October 2023

ತುಳು ಲಿಪಿತ್ತ ಅಪರೂಪದ ಸಾಧಕಿ ಶಿಮಂತೂರು ಮಜಲಗುತ್ತು ಸುರೇಖಾ ನವೀನ್ ಶೆಟ್ಟಿ

ಮುಲ್ಕಿ: ಬೊಂಬೈ ಬೊಕ್ಕ ಶಿಮಂತೂರು ಪರಿಸರದ ಸುಮಾರ್ ತುಳು ಬಾಂಧವೆರೆಗೆ ತುಳು ಲಿಪಿ ಕಲ್ಪಾವುನ ಮುಖೇನ ಶಿಮಂತೂರು ಮಜಲಗುತ್ತು (ತಕ್ಕಣಪಾದೆ) ಸುರೇಖಾ ನವೀನ್ ಶೆಟ್ಟಿ ತುಳು ಲಿಪಿತ್ತ ಅಪರೂಪದ ಸಾಧಕಿ ಆತೆರ್.

ಬೊಂಬೈಡ್ ವಿರಾರ್ ನಾಲಸೋಪಾರ್ ತುಳು ಫೌಂಡೇಶನ್ ದ ಗುರ್ಕಾರೆ ಶಶಿಧರ್ ಕೆ ಶೆಟ್ಟಿ ಇನ್ನಂಜೆ ಮುತಾಲಿಕೆದ ಸಂಘದ ತುಳುವೆರೆಗ್ ಆನ್ ಲೈನ್ ಮುಖೇನ ತುಳು ಲಿಪಿನ್ ಧರ್ಮೊಗು ಕಲ್ಪಾದ್ ತುಳುನಾಡ್ ದ ಸಂಸ್ಕೃತಿ ಒರಿಪಾವುನ ಬೇಲೆ ಮಲ್ದೆರ್.

ಬೊಂಬೈದ ವಿರಾರ್ ಡ್ ಪುತ್ತಿಗೆ ಮಠಾಧೀಶೆರ್ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಲೆನ ಆಶೀರ್ವಚನದೊಟ್ಟಿಗೆ ನಡತಿನ “ಕೋಟಿ ಗೀತಾ ಲೇಖನ ಯಜ್ಞ ದೀಕ್ಷೆ” ಲೇಸ್ ಡ್ ಶ್ರೀಮದ್ಭಗವದ್ಗೀತೆದ ಶ್ಲೋಕನ್ ತುಳು ಲಿಪಿಟ್ಟ್ ಬರೆದ್ ಸ್ವಾಮೀಜಿಗ್ ಕೊರಿಯೆರ್.

ಲೇಸ್ ಡ್ ಸಾಧಕೆರೆನ ನೆಲೆಟ್ಟ್ ಸುರೇಖಾ ನವೀನ್ ಶೆಟ್ಟಿ ಮೆರೆಗ್ ಸ್ವಾಮೀಜಿ ಮಾನಾದಿಗೆ ಮಲ್ತೆರ್. ಬೊಕ್ಕ ಜೈ ತುಳುನಾಡು ಸಂಘಟನೆದ ಸಹಕಾರರ್ದ್ 108 ಯಜ್ಞಾರ್ಥಿಲೆಗ್ ತುಳು ಲಿಪಿಟ್ಟ್ ಬರೆಯೆರೆ ಪ್ರೇರೇಪಣೆ ಕೊರಿಯೆರ್.

ಈ ಪೊರ್ತುಡು ಉದ್ಯಮಿ ವಿರಾರ್ ಶಂಕರ್ ಶೆಟ್ಟಿ, ಹರೀಶ್ ಶೆಟ್ಟಿ ಗುರ್ಮೆ, ದಿನೇಶ್ ಶೆಟ್ಟಿ, ಪ್ರದೀಪ್ ಶೆಟ್ಟಿ ವಿರಾರ್, ನವೀನ್ ಶೆಟ್ಟಿ ಪಳ್ಳಿ ವಿರಾರ್, ಶಶಿಕಲಾ ಮೆಂಡನ್, ರವಿಶೆಟ್ಟಿ ಕಿಲ್ಪಾಡಿ ಪಾಲ್ ಪಡೆದಿತ್ತೆರ್.

