ಕುಡ್ಲ: ಮಹಾಕಾಳಿಪಡ್ಪುದ ಜಪ್ಪು ಶ್ರೀ ಭಗವತೀ ತೀಯಾ ಸೇವಾ ಸಂಘದ ಮುತಾಲಿಕೆಡ್ 30ನೇ ವರ್ಷದ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ನ.26 ಐತಾರ ಬೊಲ್ಪುಗು ಜಪ್ಪು ಸಂಕಪ್ಪ ಮೆಮೋರಿಯಲ್ ಹಾಲ್ ಡ್ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರಿಕಾರೆರ್ ದಾಮೋದರ ಗುರಿಕಾರೆ, ಮಾನಾದಿಗೆದ ಗುರ್ಕಾರೆ ಚಂದ್ರಮೋಹನ್ ಜೆ, ಗುರ್ಕಾರೆ ಚಂದ್ರಶೇಖರ್ ಕೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 35ನೇ ಸಂಚಿಕೆ ನ.24 ಕ್ಕ್ ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಈ ಲೇಸ್ ನ.25 ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರ ದ ಪ್ರಕಟಣೆ ತೆರಿಪಾದ್ಂಡ್.
ದಾವಣಗೆರೆ: ಶ್ರೀ ಗಾಯತ್ರಿ ದೇವಿನ ಉಪಾಸಕೆರೆನ ಕ್ರಿಯಾತ್ಮಕ ಆಧ್ಯಾತ್ಮ ಸಂಸ್ಥೆ ಶ್ರೀ ಗಾಯತ್ರಿ ಪರಿವಾರರ್ದ್ ಪ್ರತೀ ತಿಂಗೊಲ್ ಪುಣ್ಣಮೆದಾನಿ ನಡಪುನ ಸಾಮೂಹಿಕ ಶ್ರೀ ಗಾಯತ್ರಿ ಪೂಜೆ, ಉಪಾಸನೆ, ಗೌರಿ ಪುಣ್ಣಮೆದ ಲೆಕ್ಕೊಡು ನ.27 ಸೋಮಾರ ಬೊಲ್ಪುಗು 7 ಗಂಟೆಗ್ ನಡಪರೆ ಉಂಡು ಪಂದ್ ಪರಿವಾರದ ಗುರ್ಕಾರ್ದಿ ಡಾ. ಸುಶೀಲಮ್ಮ ತೆರಿಪಾದೆರ್.
ಜಯದೇವ ವೃತ್ತಡ್ ಇಪ್ಪುನ ಶ್ರೀ ಶಂಕರ ಮಠಟ್ಟ್ ನಡಪರೆ ಇಪ್ಪುನ ಈ ಅಪ್ಪಟ ಆಧ್ಯಾತ್ಮ ಸಮಾರಂಭದ ಈ ಸರ್ತಿದ ಪೂಜೆದ ಸೇವಾಕರ್ತೆರ್ ಭಾವನ್ನಾರಾಯಣ ಬೊಕ್ಕ ಕುಟುಂಬದಕುಲು ಕರಿನ 23 ವರ್ಷೊದಿಂಚ ಏಪಲ ಪ್ರತೀ ಪುಣ್ಣಮೆದಾನಿ ನಡಪುನ ಈ ಧಾರ್ಮಿಕ ಪ್ರಕ್ರಿಯೆಡ್ ಆಸಕ್ತ ಸಾರ್ವಜನಿಕೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಪರಿವಾರದ ಪ್ರಧಾನ ಕಾರ್ಯದರ್ಶಿ ಸಾಲಿಗ್ರಾಮ ಗಣೇಶ್ ಶೆಣೈ ಬಿನ್ನಾಪು ಮಲ್ದೆರ್.
ಮುಲ್ಕಿ: ಕಾರ್ನಾಡ್ ಹಿಮಾಯತುಲ್ ಇಸ್ಲಾಂ ಸಮಿತಿದ ಮಹಾಸಭೆ ಇಂಚೊಗು ಶಾಫಿ ಜುಮ್ಮಾ ಮಸೀದಿ ಆಡಳಿತ ಸಮಿತಿದ ಅಧ್ಯಕ್ಷೆರ್ ಸುಹೈಲ್ ಹೈದರ್ ಮೆರೆನ ಗುರ್ಕಾರ್ಮೆಡ್ ಸಂಸ್ಥೆದ ಕಚೇರಿಡ್ ನಡತ್ಂಡ್.
ಪೊಸ ಗುರ್ಕಾರೆಯಾದ್ ಪುತ್ತು ಬಾವ ಕಾರ್ನಾಡು ಬೊಕ್ಕ ಪ್ರಧಾನ ಕಾರ್ಯದರ್ಶಿಯಾದ್ ಎಂ ಕೆ ಹಸೈನಾ ದರ್ಗಾ ರೋಡ್ ಮೇರ್ ಆಯ್ಕೆ ಆಯೆರ್. ಬೊಕ್ಕ 23 ಸದಸ್ಯೆರೆನ್ ಆಯ್ಕೆ ಮಲ್ತೆರ್.
47ನೇ ವರ್ಷದ ದಫ್ ರಾತೀಬ್ ಲೇಸ್ ನ್ 2024 ತ್ತ ಫೆಬ್ರವರಿ 1-3 ಮುಟ್ಟ ನಡಪುನ ಬಗೆಟ್ಟ್ ತೀರ್ಮಾನ ನಡತ್ಂಡ್.
