February 2024

ಕಾಪು ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯಡ್ ಕೊಡಿ ಏರ್ಂಡ್

ಕಾಪು: ಕಾಪು ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯದ ವರ್ಷದ ಜಾತ್ರೆದ ಲೆಕ್ಕೊಡು ಫೆ.13 ಕ್ಕ್ ಕೊಡಿ ಏರ್ಂಡ್.

ಈ ಲೇಸ್ ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯದ ಪ್ರಧಾನ ತಂತ್ರಿ ವೇದಮೂರ್ತಿ ಅನಂತರಾಮ ತಂತ್ರಿ ಕಲ್ಯ ಮೆರೆನ ಮುತಾಲಿಕೆಡ್ ಅರ್ಚಕೆರ್ ವೇ. ನಾರಾಯಣ ತಂತ್ರಿ, ವೇ.ಜನಾರ್ದನ ತಂತ್ರಿಲೆನ ಉಪಸ್ಥಿತಿಡ್ ನಡತ್ಂಡ್.

ಈ ಪೊರ್ತುಡು ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯದ ಕಾರ್ಯ ನಿರ್ವಹಣಾಧಿಕಾರಿ ಅರುಣ್ ಕುಮಾರ್ ಬಿ.ಕೆ., ಗೌರವ ಸಲಹೆಗಾರೆರ್ ಕೆ.ಪಿ. ಆಚಾರ್ಯ, ಕಟ್ವಾನ ನಿರ್ಮಾಣ ಸಮಿತಿ ಗುರ್ಕಾರೆ ಕೆ.ವಾಸುದೇವ ಶೆಟ್ಟಿ, ವ್ಯವಸ್ಥಾಪನ ಸಮಿತಿ ಮಾಜಿ ಗುರ್ಕಾರೆ ಮೋಹನ್ ಎಂ. ಬಂಗೇರ, ಮಾಜಿ ಶಾಸಕೆರ್ ಲಾಲಾಜಿ ಆರ್. ಮೆಂಡನ್, ಪ್ರಮುಖೆರ್ ಅನಿಲ್ ಬಲ್ಲಾಳ್ ಕಾಪು ಬೂಡು, ನಡಿಕೆರೆ ರತ್ನಾಕರ ಶೆಟ್ಟಿ, ಕಾಪು ದಿವಾಕರ ಶೆಟ್ಟಿ, ರಮೇಶ್ ಹೆಗ್ಡೆ ಕಲ್ಯ, ಸೂರಜ್ ಶೆಟ್ಟಿ ಮಲ್ಲಾರುಗುತ್ತು, ಮನೋಹರ ಶೆಟ್ಟಿ ಕಾಪು, ಶ್ರೀಧರ ಶೆಣೈ, ಪ್ರಸಾದ್ ಶೆಣೈ, ರತ್ನಾಕರ ಹೆಗ್ಡೆ ಕಲೀಲಬೀಡು, ಯೋಗೀಶ್ ಶೆಟ್ಟಿ ಬಾಲಾಜಿ, ಶ್ರೀಕರ ಶೆಟ್ಟಿ ಕಲ್ಯ, ವಿಕ್ರಂ ಕಾಪು, ಸಖೇಂದ್ರ ಸುವರ್ಣ, ಮಾಧವ ಆರ್. ಪಾಲನ್, ಸುರೇಶ್ ಶೆಟ್ಟಿ ಅಯೋಧ್ಯಾ, ಬಾಲಕೃಷ್ಣ ಶೆಟ್ಟಿ ದೊರಕಳಗುತ್ತು, ಶೇಖರ ಸಾಲ್ಯಾನ್, ರವಿ ಭಟ್ ಮಂದಾರ, ದೇವರಾಜ್ ‘ತೊಟ್ಟಂ, ರವೀಂದ್ರ ಮಲ್ಲಾರು, ಉಮೇಶ್ ಪೂಜಾರಿ, ಸರೋಜಿನಿ ಶೆಟ್ಟಿ ರಮಾ ಶೆಟ್ಟಿ ಸಂದೀಪ್ ಶೆಟ್ಟಿ ಕಲ್ಯಾ, ರತ್ನಾಕರ ಶೆಟ್ಟಿ ಪಡುಮನೆ, ಅನಿಲ್ ಕುಮಾರ್ ಬೊಕ್ಕ ಕಾಪು ಸಾರ ಸೀಮೆದ ಭಕ್ತೆರ್ ಪಾಲ್ ಪಡೆದಿತ್ತೆರ್.

ಸಂಘ-ಸಂಸ್ಥೆಲು ಸಮಾಜದ ಬೇಲೆ ಮಲ್ತ್ ದ್ ಸಾಧಕೆರಾವೊಡು: ಪ್ರಭಾಕರ ಶೆಟ್ಟಿ

ಮುಲ್ಕಿ: ಸಮಾಜಮುಖಿ ಬೇಲೆರ್ದ್ ಸಂಘ ಸಂಸ್ಧೆಲು ಕಾರ್ಯಪ್ರವೃತ್ತಿ ಆಂಡ ಸಾಧಕೆರಾಯೆರೆ ಸಾಧ್ಯ ಪಂದ್ ಏಳಿಂಜೆ ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಪ್ರಭಾಕರ ಶೆಟ್ಟಿ ಏಳಿಂಜೆ ಕೋಂಜಾಲು ಗುತ್ತು ಪಂಡೆರ್.