ಮುಲ್ಕಿದ ಶಿಮಂತೂರು ಆದಿ ಜನಾರ್ಧನ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಚಂದ್ರಹಾಸ ಶೆಟ್ಟಿ ಮಾಧ್ಯಮದೊಟ್ಟಿಗೆ ಪಾತೆರ್ದ್, ಸುರೇಖಾ ನವೀನ್ ಶೆಟ್ಟಿ ಅಪ್ರತಿಮ ತುಳು ಲಿಪಿತ್ತ ಸಾಧಕಿ ಆತೆರ್. ನನದ ದಿನಟ್ಟ್ ಮೆರೆನ ಸಾಧನೆ ಏಪಲ ದುಂಬರಿಯಡ್ ಪಂದ್ ಪಂಡೆರ್.

ಎಸ್ ಬಿಐಡ್ 2 ಸಾರ ಬೇಲೆದ ಪರೀಕ್ಷೆಗ್ ಹಾಲ್ ಟಿಕೆಟ್ ಬುಡುಗಡೆ

ಎಸ್ ಬಿಐಡ್ ಖಾಲಿ ಇಪ್ಪುನ 2 ಸಾರ ಪ್ರೊಬೇಷನರಿ ಆಫೀಸರ್ (ಪಿಒ) ಬೇಲೆದ ಪರೀಕ್ಷೆಗ್ ಹಾಲ್ ಟಿಕೆಟ್ ಬುಡುಗಡೆ ಆತ್ಂಡ್.

ಈ ಹಾಲ್ ಟಿಕೆಟ್ ನ್ https://ibpsonline.ibps.in/ ವೆಬ್ ಸೈಟ್ ಡ್ ನೊಂದಣಿ ಸಂಖ್ಯೆ ಬೊಕ್ಕ ಪಾಸ್ ವರ್ಡ್ ನ್ ಪಾಡ್ದ್ ಡೌನ್‌ಲೋಡ್ ಮಲ್ಪೊಲಿ. ನೆತ್ತ ಪೂರ್ವಭಾವಿ ಲಿಖಿತ ಪರೀಕ್ಷೆಲು ನ.1-6 ಮುಟ್ಟ ನಡಪರೆ ಉಂಡು. ಡಿಸೆಂಬರ್ ಅತ್ತಂಡ ಜನವರಿಡ್ ಮುಖ್ಯ ಪರೀಕ್ಷೆ ಬೊಕ್ಕ ಫೆಬ್ರವರಿಡ್ ಸಂದರ್ಶನ ನಡಪರೆ ಉಂಡು.

ಕಲ್ಯಾಣ್ ತುಳುನಾಡ ತುಳುವೆರ್ ಮಹಿಳಾ ಸದಸ್ಯೆರೆರ್ದ್ ಮಾರ್ನೆಮಿ ಭಜನೆ

ಕಲ್ಯಾಣ್ (ಮಹಾರಾಷ್ಟ್ರ): ತುಳುನಾಡ ತುಳುವೆರ್, ಕಲ್ಯಾಣ್ ದ ಮಹಿಳಾ ಸದಸ್ಯೆರೆರ್ದ್ ಮಾರ್ನೆಮಿ ಪೊರ್ತುಡು ಬೇತೆ ಬೇತೆ ಕಡೆಟ್ಟ್ ಭಜನೆ ಲೇಸ್ ನಡತ್ಂಡ್.

ಮಹಿಳಾ ಸದಸ್ಯೆರ್ ಮಾರ್ನೆಮಿದ 9 ದಿನೊಲ 9 ಬಣ್ಣದ ಸೀರೆ ತುತ್ತುದು ದಿನಕೊಂಜಿ ಸದಸ್ಯೆರೆನ ಇಲ್ಲಡ್ ಭಜನೆ ಸೇವೆ ಮಲ್ತ್ ದೆರ್. ಸಂಸ್ಥೆದ ಸಂಸ್ಥಾಪಕೆರ್ ಅಶೋಕ್ ಎಲ್. ಪೂಜಾರಿ ಉಲ್ಯ ಗುತ್ತು ಪಂಜ-ಕೊಯಿಕುಡೆ ಮೆರೆನ ಮುತಾಲಿಕೆಡ್ ನಡತ್ಂಡ್.

