಳಿ ಪರ್ಬದ ತಿರುಗಾಟಗ್ ಚಾಲನೆ ಕೊರ್ದು ಆಶೀರ್ವಾದ ಮಲ್ಪರೆ ಉಲ್ಲೆರ್. ಕ್ಷೇತ್ರದ ಪ್ರಧಾನ ಅರ್ಚಕೆರ್, ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ಮೇರೆನ ಉಪಸ್ಥಿಟ್ಟ್ ನಡಪುನ ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಪುಗರ್ತೆದ ಭಾಗವತೆರ್ ಪಟ್ಲ ಸತೀಶ್ ಶೆಟ್ರ್, ಬೊಂಬೈದ ಉದ್ಯಮಿ ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ, ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ರಾಮಪ್ಪ ಮಾಸ್ತರ್ ಗುಡ್ಯಾಂ, ಕನಿಲ ಕ್ಷೇತ್ರದ ಗಣೇಶ್ ಬಜಾಲ್, ಸಾರಂತಾಯ ಗರೊಡಿದ ಕಾಂತು ಲಕ್ಕಣ ಗುರಿಕಾರೆರ್, ರೋಹಿತಾಕ್ಷ ಸುವರ್ಣ, ಅಜೆಕಾರ್ ಬಾಲಕೃಷ್ಣ ಶೆಟ್ಟಿ, ಶರತ್ ಎನ್. ಸಾಲ್ಯಾನ್ ಕಾರ್ನಾಡ್, ಅಶೋಕ್ ಶೆಟ್ಟಿ ಸರಪಾಡಿ, ಪದ್ಮನಾಭ ಸಸಿಹಿತ್ಲು, ಅಶೋಕ್ ಕುಕ್ಯಾನ್ ಸಸಿಹಿತ್ಲು, ರಾಜೇಶ್ ಗುಜರನ್ ಮೊಕುಲು ಮಾತ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಆರ್ ಪಂಡೆರ್.
ನ.24 ರಾತ್ರೆ 7.05ಕ್ಕ್ ಶ್ರೀ ಭಗವತಿ ಅಮ್ಮನ ನಡೆಟ್ಟ್ ಗೆಜ್ಜೆ ಕಟ್ಟುನ ಕ್ರಮ, ಚೌಕಿ ಪೂಜೆ ನಡಪರೆ ಉಂಡು. ಉಂದುವೇ ಪೊರ್ತುಡು ಬೊಲ್ಲಿ ಪರ್ಬದ ನೆಂಪುಗಾದ್ ಬೊಂಬೈದ ಭಕ್ತೆರ್ ಕೊರ್ತಿನ ಪೊಸ ರಂಗಸ್ಥಳದ ಉದಿಪನ ಆವರೆ ಉಂಡು. ಅವ್ವತ್ತಾಂದೆ ಕರಿನ 24 ವರ್ಷೊರ್ದಿಂಚಿ ಸೇವೆ ಮಲ್ದಿನ 3 ಜನ ಕಲಾವಿದೆರೆಗ್ ಮಾನಾದಿಗೆ, ದಿ. ಜಗದೀಶ್ ನಲ್ಕ ಕುಟುಂಬಗ್ ಪನವುದ ಸಕಾಯ, ಕಾಯಂ ಆಟ ಗೊಬ್ಬಾವುನಕ್ಲೆಗ್ ಮಾನಾದಿಗೆ, ಪ್ರಸಂಗಕರ್ತೆರೆಗ್ ಮಾನಾದಿಗೆ ನಡಪರೆ ಉಂಡು ಪಂದ್ ಆರ್ ಪಂಡೆರ್.