ಈ ಪೊರ್ತುಡು ಸಭೆಟ್ಟ್ ಫಾರೂಕ್ ಹಾಜಿ, ಕಾರ್ನಾಡು ಮದರಸದ ಸದರ್ ಉಸ್ತಾದ್, ಬಹುಮಾನ್ಯ ರಝಾಕ್ ಮದನಿಯೆರ್ ಇತ್ತೆರ್.
ಕುಡ್ಲ: ಟೈಟಲ್, ಪೋಸ್ಟರ್ ಡೇ ಆಸಕ್ತಿ ಪುಟ್ಟಾಯಿನ “ಗಬ್ಬರ್ ಸಿಂಗ್” ತುಳು ಪಿಕ್ಚರ್ ಮಾ.22 ಕ್ಕ್ ತುಳುನಾಡ್ ದ ಜಿಲ್ಲೆ ಇಡೀ ಬುಡುಗಡೆ ಆಯೆರೆ ಉಂಡು ಪಂದ್ ಪಿಕ್ಚರ್ ದ ನಿರ್ಮಾಪಕೆರ್ ಸತೀಶ್ ಪೂಜಾರಿ ಬಾರ್ಕೂರು ತೆರಿಪಾದೆರ್.
ಮುತ್ತು ಗೋಪಾಲ್ ಫಿಲ್ಮ್ಸ್ ಬಾರ್ಕೂರು ಲಾಂಛನಡ್ ತಯಾರಾಯಿನ ಗಬ್ಬರ್ ಸಿಂಗ್ ಪಿಕ್ಚರ್ ಗ್ ಸುರತ್ಕಲ್, ಚಿತ್ರಾಪುರ, ಬೈಕಂಪಾಡಿ ಪ್ರದೇಶಡ್ ಮೂಜಿ ಹಂತಡ್ ಶೂಟಿಂಗ್ ನಡತ್ ದ್ಂಡ್. ನಾಯಕೆ ನಟೆಯಾದ್ ಶರಣ್ ಶೆಟ್ಟಿ, ನಾಯಕಿಯಾದ್ ವೆನ್ಸಿಟಾ ಅಭಿನಯ ಮಲ್ದೆರ್. ಸಮಾಜಡ್ ಅಶಾಂತಿ ಸೃಷ್ಟಿ ಆನಗ ಕುಡ ಶಾಂತಿ ತಿಕುಲೆಕ್ಕ ಮಲ್ಪುನ ಖಡಕ್ ಅಧಿಕಾರಿ ಪಾತ್ರಡ್ ಶರಣ್ ಶೆಟ್ಟಿ ಅಭಿನಯ ಮಲ್ದೆರ್. ಗಬ್ಬರ್ ಸಿಂಗ್ ಆಕ್ಷನ್ ಥ್ರಿಲ್ಲರ್ ಫ್ಯಾಮಿಲಿ ಓರಿಯೆಂಟೆಡ್ ಫಿಲ್ಮ್ ಆತ್ಂಡ್. ಸಿನಿಮಾ ಕತೆ ಚಿತ್ರಕತೆನ್ ಸತೀಶ್ ಪೂಜಾರಿ ಬಾರ್ಕೂರ್, ನಿರ್ದೇಶನದ ಜಬದಾರಿನ್ ಪ್ರದೀಪ್ ಬೈಕಾಡಿ ಒಯಿಸೊಂದೆರ್. ಮಧು ಸುರತ್ಕಲ್ ಸಂಭಾಷಣೆ ರಚನೆ ಮಲ್ದೆರ್. ಮುಖ್ಯ ಪಾತ್ರಡ್ ಕುಸಲ್ದರಸೆ ನವೀನ್ ಡಿ ಪಡೀಲ್, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ಪ್ರಸನ್ನ ಶೆಟ್ಟಿ ಬೈಲೂರು, ಸಾಯಿಕೃಷ್ಣ, ಉಮೇಶ್ ಮಿಜಾರ್, ರವಿರಾಮ ಕುಂಜ, ಗಿರೀಶ್ ಎಂ. ಶೆಟ್ಟಿ ಕಟೀಲ್, ಅಥರ್ವ ಪ್ರಕಾಶ್, ಉದಯ ಆಳ್ವ ಇಡ್ಯಾ, ಸಂದೀಪ್ ಭಕ್ತ, ಕಿರಣ್ ಮಲ್ಪೆ, ಪೂರ್ಣಿಮಾ ಶೆಟ್ಟಿ, ಪವಿತ್ರ ಶೆಟ್ಟಿ, ಸದಾಶಿವ ಬ್ರಹ್ಮಾವರ್, ಶಶಿ ಬೆಳ್ಳಾಯರು, ಚಂದ್ರಹಾಸ ಶೆಟ್ಟಿ ಮಾಣಿ, ಸಂಪತ್ ಲೋಬೋ, ಆಶಾ ಶೆಟ್ಟಿ ಶಿಬರೂರು, ಲಹರಿ ಶೆಟ್ಟಿ ಪಡ್ರೆ, ವೀಣಾ ಶೆಟ್ಟಿ, ಶಿಲ್ಪಾ ಶೆಟ್ಟಿ, ಸಂತೋಷ್ ನಟನೆ ಮಲ್ದೆರ್.