ಏಳಿಂಜೆ ಶ್ರೀ ಲಕ್ಷ್ಮೀಜನರ್ದಾನ ದೇವಲ್ಯದ ಚಾವಡಿಡ್ ನಡತಿನ ಏಳಿಂಜೆ ಶ್ರೀ ದೇವಿ ಯುವತಿ ಮಹಿಳಾ ಮಂಡಲದ ವಾರ್ಷಿಕ ಉಚ್ಚಯ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರಿಯೆರ್.

ಈ ಲೇಸ್ ಡ್ ಸಾಧಕಿ ಬರವುಗಾರ್ತಿ ಶರೋನ್ ಶೆಟ್ಟಿ ಬೊಕ್ಕ ಕಂಬುಲ ಒಟಗಾರೆ ಗುರುಚರಣ್ ಪಟ್ಟೆ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ದೇವಲ್ಯದ ಪ್ರಧಾನ ಅರ್ಚಕೆರ್ ಗಣೇಶ್ ಭಟ್, ನಿವೃತ್ತ ಉಪ ತಹಶೀಲ್ದಾರೆರ್ ಯೋಗೀಶ್ ರಾವ್, ಬೊಂಬೈ ಉದ್ಯಮಿ ದಿವಾಕರ ಶೆಟ್ಟಿ ಕೋಂಜಾಲಗುತ್ತು, ದಯಾನಂದ ಶೆಟ್ಟಿ ಕೋಂಜಾಲು ಗುತ್ತು, ಸಂಘದ ಮಾನಾದಿಗೆದ ಗುರ್ಕಾರ್ದಿ ವತ್ಸಲಾ ರಾವ್, ನವಚೇತನ ಯುವಕ ಮಂಡಲದ ಮಾನಾದಿಗೆದ ಗುರ್ಕಾರೆ ಅನಿಲ್ ಶೆಟ್ಟಿ ಕೋಂಜಾಲುಗುತ್ತು, ಐಕಳ ಗ್ರಾ.ಪಂ ಒತ್ತು ಗುರ್ಕಾರ್ದಿ ಜಯಲಕ್ಷ್ಮಿ, ಮಾನಾದಿಗೆದ ಗುರ್ಕಾರ್ದಿ ನೇತ್ರಾವತಿ ಎಸ್ ಶೆಟ್ಟಿ, ನಿಶಿತಾ ಹರೀಶ್ ಶೆಟ್ಟಿ, ರೇಖಾ ರಘುರಾಮ, ಪದ್ಮಿನಿ ವಸಂತ್, ವಿಮಲ ನಿಶಿತ ಶೆಟ್ಟಿ, ಗುರ್ಕಾರ್ದಿ ಉಮಾವತಿ, ಕಾರ್ಯದರ್ಶಿ ಶಕುಂತಲಾ ಶೆಟ್ಟಿ, ಸವಿತಾ ಪಾಲ್ ಪಡೆದಿತ್ತೆರ್.

ಗಾಡಿದ ಬ್ಯಾಟರಿ ಕಂಡಿನ ಕೇಸ್: ಆರೋಪಿ, 3,90,000 ರೂ. ಬಿಲೆತ್ತ ಸೊತ್ತು ವಶಕ್ಕ್

ಕುಡ್ಲ ಪೇಂಟೆದ ಕೊಣಾಜೆ ಪೊಲೀಸ್ ಠಾಣಾ ವ್ಯಾಪ್ತಿಡ್ ಬ್ಯಾಟರಿ ಕಂಡಿನ ಆರೋಪಿನ್ ಬೊಕ್ಕ ಆಯಡ ಇತ್ತಿನ 3,90,000 ರೂ. ಬಿಲೆತ್ತ ಸೊತ್ತುಲೆನ್ ಕೊಣಾಜೆ ಪೊಲೀಸೆರ್ ವಶಕ್ಕ್ ಪಡೆತೆರ್.

ಈ ಕೇಸ್ ಗ್ ಸಂಬಂಧಪಟ್ಟಿನ ಆರೋಪಿ ರಿಯಾಜ್ ತಲಪಾಡಿ ತೆರಿದ್ ಬೈದ್ಂಡ್.

