April 2023

ಮೇ4-8: ಕಣಂತೂರು ಶ್ರೀ ಧರ್ಮರಸು ಶ್ರೀ ತೋಡಕುಕ್ಕಿನಾರ್ ದೈವೊಲ್ಯಡ್ ವರ್ಷಾಧಿದ ಜಾತ್ರೆ

ಬಂಟ್ವಾಳ: ಕಣಂತೂರು ಶ್ರೀ ಧರ್ಮರಸು ಶ್ರೀ ತೋಡಕುಕ್ಕಿನಾರ್ ದೈವೊಲ್ಯಡ್ ವರ್ಷಾಧಿದ ಜಾತ್ರೆ ಮೇ4-8 ಮುಟ್ಟ ನಡಪರೆ ಉಂಡು.

ಈ ಲೇಸ್ ಕ್ಷೇತ್ರದ ತಂತ್ರಿಲಾಯಿನ ರಾಜೇಶ್ ತಾಳಿತ್ತಾಯ ವರ್ಕಾಡಿ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಮೇ4 ಗುರುವಾರ ಬೊಲ್ಪುಗು ಬಾಗಂತಮೂಲೆ ಮೂಲಸ್ಥಳಡ್ ತಂಬಿಲ, ಬಯ್ಯಗ್ ಕಳ ಒಪ್ಪಯೆರೆ, ಮಕರ ತೋರಣ ಏರಿಯೆರೆ, ಭಜನೆ ರಾತ್ರೆ ಕೂಟತ್ತಜೆರ್ದ್ ಕಿರುವಾಳು ಬರಿಯೆರೆ, ಕಣಂತೂರು ಭಂಡಾರ ಇಲ್ಲರ್ದ್ ಕಿರುವಾಳು ಪಿದಾಡಿಯೆರೆ, ಕೊಡಿ ಏರಿಯೆರೆ, ಮಹಾಪೂಜೆ, ಕಂಚಿಲ್ ಸೇವೆ ಬೊಕ್ಕ ಮೊಂಟೆಪದವು ಶ್ರೀ ಶಾರದಾಕೃಷ್ಣ ಯಕ್ಷಗಾನ ಸಂಘ ಮೊಕ್ಲೆರ್ದ್ ದಕ್ಷಾದ್ವರ-ಷಣ್ಮುಖ ವಿಜಯ ಆಟ ನಡಪರೆ ಉಂಡು.

ಮೇ5 ಸುಕ್ರಾರ ಕೊಟದಾಯನ ನೇಮ, ಬಯ್ಯಗ್ ವಸಯ, ಮಹಾಪೂಜೆ, ಭಜನೆ ಮೆರವಣಿಗೆ, ರಾತ್ರೆ ದಳಿ, ಕೆರೆ ದೀಪಾರಾಧನೆ, ಶ್ರೀ ತೋಡಕುಕ್ಕಿನಾರ್ ನೇಮ, ಶ್ರೀ ಬಂಟಜಾವದೆ ನೇಮ ಬೊಕ್ಕ ಕೈತಲ್ ದ ಪ್ರತಿಭೆಲೆರ್ದ್ ನೃತ್ಯ ವೈವಿಧ್ಯ ನಡಪರೆ ಉಂಡು.

ಮೇ6 ಸನಿಯಾರ ಬೊಲ್ಪುಗು ಶ್ರೀ ಉಳ್ಳಾಲ್ತಿ ನೇಮ ಬೊಕ್ಕ ಒಲಸರಿ ನೇಮ ನಡಪರೆ ಉಂಡು. ಬೊಕ್ಕ ರಾಘವದಾಸ ಪೂಪಾಡಿಕಲ್ಲ್ ಮೆರೆನ ಸಾರಥ್ಯಡ್ ಚೂಡಾಮಣಿ ಆಟ ನಡಪರೆ ಉಂಡು. ಬಯ್ಯಗ್ ಭಜನೆ, ರಾತ್ರೆ ಶ್ರೀ ತೋಡಕುಕ್ಕಿನಾರ್ ದೈವೊದ ಒಲಸರಿ ನೇಮ ಬೊಕ್ಕ ಶ್ರೀ ವೈದ್ಯನಾಥ ಸೇವಾ ಸಂಘದ ವಾರ್ಷಿಕ ಉಚ್ಚಯ ನಡಪರೆ ಉಂಡು.

