ಎಲ್ಲೆ ಭಾರತಡ್ ಭಾಗಶಃ ಚಂದ್ರಗ್ರಾಣ ಆಯೆರೆ ಉಂಡು. ಬೊಲ್ಪುಗು 11:30 ಕ್ಕ್ ಸುರು ಆದ್ ರಾತ್ರೆ 3:58 ಗ್ ಮುಗಿಪುಂಡು ಪಂದ್ ಪ್ಲಾನೆಟರಿ ಸೊಸೈಟಿ ಇಂಡಿಯಾದ ನಿರ್ದೇಶಕೆರ್ ರಘನಂದನ್ ಕುಮಾರ್ ತೆರಿಪಾದೆರ್.
ಎಲ್ಲೆ ನಡುರಾತ್ರೆ 1:5-2:23 ಮುಟ್ಟ ಮಾತ್ರ ಗೋಚರ ಆಪುಂಡು. ಗ್ರಾಣದ ಪೊರ್ತುಡು ಪೂಜೆ ಮಲ್ಪರೆ ಬಲ್ಲಿ, ತೆನಸ್ ಬೆಯಿಪಾಯೆರೆ ಬೊಕ್ಕ ತಿನಿಯೆರೆ ಬಲ್ಲಿ. ಅತ್ತಂದೆ ಪಿದಯಿ ಜಾಲ್ ಗ್ ಪೋಪುನೆ ಆರೋಗ್ಯಗ್ ಎಡ್ಡೆ ಅತ್ತ್ ಪಂದ್ ಜ್ಯೋತಿಷಿಲು ತೆರಿಪಾದೆರ್.
ತುಮಕೂರು ಪೇಂಟೆಡ್ ಇನಿರ್ದ್ ಅ.29 ಮುಟ್ಟ ಸರ್ಕಾರಿ ನೌಕರೆರೆನ ರಾಜ್ಯಮಟ್ಟದ ಕ್ರೀಡಾಕೂಟ ಬೊಕ್ಕ ಸಾಂಸ್ಕೃತಿಕ ಪಂತೊನ್ ಆಯೋಜನೆ ಮಲ್ದ ಪಂದ್ ರಾಜ್ಯ ಸರ್ಕಾರಿ ನೌಕರೆರೆನ ಸಂಘ ತೆರಿಪಾದ್ಂಡ್.
ಬೊಲ್ಪುಗು 10 ಗಂಟೆರ್ದ್ ಬಯ್ಯ 4 ಗಂಟೆ ಮುಟ್ಟ ನೊಂದಣಿ ಇಪ್ಪುಂಡು. ಬೊಕ್ಕ ಬಯ್ಯಗ್ 4:30 ಗಂಟೆರ್ದ್ ಈ ಕ್ರೀಡಾಕೂಟಗ್ ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿಕೆ ಶಿವಕುಮಾರ್ ಚಾಲನೆ ಕೊರ್ಪೆರ್.
ಈ ಪೊರ್ತುಡು ಸಚಿವೆರ್ ಜಿ. ಪರಮೇಶ್ವರ್, ಬಿ.ನಾಗೇಂದ್ರ, ಕೆಎನ್ ರಾಜಣ್ಣ, ನೌಕರರ ಸಂಘದ ಪದುಕೆರ್ ಸೇರಿನಂಚೆನೆ ಸುಮಾರ್ ಜನ ಪಾಲ್ ಪಡೆಯೆರೆ ಉಲ್ಲೆರ್.
ಭಾರತೀಯ ಸಶಸ್ತ್ರ ಪಡೆಟ್ಟ್ ಖಾಲಿ ಇಪ್ಪುನ 650 ವೈದ್ಯಕೀಯ ಅಧಿಕಾರಿ ಬೇಲೆಗ್ ಅರ್ಹ ಅಭ್ಯರ್ಥಿಲು ಅರ್ಜಿ ಸಂದಾವೊಲಿ.
ನೆಟ್ಟ್ 585 ಬೇಲೆ ಆಂಜೋವುನಕ್ಲೆಗ್ ಬೊಕ್ಕ 65 ಬೇಲೆ ಪೊಂಜೋವುನಕ್ಲೆಗ್ ತಿಕ್ಕುಂಡು. ಎಂಬಿಬಿಎಸ್, ಸ್ಟೇಟ್ ಮೆಡಿಕಲ್ ಕೌನ್ಸಿಲ್ ಎಂಸಿಎ, ಎನ್ಎಂಸಿ ನೊಂದಣಿ ಆದಿಪ್ಪೊಡು. ಎಚ್ಚದ ಪೊಲಬುಗಾದ್ https://amcssentry.gov.in/ ಗ್ ಭೇಟಿ ಕೊರೊಲಿ.