ಈ ಕೇಸ್ ದ ಪತ್ತೆ ಕಾರ್ಯ ಕುಡ್ಲ ಪೇಂಟೆದ ಮಾನ್ಯ ಪೊಲೀಸ್ ಆಯುಕ್ತೆರ್ ಅನುಪಮ್ ಅಗರವಾಲ್ ಐ.ಪಿ.ಎಸ್‌ ಮೆರೆನ ಮಾರ್ಗದರ್ಶನದಂಚೆನೆ ಕಾನೂನು & ಸುವ್ಯವಸ್ಥೆ ವಿಭಾಗದ ಡಿಸಿಪಿ ಸಿದ್ದಾರ್ಥ ಗೋಯಲ್ ಐ.ಪಿ.ಎಸ್ ಬೊಕ್ಕ ಅಪರಾಧ & ಸಂಚಾರ ವಿಭಾಗದ ಡಿಸಿಪಿ ದಿನೇಶ್‌ಕುಮಾರ್ ನಿರ್ದೇಶನದಂಚೆನೆ, ಕುಡ್ಲ ದಕ್ಷಿಣ ವಿಭಾಗದ ಎ.ಸಿ.ಪಿ. ಧನ್ಯ ಎನ್ ನಾಯಕ್ ಮೆರೆನ ಮುತಾಲಿಕೆಡ್ ನಡತ್ಂಡ್.

ಈ ಪೊರ್ತುಡು ಕೊಣಾಜೆ ಪೊಲೀಸ್ ಠಾಣೆದ ಪೊಲೀಸ್ ನಿರೀಕ್ಷಕೆರ್ ರವೀದ್ರ ಸಿ ಎಂ, ಪೊಲೀಸ್ ಉಪ ನಿರೀಕ್ಷಕೆರ್ ನಾಗರಾಜ್ ಎಸ್, ಪುನೀತ್ ಗಾಂವ್ಕರ್, ಅಶೋಕ್, ಯಲ್ಲಾಲಿಂಗ, ಸಿಬ್ಬಂದಿಲಾಯಿನ ಸಂಜೀವ್ ಎಎಸ್ ಐ, ರೇಶ್ಮಾ , ಸಂತೋಷ್ ಕೆಸಿ ಬಸವನಗೌಡ, ಸುರೇಶ್ ತಳವಾರ್ ಇತ್ತೆರ್.

ಕಾಂಗ್ರೆಸ್ ಮುಖಂಡೆರ್ ಬಾಬು ಎನ್ ಶೆಟ್ಟಿ ನನ ನೆಂಪು ಮಾತ್ರ

ಬಜಪೆ: ಕಾಂಗ್ರೆಸ್ ಮುಖಂಡೆರ್, ಉದ್ಯಮಿ, ಮರವೂರು ಬೂಡು ಬಾಬು ಎನ್ ಶೆಟ್ಟಿ (73) ಮೇರ್ ಹುಷಾರ್ ದಾಂತೆ ಫೆ.3 ಸನಿಯಾರ ದೇವೆರೆ ಪಾದ ಸೇರಿಯೆರ್.

ಕಷ್ಟಡ್ ಇತ್ತಿನಕ್ಲೆಗ್ ಮಾತೆರ್ಗ್ಲಾ ಸಕಾಯ ಮಲ್ತೊಂದು ಇತ್ತಿನ ಮೇರ್ ಮುಲ್ಕಿ-ಬೆದ್ರ ವಿಧಾನ ಸಭಾ ಕ್ಷೇತ್ರದ ಬ್ಲಾಕ್ ಕಾಂಗ್ರೆಸ್ ಒತ್ತು ಗುರ್ಕಾರೆಯಾದ್, ಮಳವೂರು ಪ್ರಜಾಪ್ರತಿನಿಧಿ ಸಮಿತಿದ ಗುರ್ಕಾರೆಯಾದ್ ಸೇವೆ ಸಂದಾದೆರ್.

ಮಳವೂರು ಗ್ರಾಮ ಪಂಚಾಯತ್ ಬೊಕ್ಕ ಬಜಪೆ ಮಂಡಲ ಪಂಚಾಯತ್ ದ ಸದಸ್ಯೆರಾಯಿನ ಮೇರ್ ಕುಡ್ಲ ಸರಕಾರಿ ಕಾಲೇಜ್ ದ ಯೂನಿಯನ್ ಲೀಡರ್ ಆದಿತ್ತೆರ್‌.

ಮೆರೆಗ್ ಬೊಡೆದಿ, ರಡ್ಡ್ ಆಣ್ ಜೋಕುಲು ಬೊಕ್ಕ ಮಗಲ್ ಉಲ್ಲೆರ್. ಮೆರೆನ ನಿಧನೊಗು ಮಾಜಿ ಸಚಿವೆರ್ ಕೆ.ಅಭಯಚಂದ್ರ ಜೈನ್, ಮಾಜಿ ಶಾಸಕೆರ್ ವಿಜಯ ಕುಮಾರ್ ಶೆಟ್ಟಿ, ಕಾಂಗ್ರೆಸ್ ಮುಖಂಡೆರ್ ಮಿಥುನ್ ರೈ ಸಂತಾಪ ತೆರಿಪಾದೆರ್.