ಈ ಪಿಕ್ಚರ್ ಗ್ ರವಿ ಸುವರ್ಣ ಛಾಯಾಗ್ರಹಣ, ಪ್ರಜ್ವಲ್ ಸುವರ್ಣ ಸಂಕಲನ, ವೆಂಕಟೇಶ್ ಬೆಂಗಳೂರು ಕಲೆ, ಡೊಲ್ವಿನ್ ಕೊಳಲಗಿರಿ ಸಂಗೀತ, ಕಾರ್ತಿಕ್ ಮುಲ್ಕಿ ಹಿನ್ನಲೆ ಸಂಗೀತ, ಅಲ್ಟಿಮೆಟ್ ಶಿವ್ ಸಾಹಸ, ಅವಿನಾಶ್ ಬಂಗೇರ, ಶುಭಕಿರಣ್ ನೃತ್ಯ, ಪ್ರದೀಪ್ ಮೇಕಪ್, ಶರತ್ ಬರ್ಕೆ ವಸ್ತ್ರಾಲಂಕಾರ, ಪುಷ್ಪರಾಜ ರೈ, ಜಯರಾಜ್, ಸಹ ನಿರ್ದೇಶನ, ಭಾಗ್ಯರಾಜ್ ಸಹಾಯ, ಬೊಕ್ಕ ನರೇಶ್ ಕುಮಾರ್ ಸಸಿಹಿತ್ಲು, ಆರ್.ಎನ್. ಶೆಟ್ಟಿ ಕಳವಾರು ಗೀತಾ ಸಾಹಿತ್ಯ ಕೊರ್ತೆರ್.
ಗಬ್ಬರ್ ಸಿಂಗ್ ತುಳು ಪಿಕ್ಚರ್ ಡ್ ವಿಭಿನ್ನ ಕತೆ ಉಂಡು. ಉತ್ತರಪ್ರದೇಶಡ್ ನಡತಿನ ಘಟನೆಯೊಂಜೇನ್ ಪ್ರೇಕ್ಷಕೆರೆಗ್ ಇಷ್ಟ ಆಪುನ ರೀತಿಡ್ ಈ ಪಿಕ್ಚರ್ ದ ಕತೆನ್ ಬರೆತೆರ್. ಎಡ್ಡೆ ಕತೆ, ಹಾಸ್ಯ ಇಪ್ಪುನ ಪಿಕ್ಚರ್ ಉಂದಾತ್ಂಡ್. ಪಿಕ್ಚರ್ ಡ್ ಆಜಿ ಪದ್ಯ, ನಾಲ್ ಫೈಟ್ಸ್ ಉಂಡು. ಪಿಕ್ಚರ್ ಮಾ.22 ಕ್ಕ್ ತುಳುನಾಡ್ ದ ಜಿಲ್ಲೆ ಇಡೀ ರಿಲೀಸ್ ಆಪುಂಡು. ಫೆಬ್ರವರಿಡ್ ಬೊಂಬೈ ಬೊಕ್ಕ ವಿದೇಶಡ್ ಪಿಕ್ಚರ್ ರಿಲೀಸ್ ಆಪುಂಡು ಪಂದ್ ಪಿಕ್ಚರ್ ದ ನಿರ್ಮಾಪಕೆರ್ ಬಾರ್ಕೂರು ಸತೀಶ್ ಪೂಜಾರಿ ತೆರಿಪಾದೆರ್.
ಸುರತ್ಕಲ್: ರಂಗಚಾವಡಿ ಕುಡ್ಲ ಸಾಹಿತ್ಯಿಕ ಸಾಂಸ್ಕೃತಿಕ ಸಂಘಟನೆದ ಮುತಾಲಿಕೆಡ್ ಸುಭಾಷಿತ ನಗರ ರೆಸಿಡೆಂಟ್ಸ್ ವೆಲ್ ಫೇರ್ ಅಸೋಸಿಯೇಶನ್ (ರಿ.) ಸುರತ್ಕಲ್ ದ ಒಟ್ಟುಸೇರಿಗೆಡ್ ರಂಗಚಾವಡಿ ವರ್ಷದ ಪರ್ಬ, ರಂಗಚಾವಡಿ ಪ್ರಶಸ್ತಿ 2023 ಪ್ರದಾನ ಸಮಾರಂಭ ಲೇಸ್ ಡಿ.3 ಕ್ಕ್ ಐತಾರ ಬಯ್ಯಗ್ 4.30 ಕ್ಕ್ ಸುರತ್ಕಲ್ ಬಂಟರ ಭವನಡ್ ನಡಪರೆ ಉಂಡು.