ಪ್ರಧಾನಿ ನರೇಂದ್ರ ಮೋದಿ ಇನಿ ಡೆಲ್ಲಿದ ಪ್ರಗತಿ ಮೈದಾನಡ್ ಇಪ್ಪುನ ಭಾರತ್ ಮಂಟಪಡ್ 7ನೇ ಭಾರತೀಯ ಮೊಬೈಲ್ ಕಾಂಗ್ರೆಸ್ 2023ನ್ ಉದಿಪನ ಮಲ್ಪುವೆರ್.
ಉದಿಪನಗ್ ದುಂಬು ಆಯೋಜನೆ ಮಲ್ತ್ ದ್ ಇತ್ತಿನ ವಸ್ತುಪ್ರದರ್ಶನನ್ ಮೋದಿ ಪರಿಶೀಲನೆ ಮಲ್ದೆರ್. ಈ ಪೊರ್ತುಡು ಉದ್ಯಮಿ ಮುಖೇಶ್ ಅಂಬಾನಿನ ಮಗೆ ಆಕಾಶ್ ಅಂಬಾನಿ ಪಿಎಂಗ್ ಪೊಸ ತಂತ್ರಜ್ಞಾನದ ಬಗೆಟ್ಟ್ ಪೊಲಬು ಕೊರ್ತೆರ್. ಇಂಡಿಯನ್ ಮೊಬೈಲ್ ಕಾಂಗ್ರೆಸ್ ಏಷ್ಯಾದ ಭಾರೀ ಮಲ್ಲ ಟೆಲಿಕಾಂ, ಮಾಧ್ಯಮ ಬೊಕ್ಕ ತಂತ್ರಜ್ಞಾನ ಚಾವಡಿ ಆತ್ಂಡ್. ಈ ಲೇಸ್ ಅ.27-29 ಮುಟ್ಟ ನಡಪರೆ ಉಂಡು.
ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್ (IOCL) ಡ್ ಟ್ರೇಡ್ ಅಪ್ರೆಂಟಿಸ್ ಆದ್ 1720 ಬೇಲೆ ಖಾಲಿ ಉಂಡು.
ಅರ್ಹ ಅಭ್ಯರ್ಥಿಲು ಆನ್ ಲೈನ್ ಮುಖೇನ ಅರ್ಜಿ ಸಂದಾವೊಲಿ. ಅರ್ಜಿ ಪ್ರಕ್ರಿಯೆ ಅ.21 ಕ್ಕ್ ಸುರು ಆತ್ಂಡ್. ನ.20 ಅರ್ಜಿ ಸಂದಾಯೆರೆ ಅಕೇರಿದ ದಿನ ಆತ್ಂಡ್. ಎಚ್ಚದ ಪೊಲಬುಗಾದ್ ನೆತ್ತ ಅಧಿಕೃತ ವೆಬ್ಸೈಟ್ www.iocl.com ಗ್ ಭೇಟಿ ಕೊರೊಲಿ.
ಮೆತ್ತೆ ತಿನ್ಪುನೆರ್ದ್ ಆರೋಗ್ಯಗ್ ಮಸ್ತ್ ಎಡ್ಡೆ ಪ್ರಯೋಜನ ಆಪುಂಡು.
ಉಂದು ಜೀರ್ಣಾಂಗ ವ್ಯವಸ್ಥೆದ ಆರೋಗ್ಯನ್ ಸರಿ ಮಲ್ಪರೆ ಸಕಾಯ ಮಲ್ಪುಂಡು. ನೆಟ್ಟ್ ಕರ್ಬದ ಅಂಶ ಉಂಡು. ಉಂದು ನೆತ್ತೆರ್ ಪರಿಚಲನೆಗ್ ಸಕಾಯ ಮಲ್ಪುಂಡು.
ಅತ್ತಂದೆ ಉಂದು ನೆತ್ತೆರ್ ಸಮಸ್ಯೆನ್ ಕಮ್ಮಿ ಮಲ್ಪುಂಡು. ಬೊಕ್ಕ ಎಲು ಗಟ್ಟಿ ಆಪುಂಡು. ನೆರ್ದ್ ರೋಗನಿರೋಧಕ ಶಕ್ತಿ ಎಚ್ಚಾಪುಂಡು. ಅಂಚೆನೆ ಕಣ್ಣ್ ದ ಸಮಸ್ಯೆ ಸರಿ ಆಪುಂಡು.
