ಉತ್ತರಾಖಂಡದ ಪಿಥೋರಗಢಡ್ 4.0 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ರಾಷ್ಟ್ರೀಯ ಭೂಕಂಪನಶಾಸ್ತ್ರ ಕೇಂದ್ರ ತೆರಿಪಾದ್ಂಡ್.
ಭೂಕಂಪದ ಅನುಭವ ಆಯಿನ ಕೂಡ್ಲೆ ಜನ ಇಲ್ಲರ್ದ್ ಪಿದಯಿ ಬತ್ತ್ ದ್ ಸುರಕ್ಷಿತ ಜಾಗೆಗ್ ಬಲಿತೆರ್ ಪಂದ್ ವರದಿ ಆತ್ಂಡ್. ಈ ಘಟನೆಗ್ ಸಂಬಂಧಪಟ್ಟಿನಂಚೆನೆ ಆಸ್ತಿ-ಪಾಸ್ತಿಗ್ ತೊಂದರೆ ಆಯಿನ ಬಗೆಟ್ಟ್ ಪೊಲಬು ತೆರಿದ್ ಬೈದಿಜಿ.
ಬಂಟ್ವಾಳ : ಬಸ್ಡ್ ಬತ್ತಿನಾಯೆ ಒರಿ ಚೀಲಡ್ ಕೋರಿದ ಮಾಸ ಪತೊಂದು ಬಸ್ ಬರ್ತಿನೆಕ್ಕ್ ಆಯಗ್ ಕಂಡಕ್ಟರ್ ಬಪ್ಪರ್ ನೆರಿನಿ ಮಾತ್ರ ಅತ್ತಂದೆ, ಡ್ರೈವರ್ ಬಸ್ನ್ ಸೀದಾ ಬಂಟ್ವಾಳ ಪೋಲೀಸ್ ಸ್ಟೇಷನ್ಗ್ ಕೊನೊತಿನ ಘಟನೆ ನಡತ್ದ್ಂಡ್. ಸುರೇಶ್ ಪನ್ಪಿನಾರ್ ತುಂಬೆಡ್ ಸ್ಟೇಟ್ಬ್ಯಾಂಕ್-ಪುತ್ತೂರುದ ಕೆಎಸ್ಸಾರ್ಟಿಸಿ ಬಸ್ ಬರ್ತ್ದೆರ್. ಬಸ್ ಕಂಡಕ್ಟರ್ ಟಿಕೆಟ್ ದೆತೊನರೆ ಬನ್ನಗ ಮೆರೆನ ಕೈಟ್ ಕೋರಿದ ಮಾಸದ ಚೀಲದ ಬಗೆಟ್ ಕೆಂಡೆರ್. ಅವ್ ಕೋರಿದ ಮಾಸ ಪನ್ದ್ ತೆರಿನೇ ಅರೆನ್ ಬಸ್ರ್ದ್ ತಿರ್ತ್ ಜಪ್ಪರೆ ಪನ್ತೆರ್.
ಕೋರಿದ ಮಾಸೊನು ಬಸ್ಟ್ ಕನವರೆ ಅವಕಾಶ ಇಜ್ಜಿ ಪನ್ಪಿನವು ಕಂಡಕ್ಟರ್ನ ವಾದ. ಆಂಡ ಕೂಲಿ ಬೇಲೆ ಮಲ್ಪುನ ಜನಕ್ ಉಂದು ತೆರಿಯಂದೆ ಬಸ್ರ್ದ್ ಜಪ್ಪರೆ ಒತ್ತೊನುಜೆರ್. ಮೊಕಲೆನ ನಡುಟು ಪಾತೆರೊಗು ಪಾತೆರ ಆದ್ ಕಂಡಕ್ಟರ್ ಬಪ್ಪರ್ ನೆರ್ತೆರ್ ಪನ್ದ್ ಸುರೇಶೆರ್ ಆರೋಪ ಮಲ್ದೆರ್. ಆರ್ ಬಸ್ರ್ದ್ ಜಪ್ಪಂದಿನ ತೂದು ಡ್ರೈವರ್ ಜನಕುಲೆಡ್ ದಿಂಜಿನ ಬಸ್ನ್ ಸೀದಾ ಬಂಟ್ವಾಳ ಪೋಲೀಸ್ ಸ್ಚೇಷನ್ಗ್ ಕನತ್ ಅರೆನ್ ಒಯ್ತ್ ಜಪುಡಾದೆರ್ಗೆ. ಈ ಪೊರ್ತುಡು ಎಸೈ ರಾಮಕೃಷ್ಣ ಮೇರ್ ಬಸ್ದ ಡ್ರೈವರ್ ಬೊಕ್ಕ ಕಂಡಕ್ಟರ್ಗ್ ಬುದ್ದಿ ಪನ್ತೆರ್ಗೆ. ಕೂಲಿ ಬೇಲೆ ಪೋಪಿನಕುಲು ಪಾಪದಕುಲು ಬಸ್ಟ್ ಕೋರಿ, ಮೀನ್ ಕೊನವಂದೆ ಬೊಕ್ಕ ಎಂಚ ಕೊನೊಪಿನಿ? ಒಂಜಿ ಕೆ.ಜಿ ಕೋರಿಗ್ ಕಾರ್, ರಿಕ್ಷಾ ಬಾಡಿಗೆ ಮಲ್ತ್ ಕೊನೊಡಾ ಪನ್ದ್ ಸುರೇಶೆರ್ ಕೇಂಡ್ ದೆರ್. ಬಸ್ಡ್ ಕೋರಿದ ಮಾಸ ಕನರೆ ಇಜ್ಜಿ. ಜೀವ ಇತ್ತಿನ ವಸ್ತುಲೆನ್ ಮಾತ್ರ ಕನೊಲಿ, ಮಾಸ ಪೂರ ಬಾಕಿದಕಲೆಗ್ ವಾಸನೆ ಬರ್ಪುಂಡು. ಉಂದೆರ್ದ್ ಬಾಕಿದಕಲೆಗ್ ಸಮಸ್ಯೆ ಆಪುಂಡು ಪನ್ಪಿನ ದಿಸೆಟ್ ಕರ್ನಾಟಕದ ಸರಕಾರಿ ಬಸ್ ನಿಗಮ ಆದೇಶ ಮಲ್ದ್ಂಡ್ ಪನ್ದ್ ಬಂಟ್ವಾಳ ವಿಭಾಗದ ಅಧಿಕಾರಿ ಶ್ರೀಶ ಭಟ್ ಪಂಡೆರ್.
ಇಂದಬೆಟ್ಟು: ಇಂದಬೆಟ್ಟು ಗ್ರಾಮದ ಬೆದ್ರಬೆಟ್ಟು ನಿವಾಸಿ ಸಂತೋಷ್ ಗೌಡ (34ವ) ಮೇರ್ ಅ.16 ದಾನಿ ಕುಡ್ಲಡ್ ಹಾರ್ಟ್ ಆಟ್ಯಾಕ್ಡ್ ತೀರ್ಪೋತೆರ್. ಮೇರ್ ಬಲ್ಲಾಳ್ ಬಸ್ಸ್ದ ಡ್ರೈವರ್ ಆದ್ ಬೇಲೆ ಮಲ್ತೊಂದು ಇತ್ತೆರ್. ಮೇರೆಗ್ ಅಪ್ಪೆ ಬೊಕ್ಕ ಅಣ್ಣನಕುಲ್ ಉಲ್ಲೆರ್.
ಬೆಂಗಳೂರು: ಮಾಜಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಆಸ್ಪತ್ರೆಗ್ ದಾಖಲಾತೆರ್. ಬಸವರಾಜ ಬೊಮ್ಮಾಯಿಗ್ ಕಾರ್ದ ಗಂಟ್ ಬೇನೆ ಜಾಸ್ತಿ ಆಯಿನೆದಾತ್ರೆ ವೈದ್ಯೆರ್ನ ಸಲಹೆ ಮೇರೆಗ್ ಬೆಂಗಳೂರ್ದ ಫೋರ್ಟಿಸ್ ಆಸ್ಪತ್ರೆಗ್ ದಾಖಲಾತೆರ್. ಸದ್ಯ ಡಾಕ್ಟರ್ ಬೊಮ್ಮಾಯಿ ಮೇರೆಗ್ ಕಾರ್ದ ಗಂಟ್ನ್ ಆಪರೇಷನ್ ಮಲ್ತ್ದೆರ್ ಪಂದ್ ತೆರಿದ್ ಬೈದ್ಂಡ್.