ಫೆ.25: ಉಳ್ಳಾಲ ತಾಲೂಕ್ ಬಿಲ್ಲವರ ಸಮಾವೇಶ

ಕೋಟೆಕಾರ್: ಸೋಮೇಶ್ವರದ ಕೊಲ್ಯ ಬಿಲ್ಲವ ಸೇವಾ ಸಮಾಜ ಟ್ರಸ್ಟ್ (ರಿ.) ದ ಮುತಾಲಿಕೆಡ್, ಉಳ್ಳಾಲ ತಾಲೂಕ್ ಬಿಲ್ಲವರ ಸಮಾವೇಶ ಸಮಿತಿದ ಒಟ್ಟುಸೇರಿಗೆಡ್ ಫೆ.25 ಐತಾರ ಕೊಲ್ಯ ಬಿಲ್ಲವ ಸಮಾಜ ಸಂಘದ ಚಾವಡಿಡ್ ಉಳ್ಳಾಲ ತಾಲೂಕ್ ಬಿಲ್ಲವರ ಸಮಾವೇಶ ನಡಪರೆ ಉಂಡು.

ನೆತ್ತ ಸಭಾ ಲೇಸ್ ದ ಉದಿಪನನ್ ಮಾಜಿ ಸಚಿವೆರ್ ಬಿ. ಜನಾರ್ದನ ಪೂಜಾರಿ ಮಲ್ಪುವೆರ್. ಸೋಲೂರು ಮಠತ್ತ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಲೇಸ್ ದ ಗುರ್ಕಾಮೆನ್ ಅಖಿಲ ಭಾರತ ಬಿಲ್ಲವರ ಯೂನಿಯನ್ ದ ಗುರ್ಕಾರೆ ನವೀನ್ ಚಂದ್ರ ಡಿ. ಸುವರ್ಣ ಒಯಿಸೊನ್ವೆರ್.

ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಶಿಕ್ಷಣ ಸಚಿವೆರ್ ಮಧು ಬಂಗಾರಪ್ಪ, ಸಭಾಧ್ಯಕ್ಷೆರ್ ಯು.ಟಿ ಖಾದರ್, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರ್ ಶಿವರಾಜ್ ತಂಗಡಗಿ, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ವಿರೋಧ ಪಕ್ಷದ ನಾಯಕೆ ಕೋಟ ಶ್ರೀನಿವಾಸ ಪೂಜಾರಿ, ಶಾಸಕೆರ್ ಸುನಿಲ್ ಕುಮಾರ್, ಉಮಾನಾಥ್ ಕೋಟ್ಯಾನ್, ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ ಹರಿಪ್ರಸಾದ್, ಹರೀಶ್ ಕುಮಾರ್, ಆರ್ಯ ಈಡಿಗ ಸಮಾಜ ಸೇವಾ ಸಂಘದ ಗುರ್ಕಾರೆ ತಿಮ್ಮೇಗೌಡ, ಮಾಜಿ ಸಚಿವೆರ್ ವಿಜಯಕುಮಾರ್ ಸೊರಕೆ, ಜಿಲ್ಲಾಧ್ಯಕ್ಷೆರ್ ಸತೀಶ್ ಕುಮಾರ್ ಕುಂಪಲ, ಕಂಕನಾಡಿ ಗರೋಡಿದ ಗುರ್ಕಾರೆ ಚಿತ್ತರಂಜನ್ ಗರೋಡಿ, ಮುಲ್ಕಿ ಬಿಲ್ಲವರ ಮಹಾಮಂಡಲದ ಗುರ್ಕಾರೆ ರಾಜಶೇಖರ್ ಕೋಟ್ಯಾನ್, ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದ ಗುರ್ಕಾರೆ ಹೆಚ್. ಎಸ್. ಸಾಯಿರಾಮ್, ಬಿಲ್ಲವ ಮುಖಂಡೆರ್ ಪದ್ಮರಾಜ್ ಆರ್, ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜೆ. ಸುವರ್ಣ, ನಾರಾಯಣಗುರು ವಿಚಾರ ವೇದಿಕೆದ ರಾಜ್ಯಾಧ್ಯಕ್ಷೆರ್ ಸತ್ಯಜಿತ್‌ ಸುರತ್ಕಲ್, ವಿಶ್ವಮಹಿಳಾ ಸಂಘದ ಗುರ್ಕಾರ್ದಿ ಊರ್ಮಿಳಾ ರಮೇಶ್, ಲಂಡನ್ ಯುಕೆ ಕಾರ್ಲ ನಾರಾಯಣ ಕುಕ್ಯಾನ್, ಯುವವಾಹಿನಿ ಕೇಂದ್ರ ಸಮಿತಿದ ಗುರ್ಕಾರೆ ಹರೀಶ್ ಪೂಜಾರಿ, ತುಳು ಚಲನಚಿತ್ರ ನಟೆ ಭೋಜರಾಜ್ ವಾಮಂಜೂರ್, ಶೋಭರಾಜ್ ಪಾವೂರು ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೇಸ್ ಡ್ ರಾಷ್ಟ್ರಪತಿಲೆರ್ದ್ ಸೇವಾ ಪದಕ ಪುರಸ್ಕೃತೆರ್ ರಾಮ ಪೂಜಾರಿ ಮೆರೆಗ್ ಸನ್ಮಾನ ನಡಪರೆ ಉಂಡು. ಕಬಡ್ಡಿ ಪಂತೊಡು ಬಂಗಾರ್ ದ ಪದಕ ಗೆಂದಿನ ಯಶ್ ರಾಜ್ ಬಗಂಬಿಲ ಮೆರೆಗ್ ಮಾನಾದಿಗೆದ ಅಭಿನಂದನೆ ಸಂದಾಯೆರೆ ಉಂಡು.