2023 ನೇ ಸಾಲ್ ದ ರಂಗಚಾವಡಿ ಪ್ರಶಸ್ತಿನ್ ಖ್ಯಾತ ನಾಟಕ ರಚನೆಕಾರೆ, ನಿರ್ದೇಶಕೆರ್ ವಿಜಯಕುಮಾರ್ ಕೊಡಿಯಾಲ್ ಬೈಲ್ ಸ್ವೀಕಾರ ಮಲ್ಪೆರೆ ಉಲ್ಲೆರ್. ಲೇಸ್ ನ್ ಬೊಂಬೈ ಹೇರಂಭ ಇಂಡಸ್ಟ್ರೀಸ್ ಸಂಸ್ಥೆದ ಆಡಳಿತ ನಿರ್ದೇಶಕೆರ್ ಕನ್ಯಾನ ಸದಾಶಿವ ಶೆಟ್ಟಿ ಉದಿಪನ ಮಲ್ಪುವೆರ್. ನೆತ್ತ ಗುರ್ಕಾರ್ಮೆನ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಚಲನಚಿತ್ರ ನಿರ್ಮಾಪಕೆರ್ ಡಾ. ಸಂಜೀವ ದಂಡೆಕೇರಿ, ಕಟೀಲ್ ಶ್ರೀ ಡೆವಲಪರ್ಸ್ ಸಂಸ್ಥೆದ ಮಾಲಕೆರ್ ಗಿರೀಶ್ ಎಂ ಶೆಟ್ಟಿ ಕಟೀಲ್, ತೆರಿಗೆ ಹಣಕಾಸು ನಿರ್ಧರಣೆ ಬೊಕ್ಕ ಅಫೀಲುದ ಸ್ಥಾಯಿ ಸಮಿತಿದ ಗುರ್ಕಾರೆ ವರುಣ್ ಚೌಟ, ಬಂಟರ ಮಾತೃ ಸಂಘದ ತಾಲೂಕ್ ಸಮಿತಿದ ಸಂಚಾಲಕೆರ್ ವಸಂತ ಶೆಟ್ಟಿ, ಬೊಂಬೈ ಥಾಣೆ ಬಂಟ್ಸ್ ಎಸೋಸಿಯೇಶನ್ ದ ಮಾಜಿ ಗುರ್ಕಾರೆ ವೇಣುಗೋಪಾಲ ಶೆಟ್ಟಿ, ಚಲನ ಚಿತ್ರ ನಿರ್ಮಾಪಕೆರ್ ಚಂದ್ರಶೇಖರ ಮಾಡ ಕುದ್ರಾಡಿಗುತ್ತು, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಸುರತ್ಕಲ್ ಘಟಕದ ಗುರ್ಕಾರೆ ಸುಧಾಕರ ಎಸ್ ಪೂಂಜ, ಸುಭಾಷಿತ ನಗರ ರೆಸಿಡೆಂಟ್ಸ್ ವೆಲ್ ಫೇರ್ ಅಸೋಸಿಯೇಶನ್ (ರಿ.) ದ ಗುರ್ಕಾರೆ ರಮೇಶ್ ಶೆಟ್ಟಿ, ಚಲನ ಚಿತ್ರ ನಿರ್ಮಾಪಕೆರ್ ಪ್ರಕಾಶ್ ಪಾಂಡೇಶ್ವರ್, ಕುಡ್ಲ ಯತಾರ್ಥ್ ಸೋಶಿಯಲ್ ದ ಸ್ಥಾಪಕೆರ್ ಈಶ್ವರ್ ಪ್ರಸಾದ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಘಟಕದ ಕೇಂದ್ರೀಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಕೆ ಭಂಡಾರಿ ಅಭಿನಂದನಾ ಭಾಷಣ ಮಲ್ಪೆರೆ ಉಲ್ಲೆರ್. ಡಾ ಸಂಜೀವ ದಂಡೆಕೇರಿ, ವಿ.ಜಿ.ಪಾಲ್, ಪತ್ರಕರ್ತೆರ್ ಬಾಳ ಜಗನ್ನಾಥ ಶೆಟ್ಟಿ ಇಪ್ಪುನ ಆಯ್ಕೆ ಸಮಿತಿ 2023 ನೇ ಸಾಲ್ ದ ರಂಗಚಾವಡಿ ಪ್ರಶಸ್ತಿಗ್ ವಿಜಯಕುಮಾರ್ ಕೊಡಿಯಾಲ್ ಬೈಲ್ ಮೆರೆನ್ ಆಯ್ಕೆ ಮಲ್ದ್ಂಡ್. ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ಕಲಾಸಂಗಮ ಕುಡ್ಲ ಕೂಟರ್ದ್ ವಿಜಯಕುಮಾರ್ ಕೊಡಿಯಾಲ್ ಬೈಲ್ ರಚನೆ ಮಲ್ತ್ ದ್ ನಿರ್ದೇಶನ ಮಲ್ತಿನ ಮೈತಿದಿ ನಾಟಕ ಪ್ರದರ್ಶನ ಆಯೆರೆ ಉಂಡು ಪಂದ್ ರಂಗಚಾವಡಿ ಸಂಸ್ಥೆದ ಪ್ರಕಟಣೆ ತೆರಿಪಾದ್ಂಡ್.