ಹಳೆಯಂಗಡಿ: ಪ್ರತಿಯೊಂಜಿ ಇಂಗ್ರೇರ್ಜಿದಕುಲು ಮಲ್ಪುನ ಸುಗ್ಗಿ ಪರ್ಬದ ಪಂತೊಲು ಕುಟುಂಬದ ಎಡ್ಡೆಪ್ಪುಗು ಅನು ಕೊರ್ಪುಂಡು ಪಂದ್ ಕುಡ್ಲದ ಅಥೆನಾ ಆಸ್ಪತ್ರೆದ ಮ್ಯಾನೇಜಿಂಗ್ ಡೈರೆಕ್ಟರ್ ಡಾ. ಅಶಿತ್ ಶೆಟ್ಟಿಯಾನ್ ಪಂಡೆರ್.
ಮೇರ್ ಹಳೆಯಂಗಡಿ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ದ ಮುತಾಲಿಕೆಡ್ ನಡತಿನ ಸುಗ್ಗಿ ಪರ್ಬದ ಪಂತೊಡು ಗೆಂದಿನಕ್ಲೆಗ್ ಇನಾಮು ಕೊರ್ಪುನ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಲೇಸ್ ದ ಗುರ್ಕಾರ್ಮೆನ್ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ದ ಸಭಾ ಪಾಲಕೆರ್ ರೆವೆರೆಂಡ್ ಅಮೃತ್ ರಾಜ್ ಖೊಡೆ ಮೇರ್ ಒಯಿಸೊಂದು ಎಡ್ಡೆಪ್ಪು ಬಯಕಿಯೆರ್.
ಸಿಎಸ್ಐ ಕ್ರಿಸ್ತ ಕಾಂತಿ ಚರ್ಚ್ ಪಣಂಬೂರುದ ಸಭಾ ಪಾಲಕೆರ್ ರೆವೆರೆಂಡ್ ಸಂಧ್ಯಾ ಖೊಡೆ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಈ ಪೊರ್ತುಡು ಸಭಾ ಪರಿಪಾಲನ ಸಮಿತಿದ ಸದಸ್ಯೆರ್ ಆಸ್ಟಿನ್ ಕರ್ಕಡ, ವಸಂತ ಬೆರ್ನಾಡ್,
ಲಾವಣ್ಯ ಕೋಟ್ಯಾನ್, ಶರ್ಲಿ ಬಂಗೇರ, ಜೇಮ್ಸ್ ಕರ್ಕಡ, ಬೊಕ್ಕ ಸಿಡ್ನಿ ಕರ್ಕಡ ಪಾಲ್ ಪಡೆದಿತ್ತೆರ್.
ಪಂದ್ಯಾಟ ಸಮಿತಿದ ಕಾರ್ಯದರ್ಶಿ ರೆಮ್ಮಿ ಎಲಿಸಾ ಸಾಮುವೆಲ್ ಎದ್ಕೊನಿಯೆರ್. ಕೋಶಾಧಿಕಾರಿ ಸುಹಾನ್ ಪಾಲನ್ನ ಸೊಲ್ಮೆ ಸಂದಾಯೆರ್. ಅಡ್ಲಿನ್ ನವ್ಯ ಪಾಲನ್ನ ಲೇಸ್ ದ ಸುಧಾರಿಕೆ ಮಲ್ತೆರ್.
ಕುಡ್ಲ : ನೇತ್ರಾವತಿ ಸಂಕಡ್ ಸೋಮಾರ ಬಯ್ಯಗ್ ನಡತಿನ ಸರಣಿ ಅಪಘಾತ ಆದ್ ಸುಮಾರ್ 2 ಗಂಟೆ ಟ್ರಾಫಿಕ್ ಜಾಮ್ ಆತ್ಂಡ್.
ಸಂಕದ ನಡುಟ್ಟು ಒಂಜಿ ಲಾರಿ ಹಾಳಾದ್ ಉಂತುದು ಇತ್ತ್ಂಡ್. ಈ ಪೊರ್ತುಡು ಬರ್ಸ ಬತ್ತಿರ್ನೆದಾವೆರ ಅಯಿಕ್ ಒಂಜಿ ಕಾರ್ ಗುದ್ದುದ್ಂಡ್.ಇಂಚ ಬೆರಿಕ್ಕ್ ಬೆರಿಕ್ಕ್ ಮಾತ ಗಾಡಿಲುಲ ಒಂಜೆಕ್ಕೊಂಜಿ ತಾಂಟ್ ದ್ ಈ ಘಟನೆ ನಡದ್ಂಡ್. ನೆರ್ದ್ 6 ಗಾಡಿ ಲಗಾಡಿ ಆತ್ಂಡ್.