ಮೇ7 ಐತಾರ ರಾತ್ರೆ ಶ್ರೀ ದುರ್ಗಾಲಯ ನೇಮ ಬೊಕ್ಕ ಕೂಡ ಐವರ ಬಂಟ್ರ ನೇಮ ನಡಪರೆ ಉಂಡು.

ಮೇ8 ಸೋಮಾರ ರಾತ್ರೆ ಶ್ರೀ ಪಿಲಿಚಾಮುಂಡಿ ನೇಮ, ಕೊಡಿ ಜವೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಧರ್ಮದರ್ಶಿ, ಅನುವಂಶಿಕ ಮೊಕ್ತೇಸರೆರ್ ನಾರ್ಯಗುತ್ತು ತಿಮ್ಮಪ್ಪ ಕೊಂಡೆ ಯಾನೆ ಮಂಜು ಭಂಡಾರಿ, ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಅಮಿತ್ ಷಾ ಮಿತ್ತ್ ದೂರು ದಾಖಲ್ ಮಲ್ತಿನ ಕಾಂಗ್ರೆಸ್

ಬೆಂಗ್ಲೂರ್: ಕಾಂಗ್ರೆಸ್ ಅಧಿಕಾರಗ್ ಬತ್ತ್ಂಡ ರಾಜ್ಯಡ್ ಹಿಂಸಾಚಾರ ಆಪುಂಡು ಪಂದ್ ರಾಜ್ಯದ ಮತದಾರೆರೆಗ್ ಬೆದರಿಕೆ ಪಾಡ್ದೆರ್ ಪಂದ್ ಆರೋಪ ಮಲ್ತಿನ ಕಾಂಗ್ರೆಸ್ ಕೇಂದ್ರ ಸಚಿವೆರ್ ಅಮಿತ್ ಷಾ ಮೆರೆನ ಮಿತ್ತ್ ಎಫ್ ಐಆರ್ ದಾಖಲ್ ಮಲ್ಪೆರೆ ದೂರು ಸಂದಾದೆರ್.

ಎಐಸಿಸಿ ಪ್ರಧಾನ ಕಾರ್ಯದರ್ಶಿ ರಣದೀಪ್ ಸಿಂಗ್ ಸುರ್ಜೆವಾಲ, ಕೆಪಿಸಿಸಿ ಅಧ್ಯಕ್ಷೆರ್ ಡಿ.ಕೆ ಶಿವಕುಮಾರ್, ಎಐಸಿಸಿ ವಕ್ತಾರೆರ್ ಗೌರವ್ ವಲ್ಲಭ್ ಮೊಕುಲು ಬೆಂಗ್ಲೂರ್ ದ ಹೈ ಗ್ರೌಂಡ್ಸ್ ಪೊಲೀಸೆರೆಗ್ ಗುರುವಾರ ದೂರು ಸಂದಾದೆರ್.

ಸಿನಿಮಾ ನಟಿ ಸಮಂತಾಗ್ ದೇವಲ್ಯ ಕಟ್ಟಾಯಿನ ಅಭಿಮಾನಿ!

ಆಂಧ್ರಪ್ರದೇಶ: ಆಂಧ್ರದ ಅಭಿಮಾನಿಯೊರಿ ತನ್ನ ಇಲ್ಲಲ್‌ ನೆಚ್ಚಿನ ನಟಿ ಸಮಂತಾಗಾದ್ ದೇವಲ್ಯ ಕಟ್ಟಾದೆರ್.