ಈ ಭಜನೆ ಲೇಸ್ ಡ್ ಸದಸ್ಯೆರಾಯಿನ ಪ್ರಭಾವತಿ ಸುವರ್ಣ, ರೇಖಾ ಶೆಟ್ಟಿ, ಅಂಜನ ಪೂಜಾರಿ, ದೇವಕಿ ಪೂಜಾರಿ, ಭವಾನಿ ಪೂಜಾರಿ, ಯಮುನ ಕುಲಾಲ್, ಸುಮಿತ್ರ ಪೂಜಾರಿ, ಉಮಾ ಶೆಟ್ಟಿ, ಪದ್ಮಿನಿ ಕೋಟ್ಯಾನ್, ಸುಮತಿ ಕರ್ಕೇರ, ವಿಜಯ ಕೋಟ್ಯಾನ್, ನಯನ ಕಾಂಚನ್, ಸುಜಾತ ಶೆಟ್ಟಿ, ಪ್ರಜ್ಞ ಪೂಜಾರಿ, ಕಾವ್ಯ ಪೂಜಾರಿ, ಸಿದ್ಧಿ ಕೋಟ್ಯಾನ್, ಪ್ರೇಮ ಮೂಲ್ಯ, ಮೇಘನಾ ಕರ್ಕೇರ, ಅನುಪಮಾ ಕೋಟ್ಯಾನ್, ಅರ್ಚನಾ ಕೋಟ್ಯಾನ್, ನಿಶಾ ಕೋಟ್ಯಾನ್, ಭಾರತಿ ಕರ್ಕೇರ, ಜ್ಯೋತಿ ಸುವರ್ಣ, ಸಂಗೀತ ಕೋಟ್ಯಾನ್, ವಿಶಾಲಾಕ್ಷಿ ಕೋಟ್ಯಾನ್, ಅವ್ಯಾನ್ ಕೋಟ್ಯಾನ್, ಅರ್ನಿಶ್ ಕೋಟ್ಯಾನ್, ಶಿಲ್ಪಿ ಕರ್ಕೇರ, ಸ್ವಾತಿ ಕರ್ಕೇರ, ವಸಂತಿ ಕೋಟ್ಯಾನ್, ರಾಮಚಂದ್ರ ಸುವರ್ಣ, ಉದಯ ಪೂಜಾರಿ, ಸುಂದರ ಪೂಜಾರಿ, ಗಂಗಾಧರ ಶೆಟ್ಟಿ, ಅಶೋಕ್ ಕೋಟ್ಯಾನ್, ಜಯ ಕರ್ಕೇರ, ರಹತ್ ಕೋಟ್ಯಾನ್, ಸುಂದರ ಕರ್ಕೇರ ಬೊಕ್ಕ ಸ್ವಪ್ನಿಲ್ ಕರ್ಕೇರ ಪಾಲ್ ಪಡೆದಿತ್ತೆರ್. ಭಜನೆ ಲೇಸ್ ದ ಬೊಕ್ಕ ಮಂಗಳಾರತಿ ಆದ್ ತೀರ್ಥ ಪ್ರಸಾದ ಪಟ್ಟುನ ಲೇಸ್ ನಡತ್ಂಡ್.

ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಸೇವೆ ಕೊರಿನ ಇಸ್ರೋ ವಿಜ್ಞಾನಿ

ಕಟೀಲ್: ಚಂದ್ರಯಾನ-2 ಬೊಕ್ಕ ಇಂಚಿಪ್ಪದ 3 ಉಡಾವಣೆದ ಇಸ್ರೋ ಕೂಟಡ್ ಬೇಲೆ ಮಲ್ತಿನ, ಲ್ಯಾಂಡಿಂಗ್ ಬೊಕ್ಕ ಪೊಸಿಷನಿಂಗ್ ಸಿಸ್ಟಮ್ಸ್ ವಿಭಾಗಡ್ ಇತ್ತಿನ ಹಿರಿಯ ವಿಜ್ಞಾನಿ ಸುಳ್ಯ ಕೊಡಪಾಲದ ಶಂಭಯ್ಯ ಮೇರ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಗ್ ಭೇಟಿ ಕೊರ್ದು ದೇವೆರೆನ ದರ್ಶನ ಪಡೆದ್ ಇಸೇಸ ಸೇವೆ ಸಂದಾಯೆರ್.

ಚಂದ್ರಯಾನದ ಯಶಸ್ಸ್ ಗ್ ಪ್ರಾರ್ತನೆ ಮಲ್ತ್ ದ್, ಪರಕೆ ಪಂಡ್ ದ್ ಇತ್ತಿನ ಮೇರ್, ಅನ್ನದಾನಗ್ ಕಾಣಿಕೆ ಬೊಕ್ಕ ಬಂಗಾರ್ ದ ಸರನ್ ದೇವಿಗ್ ಸಮರ್ಪಣೆ ಮಲ್ತೆರ್. ಅರ್ಚಕೆರ್ ಅನಂತ ಪದ್ಮನಾಭ ಆಸ್ರಣ್ಣ ಮೇರ್ ಇಸ್ರೋ ವಿಜ್ಞಾನಿ ಶಂಭಯ್ಯ ಮೆರೆಗ್ ದೇವಿನ ಶೇಷ ವಸ್ತ್ರನ್ ಪಾಡ್ದ್, ಪ್ರಸಾದ ಕೊರ್ದು ಮಾನಾದಿಗೆ ಮಲ್ತೆರ್.