ಈ ಲೇಸ್ ಡ್ ಸಮಾಜ ಬಾಂಧವೆರ್ ಎಚ್ಚಿನ ಸಂಖ್ಯೆಡ್ ಸೇರ್ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಉಳ್ಳಾಲ ತಾಲೂಕ್ ಬಿಲ್ಲವರ ಸಮಾವೇಶ ಸಮಿತಿದ ಗುರ್ಕಾರೆ ಎ.ಜೆ ಶೇಖರ್,
ಕೊಲ್ಯ ಬಿಲ್ಲವ ಸೇವಾ ಸಮಾಜ ಟ್ರಸ್ಟ್ (ರಿ.) ದ ಗುರ್ಕಾರೆ ವೇಣುಗೋಪಾಲ್, ಕೊಲ್ಯ ಬಿಲ್ಲವ ಸೇವಾ ಸಮಾಜ (ರಿ.) ದ ಗುರ್ಕಾರೆ ಹರೀಶ್ ಮುಂಡೋಳಿ, ಕೊಲ್ಯ ಶ್ರೀ ನಾರಾಯಣಗುರು ಮಹಿಳಾ ಮಂಡಳಿ (ರಿ.) ದ ಗುರ್ಕಾರ್ದಿ ರೇವತಿ ವಿಶ್ವನಾಥ್, ಯುವವಾಹಿನಿ (ರಿ.) ಕೊಲ್ಯ ಘಟಕದ ಗುರ್ಕಾರೆ ಲತೀಶ್ ಎಂ.ಸಂಕೊಳಿಗೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ವೇಣೂರು ಬಾಹುಬಲಿ ಮಹಾಮಜ್ಜನದ ಅಟ್ಟಣೆ: ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆ ಭೇಟಿ

ವೇಣೂರು: ವೇಣೂರು ಭಗವಾನ್ ಶ್ರೀ ಬಾಹುಬಲಿನ ಮಹಾ ಮಜ್ಜನಗ್ ಕೆಲವೇ ದಿನ ಬಾಕಿ ಇತ್ತ್ ದ್, ಇಡೆಗ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ. ವೀರೇಂದ್ರ ಹೆಗ್ಗಡೆರ್ ಭೇಟಿ ಕೊರ್ದು ಅಟ್ಟಳಿಗೆ ಬೊಕ್ಕ ಬೇತೆ ಕಾಮಗಾರಿನ್ ತೂಯೆರ್.

ಈ ಪೊರ್ತುಡು ಅಳದಂಗಡಿ ಅರಮನೆತ್ತ ತಿಮ್ಮಣ್ಣರಸೆರ್ ಡಾ.ಪದ್ಮಪ್ರಸಾದ ಅಜಿಲೆರ್, ಮಹಾ ಮಸ್ತಕಾಭಿಷೇಕ ಸಮಿತಿ ಪ್ರಧಾನ ಕಾರ್ಯದರ್ಶಿ ಪ್ರವೀಣ್ ಕುಮಾರ್ ಇಂದ್ರ, ಪ್ರಮುಖೆರ್ ಡಾ.ಶಾಂತಿ ಪ್ರಸಾದ್, ವಿಕಾಸ್ ಜೈನ್ ಪಡ್ಯಾರಬೆಟ್ಟು, ಶಿವಪ್ರಸಾದ್ ಅಜಿಲ, ಸನತ್ ಕುಮಾರ್ ಜೈನ್, ಪ್ರಮೋದ್ ಜೈನ್ ಬೊಕ್ಕ ಸಮಿತಿದ ಪದುಕೆರ್ ಪಾಲ್ ಪಡೆದಿತ್ತೆರ್.

ದೇವೆರೆ ಪಾದೊ ಸೇರಿಯೆರ್ ಖಂಡಿಗೆ ಬೂಡು ಆದಿತ್ಯ ಮುಕ್ಕಾಲ್ದಿ

ಚೇಳಾಯಿರು : ಖಂಡಿಗೆ ಬೂಡು ಶ್ರೀ ಧರ್ಮರಸು ಉಳ್ಳಾಯ ದೈವಸ್ಥಾನದ ಶ್ರೀ ಆದಿತ್ಯ ಮುಕ್ಕಾಲ್ದಿ ಮೇರ್ ದೇವೆರೆ ಪಾದೊ ಸೇರಿಯೆರ್.