ಮೇಳದ ಸಂಚಾಲಕೆರ್ ಬಿ.ದಯಾನಂದ ಗುಜರನ್ ಪಾತೆರ್ದ್, ಮೇಳಡ್ 45 ಜನ ಪ್ರಬುದ್ಧ ಕಲಾವಿದೆರ್ ಉಲ್ಲೆರ್. ಅತಿಥಿ ಭಾಗವತೆರಾದ್ ಪಟ್ಲ ಸತೀಶ್ ಶೆಟ್ರ್, ಡಾ.ಪ್ರಖ್ಯಾತ್ ಶೆಟ್ರ್ ಬರ್ರೆ ಉಲ್ಲೆರ್. ಸಸಿಹಿತ್ಲು ಮೇಳ ತುಳುನಾಡ ಜಿಲ್ಲೆ ಅತ್ತಾಂದೆ ಉತ್ತರಕನ್ನಡ, ಕಾಸ್ರೋಡು, ಬೊಂಬೈ ಇಂಚಿನ ಕಡೆಟ್ಲ ಪ್ರದರ್ಶನ ಕೊರೊಂದುಂಡು. 180 ದಿನತ್ತ ತಿರ್ಗಾಟದ ಸೀಸನ್ ಡ್ 140 ಆಟದ ಬುಕ್ಕಿಂಗ್ ಆತ್ಂಡ್. ಕಲಾವಿದೆರೆಗ್ ಎಡ್ಡೆ ರೀತಿದ ಸಂಭಾವನೆ ಕೊರೊಂದುಲ್ಲ. ಸುರೂತ್ತ ದಿನ ವಾಡಿಕೆದಂಚ ಕ್ಷೇತ್ರಡ್ “ಪಾಂಡವಾಶ್ವಮೇಧ” ಯಕ್ಷಗಾನ ಬಯಲಾಟ ನಡಪರೆ ಉಂಡು. ನ.25 ಕ್ಕ್ ಊರುದ ಭಕ್ತೆರ್ನ ಸೇವೆಯಾಟವಾದ್ ಶ್ರೀ ಕ್ಷೇತ್ರಡ್ ದೇವದಾಸ್ ಈಶ್ವರಮಂಗಲ ಬರೆತಿನ “ಅರ್ಧ ಸತ್ಯ” ಪ್ರಸಂಗದ ಪ್ರದರ್ಶನ ಉಂಡು. ತಿರ್ಗಾಟಡ್ ಶ್ರೀ ಭಗವತಿ ಮಹಾತ್ಮೆ, ದೇವಿ ಮಹಾತ್ಮೆ ಅತ್ತಾಂದೆ ಮಹಿಮೆದ ಮಾಣಿಕ್ಯ, ಬೊಳ್ಳಿ ತೊಟ್ಟಿಲ್ ಇಂಚಿನ ಪೊಸ ಪ್ರಸಂಗೊನ್ಲ ಕಲಾವಿದೆರ್ ಗೊಬ್ಬುದು ತೋಜಾವರೆ ಉಲ್ಲೆರ್ ಪಂಡೆರ್.
ಸುದ್ದಿಗೋಷ್ಠಿಡ್ ಕ್ಷೇತ್ರದ ಅಭಿವೃದ್ಧಿ ಸಮಿತಿದ ಸದಸ್ಯೆರಾಯಿನ ಡಾ.ವಿ.ಕೆ.ಯಾದವ್, ಎಸ್.ಆರ್. ಪ್ರದೀಪ್, ಮೇಳದ ಮೇಲ್ವಿಚಾರಕೆರ್ ಲೋಹಿತ್ ಗುಜರನ್ ಇತ್ತೆರ್.
ಕಕ್ಯೆಪದವು ಸತ್ಯ-ಧರ್ಮ ಜೋಡುಕರೆ ಕಂಬುಲ ಕೂಟ ನಡತ್ಂಡ್. ನೆತ್ತ ರಿಸಲ್ಟ್ ಇಂಚ ಉಂಡು.
ಈ ಕಂಬುಲ ಕೂಟಡ್ ಪಾಲ್ ಪಡೆಯಿನ ಎರ್ಲು ಸಂಖ್ಯೆ:
ಕನೆಪಲಯಿ: 5 ಜತೆ
ಅಡ್ಡಪಲಯಿ: 5 ಜತೆ
ಬಲ್ಲ್ ಮಲ್ಲ: 19 ಜತೆ
ನಾಯೆರ್ ಮಲ್ಲ: 28 ಜತೆ
ಬಲ್ಲ್ ಎಲ್ಯ: 25 ಜತೆ
ನಾಯೆರ್ ಎಲ್ಯ: 107 ಜತೆ
ಒಟ್ಟು ಎರ್ಲುಲೆನ ಸಂಖ್ಯೆ: 189 ಜತೆ ಇತ್ತ್ಂಡ್.