ಸುಬ್ರಹ್ಮಣ್ಯಡ್ ಪೂರ್ವಿ ಸಾಮಾನ್ಯ ಸೇವಾ ಕೇಂದ್ರ ಸುರು

ಸುಬ್ರಹ್ಮಣ್ಯ ಆಸ್ಪಾಸ್ ದ ಮಾತ ಸಾರ್ವಜನಿಕೆರೆಗ್ ಉದ್ಯೋಗ ಸೇವೆ, ಪ್ಯಾನ್ ಕಾರ್ಡ್, ಪೆನ್ಷನ್, ಕೌಶಲ್ಯ ಸೇವೆ, ಬ್ಯಾಂಕಿಂಗ್ ಸೇವೆ, ಈ-ಶ್ರಮ, ಎಲ್ ಐ ಸಿ, ಗಾಡಿ ವಿಮೆ, ಮೊಬೈಲ್ ಬೊಕ್ಕ ಡಿಟಿಎಚ್ ರೀಚಾರ್ಜ್, ಜೆರಾಕ್ಸ್, ಆರ್ ಟಿ ಸಿ, ರೇಷನ್ ಕಾರ್ಡ್, ಆಧಾರ್ ಕಾರ್ಡ್ ನ್ ಸರಿಯಾಯಿನ ಸಮಯಡ್ ಸರಿಯಾಯಿನ ಸೇವೆ ಸಂದಾಯೆರೆ ಪೂರ್ವಿ ಸಾಮಾನ್ಯ ಸೇವಾ ಕೇಂದ್ರ ಸುಬ್ರಹ್ಮಣ್ಯದ ಕಾಶಿಕಟ್ಟೆ ಗ್ರಾಮ ಪಂಚಾಯತ್ ಕಟ್ವಾನಡ್ ಸುಕ್ರಾರ ಉದಿಪನ ಆಂಡ್.

ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಸುಜಾತ ಕಲ್ಲಾಜೆ ಸೇವಾ ಕೇಂದ್ರನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ಎಚ್ಎಲ್ ವೆಂಕಟೇಶ್ ಪಾತೆರ್ದ್, ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಬೊಕ್ಕ ಸಂಜೀವಿನಿ ಒಕ್ಕೂಟದ ಒಡಂಬಡಿಕೆರ್ದ್ ಸೇವೆ ಸಂದಾಯೆರೆ ಇಪ್ಪುನ ಕೇಂದ್ರ ಸರಕಾರದ ಮಹತ್ವದ ಯೋಜನೆ ಉಂದಾತ್ಂಡ್. ಪೊಂಜೋವ್ ನಕುಲು ಆರ್ಥಿಕ ಸಬಲೀಕರಣ ತಿಕೊಡು ಪನ್ಪುನ ಉದ್ದೇಶರ್ದ್ ಸಾರ್ವಜನಿಕ ರಂಗಡ್ ಅಕ್ಲೆನ ಸೇವೆ ಮಾತೆರೆಗ್ಲಾ ಸುಲಭವಾದ್ ತಿಕಡ್ ಬೊಕ್ಕ ಅಕ್ಲ ಆರ್ಥಿಕವಾದ್ ಸದೃಢ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಸಂಜೀವಿನಿ ಒಕ್ಕೂಟದ ಗುರ್ಕಾರೆ ಸುಜಾತ ಕಾಶಿಕಟ್ಟೆ, ಗ್ರಾಮ ಪಂಚಾಯತ್ ಪಿ.ಡಿ. ಓ. ಮೋನಪ್ಪ, ಪಂಚಾಯತ್ ಸದಸ್ಯೆರ್, ಸಂಜೀವಿನಿ ಒಕ್ಕೂಟದ ಸದಸ್ಯೆರ್, ಸುಳ್ಯದ ಮಹಿಳಾ ಮಂಡಲದ ಮಾಜಿ ಗುರ್ಕಾರೆ ಪಾಲ್ ಪಡೆದಿತ್ತೆರ್.

