February 2024

ಫೆ.15: ಥಾಣೆ ನವೋದಯ ಕನ್ನಡ ಸೇವಾ ಸಂಘದ 55 ನೇ ವರ್ಷದ ಉಚ್ಚಯ

ಥಾಣೆ ನವೋದಯ ಕನ್ನಡ ಸೇವಾ ಸಂಘ (ರಿ.) ದ 55 ನೇ ವರ್ಷದ ಉಚ್ಚಯ ಫೆ.15 ಗುರುವಾರ ಮಹಾಕವಿ ಕಾಳಿದಾಸ್ ನಾಟ್ಯಮಂದಿರಡ್ ನಡಪರೆ ಉಂಡು.

ಆನಿ ಮಧ್ಯಾಹ್ನ ತುಡರ್ ಅರ್ಲಾದ್ ಲೇಸ್ ಉದಿಪನ ಆವರೆ ಉಂಡು. ಬೊಕ್ಕ ನವೋದಯ ಸಾಂಸ್ಕೃತಿಕ ವೈಭವ ಬೊಕ್ಕ ತುಳುನಾಡ ವೈಭವ ಸಾಂಸ್ಕೃತಿಕ ಲೇಸ್ ಬಯ್ಯಗ್ ಸಭಾ ಲೇಸ್, ಸನ್ಮಾನ ಲೇಸ್, ಇನಾಮು ಪಟ್ಟುನ ಲೇಸ್ ಬೊಕ್ಕ ಬದ್ ಕ್ ದ್ ಬನ್ನಗ ತುಳು ನಾಟಕ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ನವೋದಯ ಕನ್ನಡ ಸೇವಾ ಸಂಘದ ಗುರ್ಕಾರೆ ದಯಾನಂದ್ ಎಸ್ ಶೆಟ್ಟಿ ಎಳತ್ತೂರುಗುತ್ತು ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಬೊಂಬೈ ಬಂಟ್ಸ್ ಸಂಘದ ಗುರ್ಕಾರೆ ರತ್ನಾಕರ್ ಶ್ರೀ ಮುಂಡ್ಕೂರು ಬೊಕ್ಕ ಮಾನಾದಿಗೆದ ಬಿನ್ನೆರಾದ್ ಒತ್ತು ಗುರ್ಕಾರೆ ಮಹೇಶ್ ಶೆಟ್ಟಿ ಬಾಬಾ ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೇಸ್ ಡ್ ಜೋಕ್ಲೆನ ತಜ್ಞೆರ್ ಡಾ.ಸತ್ಯಪ್ರಕಾಶ್ ಎಸ್ ಶೆಟ್ಟಿ, ಸಮಾಜ ಸೇವಕೆರ್ ಅಕ್ಷರ ಸಂತ ಹರೆಕಳ ಹಾಜಬ್ಬ ಮೊಕ್ಲೆಗ್ ಸನ್ಮಾನ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಎಚ್ಚಾದ ಸಂಖ್ಯೆಡ್ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಥಾಣೆ ನವೋದಯ ಕನ್ನಡ ಸೇವಾ ಸಂಘ (ರಿ.) ದ ಗುರ್ಕಾರೆ, ಸದಸ್ಯೆರ್, ಕಾರ್ಯಕಾರಿ ಸಮಿತಿದ, ಮಹಿಳಾ ವಿಭಾಗದ, ಯುವ ವಿಭಾಗದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಿಜೆಪಿದ ಮುಲ್ಕಿ-ಬೆದ್ರ ಮಂಡಲಗ್ ಪದುಕೆರೆನ ನೇಮಕ

ಭಾರತೀಯ ಜನತಾ ಪಾರ್ಟಿ ಮುಲ್ಕಿ-ಬೆದ್ರ ಮಂಡಲದ ಬೇತೆ ಬೇತೆ ಜಬದಾರಿಗ್ ಪದುಕೆರೆನ್ ನೇಮಕ ಮಲ್ದೆರ್.