ಸುಲ್ತಾನ್ ಆಫ್ ಜೋಹರ್ ಕಪ್ ಹಾಕಿ ಟೂರ್ನಿಡ್ ಇನಿ ಭಾರತ ಬೊಕ್ಕ ಪಾಕಿಸ್ತಾನ ಕೂಟಲು ಎದುರು ಬದುರಾದ್ ಗೊಬ್ಬೆರೆ ಉಂಡು.
ಮಲೇಷ್ಯಾಡ್ 21 ವರ್ಷದೊಲಯಿನಕ್ಲೆನ ಹಾಕಿದ 11ನೇ ಸೀಸನ್ ಕೋಡೆರ್ದ್ ಸುರು ಆತ್ಂಡ್. ನೆಟ್ಟ್ ಹಾಲಿ ಚಾಂಪಿಯನ್ ಭಾರತ ಬೊಕ್ಕ ಮಲೇಷ್ಯಾ ಸೇರಿನಂಚೆನೆ 8 ಕೂಟಲು ಲೀಗ್ ಸುತ್ತುಡು 2 ವಿಭಾಗಡ್ ಗೊಬ್ಬುಂಡು. ಭಾರತ ಇನಿ ಪಾಕಿಸ್ತಾನದೊಟ್ಟಿಗೆ ಗೊಬ್ಬೆರೆ ಉಂಡು. ಬೊಕ್ಕ ಅ.28 ಕ್ಕ್ ಮಲೇಷ್ಯಾ, ಅ.30 ಕ್ಕ್ ನ್ಯೂಜಿಲೆಂಡ್ ದ ಎದುರು ಗೊಬ್ಬೆರೆ ಉಂಡು.
ಶಿಬಾಜೆ: ಶಿಬಾಜೆ ಗ್ರಾಮದ ಜಯರಾಮ ಪೂಜಾರಿ ಬೊಕ್ಕ ವನಜ ದಂಪತಿನ ಮಗೆ, ವಿರಾಜ್ ಜೆ ಪೂಜಾರಿ ಕಲ್ಲಡ್ಕ ವಿದ್ಯಾಭಾರತಿ ನಡಪಾಯಿನ ರಾಜ್ಯಮಟ್ಟದ ಚೆಸ್ ಚಾಂಪಿಯನ್ಡ್ (ತರುಣ ವರ್ಗ) ಸುರುತ ಇನಾಮು ಪಡೆದ್ ರಾಷ್ಟ್ರಮಟ್ಟದ ಚೆಸ್ ಚಾಂಪಿಯನ್ ಶಿಪ್ಗ್ ಆಯ್ಕೆಯಾತೆರ್.
ಅರುಣಾಚಲ ಪ್ರದೇಶಡ್ “ವಿದ್ಯಾಭಾರತಿ ಅಖಿಲ ಭಾರತಿಯ ಶಿಕ್ಷಾ ಸಂಸ್ಥಾನ್” ಅಕ್ಟೋಬರ್ 26-30 ಮುಟ್ಟ ನಡಪುನ 34ನೇ ರಾಷ್ಟ್ರೀಯ ಚೆಸ್ ಚಾಂಪಿಯನ್ ಶಿಪ್ಡ್ ಕರ್ನಾಟಕ ರಾಜ್ಯನ್ ಪ್ರತಿನಿಧಿಸಾದ್ ಪಾಲ್ ಪಡೆಯೆರೆ ಉಲ್ಲೆರ್.
ಎನ್ಮ ಜನ ಭಾರತೀಯ ಮಾಜಿ ಭಾರತೀಯ ನೌಕಾಪಡೆ ಸಿಬ್ಬಂದಿಲೆಗ್ ಕತಾರ್ದ ಕೋರ್ಟ್ ಮರಣದಂಡನೆ ಕೋರ್ನ ಬಗ್ಗೆ ವಿದೇಶಾಂಗ ಇಲಾಖೆ ತೆರಿಪಾದ್ಂಡ್.