ವಿಜಯಕುಮಾರ್ ಕೊಡಿಯಾಲ್ ಬೈಲ್ ಕರಿನ ನಾಲ್ ದಶಕರ್ದ್ ಎಚ್ಚ ರಂಗಭೂಮಿಡ್ ಕಲಾಸೇವೆ ಮಲ್ತೊಂದು ಬತ್ತಿನಾರ್. ಒರಿಯೆ ಮಗೆ, ಒಂಜಿ ನಿಮಿಷ, ಒರಿಯರ್ದೊರಿ ಅಸಲ್, ಒಯಿಕ್ ಲಾ ಆವಂದಿನಕುಲು, ಅಕ್ಲೆಲೆಕ ಎಂಕುಲತ್ತ್, ಮದಿಮೆ, ಕೋಡೆ ಇನಿ ಎಲ್ಲೆ, ವಿದ್ದು, ಸೀತಾ ಟೀಚರ್ ಇಂಚ ಎಡ್ಡೆ ನಾಟಕನ್ ರಚನೆ ಮಲ್ತ್ ದ್ ನಿರ್ದೇಶನ ಮಲ್ತ್ ದ್ ಗೆಂದಿನಾರ್. ಅಸಲ್ ಮೂರ್ತಿಲು, ಅಸಲ್ ಏರ್ ಪನ್ಪುನ ಮರಾಠಿ ನಾಟಕನ್ ತುಳುಕ್ಕ್ ಕನತಿನ ಮೇರ್. ಸ್ವಾಮಿ ಶರಣಂ ಅಯ್ಯಪ್ಪ, ಮುಕಾಂಬಿಕೆ, ದೇವುಪೂಂಜ ದಂಚಿನ ಚಾರಿತ್ರಿಕ ಬೊಕ್ಕ ಭಕ್ತಿ ಪ್ರದಾನ ನಾಟಕನ್ ಮಲ್ತ್ ದ್ ಪ್ರೇಕ್ಷಕೆರೆನ ಮನಸ್ ಗೆಂದಿನಾರ್. ಶಿವದೂತ ಗುಳಿಗೆ ನಾಟಕದ ಮುಖೇನ ಚರಿತ್ರೆ ಸೃಷ್ಟಿ ಮಲ್ತಿನಾರ್. ಇತ್ತೆ ಮೈತಿದಿ ಪೊಸ ಪರಿಕಲ್ಪನೆದ ನಾಟಕ, ಪ್ರತಿಯೊಂಜೇಟ್ಲಾ ಪೊಸತನನ್ ಕನಾಡುವೆರ್. ನಾಟಕದೊಟ್ಟಿಗೆ ಪಿಕ್ಚರ್ ಡ್ ಯಶಸ್ಸ್ ಆಯಿನಾರ್ ಮೇರ್. ಅತ್ತಂದೆ ಸುಮಾರ್ ಕಲಾವಿದೆರೆನ್ ರಂಗಭೂಮಿ, ಸಿನಿಮಾ ಕ್ಷೇತ್ರಗ್ ಪರಿಚಯ ಮಲ್ತಿನಾರ್.
ಕುಂದಾಪುರ: ಕೋಟೇಶ್ವರ ಮಹತೋಭಾರ ಶ್ರೀ ಕೋಟಿಲಿಂಗೇಶ್ವರ ದೇವಲ್ಯಡ್ ವೃಶ್ಚಿಕ ಮಾಸಡ್ ಬರ್ಪಿನ ಪುಣ್ಣಮೆದ, ಕೃತಿಕ ನಕ್ಷತ್ರದ ಸೋಮಾರದಾನಿ ಮುಲ್ಪ ದೇವೆರ್ ನಿಲೆ ಉಂತುದೆರ್.
ಅಂಚೆನೆ ಕಾಕತಾಲ್ಯವಾದ್ ಈ ವರ್ಷಲ ಅವ್ವೆ ಮೂರ್ತ, ಸೋಮಾರ ಪುಣ್ಣಿಮೆ, ಕೃತಿಕ ನಕ್ಷತ್ರ ಭಾರೀ ಇಸೇಸದ ದಿನ. ಈ ಕೊಡಿ ತಿಂಗೊಲ್ಡ್ ಬರ್ಪುನವೇ ಕೊಡಿಪರ್ಬ, ಅತ್ತಂದೆ ಈ ದೇವಲ್ಯದ ಚರಿತ್ರೆಡ್ ಬೆದ್ ರ್ ಕೊಡಿತ್ತ ಬೆದ್ ರ್ ಮೆಳೆ ಕೈತಲ್ ದೇವೆರ್ ತಿಕಿನಿ ಪನ್ಪುನ ಕಾರಣರ್ದಾವೆರ ಬೆದ್ ರ್ ಕೊಡಿನ್ ರಥಕ್ಕ್ ಏರಿಸಾವುನ ಕ್ರಮ ಉಂಡು. ಅಂಚಾದ್ ಉಂದೆನ್ ಕೊಡಿಪರ್ಬ ಪಂದ್ ಲೆಪ್ಪುವೆರ್. ಉಂದು ಸೀಮೆದ ದೇವಲ್ಯ ಆಯಿನ 14 ಗ್ರಾಮಗ್ ಸಂಬಂಧಪಟ್ಟಿನಂಚಿನ ದೇವಲ್ಯ ಆತ್ಂಡ್.
ಈ ದೇವಲ್ಯಗ್ ಸಾರ ವರ್ಷದ ಇತಿಹಾಸ ಉಂಡು. ಮುಲ್ಪ ದುಂಬು ಸುಮಾರ್ ರಾಜ ಮಹಾರಾಜೆರ್ ಆಳ್ವಿಕೆ ಮಲ್ದೆರ್. ಅತ್ತಂದೆ ಸುಮಾರ್ ಶಾಸನಲ ತಿಕ್ ದ್ಂಡ್. ಮಾತ ರಾಜ ಮಹಾರಾಜೆರೆನ ಆಡಳಿತಡ್ ಸೇರಿನಂಚಿನ ಭಾರೀ ಮಲ್ಲ ಪುಣ್ಯ ಕ್ಷೇತ್ರ ಆತ್ಂಡ್. ಆದಾಯದ ದೃಷ್ಟಿಡ್ ಮಲ್ಲ ದೇವಲ್ಯ ಅತ್ತ್ ಆಂಡಲ, ಕ್ಷೇತ್ರದ ದೃಷ್ಟಿಡ್ ಭಾರೀ ಪಿರಾಕ್ ದ ದೇವಲ್ಯ ಉಂದಾತ್ಂಡ್.