ಮಂಡಲದ ಗುರ್ಕಾರೆಯಾದ್ ದಿನೇಶ್ ಪುತ್ರನ್ ಬಳ್ಕುಂಜೆ, ಒತ್ತು ಗುರ್ಕಾರೆಯಾದ್ ಸುಕೇಶ್ ಶೆಟ್ಟಿ ಶಿರ್ತಾಡಿ, ವಿನೋದ್ ಬೊಳ್ಳೂರು, ರಂಗನಾಥ್ ಶೆಟ್ಟಿ, ಕೇಶವ ಕರ್ಕೇರ, ಸುಮ ಶೆಟ್ಟಿ ಬಜಪೆ, ಸೂರಜ್ ಜೈನ್ ಮಾರ್ನಾಡ್, ಪ್ರಧಾನ ಕಾರ್ಯದರ್ಶಿಯಾದ್ ರಂಜಿತ್ ಪೂಜಾರಿ ತೋಡಾರ್, ಹರಿಪ್ರಸಾದ್ ಶೆಟ್ಟಿ ಮೂಡುಶೆಡ್ಡೆ, ಕಾರ್ಯದರ್ಶಿಯಾಗಿ ಸುಭಾಸ್ ಶೆಟ್ಟಿ ಮುಲ್ಕಿ, ಸಾತ್ವಿಕ್ ಮಲ್ಯ ಬೆದ್ರ, ಮಮತಾ ದಿವಾಕರ್ ಪೂಂಜಾ ಬಳ್ಕುಂಜೆ, ಗಣೇಶ ಬಿ ಅಳಿಯೂರು, ಪ್ರೇಮನಾಥ್ ಶೆಟ್ಟಿ ಕೊಡೆತ್ತೂರು, ಪೂರ್ಣಿಮಾ ಹಳೆಯಂಗಡಿ, ಮಂಡಲ ಕೋಶಾಧಿಕಾರಿಯಾದ್ ಪ್ರಭಾಕರ್ ಕುಲಾಲ್ ಪಳಕಳ, ಕಾರ್ಯಾಲಯ ಕಾರ್ಯದರ್ಶಿಯಾದ್ ವಿದ್ಯಾನಂದ ಶೆಟ್ಟಿ ತೆಂಕಮಿಜಾರ್ ನೇಮಕ ಆತೆರ್.

ಅಂಚೆನೆ ರೈತ ಮೋರ್ಚಾ, ಎಸ್ ಸಿ ಮೋರ್ಚಾ, ಎಸ್ ಟಿ ಮೋರ್ಚಾ, ಮಹಿಳಾ ಮೋರ್ಚಾ , ಹಿಂದುಳಿದ ವರ್ಗಲೆನ ಮೋರ್ಚಾ, ಯುವ ಮೋರ್ಚಾ ಬೊಕ್ಕ ಸಾಮಾಜಿಕ ಜಾಲತಾಣ ಪ್ರಕೋಷ್ಟಗ್ ಪದುಕೆರೆನ್ ನೇಮಕ ಮಲ್ದ್ಂಡ್ ಪಂದ್ ಬಿಜೆಪಿ ಮುಲ್ಕಿ-ಬೆದ್ರ ಮಂಡಲದ ಗುರ್ಕಾರೆ ದಿನೇಶ್ ಪುತ್ರನ್ ಪ್ರಕಟಣೆಡ್ ತೆರಿಪಾದೆರ್.

ಇನಿ ಕಾಂಗ್ರೆಸ್ ಶಾಸಕಾಂಗ ಸಭೆ

ಕಾಂಗ್ರೆಸ್ ಶಾಸಕಾಂಗ ಪಕ್ಷದ ಸಭೆ ಇನಿ ಬಯ್ಯಗ್ ನಡಪರೆ ಉಂಡು.

ಲೋಕಸಭೆ ವೋಟುದ ಹಿನ್ನೆಲೆಡ್ ಸುರು ಆಯಿನ ವಿಧಾನಸಭೆ ಆಧಿವೇಶನಡ್ ವಿಪಕ್ಷಲೆನ ಆರೋಪನ್ ಸರಿಯಾದ್ ಉತ್ತರ ಕೊರಿಯೆರೆ ಶಾಸಕೆರೆಗ್ ಸೂಚನೆ ಕೊರ್ಪುನ ದಿಟ್ಟಿಡ್ ಸಿಎಂ ಸಿದ್ದರಾಮಯ್ಯ ಈ ಸಭೆ ಲೈದೆರ್.