ಅರೆನ ಅಂತಿಮ ಕ್ರಿಯೆ ಎಲ್ಲೆ (ಫೆ.15) ಕಾಂಡೆ 11 ಗಂಟೆಗೆ ಅರೆನ ಇಲ್ಲಡ್ ನಡಪರೆ ಉಂಡು ಪಂದ್ ಕುಟುಂಬಸ್ಥೆರ್ ತೆರಿಪಾದೆರ್. ಅರೆನ ಆತ್ಮೊಗು ಶಾಂತಿ ತಿಕ್ಕಡ್ ಪಂದ್ ಊರು, ಪರವೂರುದಕುಲು ಪ್ರಾರ್ತನೆ ಮಲ್ತೊಂದೆರ್.

ಇನಿರ್ದ್ ದೇಲಂತಬೆಟ್ಟು ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಪ್ರತಿಷ್ಠಾ ವರ್ಧಂತಿ, ಕಾಲಾವಧಿ ಶ್ರೀ ಭೂತಬಲಿ ಉಚ್ಚಯ

ಕನ್ಯಾನ: ದೇಲಂತಬೆಟ್ಟು ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಫೆ.14 ಬೊಕ್ಕ 15 ಕ್ಕ್ ಪ್ರತಿಷ್ಠಾ ವರ್ಧಂತಿ ಬೊಕ್ಕ ಕಾಲಾವಧಿ ಶ್ರೀ ಭೂತಬಲಿ ಉಚ್ಚಯ ನಡಪರೆ ಉಂಡು.

ಈ ಲೇಸ್ ದ ವೈದಿಕ ವಿಧಿ ವಿಧಾನಲು ಬ್ರಹ್ಮಶ್ರೀ ಕುಂಟುಕುಡೇಲು ರಘರಾಮ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.

ಫೆ.9 ಸುಕ್ರಾರ ಬೊಲ್ಪುಗು ಪೂಜೆ, ಗಣಪತಿ ಹವನ, ಪವಮಾನ ಅಭಿಷೇಕ, ಮಧ್ಯಾಹ್ನ ಮಹಾಮಂಗಳಾರತಿ, ಅನ್ನ ಪ್ರಸಾದ ಸೇವೆ ಬಯ್ಯಗ್ ರಂಗಪೂಜೆ, ರಾತ್ರೆ ರಂಗಪೂಜೆ, ಮಂಗಳಾರತಿ ತೀರ್ಥ ಪ್ರಸಾದ ವಿತರಣೆ ನಡತ್ಂಡ್.

ಫೆ.14 ಬುದಾರ (ಇನಿ) ಪೂಜೆ, ಮಹಾಗಣಪತಿ ಹವನ, ನವಕ ಕಲಶಾಭಿಷೇಕ ಮಧ್ಯಾಹ್ನ ತುಲಾಭಾರ ಸೇವೆ, ಮಹಾಪೂಜೆ, ಮಂಗಳಾರತಿ, ಪ್ರಸಾದ ವಿತರಣೆ ಬೊಕ್ಕ ಅನ್ನ ಪ್ರಸಾದ ಸೇವೆ ನಡತ್ಂಡ್. ಬಯ್ಯಗ್ ಸಾಂಸ್ಕೃತಿಕ ಲೇಸ್, ಕನ್ಯಾನ ಮಲರಾಯ ದೈವೊಲ್ಯರ್ದ್ ಮಲರಾಯಿ ದೈವೊದ ಭಂಡಾರ ದೇವಲ್ಯಗ್ ಪಿದಾಡಿಯೆರೆ, ರಾತ್ರೆ ಕಾರ್ತಿಕ ಪೂಜೆ, ದೀಪಾರಾಧನೆ, ಉಚ್ಚಯ ಬಲಿ ನಡಪರೆ ಉಂಡು.

ಫೆ.15 ಗುರುವಾರ ಬೊಲ್ಪುಗು ದೇವೆರೆನ ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ರಾಜಾಂಗಣ ಪ್ರಸಾದ, ನವಕ ಕಲಶಾಭಿಷೇಕ, ನಿತ್ಯ ಪೂಜೆ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರಿಕಾರೆರ್ ಸುಬ್ಬಾರಾಂ ಪಿಲಿಂಗುಳಿ, ಕನ್ಯಾನ ದೇಲಂತಬೆಟ್ಟು ಶ್ರೀ ವಿಷ್ಣುಮೂರ್ತಿ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಕೆ. ಮನೋಜ್ ಕುಮಾರ್ ಬನಾರಿ ಬೊಕ್ಕ ಸದಸ್ಯೆರ್, 12 ಇಲ್ಲದ ಗುರಿಕಾರೆರ್ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಂದಲೆ ಮೂಡುಮನೆಗುತ್ತು ಶ್ರೀಮಂತ ರಾಜಗುಳಿಗ ಕ್ಷೇತ್ರಡ್ ಪರಕೆದ ಕೋಲ

ಪಚ್ಚನಾಡಿ: ಬಂದಲೆದ ಮೂಡುಮನೆಗುತ್ತು ಶ್ರೀಮಂತ ರಾಜಗುಳಿಗ ಕ್ಷೇತ್ರಡ್ ಫೆ.13 ಅಂಗಾರೆ  ಪರಕೆದ ಕೋಲೋಚ್ಚಯ ನಡತ್ಂಡ್.