ಮರಣದಂಡನೆಗ್ ಮಾಜಿ ಭಾರತೀಯ ನೌಕಾಪಡೆ ಸಿಬ್ಬಂದಿಲು ಕರಿನ ವರ್ಷ ಆಗಸ್ಟ್ರ್ದ್ ಜೈಲ್ಡ್ ಇತ್ತೆರ್. ಅಕ್ಲೆನ ವಿರುದ್ಧದ ಆರೋಪಲೆನ್ ಕತಾರ್ ಅಧಿಕಾರಿಲು ಬಹಿರಂಗ ಮಲ್ತ್ ಇಜ್ಜಾಂಡ್. ನೆತ್ತ ಬಗ್ಗೆ ಮಾಹಿತಿ ಕೋರ್ನ ವಿದೇಶಾಂಗ ವ್ಯವಹಾರದ ಸಚಿವಾಲಯ, ಅಲ್ ದಹ್ರಾ ಕಂಪನಿದ ಎನ್ಮ ಭಾರತೀಯ ಉದ್ಯೋಗಿಲೆನ ಕೇಸ್ಡ್ ಕತಾರ್ದ ಸುರುತ ನಿರ್ದೇಶನದ ನ್ಯಾಯಾಲಯ ತೀರ್ಪು ಕೊರ್ತುಂಡ್ ಪಂದ್ ತೆರಿದ್ ಬೈದ್ಂಡ್.
ಪುತ್ತೂರು: ಪ್ರಾಥಮಿಕ ಶಾಲಾ ಶಿಕ್ಷಕರ ನೇಮಕಾತಿ ವಿಚಾರಡ್ ನ್ಯಾಯಾಲಯಡ್ ತಡೆಯಾಜ್ಞೆ ತೆರವು ಆದ್, ಸರಕಾರ ದ.ಕ. ಜಿಲ್ಲೆಗ್ 546 ಶಿಕ್ಷಕೆರೆನ್ ನೇಮಕ ಮಲ್ತ್ ಆದೇಶ ಕೊರ್ತುಂಡ್, ಈ ಪೈಕಿ ಪುತ್ತೂರುಗ್ 131 ಶಿಕ್ಷಕೆರೆನ್ ನೇಮಕ ಮಲ್ತ್ದೆರ್. ಪುತ್ತೂರು ಸೇರಿನಂಚ ದ.ಕ ಜಿಲ್ಲೆದ ಸರಕಾರಿ ಪ್ರಾಥಮಿಕ ಶಾಲೆಡ್ ಶಿಕ್ಷಕೆರ್ನ ಕೊರತೆ ಇತ್ತ್ಂಡಲ ಶಿಕ್ಷಕೆರೆನ್ ನೇಮಕ ಮಲ್ಪುನಂಚ ಇಜ್ಜಾಂಡ್.
ಶಿಕ್ಷಕರ ನೇಮಕಾತಿ ವಿಚಾರಡ್ ನ್ಯಾಯಾಲಯದ ತಡೆಯಾಜ್ಞೆ ಇತ್ತಿನ ಕಾರಣ ಕರಿನ ಕೆಲವು ವರ್ಷರ್ದ್ ಅತಿಥಿ ಶಿಕ್ಷಕ ನೇಮಕ ಮಲ್ತೊಂದು ಇಜ್ಜಾಂಡ್. ಇತ್ತೆ ನ್ಯಾಯಾಲಯ ತಡೆಯಾಜ್ಞೆ ದೆತ್ತಿನೆಕ್ಕ್ ಶಿಕ್ಷಕರ ನೇಮಕಾತಿ ಪ್ರಕ್ರಿಯೆ ನಡಪೆರೆ ಉಂಡು. ನ್ಯಾಯಾಲಯದ ತಡೆಯಾಜ್ಞೆ ವಿಚಾರನ್ ಪುತ್ತೂರು ಶಾಸಕೆರ್ ಅಶೋಕ್ ರೈ ಸರಕಾರದ ಗಮನಗ್ ಕನತ್ ಇತ್ತೆರ್. ಶಿಕ್ಷಕರ ಕೊರತೆರ್ದ್ ಸರಕಾರಿ ಶಾಲೆಡ್ ಗುಣಮಟ್ಟದ ಶಿಕ್ಷಣನ್ ಕೊರಿಯೆರೆ ಸಾಧ್ಯ ಆವೊಂದು ಇಜ್ಜಿ. ಗ್ರಾಮೀಣ ಭಾಗದ ಕಲ್ಪಾರ್ಥಿಲೆಗ್ ತೊಂದರೆ ಆವೊಂದು ಉಂಡು. ಅಂಚಾದ್ ನೇಮಕಾತಿ ವಿಚಾರಡ್ ಸರಕಾರ ಮಧ್ಯ ಪ್ರವೇಶ ಮಲ್ಪುನಂಚ ಮನವಿ ಮಲ್ತ್ ಇತ್ತೆರ್.