ಪೂರ್ವಿ ಸೇವಾ ಕೇಂದ್ರದ ಮುಖ್ಯಸ್ಥೆರ್ ತ್ರಿವೇಣಿ ದಾಮ್ಲೆ ಲೇಸ್ ನ್ ಸುಧಾರಿಕೆ ಮಲ್ತ್ ದ್, ಸೇವಾ ಕೇಂದ್ರದ ಉದ್ದೇಶನ್ ತೆರಿಪಾದ್ ಎದ್ಕೊನಿಯೆರ್. ಸಂಜೀವಿನಿ ಒಕ್ಕೂಟದ ಕಾರ್ಯದರ್ಶಿ ಹೇಮಾವತಿ ಸೊಲ್ಮೆ ಸಂದಾಯೆರ್.

ವರದಿ: ಗೋಪಿಚಂದನ್ ಕೆಎಸ್

ಎಲ್ಲೆ ಮೈಸೂರ್ ಜಂಬೂ ಸವಾರಿ!

ಮೈಸೂರು: ಪುಗರ್ತೆದ ಮೈಸೂರು ದಸರಾದ ಲೆಕ್ಕೊಡು ಇನಿ (ಅ.23) ಅರಮನೆಟ್ಟ್ ರಾಜವಂಶಸ್ಥೆರ್ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್‌ ಮೇರ್ ಆಯುಧಪೂಜೆ ಮಲ್ತೆರ್. ಎಲ್ಲೆ ಅಂಗಾರೆ ದಸರಾ ಉಚ್ಚಯದ ಪ್ರಮುಖ ಆಕರ್ಷಣೆ ಆಯಿನ ಜಂಬೂ ಸವಾರಿ ನಡಪರೆ ಉಂಡು.

ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರ್ ಅಂಗಾರೆ ಮಧ್ಯಾಹ್ನ ಅರಮನೆ ಬಲರಾಮ ದ್ವಾರಡ್ ನಂದಿಧ್ವಜಗ್ ಪೂಜೆ ಮಲ್ಪುನ ಮುಖೇನ ಜಂಬೂ ಸವಾರಿಗ್ ಚಾಲನೆ ಕೊರ್ಪೆರ್.

ಬಯ್ಯಗ್ ಅರಮನೆ ಉಲಯಿದ ಇಸೇಸ ಚಾವಡಿಡ್ ಉಂತುದು ಗಜರಾಜೆ ಅಭಿಮನ್ಯು ದೆರ್ಪುನ 750 ಕೆಜಿ ತೂಕದ ಬಂಗಾರ್ ದ ಅಂಬಾರಿಡ್ ಇಪ್ಪುನ ಚಾಮುಂಡೇಶ್ವರಿ ವಿಗ್ರಹಗ್ ಪುಷ್ಪಾರ್ಚನೆ ಮಲ್ಪರೆ ಉಲ್ಲೆರ್. ಈ ಪೊರ್ತುಡು ರಾಜವಂಶಸ್ಥೆರ್ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್‌, ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌, ಜಿಲ್ಲಾ ಉಸ್ತುವಾರಿ ಸಚಿವೆರ್ ಡಾ.ಎಚ್‌.ಸಿ. ಮಹದೇವಪ್ಪ ಪಾಲ್ ಪಡೆಯೆರೆ ಉಲ್ಲೆರ್.

ಬೊಕ್ಕ ಮೆರವಣಿಗೆ 5 ಕಿ.ಮೀ. ಬತ್ತ್ ದ್ ಬನ್ನಿಮಂಟಪ ಎತ್ತುಂಡು. ಅಲ್ಪ ಬಯ್ಯಗ್ ಪಂಜಿನ ಕವಾಯತು ನಡಪರೆ ಉಂಡು. ರಾಜ್ಯಪಾಲೆರ್ ಥಾವರ್‌ ಚಂದ್‌ ಗೆಹ್ಲೊಟ್ ಗೌರವ ವಂದನೆ ಸ್ವೀಕಾರ ಮಲ್ಪುವೆರ್. ಈ ಲೇಸ್ ಡ್ ಸಿಎಂ ಸೇರಿನಂಚೆನೆ ಸಂಪುಟದ ಸುಮಾರ್ ಸದಸ್ಯೆರ್ ನೆಟ್ಟ್ ಪಾಲ್ ಪಡೆಯೆರೆ ಉಲ್ಲೆರ್.