ಶಿವನ ಆರಾಧನೆ ಮಲ್ಪುನಕ್ಲೆಗ್ ಉಂದು ಈ ರಡ್ಡ್ ಜಿಲ್ಲೆಡ್ ಭಾರೀ ಮಲ್ಲ ಕ್ಷೇತ್ರ. ದಾಯೇ ಪಂಡ ಅನಾದಿ ಕಾಲರ್ದ್ ಲ ಈ ದೇವಲ್ಯ ಪುದರ್ ವಾಸಿ ಆತ್ಂಡ್ ಪನ್ಪುನೆಕ್ಕ್ ಕಾರಣ ದಾದ ಕೇಂಡ ತುಳುನಾಡ್ ದ ಪರಂಪರೆಡ್ ಬರ್ಪಿನ ಕೋಟಿ ಚೆನ್ನಯೆರೆನ ಇತಿಹಾಸ, ಅವು ಪಾರ್ದನಡ್ಲ ಬರ್ಪುಂಡು. ಆ ರಡ್ಡ್ ಜೋಕುಲೆಗ್ ದಾಯೆ ಪುದರ್ ದೀಯೆರ್ ಪಂಡ ಸುರ್ಯದ ಚೆನ್ನಕೇಶವ ದೇವೆರೆನ ಪುದರ್ ಡ್ ಚೆನ್ನಯೆ ಬೊಕ್ಕ ಕೋಟೇಶ್ವರ ಕೋಟಿಲಿಂಗೇಶ್ವರ ದೇವೆರೆನ ಪುದರ್ ಡ್ ಕೋಟಿ ಪಂದ್ ಪುದರ್ ದೀಯೆರ್. ನೇರ್ದ್ ಕೋಟಿ ಚೆನ್ನಯ ಪಂದ್ ಪುದರ್ ಬರಿಯೆರೆ ಕಾರಣ ಆಂಡ್. ಆ ಕಾಲಡ್ಲಾ ಆತ್ ಪುಗರ್ತೆ ಪಡೆಯಿನ ದೇವಲ್ಯ ಉಂದಾತ್ಂಡ್. ಅತ್ತಂದೆ ಜನಜೀವನದ ನಡುಟ್ಟ್ ಇಪ್ಪುನ ದೇವಲ್ಯ ಆತ್ಂಡ್.
ಒಂಜಿ 50 ವರ್ಷದ ಪಿರಾವುದ ಪರ್ಬ ಪಂಡ ಇಡೀ ಕುಂದಾಪುರ ತಾಲೂಕ್ ದ, ಅತ್ತಂಡ ಇತ್ತೆದ ಬೈಂದೂರು, ಬ್ರಹ್ಮಾವರ ತಾಲೂಕ್ ಪಂದ್ ಲೆಪ್ಪುನ ಬೇತೆ ತಾಲೂಕ್ ಆಂಡಲ, ಮಾತೆರ್ಲಾ ಕೃಷಿ ಕಾರ್ಯ ಮುಗಿ ಬೊಕ್ಕ ಆಯಿನ್ ವಿನಿಮಯ ಮಲ್ತೊಂದು ಆ ಕಾಸ್ ಡ್ ತನ್ನ ವರ್ಷದ ಮಾತ ಸೊತ್ತುಲೆನ್ ಮುಲ್ಪರ್ದ್ ಕೊನೊಪುನ ಜಾತ್ರೆ ಆತ್ಂಡ್. ಪ್ರತಿಯೊಂಜಿ ಸಾಮಾನ್ ಮುಲ್ಪ ತಿಕೊಂದು ಇತ್ತ್ಂಡ್. ಅಂಚಾದ್ ಮುಲ್ಪ ಒಂಜಿ ತಿಂಗೊಲ್ ಈ ಪರ್ಬ ನಡಪುಂಡು. ಅತ್ತಂದೆ ಉಂದು ತೇರ್ ಉಚ್ಚಯಡ್ ಬರ್ಪುನ ಸುರುತ್ತ ಪರ್ಬ ಆತ್ಂಡ್. ಸುಬ್ರಹ್ಮಣ್ಯದ ತೇರ್ ಬುಡ್ನ ಈ ಕೋಟಿಲಿಂಗೇಶ್ವರ ದೇವಲ್ಯದನೇ ಮಲ್ಲ ತೇರ್ ಆತ್ಂಡ್ ಪಂದ್ ಗೋಪಾಲಕೃಷ್ಣ ಶೆಟ್ಟಿ ಮಾರ್ಕೋಡು ಪಂಡೆರ್.
ಅಂಚೆನೆ ಈ ದೇವಲ್ಯದ ಕೊಡಿಪರ್ಬ ಬೊಕ್ಕ ತೇರ್ ಉಚ್ಚಯ ನ.27 ಸೋಮಾರ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತಾದಿಲು ಮಾತೆರ್ಲಾ ಪಾಲ್ ಪಡೆದ್, ಶ್ರೀ ಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಕಾರ್ಯ ನಿರ್ವಾಹಣಾಧಿಕಾರಿ ಪ್ರಶಾಂತ್ ಕುಮಾರ್ ಶೆಟ್ಟಿ, ಪ್ರಧಾನ ಅರ್ಚಕೆರ್ ತಂತ್ರಿಲಾಯಿನ ಪ್ರಸನ್ನ ಕುಮಾರ್ ಐತಾಳ್, ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಎಮ್ ಪ್ರಭಾಕರ ಶೆಟ್ಟಿ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂಟ್ವಾಳ: ಸಜೀಪಮೂಡ ಪಣೊಲಿಬೈಲ್ ಶ್ರೀ ಕಲ್ಲುರ್ಟಿ ದೈವೊಲ್ಯಡ್ ವರ್ಷಾವಧಿದ ಕೋಲ ನ.23 ಬೊಕ್ಕ 24 ಕ್ಕ್ ನಡಪುಂಡು.