ಈ ಸಭೆಟ್ಟ್ ಡಿಸಿಎಂ ಡಿಕೆಶಿ, ಪರಿಷತ್ ಸಭಾ ನಾಯಕೆ ಎನ್ ಎಸ್ ಭೋಸರಾಜ್ ಸೇರ್ದ್ ಮಾತ ಶಾಸಕೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಏಳಿಂಜೆ ಶ್ರೀ ಲಕ್ಷೀ ಜನಾರ್ಧನ ಮಹಾಗಣಪತಿ ದೇವಲ್ಯಡ್ ಕೊಡಿ ಏರ್ ದ್ ಉಚ್ಚಯ ಬಲಿ

ಮುಲ್ಕಿ: ಕಿನ್ನಿಗೋಳಿ ಕೈತಲ್ದ ಏಳಿಂಜೆ ಶ್ರೀ ಲಕ್ಷೀ ಜನಾರ್ಧನ ಮಹಾಗಣಪತಿ ದೇವಲ್ಯದ ವಾರ್ಷಿಕ ಜಾತ್ರೆದ ಕೊಡಿ ಏರ್ಂಡ್.

ದೇವಲ್ಯಡ್ ಬಾಲಗಣಪತಿ ಹೋಮ, 108 ತಾರಾಯಿದ ಗಣಹೋಮ, ನವಕಾಭಿಷೇಕ ನಿತ್ಯ ಗಣಹೋಮ ಆದ್ ದೇವೆರೆನ ಉಚ್ಚಯ ಬಲಿ ಆದ್ ಕೊಡಿ ಏರ್ಂಡ್. ಅಂಚೆನೆ ಫೆ.17 ಮುಟ್ಟ ಪ್ರತಿ ದಿನೊಲ ಧಾರ್ಮಿಕ, ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಈ ಪೊರ್ತುಡು ಅನುವಂಶಿಕ ಅರ್ಚಕೆರ್ ಗಣೇಶ್ ಭಟ್, ವಿದ್ವಾನ್ ವರುಣ್ ಭಟ್, ಆಡಳಿತ ಮೊಕ್ತೇಸರೆರ್ ಏಳಿಂಜೆ ಕೋಂಜಾಲಗುತ್ತು ಪ್ರಭಾಕರ ಶೆಟ್ಟಿ ಮೊಕುಲು‌ ಮಾತ ಪಾಲ್ ಪಡೆದಿತ್ತೆರ್.

ಫೆ.13-20: ಮುಂಡ್ಕೂರು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ವಾರ್ಷಿಕ ಉಚ್ಚಯ

ಕಾರ್ಲ: ಮುಂಡ್ಕೂರು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ವಾರ್ಷಿಕ ಉಚ್ಚಯ ಫೆ.13-20 ಮುಟ್ಟ ನಡಪರೆ ಉಂಡು.

ಫೆ.12 ಸೋಮಾರ ರಾತ್ರೆ ಅಂಗನವಾಡಿ ಜೋಕ್ಲೆರ್ದ್ ನೃತ್ಯ ವೈಭವ ಬೊಕ್ಕ ಮಕರಾಕ್ಷ ಇಂದ್ರಜಿತು ಯಕ್ಷಗಾನ ಬಯಲಾಟ ನಡತ್ಂಡ್.

ಫೆ.13 ಅಂಗಾರೆ ರಾತ್ರೆ ಅಮರನಾಥನ ಅಮರಕಥೆ, ಶಿವಕಥಾ ದೃಶ್ಯರೂಪಕ ಬೊಕ್ಕ ಪಿರವುಡ್ ಒರಿಉಲ್ಲೆ ತುಳು ನಾಟಕ ನಡತ್ಂಡ್.

ಫೆ.14 ಬುದಾರ (ಇನಿ) ರಾತ್ರೆ ಕದಂಬ ನಾಟಕ ನಡಪರೆ ಉಂಡು.

ಫೆ.15 ಗುರುವಾರ ರಾತ್ರೆ ಕಲ್ಜಿಗದ ಮಾಯ್ಕಾರೆ ಪಂಜುರ್ಲಿ ತುಳು ನಾಟಕ ನಡಪರೆ ಉಂಡು.

ಫೆ.16 ಸುಕ್ರಾರ ರಾತ್ರೆ ನರಕಾಸುರ ಮೋಕ್ಷ ಆಟ ನಡಪರೆ ಉಂಡು.

ಫೆ.17 ಸನಿಯಾರ ಬಯ್ಯಗ್ ನೃತ್ಯ ವೈಭವ ಬೊಕ್ಕ ಭಕ್ತಿ ಸಂಗೀತ ಲೇಸ್, ರಾತ್ರೆ ಬಿತ್ತಿಲ್ದ ಉಳ್ಳಾಲ್ತಿ ಅಪ್ಪೆ ಭಗವತಿ ತುಳು ನಾಟಕ ನಡಪರೆ ಉಂಡು.

