October 2023

ನಾನಿಲ್ತಾರ್ ಕುಲಾಲ ಸಂಘದ 35 ನೇ ವರ್ಷದ ವಾರ್ಷಿಕ ಮಹಾಸಭೆ ಬೊಕ್ಕ ಅಭಿನಂದನಾ ಕಾರ್ಯಕ್ರಮ

ಮುಂಡ್ಕೂರು ಶ್ರೀ ಅಮ್ಮನ ಆಶೀರ್ವಾದಡ್ ದುಂಬುದ ವರ್ಷ ನಾನಿಲ್ತಾರು ಕುಲಾಲ ಸಂಘ ಕ್ಕೆ ಸುಮಾರು 5 ಲಕ್ಷ ವೆಚ್ಚದ ಜನರೇಟರ್ ಕೊಡುಗೆ ಕೊರ್ಪುನ ಪಂದ್ ಬೊಂಬೈ ನಾನಿಲ್ತಾರ್ ಅಭಿಮಾನಿ ಬಳಗ ಸಂಚಾಲಕೆರ್ ಕೃಷ್ಣ ಮೂಲ್ಯ ನಾಲಸೂಪರ ತೆರಿಪಾಯೆರ್. ಮೇರ್ ಅ. 1 ದಾನಿ ಕುಲಾಲ ಸಂಘ ನಾನಿಲ್ತಾರ್ ಮುಲ್ಲಡ್ಕ ಮುಂಡ್ಕೂರು ನೆತ್ತ 35ನೇ ವರ್ಷದ ವಾರ್ಷಿಕ ಮಹಾಸಭೆ ಬೊಕ್ಕ ಅಭಿನಂದನಾ ಕಾರ್ಯಕ್ರಮಡ್ ಪಾತೆರಿಯೆರ್.
ಸಂಘದ ಗುರ್ಕಾರ್ಲು ಕುಶ ಆರ್ ಮೂಲ್ಯ ಇನ್ನಾ ಲೇಸ್ ದ ಗುರ್ಕಾರ್ಮೆನ್ ವಹಿಸ್ ದ್ ಇತ್ತೆರ್. ಸಮಾಜದ ಸಹಕಾರಿ ಸಂಸ್ಥೆ ಸ್ಥಾಪನೆಗ್ ಮಾತೆರ್ನಲ ಸಹಕಾರನ್ ಕೇಂಡೆರ್. ಬೆಂಗಳೂರು ಸಂಘದ ಗುರ್ಕಾರ್ಲು ವಿಠಲ ಮೂಲ್ಯ ಕನೀರ ತೋಟ ಕುಲಾಲ ಸಮುದಾಯನ್ ಪ್ರವರ್ಗ 1 ಕ್ಕ್ ಸೇರ್ಪಡೆ ಬೊಕ್ಕ ಹಂಪಿ ವಿಶ್ವವಿದ್ಯಾಲಯಡ್ ಕುಂಬಾರರ ಕುಲ ಶಾಸ್ತ್ರೀಯ ಅಧ್ಯಯನ ಪೀಠ ರಚನೆ ಆದ್ ಕುಂಬಾರ ಸಮಗ್ರ ವರದಿನ್ ಸರ್ಕಾರಗ್ ವರದಿ ಮಲ್ಪೆರೆ ಉಂಡು ಪಂದ್ ತೆರಿಪಾಯೆರ್. ಅತ್ಯುತ್ತಮ ಒಡಿಪು ಜಿಲ್ಲಾ ಶಿಕ್ಷಕ ಪ್ರಶಸ್ತಿ ಪುರಸ್ಕತೆರಾಯಿನ ರಮೆಶ್ ಕುಲಾಲ್ ಸಿದ್ದಾಪುರ, ಕಾಂತಾವರ ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷೆರ್ ಪ್ರಭಾಕರ್ ಕುಲಾಲ್, ಕಾಪು