ಇತ್ತೆ ದೇವಲ್ಯಡ್ ಪ್ರತಿಷ್ಠಾಪನೆ ಮಲ್ಪರೆ “ಸ್ಯಾಮ್” ಮೆರೆನ‌ ಮೂರ್ತಿ ಲ ರಡಿ ಆತ್ಂಡ್. ಉಂದುವೇ ಸುಕ್ರಾರ ದೇವಲ್ಯ ಉದಿಪನ ಆವರೆ ಉಂಡು.

ಏಪ್ರಿಲ್ 28 ಕ್ಕ್ ಸಮಂತಾ ಪುಟ್ಟುಪರ್ಬ. ಅಂಚಾದ್ ಮೆರೆಗ್ ಈ ಮುಖೇನ ಇಸೇಸ ಉಡುಗೊರೆ ಕೊರಿಯೆರೆ ಅಭಿಮಾನಿ ದುಂಬಾತೆರ್. ಆತೆ ಅತ್ತಾಂದೆ ಮಯೋಸೈಟಿಸ್ ಸಮಸ್ಯೆರ್ದ್ ನರಲೊಂದು ಇಪ್ಪುನ ಸಮಂತಾ ಬೇಗ ಹುಷಾರ್ ಆವೊಡು ಪಂದ್ ಆ ಅಭಿಮಾನಿ ತೀರ್ಥಕ್ಷೇತ್ರಗ್ ಯಾತ್ರೆ ಮಲ್ಪರೆ ಉಲ್ಲೆರ್.

ಮೇ26-28: ಬೋಳಿಯಾರ್ ಶ್ರೀ ಸತ್ಯ ಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ಸಾನಿಧ್ಯಡ್ ವರ್ಷಾಧಿದ ಕೋಲ

ಪಲ್ಲ: ಬೋಳಿಯಾರ್ ಶ್ರೀ ಸತ್ಯ ಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ಸಾನಿಧ್ಯಡ್ ವರ್ಷಾಧಿದ ಕೋಲ ಮೇ26-28 ಮುಟ್ಟ ನಡಪರೆ ಉಂಡು.

ಮೇ26 ಕ್ಕ್ ಬೊಲ್ಪುಗು ಗಣಪತಿ ಹೋಮ, ಶ್ರೀ ಸತ್ಯಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ದೈವೊಲೆಗ್ ನವಕ ಕಲಶಾಭಿಷೇಕ, ಮಧ್ಯಾಹ್ನ ಅನ್ನಸಂತರ್ಪಣೆ ಬಯ್ಯಗ್ ನಾಗದೇವೆರೆಗ್ ತನುತರ್ಪಣ ಸೇವೆ, ರಾತ್ರೆ ಅನ್ನಸಂತರ್ಪಣೆ ನಡತ್ಂಡ್.

ಮೇ27 ಕ್ಕ್ ಬಯ್ಯಗ್ ಶ್ರೀ ಸತ್ಯಮಂತ್ರದೇವತೆನ ದರ್ಶನ ಸೇವೆ, ರಾತ್ರೆ ಅನ್ನಸಂತರ್ಪಣೆ, ಶ್ರೀ ಸತ್ಯ ಮಂತ್ರದೇವತೆನ ಕೋಲ ನಡಪರೆ ಉಂಡು.

ಮೇ28 ಕ್ಕ್ ಮಧ್ಯಾಹ್ನ ಮಂತ್ರ ಗುಳಿಗನ ಕೋಲ, ಅನ್ನಸಂತರ್ಪಣೆ, ಬಯ್ಯಗ್ ಕೊರಗಜ್ಜನ ಕೋಲ ನಡಪರೆ ಉಂಡು ಪಂದ್ ಆದಿತ್ಯ ಪೂಜಾರಿ ಬೋಳಿಯಾರ್ ಲೆಪ್ಪೋಲೆಡ್ ತೆರಿಪಾದೆರ್.