ಫೆ.18 ಐತಾರ ಬೊಲ್ಪುಗು ತೇರ್ ಉಚ್ಚಯ, ಬಯ್ಯಗ್ ಭಕ್ತಿಗೀತೆ, ರಾತ್ರೆ ಭರತನಾಟ್ಯ ನಡಪರೆ ಉಂಡು.

ಫೆ.19 ಸೋಮಾರ ಬಯ್ಯಗ್ ಅಯೋಧ್ಯ ರಾಮ ದರ್ಶನ, ರಾತ್ರೆ ಬೂಳ್ಯ ಜಾನಪದ ನಾಟಕ ನಡಪರೆ ಉಂಡು.

ಫೆ.21 ಬುದಾರ ಬಯ್ಯಗ್ ಶ್ರೀ ರಾಮ ದರ್ಶನ ಯಕ್ಷಗಾನ ಬಯಲಾಟ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕಾರ್ಲ ಕಂದಾಯ ನಿರೀಕ್ಷಕೆರ್ ಶಿವಪ್ರಸಾದ್ ವಿ.ರಾವ್, ಪವಿತ್ರವಾಣಿ ರಾಮ ಮಡ್ಮಣ್ಞಾಯ, ಪ್ರಧಾನ ಅರ್ಚಕೆರ್ ವೇ| ರಾಮದಾಸ ಆಚಾರ್ಯ, ಶ್ರೀ ದೇವಲ್ಯದ ಸಿಬ್ಬಂದಿ ವರ್ಗ, ಇನ್ನಾ, ಮುಂಡ್ಕೂರು, ಮುಲ್ಲಡ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಫೆ.17: ಬೊಂಬೈ ಬಿಲ್ಲವರ ಅಸೋಸಿಯೇಷನ್ ಭಿವಂಡಿ ಕಚೇರಿದ 24ನೇ ವಾರ್ಷಿಕ ಉಚ್ಚಯ, ತುಳು ನಾಟಕ “ಪಿರ ಬನ್ನಗ”

ಬೊಂಬೈ ಬಿಲ್ಲವರ ಅಸೋಸಿಯೇಷನ್ ಭಿವಂಡಿ ಸ್ಥಳೀಯ ಕಚೇರಿದ 24ನೇ ವರ್ಷದ ಉಚ್ಚಯದ ಲೆಕ್ಕೊಡು ಭಿವಂಡಿ ಸ್ಥಳೀಯ ಕಚೇರಿದ ಸದಸ್ಯೆರೆರ್ದ್, ರಂಗ ತುಡರ್ ಕಲಾವಿದೆರೆರ್ದ್ 10ನೇ ತುಳು ನಾಟಕ “ಪಿರ ಬನ್ನಗ” ಫೆ.17 ಸನಿಯಾರ ಭಿವಂಡಿದ ವಾಟರ್ ಸಪ್ಲಯಿ ದಿ. ಪ್ರೇಮಾತಾಯಿ ಪೇರ್ ದ ಚಾವಡಿಡ್ ನಡಪರೆ ಉಂಡು.

ಜಗದೀಶ್ ಕೆಂಚನಕೆರೆ ನಿರ್ದೇಶನದ ಈ ನಾಟಕಡ್ ಜಗದೀಶ್ ಕೌಡೂರು, ಜಯಂತ್ ಬೆದ್ರ, ಸುನಿಲ್ ಪೂಸ್ರಾಲ್, ಸಂತೋಷ್ ಸಾಣೂರು, ರತ್ನಾಕರ್ ಬಜಗೋಳಿ, ಸುಭಾಷ್ ಬಜ್ಪೆ, ಸಚಿನ್ ಪೂಜಾರಿ ಭಿವಂಡಿ, ಸಂದೀಪ್-ಕಲ್ಯಾಣ್ ರೋಡ್, ಸಚಿನ್ ಠಾಣಾ, ಪ್ರಶಾಂತ್ ಪಾಲಡ್ಕ, ಮನೀಷ್ ಬಜಗೋಳಿ, ರಾಹುಲ್ ಬಜಗೋಳಿ, ರಕ್ಷಿತ್ ಕನೇರಿ, ಪವನ್, ಕಲ್ಯಾಣ್ ರೋಡ್ ಅಭಿನಯ ಮಲ್ದೆರ್. ರಮಾನಂದ್ ಕಿನ್ನಿಗೋಳಿ ಸಹಕಾರ ಕೊರ್ತೆರ್. ಮಂಜುನಾಥ ಶೆಟ್ಟಿಗಾರ್ ಮೇಕಪ್, ಪ್ರಶಾಂತ್ ಎನ್ ಪೂಜಾರಿ, ಹರೀಶ್ ವಿ. ಪೂಜಾರಿ, ಪ್ರಶಾಂತ್ ಆರ್ ಪೂಜಾರಿ, ಉದಯ ಎಸ್ ಪೂಜಾರಿ, ರಮೇಶ್ ಕುಲಾಲ್, ವಸಂತ್ ಬಿ. ಪೂಜಾರಿ, ಸತೀಶ್ ಆರ್ ಪೂಜಾರಿ ಹಿನ್ನೆಲೆ ಸಹಕಾರ ಕೊರ್ತೆರ್.