ಕ್ಷೇತ್ರ ಟೈಲರ್ ಎಸೋಸಿಯೇಷನ್ ಗುರ್ಕಾರ್ಲು ರಮಾನಂದ್ ಮೂಲ್ಯ, ರಾಜ್ಯ ಮಟ್ಟದ ಪ್ರತಿಭಾ ಕಾರಂಜಿ ತುಳು ಭಾಷಣ ಸ್ಪರ್ಧೆಡ್ ಸುರುತ ಇನಾಮು ಪಡೆನ  ರಮೇಶ್, ರಶ್ಮಿತಾ, ಕರಾಟೆ ಸ್ಪರ್ಧೆಡ್ ನಾಲ್ ಬಂಗಾರ್ದ ಪದಕ ಪಡೆನ ಮೋಕ್ಷಿತ್ ಕುಲಾಲ್ , ಕುಲಾಲ ಸಂಘದ ಶ್ರೀ ದುರ್ಗಾ ಕುಣಿತ ಭಜನೆದ ಶಿಕ್ಷಕೆರಾಯಿನ ರಾಜೇಂದ್ರ ಶೆಟ್ಟಿಗಾರ್ ಮೊಕ್ಲೆಗ್ ಈ ಪೊರ್ತುಡು ಮಾನಾಡಿಗೆ ನಡತ್ಂಡ್. 51 ಸಾವಿರ ವೆಚ್ಚಡ್ ಸಂಘಗ್ ಶಾಶ್ವತ ಧ್ವನಿ ವರ್ಧಕ ಕೊಡುಗೆ ಅನಾವರಣ ಮಲ್ತೆರ್. ಅಂಚನೆ ವೈದ್ಯಕೀಯ ನೆರವು ಕೊರಿಯೆರ್..
2023-25ರ ಪೊಸ ಕಾರ್ಯಕಾರಿ ಮಂಡಳಿ ರಚನೆ ಮಲ್ತೆರ್. ಗುರ್ಕಾರ್ಲು ಆದ್ ಜಯರಾಮ್ ಕುಲಾಲ್, ಯುವ ವೇದಿಕೆ ಗುರ್ಕಾರ್ಲು ಲೋಕೇಶ್ ಕುಲಾಲ್ ಮುಂಡ್ಕೂರು, ಮಹಿಳಾ ಘಟಕದ ಗುರ್ಕಾರ್ಲು ಪ್ರತಿಮಾ ಶ್ರೀಧರ್ ಆಯ್ಕೆ ಆಯೆರ್. ಚಾವಡಿಡ್ ಗೌರವಧ್ಯಕ್ಷೆರಾಯಿನ ಐತು ಆರ್ ಕರಾಟೆ, ಮುಂಬೈ ಮಾಜಿ ಗುರ್ಕಾರ್ಲು ಮಂಜಪ್ಪ ಕರಾಟೆ, ಉಪಾಧ್ಯಕ್ಷೆರಾಯಿನ ಬೊಗ್ಗು ಮೂಲ್ಯ ಬೇಲಾಡಿ, ಕಾರ್ಯದರ್ಶಿ ಆಶಾ ವರದರಾಜ್, ಸುಧಾಕರ ಕುಲಾಲ್ ದೀಪಕ್ ಬೆಳ್ಮಣ್, ರಾಜೇಶ್ ಕುಲಾಲ್, ಸುಧಾಕರ್ ಕುಲಾಲ್ ಸಂತೋಷ್ ಕುಲಾಲ್ ಅಗ್ಗರಟ್ಟ ಈ ಪೊರ್ತುಡು ಇತ್ತೆರ್. ಹರ್ಷಿತಾ ಬೊಕ್ಕ ಶಿಕ್ಷಕೆರಾಯಿನ ಶ್ರೀಕಾಂತ್ ಲೇಸ್ ದ ಸುಧಾರಿಕೆ ಮಲ್ತ್ , ದೈಹಿಕ ಶಿಕ್ಷಕೆರಾಯಿನ ದಿನೇಶ್ ಕುಲಾಲ್ ಸೊಲ್ಮೆ ಸಂದಾಯ ಮಲ್ತೆರ್.