ಎ.29 ಕ್ಕ್ ಅಮಿತ್ ಷಾ ಕುಡ್ಲಗ್ ಭೇಟಿ

ರಾಜಕೀಯ ನಿಪುಣೆ ಅಮಿತ್ ಷಾ ಎ.29 ಸನಿಯಾರ ಕುಡ್ಲಗ್ ಬರಿಯೆರೆ ಉಲ್ಲೆರ್.

ಬೊಕ್ಕ ಕುಡ್ಲ ಪೇಂಟೆದ ದಕ್ಷಿಣದ ಬಿಜೆಪಿ ಅಭ್ಯರ್ಥಿ ಡಿ. ವೇದವ್ಯಾಸ ಕಾಮತ್ ಮೆರೆನ ಪರವಾದ್ ಮಲ್ಲ ರೋಡ್ ಶೋ ಮಲ್ಪೆರೆ ಉಲ್ಲೆರ್.

ಎ.26-28: ತಿಂಗಳಾಡಿ ಶ್ರೀ ಮಾರಿಯಮ್ಮ ದೇವಿ ದೇವಲ್ಯಡ್ ಶ್ರೀ ಮಾರಿಪೂಜೆ ಮಹಾ ಉಚ್ಚಯ

ಪುತ್ತೂರ್: ಗಾಂಧಿನಗರ ಕೈತಲ್ ದ ತಿಂಗಳಾಡಿ ಶ್ರೀ ಮಾರಿಯಮ್ಮ ದೇವಿ ದೇವಲ್ಯಡ್ ಶ್ರೀ ಮಾರಿಪೂಜೆ ಮಹಾ ಉಚ್ಚಯ ಎ.26-28 ಮುಟ್ಟ ನಡಪರೆ ಉಂಡು.

ಎ.27 ಗುರುವಾರ ಕಾಂಡೆ ಮಾರಿ ಕಲೆಪರೆ, ಬೊಕ್ಕ ಅಮ್ಮನ ದರ್ಶನ, ದೈವೊಲೆನ ದರ್ಶನ, ಮಧ್ಯಾಹ್ನ ಮಹಾಪೂಜೆ, ಪರಕೆ ಕಾಣಿಕೆ ಸ್ವೀಕಾರ, ಅನ್ನಸಂತರ್ಪಣೆ ಬಯ್ಯಗ್ ಭಂಡಾರ ದೇವಲ್ಯಗ್ ಕೊನೊಯೆರೆ ಉಂಡು.

ಎ.28 ಸುಕ್ರಾರ ಕಾಂಡೆ ಶ್ರೀ ದೇವಿನ ಭಂಡಾರ ಪ್ರತಿಷ್ಠಾಪನೆ ಆವರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಆಡಳಿತ ಮೊಕ್ತೇಸರೆರ್, ದೇವಲ್ಯದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮೇ3: ಮುಲ್ಕಿಗ್ ಬರಿಯೆರೆ ಉಲ್ಲೆರ್ ಪ್ರಧಾನಿ ಮೋದಿ

ಪ್ರಧಾನಿ ನರೇಂದ್ರ ಮೋದಿ ಮೇರ್ ಮೇ3 ಕ್ಕ್ ಬೊಲ್ಪುಗು 10 ಗಂಟೆಗ್ ಮುಲ್ಕಿಗ್ ಭೇಟಿ ಕೊರಿಯೆರೆ ಉಲ್ಲೆರ್.