ಕುಡ್ಲ ದಕ್ಷಿಣ ಸಂಚಾರಿ ಠಾಣೆ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಗಾಡಿಲೆನ್ ದೆಪ್ಪಾದ್ ಸಂಚಾರೊಗು ಸರಿ ಮಲ್ತ್ ಕೊರಿಯೆರ್.
ಮುಲ್ಕಿ: ಮುಲ್ಕಿ ತಾಲೂಕ್ ಡ್ ಬರ್ಸದ ನೀರ್ ಸಂಗ್ರಹ ಮಲ್ಪುನೆನ್ (ರೈನ್ ವಾಟರ್ ಹಾರ್ವೆಸ್ಟಿಂಗ್) ಕಟ್ವಾನದ ಲೈಸೆನ್ಸ್ ಬೊಕ್ಕ ಅನುಭೋಗ ಪ್ರಮಾಣಪತ್ರ ಕೊರ್ನಗನೇ ಕಡ್ಡಾಯ ಮಲ್ಪೊಡು ಪಂದ್ ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ (ಎಸಿಇ) ಮುಲ್ಕಿದ ಸ್ಥಾಪಕಾಧ್ಯಕ್ಷೆರ್ ಜೀವನ್ ಕೆ ಶೆಟ್ಟಿ ಮೇರ್ ಅ.16 ಕ್ಕ್ ತಹಶೀಲ್ದಾರೆರ್ ಪ್ರದೀಪ್ ಕುರುಡೇಕರ್ ಮೆರೆನ್ ಭೇಟಿ ಮಲ್ತ್ ದ್ ಬಿನ್ನಾಪು ಮಲ್ತೆರ್.
ನೆಕ್ಕ್ ತಹಶಿಲ್ದಾರೆರ್ ಎಡ್ಡೆ ಸ್ಪಂದನೆ ಕೊರಿಯೆರ್. ನನ ದುಂಬಗ್ ಅಸೋಸಿಯೇಶನ್ ದ ಮುಖೇನ ಅಭಿವೃದ್ಧಿ ಕಾರ್ಯಗ್ ತನ್ನ ಸಹಕಾರನ್ ಕೊರ್ಪೆ ಪಂದ್ ಭರವಸೆ ಕೊರಿಯೆರ್. ಈ ಪೊರ್ತುಡು ACEM ದ ಕೋಶಾಧಿಕಾರಿ ವರುಣ್ ಇತ್ತೆರ್.
ಬೊಂಬೈ ಮಹಾನಗರದ ಪೊವಾಯಿ ಪರಿಸರದ ತುಂಗಾ ಗಾವು ಸೂಡ ಭೂತಬೆಟ್ಟು ದಿ.ಮೋನಪ್ಪ ಶೆಟ್ರ್ ಸ್ಥಾಪನೆ ಮಲ್ದಿನ ಶ್ರೀ ದುರ್ಗಾ ಪರಮೇಶ್ವರಿ ದೇವಸ್ಥಾನಡ್ ಅ.16 ದಾನಿ ಮಾರ್ನೆಮಿದ ಸುರುತ್ತ ದಿನತ ಉಚ್ಚಯ ಶ್ರೀ ದೇವದಾಸ್ ಭಟ್ ಮೆರೆನ ಮುತಾಲಿಕೆಡ್ ಬಾರಿ ಗೌಜಿಡ್ ನಡತ್ಂಡ್.
ಪೂಜೆಡ್ ಕೈತಲ್ದ ರಾಜಕೀಯ ನಾಯಕೆರ್ ಬೊಕ್ಕ ಸಂಘ ಸಂಸ್ಥೆದಕುಲು ಪಾಲ್ ಪಡೆದಿತ್ತೆರ್. ದೇವಸ್ಥಾನ ಮುಖ್ಯಸ್ಥೆರ್ ಸುಂದರಿ ಮೋನಪ್ಪ ಶೆಟ್ಟಿ, ಮಗೆ ಮನೋಜ್ ಎಂ ಶೆಟ್ಟಿ ಸುಪ್ರಿತಾ ಮನೋಜ್ ಶೆಟ್ಟಿ ಮಹಾಪೂಜೆ ಆದ್ ಪ್ರಸಾದನ್ ಮಾತಾ ಭಕ್ತೆರೆಗ್ ಪಟ್ಟಿಯೆರ್. ದೇವಸ್ಥಾನದ ಸ್ಥಾಪಕೆರ್ ಸೂಡ ಭೂತಬೆಟ್ಟು ಸತೀಶ್ ಶೆಟ್ಟಿ, ಕನ್ನಡ ಸೇವಾ ಸಂಘದ ಪೊಸ ಗುರ್ಕಾರೆ ಸಂದೇಶ್ ಆರ್ ಶೆಟ್ಟಿ ಮೂಡು ಬೆಳ್ಳೆ ಅಂಚನೆ ಭಕ್ತೆರ್ ಈ ಪೊರ್ತುಡ್ ಇತ್ತೆರ್.