ನ.23 ಗುರುವಾರ ಬಯ್ಯಗ್ ಕೊಪ್ಪರಿಗೆ ಮೂರ್ತ, ನಲಿಕೆ ಭಜನೆ, ತುಡರ್ ಅರ್ಲಾದ್ ಬೊಕ್ಕ ಸಾತ್ವಿಕ ತೇಜ ಕಲಾಕೇಂದ್ರ (ರಿ.) ಒಡಿಯೂರು ಬೊಕ್ಕ ಪಣೊಲಿಬೈಲ್ ಶ್ರೀ ಕೃಷ್ಣ ಮಂದಿರ ಶಾಖೆದ ಜೋಕುಲೆರ್ದ್ ಬೇತೆ ಬೇತೆ ಸಾಂಸ್ಕೃತಿಕ ವಿನೋದಾವಳಿ, ರಾತ್ರೆ ಯಕ್ಷಗಾನ ವೈಭವ ಸ್ವರಾಭಿಷೇಕ ನಡತ್ಂಡ್.
ನ.24 ಸುಕ್ರಾರ (ಇನಿ) ಬೊಲ್ಪುಗು ನವಕ ಪ್ರಧಾನ, 12 ತಾರಾಯಿದ ಗಣಹೋಮ, ನಾಗತಂಬಿಲ ನಡತ್ಂಡ್. ಮಧ್ಯಾಹ್ನ ಸಾರ್ವಜನಿಕ ನುಪ್ಪು ಪ್ರಸಾದ ಸೇವೆ ನಡಪುಂಡು. ಬೊಕ್ಕ ಮಧ್ಯಾಹ್ನರ್ದ್ ಬಯ್ಯ ಮುಟ್ಟ ಭಜನೆ ಆದ್ ಶ್ರೀ ಕೃಷ್ಣ ಭಜನಾ ಮಂದಿರ ಪಣೊಲಿಬೈಲ್ ರ್ದ್ ಶ್ರೀ ಕ್ಷೇತ್ರಗ್ ಮೆರವಣಿಗೆ ಬರ್ಪುಂಡು. ರಾತ್ರೆ ನೃತ್ಯ ಸುಧಾ ಕುಡ್ಲ, ವಿದೂಷಿ ಸೌಮ್ಯ ಸುಧೀಂದ್ರ ರಾವ್ ಮೆರೆರ್ದ್ ಭರತನಾಟ್ಯ ಬೊಕ್ಕ ನೃತ್ಯ ವೈಭವ, ಲಯನ್ ಕಿಶೋರ್ ಡಿ ಶೆಟ್ರೆನ ನಿರ್ಮಾಣಡ್ ಅವುದಾಲಾಪುಜಿ ತುಳು ನಾಟಕ ನಡಪರೆ ಉಂಡು. ಬೊಕ್ಕ ಭಂಡಾರದ ಇಲ್ಲರ್ದ್ ದೈವೊಲೆನ ಭಂಡಾರ ಬರ್ಪುಂಡು. ಅವೆರ್ದ್ ಬೊಕ್ಕ ವರ್ಷಾವಧಿದ ಕೋಲ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರ್ದು, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ಶ್ರೀ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಬಂಟ್ವಾಳ ತಾಲೂಕ್ ತಹಶಿಲ್ದಾರ್, ಆಡಳಿತಾಧಿಕಾರಿ ಎಸ್ ಬಿ ಕೊಡಂಗಿ, ಕಾರ್ಯನಿರ್ವಾಹಣಾಧಿಕಾರಿ ಪ್ರವೀಣ್, ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವೊಲ್ಯದ ಅರ್ಚಕೆರ್, ಸಿಬ್ಬಂದಿ ವರ್ಗ, ಸಜೀಪ ಮಾಗಣೆ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕಾರ್ಲ: ಶ್ರೀ ರಾಘವೇಂದ್ರ ಚಾರಿಟೇಬಲ್ ಟ್ರಸ್ಟ್ (ರಿ.) ಹೆಬ್ರ ಮುತಾಲಿಕೆಡ್ ಸಂಸ್ಕೃತಿ ವಿಶ್ವ ಪ್ರತಿಷ್ಠಾನ (ರಿ.) ಒಡಿಪು ಕೊರ್ಪಿನ ‘ಶಾರದಾ ಕೃಷ್ಣ’ ಪ್ರಶಸ್ತಿಗ್ ಈ ಸರ್ತಿ ಮಲ್ಲ ಕಲಾವಿದೆರ್, ನಿರ್ದೇಶಕೆರ್, ಸಂಘಟಕೆರ್, ಚಲನಚಿತ್ರ ನಟೆ ಕಾಸರಗೋಡು ಚಿನ್ನಾ ಮೇರ್ ಆಯ್ಕೆ ಆತೆರ್.
ಮೆರೆಗ್ ಜನವರಿ ತಿಂಗೊಲ್ಡ್ ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಂಡು. ಪ್ರಶಸ್ತಿ ಪತ್ರ, ಫಲಕ ಬೊಕ್ಕ 25,000 ರೂಪಾಯಿ ಪನವುದೊಟ್ಟಿಗೆ ಮಾನಾದಿಗೆ ಮಲ್ಪೆರೆ ಉಂಡು ಪಂದ್ ಪ್ರಶಸ್ತಿದ ಸಂಚಾಲಕೆರ್ ವಿವೇಕಾನಂದ ಎನ್. ಮೇರ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.