ಅಂಚಾದ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆರ್ದ್ ಬರ್ಪಿನ ಕಾರ್ಯಕರ್ತೆರೆಗ್ ಪಾರ್ಕಿಂಗ್ ವ್ಯವಸ್ಥೆಗ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪ್ರತ್ಯೇಕ ಕೂಟ ರಚನೆ ಮಲ್ತ್ ದ್, ಖಾಸಗಿ, ಸರಕಾರಿ ಜಾಗೆಲೆನ್ ಗುರುತಿಸಾದೆರ್. ಕೆಲವು ಕಡೆಟ್ಟ್ ಕಂಡನ್ ಪಾರ್ಕಿಂಗ್ ಗ್ ಗಲಸಿಯೆರೆ ನಿರ್ಧಾರ ಮಲ್ದೆರ್. ನೆಕ್ಕ್ ಕೈತಲ್ ದಕುಲ್ಲ ಸಹಕಾರ ಕೊರ್ತೆರ್.ಸುಮಾರ್ 50-60 ಎಕರೆ ಜಾಗೆನ್ ಗುರುತಿಸಾದ್ ಗಾಡಿ ಪಾರ್ಕಿಂಗ್ ಗ್ ವ್ಯವಸ್ಥೆ ಮಲ್ದೆರ್.

ಬೊಕ್ಕ ರಾಷ್ಟ್ರೀಯ ಹೆದ್ದಾರಿ ಪಾವಂಜೆರ್ದ್ ಮುಲ್ಕಿ ಶಾಂಭವಿ ಸಂಕ ಮುಟ್ಟ ಮುಲ್ಕಿ ಪೇಂಟೆನ್ ಶೃಂಗಾರ ಮಲ್ಪೆರೆ ಸಿದ್ದತೆ ನಡತೊಂದು ಉಂಡು.

ಅಂಚೆನೆ ಮೋದಿ ಬರ್ಪುನ ಜಾಗೆದ ಸಮತಟ್ಟ್ ಆವೊಂದು ಉಂಡು. ಈ ಜಾಗೆಗ್ ಶಾಸಕೆರ್ ಎ. ಉಮಾನಾಥ ಕೋಟ್ಯಾನ್ ಭೇಟಿ ಕೊರ್ನ ಪೊರ್ತುಡು ಮೆರೆನೊಟ್ಟಿಗೆ ಮುಖಂಡೆರ್ ಸುನಿಲ್ ಆಳ್ವ, ಸುಭಾಷ್ ಶೆಟ್ಟಿ, ಸತೀಶ್ ಅಂಚನ್, ರಂಗನಾಥ ಶೆಟ್ಟಿ, ಶೈಲೇಶ್ ಕುಮಾರ್, ವಿನೋದ್ ಸಾಲ್ಯಾನ್ ಬೆಳ್ಳಾಯರ್, ವಿಠಲ ಎನ್ ಎಂ, ಪ್ರತೀಕ್ ಶೆಟ್ಟಿ, ಕಮಲಾಕ್ಷ ಬಡಗುಹಿತ್ಲು, ಜಯಾನಂದ ಮುಲ್ಕಿ, ಉಮೇಶ್ ಮಾನಂಪಾಡಿ, ಶಶಿಕುಮಾರ್, ಸುನಿಲ್ ಇಟಗ, ರಮೇಶ್ ಹಂಗರಗಿ ಇತ್ತೆರ್.

ಅಂಚೆ ಇಲಾಖೆ ಕುಡ್ಲ ವಿಭಾಗ ಬೊಕ್ಕ ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ಬ್ಯಾಂಕ್ ದ ಒಟ್ಟುಸೇರಿಗೆಡ್ ಆಕ್ಸಿಡೆಂಟ್ ವಿಮೆ ಸೇವೆ

ಭಾರತೀಯ ಅಂಚೆ ಇಲಾಖೆ ಕುಡ್ಲ ವಿಭಾಗ ಬೊಕ್ಕ ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ಬ್ಯಾಂಕ್ ದ ಒಟ್ಟುಸೇರಿಗೆಡ್ ಆಕ್ಸಿಡೆಂಟ್ ವಿಮೆ ಸೇವೆ ಮಲ್ಪೊಲಿ.