ಮಕರ ಶ್ರೀ ಭಜನಾ ಮಂಡಳಿ ಬೆಂಗ್ಲೂರ್ ಕೂಟದ ಭಜಕೆರ್ ಮಾತ ಈ ವರ್ಷೊದ ದಸರಾ ಉಚ್ಚಯದ ಸುರುತ್ತ ದಿನ ಅ.15 ಐತಾರ ರಾಜರಾಜೇಶ್ವರಿ ನಗರಡ್ ನೆಲೆ ಇಪ್ಪುನ ಶ್ರೀ ರಾಜರಾಜೇಶ್ವರಿ ಅಮ್ಮನ ಸನ್ನಿಧಿಗ್ ನಡತೊಂದು ಬತ್ತ್ ದ್ ಭಜನಾ ಸೇವೆ ಮಲ್ತ್ ದ್ ಶ್ರೀ ದೇವಿನ ಅನುಗ್ರಹ ಪಡೆಯೆರ್.
ಶ್ರೀ ಸೌಮ್ಯನಾಥ ಸ್ವಾಮೀಜಿ ಮೆರೆನ ಆಶೀರ್ವಾದದೊಟ್ಟಿಗೆ ಹೊಸಳ್ಳಿ ಶ್ರೀ ಗಂಗಾಧರೇಶ್ವರ ದೇವಲ್ಯರ್ದ್ ಬೊಲ್ಪುಗು 4 ಗಂಟೆಗ್ ಸರಿಯಾದ್ ಸುಮಾರ್ 40 ಭಕ್ತೆರೆನೊಟ್ಟಿಗೆ ಸುರು ಆಯಿನ ಪಾದಯಾತ್ರೆ ದೇವಿ ಸನ್ನಿದಿಗ್ 10 ಗಂಟೆಗ್ ಸರಿಯಾದ್ ಎತ್ತ್ ದ್ಂಡ್. ಬೊಕ್ಕ ಸನ್ನಿಧಿಡ್ ಭಜನೆ ಸೇವೆ ಕೊರ್ದು ಪ್ರಸಾದ ಸ್ವೀಕಾರ ಮಲ್ತೆರ್.
ವರದಿ: ರಂಜು ತುಳುರಂಗಪ್ರೇಮಿ
ಕುಡ್ಲ: ತೆಡಿಲ್ ಹಾಕ್ ದ್ ಶಾರ್ಟ್ ಸರ್ಕ್ಯುಟ್ ಆದ್ ಪೊಂಜೋವ್ ಬೊಕ್ಕ ಬಾಲೆಗ್ ಪೆಟ್ಟಾಯಿನ ಘಟನೆ ಕುಡ್ಲದ ವಾಮಂಜೂರು ಅಮೃತ ನಗರದ ಗೋಪಾಲ ಪೂಜಾರಿ ಪನ್ಪುನಾರೆನ ಇಲ್ಲಲ್ ನಡತ್ ದ್ಂಡ್.
ತೆಡಿಲ್ ದ ಸೌಂಡ್ ಗ್ ಇಲ್ಲಲ್ ಶಾರ್ಟ್ ಸರ್ಕ್ಯುಟ್ರ್ದ್ ಸ್ವಿಚ್ ಬೋರ್ಡ್ ಬೊಕ್ಕ ಮೀಟರ್ ಬಾಕ್ಸ್ ಪೊಡಿ ಆತ್ಂಡ್. ಅತ್ತಂದೆ ಪೊಂಜೋವ್ ಶ್ವೇತಾ ಬೊಕ್ಕ 5 ವರ್ಷೊದ ಬಾಲೆದ ಕೆಬಿಕ್ಕ್ ಪೆಟ್ಟಾತ್ಂಡ್. ಮೊಕುಲು ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಈ ಘಟನೆ ನಡಪುನ ಪೊರ್ತುಡು ಇಲ್ಲಲ್ ನಾಲ್ ಜನ ಕುಟುಂಬಸ್ಥೆರ್ ಇತ್ತೆರ್.