ಈ ಕೋಲೋಚ್ಚಯ ಬೊಲ್ಪುಗು ವಿಠಲ್ ಪೂಂಜ ಮುಡಿಪು ಮೆರೆನ ಮುತಾಲಿಕೆಡ್ ನಡತ್ಂಡ್. ಅಂಚೆನೆ ರಾತ್ರೆ ದೀಪಾಲಂಕಾರ ಪೂಜೆ ನಡತ್ಂಡ್.

ಕೊರಗ ಸಮುದಾಯದ ಮೂಲ ಸಂಪ್ರದಾಯದ ಪ್ರಕಾರ ಸಾಮೂಹಿಕ ಮದಿಮೆ

ತುಳುನಾಡ್ ದ ಕೊರಗ ಸಮುದಾಯಡ್ ಇಂಚಿಪ್ಪಗ್ ಭಾರಿ ಅಪರೂಪವಾಯಿನ ಮೂಲ ಸಂಪ್ರದಾಯದ ಪ್ರಕಾರ ನಡತಿನ ಸಾಮೂಹಿಕ ಮದಿಮೆಡ್ಐನ್ ಜೋಡಿಲು ಕಂಡನಿ ಬುಡೆದಿಯಾದ್ ಸಂಸಾರದ ಪೊಸ ಬದ್ ಕ್ ಗ್ ಪಜ್ಜೆ ದೀಯೆರ್.

ಸುರತ್ಕಲ್ ಕೈತಲ್ದ ಕುತ್ತೆತ್ತೂರು ಆದಿವಾಸಿ ಸಮುದಾಯ ಭವನಡ್ ದ.ಕ.ಜಿಲ್ಲಾ ಕೊರಗ ಸಂಘದ ಮುತಾಲಿಕೆಡ್ ಈ ಲೇಸ್ ನ್ ಆಯೋಜನೆ ಮಲ್ತ್ ದಿತ್ತೆರ್. ಈ ಇಸೇಸವಾಯಿನ ಮದಿಮೆಗ್ ನೂದೆರ್ದ್ ಲ ಎಚ್ಚ ಜನ ಸಾಕ್ಷಿ ಆಯೆರ್.

ಮೂಲ ಸಂಪ್ರದಾಯದ ಪ್ರಕಾರ ಕೊರಗ ಸಮುದಾಯಡ್ ಮದಿರೆಂಗಿ ಪನ್ಪುನ ಲೇಸೇ ಇಜ್ಜಿ. ನೆತ್ತ ಬದಲ್ ಮೂರ್ತ ನಡಪುಂಡು. ಮೂರ್ತ ಪಂಡ ಮದಿಮೆರ್ದ್ ದುಂಬುದ ದಿನ ಮದಿಮಾಯೆ ಅತ್ತ್ ಡ ಮದಿಮಾಲೆನ್ ಮಂಜಲ್ ಬೊಕ್ಕ ಪೇರ್ ಡ್ ಮೀಪಾವೆರ್, ಅತ್ತಂದೆ ಬತ್ತಿನ ಮಾತ ಜನಕುಲು ಮದಿಮಾಯೆ ಬೊಕ್ಕ ಮದಿಮಲೆಗ್ ಮೂರ್ತದ ಮಣಿ ಸರ (ಎಲ್ಯ ಎಲ್ಯ ಮಣಿ ಇಪ್ಪುನ ಸರ) ಕಟ್ಟುವೆರ್. ಮಾತೆರ್ಲಾ ಸರ
ಪಾಡಿ ಬೊಕ್ಕ ತನ್ನ ಸಮುದಾಯದ ಗುರ್ಕಾರ್ಲು ಮಣಿಸರ ಕಟ್ಟುವೆರ್. ಬೊಕ್ಕ ಗುರ್ಕಾರ್ಲು ಕಟ್ಟಿನ ಮಣಿಸರನ್ ಬುಡ್ದು ಬೇತೆ ಮಾತ ಮಣಿಸರನ್ ದೆಪ್ಪುವೆರ್.