ಪೊರ್ಕೋಡಿ ಹಿಂದೂ ಯುವ ಸೇನೆದ 21ನೇ ವರ್ಷೊದ ವಾರ್ಷಿಕ ಉಚ್ಚಯ, ಸತ್ಯನಾರಾಯಣ ಪೂಜೆ

ಬಜಪೆ: ಹಿಂದೂ ಯುವ ಸೇನೆ ಪೇಜಾವರ ಶಾಖೆ, ಪೊರ್ಕೋಡಿದ 21ನೇ ವರ್ಷದ ವಾರ್ಷಿಕ ಉಚ್ಚಯ ಲೆಕ್ಕೊಡು ಶ್ರೀ ಲಕ್ಷ್ಮೀ ನಾರಾಯಣ ಭಟ್ ಮೆರೆನ ಮುತಾಲಿಕೆಡ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಕಾಂಜಾಗೋಳಿ ಮಹಾಮ್ಮಾಯಿ ಮೈದಾನಡ್ ನಡತ್ಂಡ್.

ಬೊಕ್ಕ ಪೊರ್ಕೋಡಿ ಯುವ ಬ್ರಿಗೇಡ್‌ ರ್ದ್ ಭಜನೆ ನಡತ್ಂಡ್. ಈ ಪೊರ್ತುಡು ಶಾಖೆದ ಗುರ್ಕಾರೆ ಗುಣಪಾಲ ದೇವಾಡಿಗ, ಮಾನಾದಿಗೆದ ಗುರ್ಕಾರೆ ನಿತ್ಯಾನಂದ ಪುತ್ರನ್, ಚಂದ್ರಬಾಬು, ರಾಜೇಶ್ ಅಮೀನ್, ಪ್ರಮುಖೆರ್ ಅಮೃತೇಶ್, ಶಿವಾನಂದ, ರಾಜೇಶ್ ಕೂಳೂರು, ಹರೀಶ್, ಹರ್ಷಿತ್ ಪಾಲ್ ಪಡೆದಿತ್ತೆರ್.

ನೆತ್ತೆರ್ ದಾನ ಮುಕೇನ ಜೀವ ಒರಿಪಾವುನವು ಮಲ್ಲ ಸೇವೆ: ತ್ಯಾಗರಾಜ ಆಚಾರ್ಯ

ಮುಲ್ಕಿ: ತೋಕೂರು ತಪೋವನ ರಾಮಕೃಷ್ಣ ಪೂಂಜಾ ಕೈಗಾರಿಕಾ ತರಬೇತಿ ಸಂಸ್ಥೆಡ್ ಕೆಎಂಸಿ ಕಾಲೇಜ್, ರಕ್ತನಿಧಿ ಕೇಂದ್ರ ಅತ್ತಾವರ ಬೊಕ್ಕ ಕಿನ್ನಿಗೋಳಿ ರೋಟರಿ ಕ್ಲಬ್ ದ ಒಟ್ಟುಸೇರಿಗೆಡ್ ನೆತ್ತೆರ್ ಉಂಬೊಲಿ (ದಾನ) ಶಿಬಿರ ನಡತ್ಂಡ್.