ಕನ್ನಡದ ಗಡಿನಾಡ್ ಕಾಸ್ರೋಡುದ ಶ್ರೀನಿವಾಸ ರಾವ್ ಎಸ್. ಮೇರ್ ಕಾಸರಗೋಡು ಚಿನ್ನಾ ಪಂದೇ ಪರಿಚಿತೆರ್. ತನ್ನ ಬಿ.ಎ. ವಿದ್ಯಾಭ್ಯಾಸನ್ ಮುಗಿತ್ ದ್, ಆದರ್ಶ ಫಿಲಂ ಇನ್ಸ್ಟಿಟ್ಯೂಟ್ ಡ್ ಡಿಪ್ಲೋಮೋ ಡ್ ಬಂಗಾರ್ ದ ಪದಕನ್ ಪಡೆಯಿನ ಚಿನ್ನಾ ಮೇರ್ ಸಂಘಟಕೆರಾದ್, ನಟೆಯಾದ್, ರಂಗ ನಿರ್ದೇಶಕೆರಾದ್, ಚಲನಚಿತ್ರ ನಿರ್ದೇಶಕೆರಾದ್ ಚಿರಪರಿಚಿತೆರ್.
ಮೇರ್ ಕನ್ನಡ, ತುಳು, ಕೊಂಕಣಿ ಮಲಯಾಳಂ, ಇಂಗ್ಲಿಷ್ ನಾಟಕಡ್ ಅಭಿನಯ ಮಲ್ತ್ ದ್, ನಾಟಕನ್ ನಿರ್ದೇಶನ ಮಲ್ತ್ ದ್, ಸುಮಾರ್ ಸಂಘ ಸಂಸ್ಥೆಲೆಡ್ ಗುರ್ಕಾರೆ, ಮಾನಾದಿಗೆದ ಗುರ್ಕಾರೆ, ಒತ್ತು ಗುರ್ಕಾರೆಯಾದ್ ಸೇವೆ ಸಂದಾದೆರ್. ಅತ್ತಂದೆ ರಂಗ ಚಿನ್ನಾರಿ ಪನ್ಪುನ ಸಂಸ್ಥೆನ್ ಕಟ್ಟ್ ದ್, ಸುಮಾರ್ ಕನ್ನಡದ ಕೆಲಸನ್ ಏಪಲ ಕಾಸ್ರೋಡು ಪರಿಸರಡ್ ಮಲ್ತೊಂದು ಉಲ್ಲೆರ್.
ಅಂಚೆನೆ ಸುಮಾರ್ ಕೃತಿನ್ ಕನ್ನಡರ್ದ್ ಮಲಯಾಳಂಗ್, ಮಲಯಾಳಂರ್ದ್ ತುಳು, ಕೊಂಕಣಿ ಬೊಕ್ಕ ಕನ್ನಡಗ್ ಅನುವಾದ ಮಲ್ದೆರ್. ಬೊಕ್ಕ ಸಾಹಿತ್ಯ ಕ್ಷೇತ್ರಡ್ ಉಲ್ಲೆರ್. ಸುಮಾರ್ ನೂದೆರ್ದ್ ಎಚ್ಚ ಯಶಸ್ವಿ ಸಾಂಸ್ಕೃತಿಕ ಲೇಸ್ ನ್ ಸಂಘಟನೆ ಮಲ್ತಿನ ಕೀರ್ತಿ ಮೆರೆಗ್ ಸಂದುಂಡು. ಮೆರೆನ ಈ ಸೇವೆಗ್, ಸಾಧನೆಗ್, ಕರ್ನಾಟಕ ರಾಜ್ಯ, ಕನ್ನಡ ಸಾಹಿತ್ಯ ಪರಿಷತ್ತ್, ಕೇರಳ ರಾಜ್ಯ ಬೊಕ್ಕ ಪ್ರತಿಷ್ಠಿತ ಸಂಘ ಸಂಸ್ಥೆಲೆನ ಪ್ರಶಸ್ತಿ ಬೈದ್ಂಡ್.
ಖೇಲೋ ಇಂಡಿಯಾ ಕ್ರೀಡಾಕೂಟ ಯಶಸ್ವಿ ಆತ್ಂಡ್. ನನ ಡಿ.10-17 ಮುಟ್ಟ ಖೇಲೋ ಇಂಡಿಯಾ ಪ್ಯಾರಾ ಗೇಮ್ಸ್ ಆಯೋಜನೆ ಮಲ್ಪೆರೆ ಕೇಂದ್ರ ತಯಾರಾತ್ಂಡ್.
ಪ್ಯಾರಾ ಗೇಮ್ಸ್ ದ ಚೊಚ್ಚಲ ಆವೃತ್ತಿ ಉಂದಾತ್ಂಡ್. 28 ರಾಜ್ಯ, 4 ಕೇಂದ್ರಾಡಳಿತ ಪ್ರದೇಶಲೆಡ್ ಒಟ್ಟು 1350 ರ್ದ್ ಎಚ್ಚ ಕ್ರೀಡಾಪಟುಲು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕೇಂದ್ರ ಕ್ರೀಡಾ ಸಚಿವೆರ್ ಅನುರಾಗ್ ಠಾಕೂರ್ ತೆರಿಪಾದೆರ್. ಇಂಚಿಪ್ಪ ಪ್ಯಾರಾ ಏಷ್ಯನ್ ಗೇಮ್ಸ್ ಡ್ ಭಾರತ 29 ಬಂಗಾರ್, 31 ಬೊಳ್ಳಿ, 51 ಕಂಚ್ ದ ಪದಕ ಗೆಂದ್ ದ್ಂಡ್.