ಅಂಚೆ ಇಲಾಖೆದ ಉಳಿತಾಯ ಯೋಜನೆ, ಅಂಚೆ ಜೀವ ವಿಮಾ ಯೋಜನೆ, ಸುಕನ್ಯಾ ಸಮೃದ್ಧಿ ಯೋಜನೆ, ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ ಯೋಜನೆ, ಪ್ರಧಾನ ಮಂತ್ರಿ ಸುರಕ್ಷಾ ವಿಮಾ ಯೋಜನೆ, ಪ್ರಧಾನ ಮಂತ್ರಿ ಜೀವನ ಜ್ಯೋತಿ ವಿಮಾ ಯೋಜನೆ, ಆಧಾರ್ ಕಾರ್ಡ್ ಗ್ ಮೊಬೈಲ್ ನಂಬರ್ ಜೋಡಣೆ ಅತ್ತಂಡ ಬದಲಾವಣೆ, ಆಧಾರ್ ಜೋಡಣೆ ಆಯಿನ ನಿಕುಲೆನ ಒವ್ವೇ ಬ್ಯಾಂಕ್ ಅಕೌಂಟ್ ರ್ದ್ ಕಾಸ್ ಪಡೆಯೆರೆ ವರ್ಷೊಗು 399 ರೂ. ಅತ್ತಂಡ 396 ಕ್ಕ್ 10 ಲಕ್ಷ ರೂ. ಅಪಘಾತ ವಿಮೆ ಸೇವೆಲು ಮುಲ್ಪ ತಿಕ್ಕುಂಡು ಪಂದ್ ಕುಡ್ಲ ವಿಭಾಗದ ಪೆರಿಯ ಅಂಚೆ ಅಧೀಕ್ಷಕೆರ್ ಪ್ರಕಟಣೆಡ್ ತೆರಿಪಾದೆರ್.

ಅಂಚೆನೆ ಎಚ್ಚದ ಪೊಲಬುಗಾದ್ ಪೋಸ್ಟ್ ಮ್ಯಾನ್ ಅತ್ತಂಡ ಕೈತಲ್ ದ ಅಂಚೆ ಕಚೇರಿನ್ ಸಂಪರ್ಕ ಮಲ್ಪುಲೆ.

ಎ.29: ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಚಾವಡಿಡ್ ಅಂಚೆ ಇಲಾಖೆದ ಯೋಜನೆಲೆನ ಬಗೆಟ್ ಪೊಲಬು, ಕಾರ್ಯಾಗಾರ

ಹಳೆಯಂಗಡಿ: ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ, ನೆಹರು ಯುವ ಕೇಂದ್ರ ಕುಡ್ಲ, ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಕುಡ್ಲ, ಭಾರತೀಯ ಅಂಚೆ ಇಲಾಖೆ ಕುಡ್ಲ ವಿಭಾಗ, ಶ್ರೀ ಗಣೇಶೋತ್ಸವ ಸೇವಾ ಟ್ರಸ್ಟ್ (ರಿ.) ಹಳೆಯಂಗಡಿ ಬೊಕ್ಕ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.) ಹಳೆಯಂಗಡಿ ನೆತ್ತ ಒಟ್ಟುಸೇರಿಗೆಡ್ ಅಂಚೆ ಇಲಾಖೆದ ಬೇತೆ ಬೇತೆ ಯೋಜನೆಲೆನ ಬಗೆಟ್ ಪೊಲಬು ಬೊಕ್ಕ ಕಾರ್ಯಾಗಾರ ಲೇಸ್ ಎ.29 ಸನಿಯಾರ ಬೊಲ್ಪುಗು 9.30 ರ್ದ್ 2 ಗಂಟೆ ಮುಟ್ಟ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಚಾವಡಿಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಬಲ್ಮಠದ ಪೆರಿಯ ಅಂಚೆ ಅಧೀಕ್ಷಕೆರ್ ಶ್ರೀಹರ್ಷ ಎನ್ ಒಯಿಸೊನ್ವೆರ್. ಬೊಕ್ಕ MBBS, DNB (General Medicine), PGDCR ಡಾ. ನಿಶಾಂಕ್ ಎಸ್ ಶೆಟ್ಟಿಗಾರ್ ಮೇರ್ ಲೇಸ್ ದ ಉದಿಪನ ಮಲ್ಪುವೆರ್.