ಛಾಯಾಚಿತ್ರ ಅಶೋಕ್ ಫಲ್ಗುಣಿ ಡಿಜಿಟಲ್ ಮೂಡ್ಕರು

ಶಿವಮೊಗ್ಗ ಸ್ಲೀಪರ್ ಸೆಲ್ ದ ಅಡ್ಡಾ ಆತ್ಂಡ್. ಅವೆತ್ತ ಭಾಗನೇ ಈ ದಾಳಿ: ವೇದವ್ಯಾಸ್ ಕಾಮತ್

ಶಿವಮೊಗ್ಗದ ರಾಗಿಗುಡ್ಡಡ್ ಈದ್ ಮಿಲಾದ್ ಮೆರವಣಿಗೆದ ಪೊರ್ತುಡು ಜಿಹಾದಿ ಮನಸ್ಥಿತಿದ ಕಿಡಿಗೇಡಿಲು ಪೊಲೀಸೆರ್ ಸೇರಿನಂಚ ಇಲ್ಲದಕ್ಲೆನ ಮಿತ್ತ್ ಕಲ್ಲ್ ದಕ್ಕಿನ ಘಟನೆ ನಡತ್ ದ್ ಹಿಂದುಲು ಪೋಡಿಗೆದ ವಾತಾವರಣಡ್ ಬದುಕುನಂಚ ಆತ್ಂಡ್. ಉಂದುವೇ ಶಿವಮೊಗ್ಗಡ್ ಕರಿನ ಸರ್ತಿ ಭಾರಿ ಜನತ ಒಟ್ಟಿಗೆ ಒವ್ವೆ ಗಲಭೆ ಇಜ್ಜಂದೆ ಗಣೇಶ ವಿಸರ್ಜನೆ ಆತ್ಂಡ್. ಆಂಡ ಈ ಸರ್ತಿ ದ ಘಟನೆಗ್ ಮಾತ ಕಾರಣ ಜಿಹಾದಿ ಮಾನಸಿಕತೆದ ಕಿಡಿಗೇಡಿಲು ಬೊಕ್ಕ ಸೆಕ್ಯುಲರ್ ಮುಖವಾಡದ ಕಾಂಗ್ರೆಸ್ ಸರ್ಕಾರ” ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಆರೋಪ ಮಲ್ದೆರ್.

ಮತಾಂಧೆರ್ನ ನಂಚಿನ ಬ್ಯಾನರ್ ಪಾಡುನ, ತಲ್ವಾರ್ ಪತ್ ದ್ ಪ್ರಚೋದನಕಾರಿ ಘೋಷಣೆ ಪಾಡುನ, ಹಿಂದೂಲೆನ ಮಿತ್ತ್ ಕಲ್ಲ್ ದಕ್ಕುನ ಉಂದು ಮಾತ ವ್ಯವಸ್ಥಿತ ಗಲಭೆದ ಷಡ್ಯಂತ್ರದ ಭಾಗ ಆತ್ಂಡ್. ಟಿಪ್ಪು ಸುಲ್ತಾನ್‌ ಕಾರ್ ದ ಅಡಿಟ್ ಕೇಸರಿ ಬಣ್ಣದ ಪಗಡೆ ಪಾಡಿನ ನರಮಾನಿ ಜೆತ್ತಿನ ಕಟೌಟ್‌ ಪಾಡ್ದ್ ವಿವಾದ ಆವೊಂದು ಇಪ್ಪುನ ಪೊರ್ತುಗು ಸ್ವತಃ ಎಸ್‌ಪಿ ನೇತೃತ್ವಡ್ ಕಟೌಟ್‌ ಗ್ ಬೊಲ್ದು ಬಣ್ಣದ ಪಾಡ್ದ್ ಬುಡಿಯೆರ್. ಅಂಚಾದ್ ಕಿಡಿಗೇಡಿಲು ಪೊಲೀಸೆರ್ನ ಮಿತ್ತ್ ಲ ದಾಳಿ ಮಲ್ತ್ ದ್ ಕೆ.ಜೆ ಹಳ್ಳಿ, ಡಿ.ಜೆ ಹಳ್ಳಿ ಮಾದರಿಡ್ ಗಲಭೆಗೆ ಸಂಚ್ ಮಲ್ತ್ ದ್ ಇಪ್ಪೊಡು. ಆಂಡಲ ಪೊಲೀಸೆರ್ ಲಾಠಿ ಚಾರ್ಜ್ ಮಲ್ತ್ ದ್ ಪರಿಸ್ಥಿತಿನ್ ಹತೋಟಿಗ್ ಕನಪುನೆಟ್ಟ್ ಯಶಸ್ವಿಯಾತೆರ್” ಪಂದ್ ಆರ್ ಪಂಡೆರ್.