ಕನೆಪಲಯಿಡ್:
ಸುರುತ್ತ ಇನಾಮು: ನೇರಳೆಕಟ್ಟೆ ಕೊಡ್ಲಾಡಿ ಅದ್ವಿನ್ ರವಿರಾಜ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ಬೈಂದೂರು ಭಾಸ್ಕರ ದೇವಾಡಿಗ
ರಡ್ಡನೇ ಇನಾಮು: ಬೇಲಾಡಿ ಬಾವ ಅಶೋಕ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ
ಅಡ್ಡ ಪಲಯಿಡ್:
ಸುರುತ್ತ ಇನಾಮು: ಅಲ್ಲಿಪಾದೇ ಕೆಳಗಿನಮನೆ ವಿನ್ಸೆಂಟ್ ಪಿಂಟೋ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ
ರಡ್ಡನೇ ಇನಾಮು: ನಾರಾವಿ ರಕ್ಷಿತ್ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್
ಬಲ್ಲ್ ಮಲ್ಲ:
ಸುರುತ್ತ ಇನಾಮು: ಕೊಳಕೆ ಇರ್ವತ್ತೂರು ಭಾಸ್ಕರ ಎಸ್ ಕೋಟ್ಯಾನ್ “ಬಿ”
ಗಿಡತಿನಾರ್: ಕೊಳಕೆ ಇರ್ವತ್ತೂರು ಆನಂದ್
ರಡ್ಡನೇ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಸಿ”
ಗಿಡತಿನಾರ್: ಬಂಬ್ರಾಣಬೈಲು ವಂದಿತ್ ಶೆಟ್ಟಿ
ಬಲ್ಲ್ ಎಲ್ಯ:
ಸುರುತ್ತ ಇನಾಮು: ಎಂಬತ್ತು ಬಡಗಬೆಟ್ಟು ಕಲ್ಲಪಾಪು ಶ್ರೀಕ ಸಂದೀಪ್ ಶೆಟ್ಟಿ “ಎ”
ಗಿಡತಿನಾರ್: ಮಾಳ ಆದಿಶ್ ಪೂಜಾರಿ
ರಡ್ಡನೇ ಇನಾಮು: ಕಾರ್ಕಡ ಪುಟ್ಟು ಹೊಳ್ಳರಮನೆ ನಟರಾಜ ಹೊಳ್ಳ ಸಾಲಿಗ್ರಾಮ
ಗಿಡತಿನಾರ್: ಪಣಪಿಲ ಪ್ರವೀಣ್ ಕೋಟ್ಯಾನ್
ನಾಯೆರ್ ಮಲ್ಲ:
ಸುರುತ್ತ ಇನಾಮು: ಬೋಳದ ಗುತ್ತು ಸತೀಶ್ ಶೆಟ್ಟಿ “ಬಿ”
ಗಿಡತಿನಾರ್: ಬೈಂದೂರು ವಿಶ್ವನಾಥ ದೇವಾಡಿಗ
ರಡ್ಡನೇ ಇನಾಮು: ಮಾಳ ಆನಂದ ನಿಲಯ ಶೇಖರ ಎ ಶೆಟ್ಟಿ
ಗಿಡತಿನಾರ್: ಪಟ್ಟೆ ಗುರು ಚರಣ್
ನಾಯೆರ್ ಎಲ್ಯ:
ಸುರುತ್ತ ಇನಾಮು: ಪಣೋಳಿಬೈಲು ಭಂಡಾರದಮನೆ ಶಿವಾನಂದ ಕುಲಾಲ್
ಗಿಡತಿನಾರ್: ಪಣಪಿಲ ಪ್ರವೀಣ್ ಕೋಟ್ಯಾನ್
ರಡ್ಡನೇ ಇನಾಮು: ನಲ್ಲೂರು ಬಜಗೋಳಿ ಶಿವಪ್ರಸಾದ್ ನಿಲಯ ದಿನೇಶ್ ಭಂಡಾರಿ
ಗಿಡತಿನಾರ್: ಭಟ್ಕಳ ಶಂಕರ್