ಅಂಚೆನೆ ಈ ಲೇಸ್ ಗ್ ಶ್ರೀ ವಿದ್ಯಾವಿನಾಯಕ ರಜತ ಸೇವಾ ಟ್ರಸ್ಟ್ (ರಿ.) ಹಳೆಯಂಗಡಿ, ಸುವರ್ಣ ಮಹಾ ಉಚ್ಚಯ ಸಮಿತಿ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.) ಹಳೆಯಂಗಡಿ, ಜಿಲ್ಲಾ ಪ್ರಶಸ್ತಿ ವಿಜೇತ, ಯುವತಿ ಬೊಕ್ಕ ಮಹಿಳಾ ಮಂಡಲ (ರಿ.) ಹಳೆಯಂಗಡಿ ಮೊಕುಲು ಸಹಕಾರ ಕೊರ್ತೆರ್.

ಈ ಸರ್ತಿ 50,000 ವೋಟು ಲೀಡ್ ಡ್ ಗೆಂದುನ ವಿಶ್ವಾಸ : ಉಮಾನಾಥ ಕೋಟ್ಯಾನ್

ಮುಲ್ಕಿ : ಐನ್ ವರ್ಷದ ಪಿರವುಡು ಮುಲ್ಕಿ-ಬೆದ್ರ ಕ್ಷೇತ್ರಡ್ ಯಾನ್ ಶಾಸಕೆ ಆದಿತ್ತಿಜಿಡಲ ಜನಕ್ಲೆಡ ವೋಟು ಕೇಂದಿನೆಕ್ಕ್ ಎನ್ನ ಮಿತ್ತ್ ವಿಶ್ವಾಸ ದೀದ್ 30,000 ಸಾರ ವೋಟುದ ಲೀಡ್ ಡ್ ಗೆಂದಾದೆರ್. ಈ ಸರ್ತಿ ಯಾನ್ 5 ವರ್ಷ ಅಭಿವೃದ್ಧಿದ ಬೇಲೆ ಮಲ್ತ್ ತೋಜಾದ್ ವೋಟು ಕೇನೊಂದುಲ್ಲೆ. ಅಂಚಾದ್ ಜನಕುಲು ಎನನ್ 50,000 ವೋಟುದ ಲೀಡ್ ಡ್ ಎನನ್ ಗೆಂದಾವೆರ್ ಪನ್ಪುನ ವಿಶ್ವಾಸ ಉಂಡು ಪಂದ್ ಮುಲ್ಕಿ ಬೆದ್ರ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಮಾಜಿ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಪಂಡೆರ್.

ಮುಲ್ಕಿದ ಪುನರೂರು ಕಟ್ವಾಣದ ಸ್ವಾಗತ್ ಹೋಟೆಲ್ ದ ಚಾವಡಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಆರ್ ಪಾತೆರಿಯೆರ್.

ಕ್ಷೇತ್ರಡ್ ಅಭಿವೃದ್ಧಿ ಯೇ ಮೂಲ ಮಂತ್ರ. ಆ ಬೇಲೆನ್ ತೊಜಪಾದ್ ಇಲ್ಲ್ ಇಲ್ಲ್ ಗ್ ವೋಟು ಕೇನರೆ ಪೋನಗ ಎಡ್ಡೆ ಅಭಿಪ್ರಾಯ ಬರ್ಪಿನವು ಕೇನ್ನಗ ಕುಷಿ ಆಪುಂಡು. ಮೇ 3 ತಾರೀಕ್ ಗ್ ಕಾಂಡೆ 10 ಗಂಟೆಗ್ ಮುಲ್ಕಿ- ಕೊಲ್ನಾಡ್ ಗ್ ಪ್ರಧಾನಿ ನರೇಂದ್ರ ಮೋದಿ ಉಂದುವೇ ಸುರೂತ್ತ ಸರ್ತಿ ತಾಲೂಕು ಕೇಂದ್ರೊಗು ವೋಟುದ ಪ್ರಚಾರೊಗು ಬರೊಂದುಲ್ಲೆರ್ ಪಂದ್ ಆರ್ ಪಂಡೆರ್.