“ಕುಡ್ಲದ ಕುಕ್ಕರ್ ಬಾಂಬ್ ಪ್ರಕರಣದ ಎನ್ ಐ ಎ ತನಿಖೆಡ್ ಉಂದುವೇ ಶಿವಮೊಗ್ಗದ ತೀರ್ಥಹಳ್ಳಿದ ಶಂಕಿತ ಭಯೋತ್ಪಾದಕೆರೆನ್ ಅರೆಸ್ಟ್ ಮಲ್ತಿನೆನ್ ನಮ ಗಮನಿಸಾವೊಡು. ಮೊಕ್ಲೆನ ಷಡ್ಯಂತ್ರದ ಮಾತ ಮಾಹಿತಿ ರಾಜ್ಯ ಕಾಂಗ್ರೆಸ್ ಸರ್ಕಾರಗ್ ಇತ್ತ್ಂಡಲ ನೆಟ್ಟ್ ವೋಟ್ ಬ್ಯಾಂಕ್ ರಾಜಕೀಯ ಮಲ್ತೊಂದು ಇಪ್ಪುನ ರಾಜ್ಯದ ದುರಂತ.ಡಿಜೆ ಹಳ್ಳಿ ಬೊಕ್ಕ ಕೆಜೆ ಹಳ್ಳಿ ಪ್ರಕರಣದ ಕೇಸ್ ನ್ ಪಿರ ದೆಪ್ಪುನ ಬಗ್ಗೆ ಕಾಂಗ್ರೆಸ್ ಸರ್ಕಾರ ತೀರ್ಮಾನ ಮಲ್ತ್ ದ್ ಅವೆಕ್ ಪೂರಕವಾದ್ ಸ್ವತಃ ಗೃಹ ಸಚಿವೆರೆ ಟಿಪ್ಪಣಿ ಬರೆದ್ ಮಾಧ್ಯಮದ ಮುಕೇನ ಪ್ರಸಾರ ಅವರೆ ಉಂಡು. ಸರ್ಕಾರದ ಮಟ್ಟದಡೆ ಇಂಚಿನ ಕಿಡಿಗೇಡಿಲೆಗ್ ವ್ಯವಸ್ಥಿತ ವಾತಾವರಣ ನಿರ್ಮಾಣ ಆನಗ ಸಹಜವಾದ್ ಇಂಚಿನ ಗಲಭೆಲು ಎಚ್ಚ ಆಪುಂಡು.

ದಾದ ಆಂಡಲ ಈ ಕಾಂಗ್ರೆಸ್ ಸರ್ಕಾರ ನಮ್ಮ ಪರ ಉಂಡು ಪಂದ್ ಗಲಭೆ ಸೃಷ್ಟಿಸಾದ್ ಜನಕ್ಲೆಡ ಪೋಡಿಗೆದ ವಾತಾವರಣ ಮೂಡಿಸಾವುನ ಇಂಚಿನ ಕಿಡಿಗೇಡಿಲೆಗ್ ಕಟ್ಟು ನಿಟ್ಟ್ ಡ ಕ್ರಮತ್ತ ಒಟ್ಟಿಗೆ ಹೆಡೆಮುರಿ ಕಟ್ಟೊಡು, ಅಂಚೆನೆ ಅಲ್ಪದ ಹಿಂದೂಲೆನ ಹಿತರಕ್ಷಣೆನ್ ತೂವೊನೊಡು” ಪಂದ್ ಕಾಮತ್ ಸರ್ಕಾರಗ್ ಆಗ್ರಹ ಮಲ್ತ್ ದೆರ್.