ಗುರ್ಕಾರ್ಲು ಕಟ್ಟಿನ ಮಣಿಸರ ಮದಿಮೆ ಕ್ರಮ ಆಪುನ ಮುಟ್ಟ ನಾಲಿಡ್ ಇಪ್ಪೊಡು. ಮದಿಮೆದ ದಿನ ತನ್ನನೇ ಆಯಿನ ಶೈಲಿಡ್ ದಿಬ್ಬಣ ಎದ್ಕೊನುನ ಕ್ರಮ, ಪೂಸೀರೆ ಕೊರ್ಪುನ ಕ್ರಮ ನಡಪುಂಡು. ಬೇತೆ ಸಮುದಾಯಡ್ ಕಲಶ ದೀದ್ ದಾರೆ ಮಯಿತ್ ದ್ ಕೊರ್ಪಿನ ಕ್ರಮ ಇತ್ತ್ಂಡ, ಮುಲ್ಪ ಬಚ್ಚಿರೆ ಬೊಕ್ಕ ಬಜ್ಜೆಯಿಡ್ ದಾರೆ ಮಯಿಪುನ ಕ್ರಮ ಪ್ರಧಾನ ಪಾತ್ರ ಉಂಡು. ಮೂಲು ಕನ್ಯಾದಾನ ಕ್ರಮ ಇಜ್ಜಿ.

ಸುರುಕು ಪೊಣ್ಣನ ಕಡೆರ್ದ್ ದಾರೆ ಮಯಿತ್ತ್ಂಡ, ಬೊಕ್ಕ ಆಣನ ಕಡೆರ್ದ್ ದಾರೆ ಮಯಿಪುವೆರ್. ಮದಿಮೆ ಕ್ರಮ ಆನಗ ರಡ್ಡ್ ಮೂಜಿ ಜನ ಹಿರಿಯ ಪೊಂಜೋವುಲು ಸೇರ್ದ್ ಪಾರ್ದನ ಶೈಲಿಡ್ ಪದ ಪನ್ಪೆರ್. ನೆಟ್ಟ್ ಮದಿಮೆದ ನಿಜವಾಯಿನ ಅರ್ಥ, ಮದಿಮೆದ ಬೊಕ್ಕದ ತನ್ನ ಜೀವನ ಶೈಲಿ, ಕಂಡನಿನ ಇಲ್ಲಡ್ ಎಂಚ ಇಪ್ಪೊಡು ಪಂದ್ ಈ ಪದತ್ತ ಮುಕೇನ ಪನ್ಪೆರ್.

ಮದಿಮೆದ ಮಂಟಪಡ್ ಕಲಸೆನ್ ಮಣೆತ್ತ ಮಿತ್ತ್ ದೀದ್, ಅಯಿಕ್ಕ್ ಹಿರಿಯೆರ್ ಅರಿನ್ ಪಾಡುವೆರ್. ಅವೆತ್ತ ಮಿತ್ತೊಂಜಿ ಕೇಪುಲ ಪೂ ದೀಪೆರ್. ಮಾತೆರ್ಲಾ ಬತ್ತ್ ದ್ ಮದಿಮಾಯೆ ಮದಿಮಲೆಗ್ ಸೇಸೆ ಪಾಡುವೆರ್. ಕುಡೊಂಜಿ ಕಡೆಟ್ಟ್ ವಾದ್ಯ ಬ್ಯಾಂಡ್ ದ ಬದಲ್ ತನ್ನ ಸಂಪ್ರದಾಯದ ಪ್ರಕಾರ ಡೋಲು ವಾದನ ನಡತೊಂದು ಇಪ್ಪುಂಡು. ಮದಿಮೆದ ಪ್ರತಿ ಹಂತಡ್ ಗುರಿಕಾರೆ, ಪೊಪ್ಪ ಅಮ್ಮ, ಮಾಮಿ ಮಾಮು ಪ್ರಮುಖೆರಾದಿಪ್ಪುವೆರ್.
ಸಾಮೂಹಿಕ ಮದಿಮೆಡ್ ಐನ್ ಜೋಡಿಲು ಸಾಂಸಾರಿಕ ಜೀವನಗ್ ಪಜ್ಜೆ ದೀತ್ಂಡ್. ಸಾಮೂಹಿಕ ಮದಿಮೆಗಾದ್ ಪೊಣ್ಣು ಬೊಕ್ಕ ಆಣನ ಕಡೆರ್ದ್ ತಲಾ 5 ಸಾರ ದೆತೊಂದೆರ್. ಈ ಕಾಸ್ ಡ್ ಪೊಣ್ಣಗ್ ಬಂಗಾರ್ ದ ತಾಳಿ ಬೊಕ್ಕ ಆಣಗ್ ಬೊಡಾಯಿನ ತುತ್ತೈತ ಕೊರ್ತೆರ್. ಅತ್ತಂದೆ ಬತ್ತಿನ ಬಿನ್ನೆರೆಗ್ ವನಸ್ ನ್ ಕೊರ್ತೆರ್. ಮದಿಮೆಗ್ ಮಾಸದ ವನಸ್ ಕಡ್ಡಾಯ ಆದಿತ್ತ್ಂಡ್. ಎಚ್ಚಾದ್ ನೆಯಿತ್ತ ನುಪ್ಪು, ಕೋರಿ ಆಜಾದಿನ, ಪಾಯಸ ಹೋಳಿಗೆ ಮಲ್ಪುವೆರ್.