ಮುಲ್ಕಿ- ಬೆದ್ರ ಕ್ಷೇತ್ರೊಗು ಪ್ರಚಾರದ ಅಂಗವಾದ್ ಬತ್ತಿತ್ತಿನ ಮಹಾರಾಷ್ಟ್ರದ ಬಿಜೆಪಿ ಸಂಸದೆರ್ ಗೋಪಾಲ ಶೆಟ್ರ್ ಪಾತೆರ್ದ್, ಕರ್ನಾಟಕೊಡು 140 ಸೀಟ್ ಗೆಂದುನ ವಿಶ್ವಾಸ ಉಂಡು. ದೇಶದ ಅಭಿವೃದ್ಧಿ ಆವೊಡ್ಡ ಕೇಂದ್ರಡ್ ಲ ರಾಜ್ಯಡ್ ಲ ಬಿಜೆಪಿ ಸರ್ಕಾರ ಬರೊಡು.ಒರ್ಂಬ ವರ್ಷೊಡು ಪ್ರಧಾನಿ ನರೇಂದ್ರ ಮೋದಿ ಮಾತಾ ಕ್ಷೇತ್ರೊಡು ಅಭಿವೃದ್ಧಿ ಮಲ್ದೆರ್. ನಿತಿನ್ ಗಡ್ಕರಿ ಮೆರೆನ ಮುಕೇನ ಮೂಲಸೌಕರ್ಯ ಅಭಿವೃದ್ಧಿ ಮಲ್ದೆರ್ ಪಂಡೆರ್.

ನರೇಂದ್ರ ಮೋದಿ ಆಡಳಿತ ಅವಧಿಡ್ ಆರ್ಥಿಕವಾದ್ ಭಾರಿ ಪ್ರಗತಿ ಆತ್ಂಡ್.1 ಲಕ್ಷ ಕೋಟಿ ಜಿಎಸ್ ಟಿ ಸಂಗ್ರಹ ಆತ್ಂಡ್. ದುಂಬುದ ಅವಧಿಡ್ 1.6 ಲಕ್ಷ ಕೋಟಿ ದ ಟಾರ್ಗೆಟ್ ಉಂಡು ಪಂದ್ ಪಂಡೆರ್.

ಸುದ್ದಿಗೋಷ್ಠಿಡ್ ಮಾಜಿ ಶಾಸಕೆರ್ ಪದ್ಮನಾಭ ಕೊಟ್ಟಾರಿ, ಮಹಾರಾಷ್ಟ್ರ ಬಿಜೆಪಿ ಉಪಾಧ್ಯಕ್ಷೆರ್ ಹರೀಶ್ ಶೆಟ್ಟಿ ಎರ್ಮಾಳ್, ಜಿಲ್ಲಾ ಬಿಜೆಪಿ ಪ್ರಕೋಷ್ಠದ ದಿವಾಕರ ಸಾಮಾನಿ ಚೇಳಾಯಿರುಗುತ್ತು, ಭುವನಾಭಿರಾಮ ಉಡುಪ, ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್, ಮುಲ್ಕಿ ಬೆದ್ರ ಮಂಡಲ ಅಧ್ಯಕ್ಷೆರ್ ಸುನಿಲ್ ಆಳ್ವ, ಕೇಶವ ಕರ್ಕೇರ, ವಿನೋದ್ ಬೊಳ್ಳೂರು, ವಿನೋದ್ ಬೆಳ್ಳಾಯಿರು ಮೊಕುಲು ಮಾತ ಇತ್ತೆರ್.