ಈ ಲೇಸ್ ಡ್ ಕಿನ್ನಿಗೋಳಿ ರೋಟರಿ ಕ್ಲಬ್ ದ ಗುರ್ಕಾರೆ ತ್ಯಾಗರಾಜ ಆಚಾರ್ಯ ತುಡರ್ ಅರ್ಲಾದ್ ಚಾಲನೆ ಕೊರ್ದು ಪಾತೆರ್ದ್, ನೆತ್ತೆರ್ ದಾನದ ಮುಕೇನ ಜೀವ ಒರಿಪಾವುನ ಬೇಲೆ ಶ್ರೇಷ್ಠವಾಯಿನವು ಪಂದ್ ಪಂಡೆರ್. ಡಾ. ಸುಮುಖ್ ನೆತ್ತೆರ್ ದಾನದ ಮಹತ್ವನ್ ತೆರಿಪಾಯೆರ್.

ಶಿಮಂತೂರುಡ್ ಧರ್ಮಾರ್ಥ ಕರಾಟೆ ಕ್ಲಾಸ್ ಮುಗಿತಲ, ಆಜೋಲೆ ಪಟ್ಟುನ ಲೇಸ್

ಮುಲ್ಕಿ: ಶಿಮಂತೂರು ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ದ ಕಲ್ಪಾರ್ಥಿಲೆಗ್ ಕರಿನ ಜೂನ್ ತಿಂಗೊಲ್ಡ್ ಸುರು ಆಯಿನ ಧರ್ಮಾರ್ಥ ಕರಾಟೆ ಕ್ಲಾಸ್ ದ ಮುಗಿತಲದ ಲೇಸ್ ನಡತ್ಂಡ್.

ಕರಾಟೆ ಮಾಸ್ಟರ್ ಕ್ಯೋಷಿ ಈಶ್ವರ್ ಕಟೀಲ್ ಮುಖ್ಯ ಪರಿವೀಕ್ಷಕೆರಾದ್ ಕಲ್ಪಾರ್ಥಿಲೆಗ್ ಕಲರ್ ಬೆಲ್ಟ್ ಗ್ರೇಡಿಂಗ್ ಪರೀಕ್ಷೆನ್ ನಡಪಾದ್, ಭಾರತ ಕರಾಟೆನ್ ಸಮರ ವಿಜ್ಞಾನವಾದ್ ಕಲ್ಪಾವುಂಡು. ಕರಾಟೆ ಜೋಕ್ಲೆನ ದೈಹಿಕ ಬೊಕ್ಕ ಮಾನಸಿಕ ಸಾಮರ್ಥ್ಯನ್ ಸುಧಾರಿಸಾಯೆರೆ ಸಕಾಯ ಮಲ್ಪುಂಡು ಪಂದ್ ಪಂಡೆರ್.

ಶಿಹಾನ್ ಮೋರ್ಗನ್ ವಿಲಿಯಮ್, ರೆಂಷಿ ಚಂದ್ರಹಾಸ್ ಕಟೀಲ್, ಸೆನ್ಸ್ಯಿ ಸುಮಂತ್, ಸೀನಿಯರ್ ಬ್ಲಾಕ್‌ಬೆಲ್ಟ್ ಪರಿಣಿತೆರ್ ಸಹಾಯಕೆರಾದ್ ಕೆಲಸ ಮಲ್ದೆರ್. ಈ ಪೊರ್ತುಡು ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್, ಶಾಲಾ ಕರಾಟೆ ತರಬೇತುದಾರೆರ್ ಶಿಹಾನ್ ನಾಗರಾಜ್ ಕುಲಾಲ್ ಪಾಲ್ ಪಡೆದಿತ್ತೆರ್.

ಪರೀಕ್ಷೆಡ್ ಸುಮಾರ್ 130 ಕಲ್ಪಾರ್ಥಿಲು ಪಾಲ್ ಪಡೆದಿತ್ತೆರ್. ನನದ ಹಂತಗ್ ಉತ್ತೀರ್ಣರಾತೆರ್. ನೆಟ್ಟ್ 33 ಕಲ್ಪಾರ್ಥಿಲೆಗ್ ಯೆಲ್ಲೊ, 36 ಕಲ್ಪಾರ್ಥಿಲೆಗ್ ಗ್ರೀನ್, 26 ಕಲ್ಪಾರ್ಥಿಲೆಗ್ ಆರೆಂಜ್, 30 ಕಲ್ಪಾರ್ಥಿಲೆಗ್ ಬ್ಲೂ, 5 ಕಲ್ಪಾರ್ಥಿಲೆಗ್ ಪರ್ಪಲ್ ಬಣ್ಣದ ಬೆಲ್ಟ್ ಬೊಕ್ಕ ಪ್ರಮಾಣ ಪತ್ರನ್ ಕೊರಿಯೆರ್.